Fisyun fu Gado en Kownukondre e kon tru

„A ben o bun efu unu e poti prakseri na den profeititori disi, neleki fa unu ben o du dati nanga wan lampu di e skèin na ini wan dungru presi.”​—2 PETRUS 1:19.

1. Sortu tu sani de kontrari fu makandra na ini a grontapu fu tide?

MUILEK situwâsi tapu muilek situwâsi, iya, dati na wan aladei sani na ini a grontapu fu tide. Te wi e luku den rampu di e pasa na ini a naturu, nanga den ogri-ati sani di sma e du na heri grontapu fu gens tirimakti, dan a gersi leki libisma e ondrofeni moro nanga moro problema. Srefi den kerki fu grontapu no man lusu den problema disi. Fu taki en leti, furu tron den e meki sani kon moro ogri fu di den e sutu faya gi sma so taki den kan kisi takru denki fu trawan, so taki den kan abi bita-ati gi trawan, èn so taki den e si den eigi kondre leki a moro bun wan. Den sani disi e tyari prati kon na mindri sma. Iya, soleki fa Bijbel ben taki na fesi kaba, „deki dungru” tapu „den nationaal grupu” (Yesaya 60:2). Ma na a srefi ten, milyunmilyun sma abi a howpu taki sani sa go moro bun na ini a ten di e kon. Fu san ede dati de so? Fu di den e poti prakseri na a profeiti wortu fu Gado, ’neleki fa den ben o du dati nanga wan lampu di e skèin na ini wan dungru presi’. Den e meki a „wortu” fu Gado, noso a boskopu fu en di de fu feni now na ini Bijbel, tiri den.​—2 Petrus 1:19.

2. Soleki fa a profeititori fu Danièl e taki fu „a ten fu a kaba”, dan suma wawan e kisi a koni fu man frustan yeye afersi?

² Disi na san a profeiti Danièl ben skrifi fu „a ten fu a kaba”: „Furu sma sa go-kon, èn a tru sabi o lai srefisrefi. Furu sma sa krin densrefi, den sa meki densrefi kon weti, èn den sa kon soifri. Èn den godelowsu sma sa du godelowsu sani trutru, èn nowan-enkri godelowsu sma sa frustan; ma den wan di abi a koni fu man si sani krin sa frustan” (Danièl 12:4, 10). Soso den wan di e meki trutru muiti fu „go-kon” na ini Gado Wortu, noso fu studeri en fayafaya, iya, den wan di e fiti densrefi na den markitiki fu en èn di e meki muiti fu du a wani fu en, e kisi a koni fu man frustan yeye afersi.​—Mateyus 13:11-15; 1 Yohanes 5:20.

3. Sortu prenspari tru tori den Bijbel Ondrosukuman kon frustan na ini den yari baka 1870?

³ Frukufruku kaba na ini den yari baka 1870, bifo „den lasti dei” ben bigin, dan Yehovah Gado bigin skèin moro leti tapu „den santa kibritori fu a kownukondre fu hemel” (2 Timoteyus 3:1-5; Mateyus 13:11). Na a ten dati, wan grupu fu Bijbel Ondrosukuman kon si taki Krestes ben o kon baka sondro taki sma ben o si en, èn dati ben de heri tra fasi leki fa furu sma ben denki. Baka di Yesus tron Kownu na ini hemel, dan a fasi fa a ben o kon baka ben o de taki a ben o poti en prakseri na grontapu leki Kownu fu grontapu. Wan marki di ben abi fu du nanga difrenti sani èn di den disipel fu en ben o man si, ben o sori den taki a denoya fu en ben bigin kaba.​—Mateyus 24:3-14.

