Yu e memre disi ete?

Yu ben prisiri fu leisi den Waktitoren di kon na doro no solanga pasa? We, luku efu yu kan gi wan piki tapu den aksi di e kon now:

• Omeni kapitel de na ini a buku Mika, o ten a buku disi skrifi, èn fa sani ben de na ini a ten dati?

A buku Mika abi seibi kapitel. A profeiti Mika skrifi a buku na ini a di fu aiti yarihondro b.G.T. Na a pisi ten dati a pipel di Gado ben meki wan frubontu nanga den, ben prati na ini tu kondre, namku Israel nanga Yuda.​—15/8, bladzijde 9.

• San Gado e aksi fu wi, soleki fa Mika 6:8 e sori?

Wi musu „du retidu”. A fasi fa Gado e du sani e sori wi san na a yoisti fasi fu du retidu. Sobun, wi musu du muiti fu tan opregti èn fu hori wi soifri retifasi, soleki fa Gado wani. A e taigi wi taki wi musu „lobi switifasi”. Kresten sori switifasi fu di den e yepi trawan di de na nowtu, soleki sma di de na nowtu baka te wan rampu pasa. Efu wi wani ’sori sakafasi te wi e waka nanga’ Yehovah, dan wi musu frustan taki wi no man du ala sani nanga wi eigi krakti èn taki wi musu frutrow tapu en.​—15/8, bladzijde 20-22.

• San wan Kresten ben kan du efu a lasi wroko?

A ben o de wan koni sani efu so wan sma e luku a fasi fa a e libi. Kande a kan seti en libi na so wan fasi taki a no sa abi so furu frantwortu moro. Kande a man froisi go na wan moro pikin oso, noso kande a man sorgu taki a no abi so furu sani moro. A no de fu taki, dati a de prenspari fu no broko wi ede tumusi nanga san wi abi fanowdu na ini wi aladei libi, ma na presi fu dati wi musu frutrow tapu Gado taki a kan meki wi kisi den sani dati (Mateyus 6:33, 34).​—1/9, bladzijde 14, 15.

• San wi musu hori na prakseri te wi e gi, noso te wi e kisi wan kado na wan trow-oso?

A no de fanowdu fu gi wan diri kado èn sma no musu fruwakti fu kisi wan diri kado sosrefi. A moro prenspari sani na taki wan sma di e gi wan sani e du dati nanga a yoisti prakseri (Lukas 21:1-4). A no ben o de wan bun sani efu wan sma ben o meki bekènti suma gi wan kado. Disi kan meki sma kisi syen (Mateyus 6:3).​—1/9, bladzijde 29.

• Fu san ede wi musu begi doronomo?

Te wi e begi doronomo, dan disi kan yepi wi fu abi wan krosibei banti nanga Gado èn a kan yepi wi fu horidoro te tesi e miti wi. Den begi fu wi kan de syatu, noso den kan de langa; disi abi fu du nanga a fasi fa wi e firi èn na ini sortu situwâsi wi de. Te wi e begi, dan disi kan meki a bribi fu wi tranga èn a kan yepi wi te wi abi problema.​—15/9, bladzijde 15-18.

• Son bijbelvertaling vertaal 1 Korentesma 15:29 leki: „teki dopoe gi dem dede soema”. Fa wi musu frustan a tekst disi?

Na apostel Paulus ben wani taki, dati te salfu Kresten e teki dopu, dan den e bigin libi na wan fasi di abi leki bakapisi taki den sa lasi den libi aladi den e hori den soifri retifasi, neleki fa dati ben pasa nanga Krestes. Baka dati den sa kisi wan opobaka fu tron wan yeye neleki fa dati ben pasa nanga Krestes.​—1/10, bladzijde 29.

• Fa wi du sabi taki wan sma di wani de wan Kresten musu du moro leki fu wai pasi nomo gi den fowtu sani di kari na ini 1 Korentesma 6:9-11?

Na apostel Paulus no ben taki dati wan Kresten musu wai pasi nomo gi fowtu sani soleki hurudu, na anbegi fu falsi gado, nanga drungufasi. A ben sori taki a kan de fanowdu fu tyari moro kenki kon, bika a ben taki moro fara na ini a tra vers: „Mi abi a reti fu du ala sani, ma a no ala sani bun fu du.”​—15/10, bladzijde 18, 19.

• Suma ben de wan tu fu den uma fu owruten di ben prisiri na ati fu Gado?

Tu fu den uma disi ben de Sifra nanga Pua, di ben abi a wroko fu yepi uma di de fu meki pikin. Den tu uma disi no ben gi yesi na Farao èn den no ben kiri den nyun-gebore manpikin fu Israel (Exodus 1:15-20). A huru-uma Rakab fu a kondre Kanan ben kibri tu spion fu Israel (Yosua 2:1-13; 6:22, 23). Fu di Abigaèl ben handri nanga koni, meki a ben man kibri a libi fu furu sma, èn a ben man tapu David fu no kisi brudu-paiman (1 Samuel 25:2-35). Den uma disi de eksempre gi uma na ini a ten disi.​—1/11, bladzijde 8-11.

• Soleki fa skrifi na ini Krutuman 5:20, dan fa a du kon taki „komoto fu hemel, den stari ben e feti” teige Sisera?

Son sma e taki dati disi e sori taki Gado ben gi yepi. Trawan e taki dati na engel ben e gi yepi, noso taki bigi ston ben e fadon komoto fu hemel, noso taki Sisera ben bribi den lukuman di ben e luku stari. Fu di Bijbel no e fruteri fa den stari ben e feti na ini a feti disi, meki a fiti fu taki dati a feti di den stari ben e feti e sori taki Gado ben e yepi a legre fu Israel.​—15/11, bladzijde 30.

• Fu san ede so furu sma e taki ete dati den e bribi na ini Gado te sma na ala sei no e broko den ede srefisrefi nanga kerki?

Son sma e go na kerki fu di den e suku fu abi wan korostu firi na ini den ati. Trawan e go na kerki fu di den e howpu fu kisi têgo libi baka te den dede, noso fu di den e howpu fu kon gosontu, fu kon gudu, noso fu di den wani taki sani waka bun gi den. Na son presi sma e howpu taki den sa man tapu a yeye nowtu di den kon kisi, now di sma e pruberi fu libi wan gudu libi, fu di a Komunisme lasi a krakti di a ben abi tapu sma. Te wan Kresten sabi den sani disi, dan dati kan yepi en fu bigin bun takimakandra nanga den ososma.​—1/12, bladzijde 3.