Aver yem sha atineakaa

Mbashiada mba Yehova

Tsua Zwa Tiv

Kwaghfan u Sainsi Lumun a Kwagh u Bibilo I̱ Er Laa?

Kwaghfan u Sainsi Lumun a Kwagh u Bibilo I̱ Er Laa?

Mlumun u Bibilo i̱ ne yô

Een, shin er Bibilo i lu takerada u sainsi ga nahan kpa, i gba zwa môm a sainsi sha akaa agen. Nenge ase akaa a a tese ér Bibilo gba zwa môm a sainsi shi i ôr akaa a mimi sha kwagh u sainsi a a kaha kposo a ityesen i ior kpishi mba ve lu uma sha ayange a i ngeren i la yô.

  • Usha man tar cii mba a mhii. (Genese 1:1) Kpa ukwaghhir mba tsev kpishi kaa ér i gba a gba usha man tar ga, kpa ka akaa a yange lu nzughul nzughul yô, i ser i ver sha inja sha inja nahan ye. Mbababilon yange ve na jighjigh ér mbaaôndo mba yange ve gba usha man tar la due ken utyeku uhar. Ukwaghhir mba tsev mbagenev di kaa ér usha man tar due ken iji i vesen.

  • Akaa nga ze hemen sha man ken tar er atindi a igbetar a tese nahan, ka er mbaaôndo ve soo la ga. (Yobu 38:33; Yeremia 33:25) Ukwaghhir mba ken ityar kposo kposo sha tar tese ér uumace vea fatyô u yangen akaa a mbaaôndo ve eren sha igbenda i cimin, shi ashighe agen ka ve er a mhôônom ma zungwen shio la ga.

  • I har shin i penda tar sha ma kwagh ga. (Yobu 26:7) Ior mba ngise mbara kpishi yange ve na jighjigh ér tar ngu delaa er pelengi nahan, i gema i penda u sha or u gban ikyôr shin ishôso, er iyar shin kurugh nahan.

  • Uifi man azande nga zough a mngerem shin utyeku man ajiir agen. Mngerem ka ma mough shin utyeku kua ajiir agen er ka tulugh nahan. Tulugh la a kondo sha zan zan a za ndôhôr maa a hingir abeen. Abeen aa soghon yô, ura u haa, gayô senou shin awombo, nahan mngerem shi ma hide sha ajiir a ma mough la. (Yobu 36:27, 28; Orpasenkwagh 1:7; Yesaia 55:10; Amoshi 9:6) Mbagrika mba ngise mbara yange ve hen ér uifi mba zough a mngerem shin utyeku mba shin mkur u inyaa. Ve lu a mhen ne sha ikyov ikyov zan zan va ken inyom i 1800 la.

  • Iwo ka i taven i seer shi igen i panden ityaven, shi iwo i i lu nyian ne kpa ka i yange uityeku uve i mtom yô. (Pasalmi 104:6, 8) Kpa ukwaghhir mbagenev kpishi gema kaa ér, kape mbaaôndo yange ve gba iwo lu je tsô i lu nyian ne.

  • Tsembelee u sha iyol yangen angev. Tindi u yange i na ikyurior i Iserael la lu a atindi agen ker ér aluer or bende a orkpen yô nana ôr iyol, shi or a lu a angev mbu tsaren yô i pav nan a mbagenev, shi i de nyian ambi côu côu ga. (Levitiku 11:28; 13:1-5; Duteronomi 23:13) Kpa cii man i na Mbaiserael tindi ne yô, Mbaigipiti sôron avav sha icigh ki gen, ki yange ve nungwa ambi a or sha mi yô.

Bibilo ôr akaa a sainsi a lumun a mi ga yôô?

Aluer u tôv ken Bibilo tsembelee yô, u nenge er Bibilo i tese ér mlumun u sha mpin ne ka ei yô. Ka akaa a Bibilo i gbe zwa môm sha mi vea sainsi, kpa ior kpishi ve fe ga je i ter shin heen ne:

Kwaghhir: Bibilo kaa ér yange i gba usha man tar ken ayange ataratar. Lu ayange a ahwa 24 ne.

Mimi: Bibilo pase shighe u Aôndo yange hii u gban usha man tar la jighilii ga. (Genese 1:1) Shi ayange a i kaa ken Genese ityough 1 ér yange i gba akaa ken a la lu ashighe a i pase ilihen i a jighilii ga yô. Jighilii yô, shighe u yange i tôô u gban usha man tar la kpa i yila ér “iyange.”—Genese 2:4.

Kwaghhir: Bibilo kaa ér yange i gba imendenev cii i mase gban iyange ye, sha u imendenev mbi zuan a kwaghyan ken iwanger i i dugh ken iyange la.—Genese 1:11, 16.

Mimi: Bibilo tese ér iyange ngi i môm ken asan a “sha,” shi i vande gban i a imendenev. (Genese 1:1) Iwanger i i dugh sha iyange la yange i va ar shin tar u se tem sha u ne sha “iyange” i hiihii, shin shighe, u gban akaa. Yange kwavaôndo ngu wanger sha mi sha “iyange” i sha utar i gban akaa la yô, iwanger i iyange la fatyô u tan va kôron shin tar sha er imendenev mbia zuan a kwaghyan ken iwanger shon yô. (Genese 1:3-5, 12, 13) Yange shighe kar ve i va hii u nengen a iyange kposo sha kwavaôndo ye.—Genese 1:16.

Kwaghhir: Bibilo kaa ér iyange ka i zende i ningir tar i tser.

Mimi: Orpasenkwagh 1:5 kaa ér: “Iyange ka i due, man iyange ka i mire, i tolough yemen u zan henpe ka i due la.” Nahan kpa, mkaanem man ma pasen er ka sea kenger sha kwavaôndo ve i lu se er iyange ngi yemen la di tsô. Nyian u ior ve fe er i lu tar u ningir iyange ne je kpa, ka ve kaa ér “iyange due” shin “iyange mire.”

Kwaghhir: Bibilo kaa ér tar ngu delaa er pelengi nahan.

Mimi: Bibilo ter ishember i “ikighir i tar,” inja na yô, ka ajiir a sha tar a a hembe gban ica cii la; kpa u ngu wer kwagh ne tese ér tar ngu delaa shin ngu a akur er pelengi nahan ga, ka di injakwagh tsô. (Aerenakaa 1:8) Kape ishember i Bibilo i yer ér “azongo a tar a anyiin” la kpa i lu injakwagh je la. Ka sea ôr ishember ne yô, se fa je ser ka tar cii i lu ôron kwagh u ye.—Yesaia 11:12; Luka 13:29.