 Wan fisyun e kon tru

4. Fa Yehovah tranga a bribi fu den disiten futuboi fu en?

⁴ A transfigurâsi fisyun ben de wan tumusi moi fisyun fu Krestes leki Tiriman fu a Kownukondre (Mateyus 17:1-9). A fisyun dati tranga a bribi fu Petrus, Yakobus, nanga Yohanes na a ten di furu disipel ben tapu fu waka baka Yesus fu di a no ben du san den ben fruwakti en fu du. Na so a de tu taki na ini a ten disi fu a kaba, Yehovah tranga a bribi fu den disiten futuboi fu en. A yepi den fu kon frustan moro bun san na a kontru fu a tumusi moi fisyun dati èn sosrefi fu furu tra profeititori di abi fu du nanga a fisyun dati. Meki wi poti prakseri now na wan tu fu den kontru dati di e tranga a bribi fu wi.

5. Suma ben de a Deistari, o ten a ’opo’, èn fa a du dati?

⁵ Disi na san na apostel Petrus ben skrifi fu a transfigurâsi: „A sani dati meki taki wi kisi moro frutrow na ini den profeititori; èn a ben o bun efu unu e poti prakseri na den profeititori disi, neleki fa unu ben o du dati nanga wan lampu di e skèin na ini wan dungru presi, iya, na ini un ati, teleki dei broko èn wan mamanten stari opo” (2 Petrus 1:19). Na agersi Deistari dati, noso a „mamanten stari di e brenki”, na Yesus Krestes di kisi glori (Openbaring 22:16). A ’opo’ na ini 1914 di Gado Kownukondre ben seti na ini hemel, èn dati ben de wan marki taki wan nyun pisi ten ben bigin (Openbaring 11:15). Na ini a transfigurâsi fisyun, Moses nanga Elia ben e tanapu na Yesus sei, èn den ben e taki nanga en. Suma den ben prenki?

6, 7. Suma Moses nanga Elia e prenki na ini a transfigurâsi? Sortu prenspari finifini tori den Buku fu Bijbel e tyari kon na krin fu den wan di den e prenki?

⁶ Fu di Moses nanga Elia ben kisi glori tu makandra nanga Krestes, meki den tu getrow kotoigi disi musu fu prenki den wan di e tiri makandra nanga Yesus na ini a Kownukondre fu en. A sani disi, namku taki Yesus o tiri makandra nanga tra sma, e kruderi nanga a fisyun di a profeiti Danièl ben kisi fu a Mesias di ben poti leki Kownu. Danièl ben si fa „wan sma di gersi wan manpikin fu libisma” ben e kisi „wan tirimakti di e tan te ten di no skotu” fu „a Graniwan ini Dei”, namku Yehovah Gado. Ma luku san Danièl e si wan syatu pisi ten baka dati. A e skrifi: „A kownukondre nanga a tirimakti nanga a grani fu den kownukondre na ondro a heri hemel ben gi na a pipel di de den santawan fu a Moro Heiwan” (Danièl 7:13, 14, 27). Iya, moro leki feifi hondro yari bifo a transfigurâsi, Gado ben tyari kon na krin taki wan tu „santawan” ben o kisi glori tu makandra nanga Krestes di ben o tron Kownu.

⁷ Suma na den santawan na ini a fisyun fu Danièl? Na apostel Paulus e taki fu den sma dati: „A yeye srefi e gi kotoigi makandra nanga a yeye fu wi taki wi na pikin fu Gado. Fu dati ede, efu wi na pikin, dan wi na sma tu di o kisi wan gudu, iya, wi o kisi wan gudu fu Gado, ma wi o kisi en makandra nanga Krestes, efu wi e nyan pina makandra nanga en, so taki wi kan kisi glori tu makandra nanga en” (Romesma 8:16, 17). Fu taki en leti, den santawan na Yesus en disipel di salfu nanga santa yeye. Na ini Openbaring, Yesus e taki: „A sma di e wini, mi sa gi primisi fu sidon nanga mi na tapu mi kownusturu, neleki fa mi ben wini èn ben sidon nanga mi Tata na tapu en kownusturu.” A nomru fu den ’winiman’ di kisi wan opobaka, na 144.000, èn makandra nanga Yesus den sa tiri a heri grontapu.​—Openbaring 3:21; 5:9, 10; 14:1, 3, 4; 1 Korentesma 15:53.

