Yesus na a Almakti Gado?
Yesus na a Almakti Gado?
Sani di sma gwenti taki:
▪ „Iya, Yesus na a Almakti Gado.”
▪ „Yesus ben de Gado di tron wan libisma.”
San Yesus ben taki?
▪ „Efu unu ben lobi mi, dan unu ben o prisiri taki mi e go na a Tata, bika a Tata bigi moro mi” (Yohanes 14:28). Yesus ben taki dati en nanga en Tata no de a srefi.
▪ „Mi o opo go na mi Tata nanga un Tata èn na mi Gado nanga un Gado” (Yohanes 20:17). Yesus no ben taki fu ensrefi leki en na Gado, ma a ben taki fu Gado leki wan aparti Sma.
▪ „Mi no taki san misrefi e prakseri, ma a Tata srefi di seni mi kon, taigi mi san mi musu taki” (Yohanes 12:49). Den sani di Yesus ben leri sma, no ben kon fu ensrefi, ma den ben kon fu en Tata.
YESUS ben taki dati en na a Manpikin fu Gado, a no taki dati en na a Almakti Gado. Efu Yesus ben de Gado, dan suma a ben begi di a ben de na grontapu? (Mateyus 14:23; 26:26-29) A no kan taki Yesus ben du neleki a e taki nanga wan tra sma!
Di tu fu den disipel fu Yesus aksi en fu kisi wan spesrutu posisi na ini en Kownukondre, dan a piki den: „A no mi musu taki suma kan go sidon na mi reti-anusei èn suma kan go sidon na mi kruktu-anusei, ma na mi Tata sreka a presi dati gi suma a wani” (Mateyus 20:23). Yesus ben lei gi den, di a sori den taki a no abi a reti fu gi den wan posisi na ini en Kownukondre? Nôno, kwetikweti! Na presi fu dati, a ben abi a sakafasi fu taigi den taki na Gado wawan abi a makti fu bosroiti dati. Yesus ben taki srefi dati son sani de, di en nanga den engel no sabi, ma di en Tata wawan sabi.—Markus 13:32.
A de so taki na soso di Yesus ben de na grontapu, a no ben de a srefi leki Gado? Nôno. Srefi baka di Yesus dede èn kisi wan opobaka, Bijbel e taki fu en dati a ben saka ensrefi na ondro Gado. Na apostel Paulus ben memre wi taki „Gado na a ede fu Krestes” (1 Korentesma 11:3). Bijbel e taki dati na ini a ten di e kon, „te ala sani de na en ondro kaba, dan a Manpikin srefi o saka ensrefi tu na ondro a Sma di ben poti ala sani na en ondro, so taki Gado kan de ala sani gi ala sma”.—1 Korentesma 15:28.
A de krin taki Yesus a no na Almakti Gado. Fu dati ede, a e kari en Tata „mi Gado”.—Openbaring 3:2, 12; 2 Korentesma 1:3, 4. *
[Futuwortu]
^ paragraaf 12 Efu yu wani sabi moro fu a tori disi, dan luku bladzijde 201-204 fu a buku San Bijbel e leri wi trutru? Yehovah Kotoigi tyari en kon na doro.
[Prenspari pisi na tapu bladzijde 7]
Yesus ben taki dati son sani de, di en nanga den engel no sabi, ma di en Tata wawan sabi