Kon krosibei na Gado

Wan Krutuman di ala ten e du san reti

Genesis 18:22-32

YU NO lobi sma di e du san reti, san bun èn di no e teki sma sei? Wi wani taki trawan handri bun nanga den, fu di na so wi meki. A de wan sari sani taki furu sma na ini a ten disi no e du san reti. Ma wan Krutuman de di wi kan frutrow, en na Yehovah Gado. Ala ten a e du san reti. Disi e kon na krin na ini a takimakandra di Yehovah ben abi nanga Abraham, soleki fa Genesis 18:22-32 e taki. *

Yehovah ben taigi Abraham taki a bosroiti fu ondrosuku fa den sma na ini Sodom nanga Gomora de. Dati meki Abraham ben frede taki bun sma ben kan de drape tu di ben kan lasi den libi. Boiti dati, en neef Lot ben e libi drape. Abraham begi Yehovah: „A de so trutru taki yu o kiri den bun sma, makandra nanga den ogriwan? Kon meki wi taki dati feifitenti bun sma e libi na ini a foto. San yu o du dan? . . . Yu no o gi a foto pardon srefi, fu di den feifitenti bun sma e libi drape?” (Vers 23, 24) Gado taki dati a no ben o pori a foto efu 50 bun sma ben e libi drape. Abraham begi Yehovah ete feifi leisi, èn te fu kaba a saka a nomru teleki a doro tin. Ibri leisi, Gado taki dati a no ben o pori a foto efu someni bun sma ben e libi drape.

Abraham ben haritaki nanga Gado? Nôno, kwetikweti! Dati ben o sori taki a abi heimemre. Ma a fasi fa Abraham ben taki, e sori taki a ben abi lespeki nanga sakafasi. A ben taki dati en ’na noti èn taki en na wan soso sma’. Na wan lespeki fasi a ben taki fo leisi „grantangi” (Vers 27, 30-32). Boiti dati, den sani di Abraham taki e sori dati a ben abi a frutrow taki Yehovah e du san bun. Abraham ben sabi taki noiti Gado ben o kiri den bun sma makandra nanga den ogrisma. Fu dati ede, a ben taki tu leisi srefi dati a „no man bribi” taki Gado ben o du so wan sani. A famiri-edeman disi ben abi a frutrow taki „a Sma di e krutu heri grontapu” ben o „du san reti”.​—Vers 25.

Abraham ben abi leti di a ben taki den sani dati? Na a wan sei a ben abi leti, ma na a tra sei a no ben abi leti. Abraham no ben abi leti di a taki dati sowan tin bun sma ben e libi na ini Sodom nanga Gomora. Ma a no de fu taki dati a ben abi leti di a taki dati Gado noiti ben „o kiri den bun sma, makandra nanga den ogriwan”. Bakaten, di Gado pori den ogri foto dati, dan nanga yepi fu engel a kibri a bun man Lot nanga den tu umapikin fu en.​—2 Petrus 2:7-9.

San a tori disi e leri wi fu Yehovah? Di Yehovah taigi Abraham san a ben abi na prakseri fu du nanga den foto, dan fu taki en leti, Yehovah gi Abraham na okasi fu taki fa a ben e denki fu a tori. Baka dati, Yehovah arki nanga pasensi di en mati Abraham ben e taki nanga sortu sani a e broko en ede (Yesaya 41:8). Na wan tumusi moi fasi a tori disi e sori wi taki Yehovah na wan Gado di abi sakafasi, èn taki a no e wisiwasi den futuboi fu en na grontapu. Na presi fu dati, A e sori lespeki gi den. A de krin fu si taki wi kan poti ala wi frutrow tapu Yehovah, a Krutuman di ala ten e du san reti.

[Futuwortu]

[Prenki na tapu bladzijde 24]

Abraham ben begi Yehovah fu no kiri den bun sma na ini Sodom nanga Gomora