8. Fa den salfu disipel fu Yesus du a srefi sortu wroko leki san Moses nanga Elia ben du, èn san na den bakapisi?

⁸ Ma fu san ede Moses nanga Elia e prenki den salfu Kresten? Na fu di den salfu Kresten dati, aladi den na libisma na grontapu ete, e du a srefi sortu wroko di Moses nanga Elia ben e du. Fu gi  wan eksempre, den e dini leki Kotoigi fu Yehovah, srefi te frufolgu e miti den (Yesaya 43:10; Tori fu den Apostel 8:1-8; Openbaring 11:2-12). Neleki Moses nanga Elia, den no frede fu puru falsi bribi kon na doro, aladi den e gi opregtisma a deki-ati fu anbegi Gado wawan (Exodus 32:19, 20; Deuteronomium 4:22-24; 1 Kownu 18:18-40). A wroko fu den abi bun bakapisi? Iya! Boiti taki den yepi fu tyari ala den salfuwan kon na wán, den yepi milyunmilyun „tra skapu” fu tron sma di de klariklari fu saka densrefi na ondro Yesus Krestes.​—Yohanes 10:16; Openbaring 7:4.

Yesus e tron winiman

9. Fa Openbaring 6:2 e prenki Yesus soleki fa a de na ini a ten disi?

⁹ Yesus no de wan libisma moro di e rei na tapu wan yongu buriki, nôno, a de wan makti Kownu now. Bijbel e taki dati a e rei na tapu wan asi, èn a sani dati e prenki orloku (Odo 21:31). Openbaring 6:2 e taki: „Luku!, wan weti asi, èn a sma di ben e sidon na en tapu, ben abi wan bo; èn den ben gi en wan kownu-ati, èn a ben e go fu go wini so taki a ben kan tron winiman te fu kaba.” Boiti dati, a psalm skrifiman David ben skrifi fu Yesus: „A tiriman tiki fu yu krakti, Yehovah sa seni kon fu Sion, èn a sa taki: ’Go na mindri den feanti fu yu èn poti den na yu ondro.’”​—Psalm 110:2.

10. (a) Fa a rei di Yesus bigin rei fu tron winiman, ben abi wan moi bigin? (b) Fa a fosi leisi di Krestes tron winiman ben abi krakti tapu heri grontapu?

¹⁰ Den fosiwan di Yesus ben wini, na den moro makti feanti fu en, namku Satan nanga den ogri yeye. A puru den na hemel, èn a fringi den go na grontapu. Fu di den ogri yeye disi sabi taki a ten fu den syatu, meki den e puru atibron na libisma tapu, èn a sani disi e meki taki bigi banawtu e miti libisma. Na ini Openbaring, ete dri asi-tyariman e bigin rei, èn den e prenki a banawtu disi (Openbaring 6:3-8; 12:7-12). Soleki fa Yesus ben taki na fesi na ini a profeititori di abi fu du nanga „a marki fu [en] denoya èn fu a kaba fu a grontapu sistema disi”, dan a rei di den asi-tyariman disi e rei abi orloku, angriten, nanga takru siki leki bakapisi (Mateyus 24:3, 7; Lukas 21:7-11). A no de fu taki dati a ’banawtu’ disi di de leki a pen di wan uma e firi te a musu kisi wan pikin, sa kon moro hebi teleki Krestes ’e tron winiman’ fu di a e pori ibri sani di abi fu du nanga na organisâsi fu Satan na grontapu. *​—Mateyus 24:8.

11. Fa a fasi fa sani waka nanga a Kresten gemeente, e sori taki Krestes abi Kownu makti?

 ¹¹ A kownumakti di Yesus abi de krin fu si te wi e luku fa a kibri a Kresten gemeente, so taki a gemeente kan du a wroko di a kisi fu preiki a Kownukondre boskopu na heri grontapu. Aladi a preikiwroko kisi hebi gens fu Babilon a Bigiwan, noso a grontapumakti fu falsi bribi, èn sosrefi fu ogri-ati tirimakti, toku a wroko disi no tan go doro wawan, ma a gro kon bigi tu moro leki iniwan wroko di du oiti na heri grontapu (Openbaring 17:5, 6). Dati na trutru wan krakti buweisi taki Krestes na Kownu!​—Psalm 110:3.

