Gado abi wan nen?
Gado abi wan nen?
Sani di sma gwenti taki:
▪ „En nen na Masra.”
▪ „A no abi wan nen.”
San Yesus ben taki?
▪ „Fu dati ede un musu begi so: ’Wi Tata na hemel, meki yu nen kon santa’” (Mateyus 6:9). Yesus ben bribi taki Gado abi wan nen.
▪ „Mi meki yu nen bekènti na den èn mi sa meki en bekènti trutru, so taki den kan abi a srefi lobi di yu abi gi mi èn mi kan de wán nanga den” (Yohanes 17:26). Yesus ben meki Gado nen bekènti.
▪ „Unu no o si mi moro, teleki unu o taki: ’Blesi fu a sma di e kon na ini Yehovah nen’” (Lukas 13:35; Psalm 118:26). Yesus ben e gebroiki Gado nen.
GADO srefi taigi wi en nen. Bijbel e sori san ensrefi taki: „Mi na Yehovah. Dati na mi nen” (Yesaya 42:8). * Na ini Sranantongo, a Hebrew nen fu Gado, na Yehovah. Kande yu o fruwondru fu sabi taki na aparti Hebrew nen disi, skrifi dusundusun tron na ini owruten Bijbel dokumenti. Fu taki en leti, a nen disi skrifi moro furu leisi na ini Bijbel leki iniwan tra nen.
Te yu ben o aksi son sma fa Gado nen, dan kande den ben o taki dati en nen na Masra. Ma te yu luku en bun, dan den no taigi yu noti nanga a piki dati. A ben o de a srefi neleki te yu ben o aksi wan sma: „Suma tron datra?” Èn a sma ben o piki: „Na a studenti.” Fu taki en leti, dati no ben o de wan krin piki, fu di a wortu „studenti” a no wan nen. Na so a de tu, taki a wortu „Masra”, a no wan nen.
Fu san ede Gado taigi wi en nen? A du dati, so taki wi kan kon leri sabi en moro bun. Fu eksempre, na ini difrenti situwâsi yu kan kari wan sma meneer, basi, papa noso granpapa. Den wortu disi e taki wan sani fu a sma. Ma a nen fu a sma, e memre wi na ala sani di wi sabi fu en. Na so a de tu taki den wortu Masra, Almaktiwan, Tata, nanga Mekiman, e meki wi prakseri den difrenti sani di Gado e du. Ma na soso en nen, Yehovah, e memre wi na ala sani di wi sabi fu en. Sobun, wi no kan taki dati wi sabi Gado trutru, efu wi no sabi en nen.
A de prenspari taki wi sabi Gado nen, èn taki wi e gebroiki en nen. Fu san ede? Fu di Bijbel e taki: „Ala sma di e kari a nen fu Yehovah, o kisi frulusu.”—Romesma 10:13; Yoèl 2:32.
[Futuwortu]
^ paragraaf 9 Efu yu wani kon sabi san a nen fu Gado wani taki, èn fu san ede a nen disi no skrifi na ini son Bijbel, dan yu kan luku bladzijde 195-197, fu a buku San Bijbel e leri wi trutru? Yehovah Kotoigi tyari en kon na doro.
[Prenspari pisi na tapu bladzijde 6]
Na ini difrenti situwâsi yu kan kari wan sma meneer, basi, papa noso granpapa. Ma a nen fu a sma, e memre wi na ala sani di wi sabi fu en