Genesis 16:1-16
16 Sarai, a wefi fu Abram, no ben kisi pikin. Ma Sarai ben abi wan umasrafu fu Egepte di ben nen Hagar.
2 Dati meki Sarai taigi Abram: „Mi e begi yu, arki mi! Yehovah tapu mi bere, so taki mi no man kisi pikin. Mi e begi yu, go didon nanga na umasrafu fu mi. Kande en kan meki pikin gi mi.” Sobun, Abram arki Sarai.
3 Dati meki Abram wefi Sarai gi en umasrafu Hagar fu Egepte leki wefi na en masra Abram. Na a ten dati Abram ben e libi tin yari kaba na ini a kondre Kanan.
4 Sobun, Abram go didon nanga Hagar èn a kon de nanga bere. Di a kon si taki a de nanga bere, a bigin wisiwasi a misi fu en.
5 Dati meki Sarai taigi Abram: „Yu meki na ogri disi miti mi. Na mi gi yu mi umasrafu. Ma di a kon si taki a de nanga bere, a bigin wisiwasi mi. Meki Yehovah srefi koti krutu na mindri mi nanga yu.”
6 Dati meki Abram taigi Sarai: „Luku, na yu srafu. Du nanga en san yu wani.” Dan Sarai bigin soso Hagar. Ne Hagar lowe gowe libi en.
7 Bakaten na engel fu Yehovah feni Hagar na wan watra-olo na ini a sabana, na a pasi di e go na Sur.
8 Na engel aksi en: „Hagar, umasrafu fu Sarai, pe yu komoto èn pe yu e go?” Dan Hagar piki en: „We, na lowe mi e lowe gowe fu mi misi Sarai.”
9 Ne na engel fu Yehovah piki en: „Drai go baka na a misi fu yu èn saka yusrefi na en ondro.”
10 Na engel fu Yehovah taigi en tu: „Mi o meki yu kisi so furu bakapikin, taki sma no o man teri den.”
11 Boiti dati, na engel fu Yehovah taigi en: „Luku, yu de nanga bere èn yu o kisi wan manpikin. Yu musu kari en Ismael, bika Yehovah yere fa yu bari krei di nowtu miti yu.
12 A o kon de wan man di de leki wan sabanaburiki. A o opo ensrefi teige ala sma èn ala sma o opo densrefi teige en. A o libi na mindri ala den brada fu en.”
13 Ne Hagar bigin begi èn a kari Yehovah nen. A taki: „Yu na wan Gado di e si ala sani.”* Hagar ben taki dati fu di a ben aksi ensrefi: „A de so trutru taki mi si a sma di e si mi?”
14 Dati meki sma kari a peti pe Hagar ben de, Beyer-Lakai-Rowi. (A peti disi de na mindri Kades nanga Bered.)
15 Bakaten Hagar meki wan manpikin gi Abram èn Abram kari a manpikin di a kisi nanga Hagar, Ismael.
16 Na a ten di Hagar meki Ismael gi Abram, Abram ben abi aititenti na siksi yari.
Futuwortu
^ Noso: „wan Gado di e si mi”; noso: „wan Gado di e meki sma si en (di e sori ensrefi).”