12. Fu san ede furu sma no e frustan taki disi na a ten fu Krestes en denoya?

¹² Ma a sari fu si taki moro furu sma, èn sosrefi milyunmilyun sokari Kresten, no e frustan taki den bigi sani di e pasa na grontapu, wani taki tra sani di den no man si nanga ai. Boiti dati, den sma disi e spotu den wan di e fruteri trawan fu a Kownukondre fu Gado (2 Petrus 3:3, 4). Fu san ede den e du dati? Fu di Satan breni den frustan (2 Korentesma 4:3, 4). Fu taki en leti, furu hondrohondro yari pasa, a bigin meki yeye dungru fadon leki wan duku na tapu sokari Kresten, èn boiti dati, a meki den poti a warti Kownukondre howpu na wan sei.

Sma poti a Kownukondre howpu na wan sei

13. San ben de a bakapisi fu a yeye dungru di sokari Kresten ben kon de na ini?

¹³ Yesus ben taki na fesi dati neleki fa takru wiwiri e gro na mindri karu, na so den sma di fadon komoto na bribi safrisafri ben o kon na ini a Kresten gemeente, èn den ben o tyari furu sma go lasi (Mateyus 13:24-30, 36-43; Tori fu den Apostel 20:29-31; Yudas 4). Baka wan pisi ten, den sokari Kresten disi bigin teki sani abra soleki heiden fesa, gwenti, nanga leri, èn den ben e kari den „Kresten fesa noso Kresten gwenti” sosrefi. Fu gi wan eksempre, Kresneti feni en rutu na ini gwenti di abi fu du nanga na anbegi fu den heiden gado Mitra nanga Saturnus. Ma san meki taki sokari Kresten teki den heiden fesa disi abra? Wan buku e taki: „Kresneti, a fesa di sma e hori fu memre a dei di Yesus Krestes gebore, ben seti fu di sma ben bigin lasi a bribi taki Krestes ben o drai kon baka heri esi” (The New Encyclopædia Britannica (1974)).

14. Fa den leri fu Origenes nanga Augustinus ben drai a waarheid fu a Kownukondre?

 ¹⁴ Luku sosrefi fa sma drai san a wortu „kownukondre” wani taki. Wan buku e taki: „Origenes, [wan kerki leriman fu a di fu dri yarihondro], kon nanga wan leri di meki taki Kresten bigin bribi taki a wortu ’kownukondre’ na a tiri fu Gado na ini na ati fu sma” (The Kingdom of God in 20th-Century Interpretation). Pe Origenes ben komoto nanga a leri disi? A leri disi no ben komoto fu den Buku fu Bijbel, ma a ben komoto fu „a fasi fa sma na a ten dati ben e denki, èn dati ben de heri tra fasi leki fa den sma na ini a ten fu Yesus èn na ini a ten fu a fosi kerki ben e denki”. Augustinus fu Hippo (354-430 G.T.) ben taki na ini a buku fu en, taki a kerki srefi na a Kownukondre fu Gado (De Civitate Dei (A foto fu Gado)). So wan denki di no e kruderi nanga Bijbel gi den kerki fu Krestenhèit reide fu abi politiek makti. Èn den ben abi a makti dati furu yarihondro langa, ma furu tron den ben e gebroiki en na wan ogri-ati fasi.​—Openbaring 17:5, 18.

15. Te wi e luku furu fu den kerki fu Krestenhèit, dan fa Galasiasma 6:7 kon tru?

¹⁵ Ma na ini a ten disi, den kerki e koti san den sai (Galasiasma 6:7). Soleki fa a sori, dan furu fu den kerki e lasi a makti fu den èn sosrefi den memre fu den. A sani dati de krin fu si na ini Europa. Soleki fa wan koranti e taki, dan „sma no e gebroiki den bigi kathedraal na ini Europa moro leki presi fu anbegi, ma leki museum di e hari soso den sma di de nanga fakansi na ini a kondre dati” (Christianity Today). A srefi sani disi de fu si na tra presi na grontapu. San disi wani taki gi falsi bribi? A sa dede gowe fu di sma no e horibaka gi en? Èn fa a sani disi sa abi krakti tapu a tru anbegi?

