Leisiman e aksi . . .

Yesus na a gran engel Mikael?

▪ Fu taki en krin, a piki tapu na aksi disi na iya. Na ini furu kulturu a gwenti de taki wan sma abi moro leki wán nen. Na so a de tu nanga a nen fu sma na ini Bijbel. Fu eksempre, a famiri-edeman Yakob, ben nen Israel tu (Genesis 35:10). Na ini a fosi tongo di Bijbel skrifi na ini, na apostel Petrus abi feifi difrenti nen. Dati na Simeon, Simon, Petrus, Seifas, nanga Simon Petrus (Mateyus 10:2; 16:16; Yohanes 1:42; Tori fu den Apostel 15:7, 14). Fa wi kan de seiker taki Mikael na wan tra nen gi Yesus? Poti prakseri na den buweisi disi fu Bijbel.

Bijbel e taki feifi leisi fu a makti engel Mikael. A buku Danièl e taki dri leisi fu na engel disi. Na ini Danièl 10:13, 21, wi e leisi taki Mikael, go yepi wan engel di ben kisi wan wroko fu du. Drape Bijbel e kari Mikael „wan fu den moro prenspari granman”, èn „a granman fu yu pipel”. Baka dati, na Danièl 12:1, wi e leisi taki na ini a ten fu a kaba „Mikael o bigin tiri. En na a bigi granman di e opo du sani fu yepi den sma fu a pipel fu yu.”

Moro fara na ini Openbaring 12:7, a nen Mikael de fu feni tu. Drape skrifi taki „Mikael nanga den engel fu en” ben feti wan prenspari feti di ben abi leki bakapisi taki den fringi Satan Didibri nanga den ogri engel fu en kon na grontapu.

Luku taki na ini ibriwan fu den tori di kari, Bijbel e taki fu Mikael leki wan engel di e feti gi a pipel fu Gado, fu kibri den. Na engel disi e feti srefi teige a moro bigi feanti fu Yehovah, dati na Satan.

Yudas vers 9 e kari Mikael „a gran engel”. Nowan presi na ini Bijbel e taki fu moro leki wán gran engel. A wan-enkri tra tekst di e taki fu wan gran engel na 1 Tesalonikasma 4:16, pe Paulus e taki fu Yesus di kisi wan opobaka. Paulus e taki: „Masra srefi o saka komoto fu hemel èn a o gi komando nanga wan tranga sten, iya, a sten fu wan gran engel, èn nanga a trompeti fu Gado.” Sobun, dyaso Bijbel e kari Yesus Krestes a gran engel, noso na edeman fu den engel.

San wi kan taki te wi e luku den buweisi disi? Yesus Krestes na Mikael, a gran engel. Mikael wani taki „Suma de leki Gado” èn Yesus wani taki „Yehovah na frulusu”. Ala den tu nen disi e sori go na a frantwortu di Yesus abi leki fesiman di o meki a kon na krin taki na Gado abi a reti fu tiri. Filipisma 2:9 e taki: „Gado gi en [Yesus di kisi glori] moro hei makti tu, èn Gado ben sori en bun-ati fu di Gado gi en a nen di hei moro ibri tra nen.”

A de prenspari fu hori na prakseri taki di Yesus gebore leki libisma, dan dati no ben de a bigin fu en libi. Bifo Yesus gebore, wan engel ben go na Maria èn a taigi en taki a ben o kon de nanga bere nanga yepi fu santa yeye èn taki a musu kari a pikin Yesus (Lukas 1:31). Di Yesus ben du a diniwroko fu en, dan nofo tron a ben taki fu a libi fu en, fosi a tron wan libisma.—Yohanes 3:13; 8:23, 58.

Sobun, Mikael, a gran engel, na Yesus, fosi a tron wan libisma. Baka di Yesus kisi wan opobaka èn drai go baka na hemel, a bigin dini baka leki Mikael, a fesiman fu den engel „so taki Gado a Tata kan kisi glori”.—Filipisma 2:11.