Sreka unsrefi gi a bigi dei fu Gado

16. Fu san ede a de prenspari fu poti prakseri na a feantifasi di moro nanga moro sma e kon abi gi Babilon a Bigiwan?

¹⁶ Te wan bergi e bigin spiti smoko nanga asisi, dan dati wani taki dati a kan sutu opo èn spiti faya iniwan momenti. Na so a feantifasi di moro nanga moro sma na furu presi na grontapu abi gi kerki, e sori tu taki a no o teki langa bifo falsi bribi o kon na wan kaba. Heri esi, Yehovah sa meki den politiek makti bondru kon na wán fu puru kon na doro suma na a huru-uma Babilon a Bigiwan èn fu pori en (Openbaring 17:15-17; 18:21). A de so taki tru Kresten musu frede gi a sani dati èn gi den tra sani di o pasa na a ten fu a „bigi banawtu” di sa kon baka dati? (Mateyus 24:21). Kwetikweti! Te yu luku en bun, dan den sa abi reide fu prisiri trutru te Gado e du wan sani fu pori den ogrisma (Openbaring 18:20; 19:1, 2). Luku san ben pasa nanga Yerusalem na ini a fosi yarihondro, èn nanga den Kresten di ben e libi drape.

17. Fu san ede den getrow futuboi fu Yehovah kan fruwakti taki sani sa waka bun nanga den na a kaba fu a sistema disi?

¹⁷ Di den srudatimakti fu Rome ben lontu Yerusalem na ini 66 G.T., dan den Kresten di ben de na ai na yeye fasi no ben skreki, èn den no ben frede tu. Fu di den ben e ondrosuku Gado Wortu bun, meki den ben sabi taki ’a pori fu Yerusalem ben kon krosibei’ (Lukas 21:20). Den ben sabi tu taki Gado ben o opo a pasi gi den fu lowe go kibri. Di dati pasa, dan den Kresten lowe gowe (Danièl 9:26; Mateyus 24:15-19; Lukas 21:21). Na so a de tu na ini a ten disi, taki den wan di sabi Gado èn di e gi yesi na en Manpikin, kan fruwakti taki sani sa waka bun nanga den na a kaba fu a sistema disi (2 Tesalonikasma 1:6-9). Fu taki en leti, te a bigi banawtu e kon, dan nanga prisiri den sa ’opo tanapu leti-opo, èn den sa opo den ede go na loktu, bika a frulusu fu den e kon krosibei’.​—Lukas 21:28.

18. San sa de a bakapisi fu a feti di Gog o go feti langalanga nanga den futuboi fu Yehovah?

¹⁸ Baka te Babilon a Bigiwan kisi pori, dan Satan, di de Gog fu Magog, sa go feti langalanga nanga den Kotoigi fu Yehovah di lobi vrede. Den legre fu Gog e opo kon „leki wolku fu tapu a kondre”, èn den e fruwakti fu wini a strei makriki. Ma den sa skreki trutru! (Esekièl 38:14-16, 18-23). Na apostel Yohanes e skrifi: „Mi si hemel opo, èn luku! wan weti asi. Èn a wan di ben sidon na tapu en, den e kari Getrow èn Tru . . . Wan langa srapu feti-owru e komopo na en mofo, fu naki den nasi nanga en.” A „Kownu fu  kownu disi” di nowan sma man wini, sa frulusu den getrow anbegiman fu Yehovah èn a sa kiri ala den feanti fu den (Openbaring 19:11-21). Dati sa de wan heimarki trutru fu a kontru fu a transfigurâsi fisyun!

19. San den getrow disipel fu Krestes o du te a tron winiman, èn san den musu suku fu du now?

¹⁹ Sma sa „fruwondru fu [Yesus] na a dei dati, makandra nanga ala den wan di ben sori bribi” (2 Tesalonikasma 1:10). Yu wani de wan fu den sma di sa sori bigi lespeki gi a Manpikin fu Gado te a tron winiman? Efu dati de so, dan tan tranga yu bribi en tan de ’srekasreka, bika a Manpikin fu libisma o kon na wan yuru di unu no ben prakseri’.​—Mateyus 24:43, 44.

Un musu de nanga un krin frustan

20. (a) Fa wi kan sori taki wi e warderi a seti fu „a getrow èn koni srafu” di Gado poti? (b) Sortu sani wi musu aksi wisrefi?

²⁰ „A getrow èn koni srafu” e frumane a pipel fu Gado doronomo fu tan na ai na yeye fasi èn fu de nanga den krin frustan (Mateyus 24:45, 46; 1 Tesalonikasma 5:6). Yu e warderi en taki yu e kisi den frumane disi na a yoisti ten? Yu e gi yesi na den te yu e bosroiti sortu sani yu o poti na a fosi presi na ini yu libi? Fu san ede yu no e aksi yusrefi: ’Mi de na ai na yeye fasi fu frustan taki a Manpikin fu Gado e tiri na ini hemel? Mi e frustan taki a de srekasreka fu krutu Babilon a Bigiwan èn sosrefi den tra pisi fu a sistema fu Satan, soleki fa Gado wani en fu du?

21. San meki taki wan tu sma no de na ai moro na yeye fasi, èn san den musu du wantewante?

²¹ Wan tu sma di abi demakandra nanga a pipel fu Yehovah, no de na ai moro na yeye fasi soleki fa den ben de fosi. A kan taki den no abi pasensi, noso taki den no man horidoro, soleki fa dati ben pasa nanga wan tu fu den fosi disipel fu Yesus? A de so taki den no de na ai moro na yeye fasi fu di den abi broko-ede na ini a libi, fu di den e feti fu kon gudu, noso fu di frufolgu miti den? (Mateyus 13:3-8, 18-23; Lukas 21:34-36). Kande wan tu sma ben abi muiti fu frustan spesrutu sani di „a getrow èn koni srafu” ben tyari kon na doro. Efu iniwan fu den sani disi pasa nanga yu, dan wi e gi yu a deki-ati fu studeri Gado Wortu nanga moro faya èn fu begi Yehovah, so taki yu kan kisi wan tranga banti baka nanga en.​—2 Petrus 3:11-15.

22. Now di yu poti prakseri na a transfigurâsi fisyun èn na den tra profeititori di abi fu du nanga a fisyun dati, dan sortu krakti dati abi na yu tapu?

²² Den disipel fu Yesus kisi a transfigurâsi fisyun di den ben abi deki-ati fanowdu. Na ini a ten disi wi abi wan moro bigi sani di kan gi wi krakti, èn dati na a kontru fu a tumusi moi transfigurâsi fisyun èn fu furu tra profeititori di abi fu du nanga na fisyun dati. Te wi e poti prakseri na den tumusi moi fisyun disi èn na san den wani taki gi a ten di e kon, dan wisrefi musu sori nanga wi heri ati taki wi e agri nanga na apostel Yohanes di ben taki: „Amen! Kon, Masra Yesus.”​—Openbaring 22:20.

[Futuwortu]

Yu e memre disi ete?

• San wan pikin grupu fu Bijbel Ondrosukuman di ben libi na ini den yari baka 1870, ben kon frustan fu a kon di Krestes ben o kon baka?

• Fa a transfigurâsi fisyun kon tru?

• Sortu krakti a rei di Yesus bigin rei fu tron winiman, abi tapu grontapu èn tapu a Kresten gemeente?

• San wi musu du fu de wan fu den sma di sa tan na libi te Yesus e tron winiman?

[Aksi fu a tori disi]

[Prenki na tapu bladzijde 16, 17]

Wan fisyun e kon tru

[Prenki na tapu bladzijde 18]

Yu sabi san pasa di Krestes bigin du sani so taki a ben kan tron winiman?