Ondrofenitori

 Koloku fu a sma di abi Yehovah leki en Gado

SOLEKI FA TOM DIDUR FRUTERI

Wi ben yuru a konmakandra presi fu a birti kaba. Wi ben fruwakti sowan 300 sma na a kring konmakandra na ini a foto Porcupine Plain, di de na ini a distrikt Saskatchewan, Kanada. Tapu dridewroko snew bigin fadon, èn tapu freida snew ben e fadon so hebi èn wán bigi winti ben e wai, taki wi no ben man si san ben de na wi fesi. A ben kon moro kowru, a ben de -40 graden Celsius. Tutenti na aiti sma ben de na a konmakandra èn sosrefi wan tu pikin. Disi ben de a fosi leisi di mi ben de na wan kring konmakandra leki wan nyun kringopziener, èn mi ben senwe. Mi ben abi 25 yari na a pisi ten dati. Ma fosi mi fruteri san pasa na a konmakandra dati, dan meki mi fruteri fa mi kisi a spesrutu grani disi fu de wan kringopziener.

MI NA a di fu seibi pikin fu den aiti pikin na ini na osofamiri, èn wi alamala na boi. A moro owruwan na Bill, baka dati na Metro, dan John, dan Fred, dan Mike, dan Alex. Mi gebore na ini 1925 èn Wally na a moro yonguwan. Wi ben libi krosibei fu a foto Ukraina, na ini a distrikt Manitoba. Drape mi papa Michael Didur nanga mi mama Anna Didur, ben abi wan oso na tapu wan pikin pisi gron. Mi papa ben de wan fu den man di ben musu luku taki a pasi pe den loko ben e waka ben tan bun. Den man di ben du a wroko dati ben tan na ini pikin oso di ben de na sei pasi. Den pikin oso disi ben de fara fu a foto èn den no ben fiti gi wan bigi osofamiri. Dati meki wi ben tan na ini na oso na tapu a pisi gron. Mi mama wawan kweki wi kon bigi, fu di furu tron mi papa no ben de na oso. Son tron mi mama no ben de na oso fu di a ben go tan nanga mi papa wan wiki, noso wan moro langa pisi ten. Ma a sorgu taki a leri wi fa fu bori, fa fu baka brede nanga tra sani, èn fu fa du osowroko. Fu di wi ben de memre fu a Griki Lomsu Kerki, meki yonguyongu mi mama leri wi fu  hori spesrutu begi na ede èn a leri wi tra kerkigwenti sosrefi.

Mi kon leri sabi a waarheid fu Bijbel

Di mi ben yongu, mi bigin angri fu frustan Bijbel. Wan man fu a birti pe mi ben tan, ben de wan Kotoigi fu Yehovah, èn a ben gwenti fu kon na wi oso fu leisi pisi fu Bijbel gi wi. Den pisi disi ben abi fu du nanga a Kownukondre fu Gado, Armagedon, nanga den blesi fu a nyun grontapu. Mi mama no ben wani sabi notinoti fu den sani di a Kotoigi ben fruteri, ma Mike nanga Alex ben wani sabi moro fu a boskopu disi. Fu taki en leti, den sani di Mike nanga Alex ben leri, meki taki den weigri fu go du srudatiwroko na ini a di fu tu grontapufeti, fu di a konsensi fu den no ben gi pasi fu du dati. Bakaten Mike ben musu koti strafu wan pisi ten, èn Alex ben musu wroko na ini wan strafuman kampu na ini Ontario. Baka wan pisi ten Fred nanga Wally teki a waarheid tu. Ma den dri moro bigi brada fu mi no du dati. Wan tu yari langa mi mama ben de teige a waarheid, ma wi alamala ben fruwondru bakaten fu si taki mi mama teki a sei fu Yehovah. A teki dopu di a ben abi 83 yari. Mi mama ben abi 96 yari di a dede. Bifo mi papa dede a ben si a waarheid leki wan bun sani tu.

Di mi ben abi 17 yari, mi go na a foto Winnipeg fu suku wroko èn fu abi demakandra nanga den sma di ben sa man yepi mi fu studeri Bijbel. Lanti ben tapu a wroko fu Yehovah Kotoigi na ini a ten dati, ma toku konmakandra ben e hori doronomo. A fosi leisi di mi go na wan konmakandra, a ben hori na ini na oso fu wan sma. Na ini a bigin, mi no ben frustan den sani di mi ben yere na a konmakandra, fu di sensi mi yongu yari, mi ben kweki nanga a Griki Lomsu bribi. A kerki dati seti na so wan fasi taki den kerki fesiman hei moro den tra kerkisma. Ma safrisafri mi kon frustan taki a sani disi no de akruderi Bijbel. Mi kon frustan sosrefi fu san ede Gado no feni en bun te den kerki fesiman e blesi orloku (Yesaya 2:4; Mateyus 23:8-10; Romesma 12:17, 18). Mi ben feni en moro bun fu libi na ini Paradijs na grontapu na presi fu go na wan farawe presi fu têgo.

Fu di mi ben sabi seiker taki disi na a waarheid, meki mi gi mi libi abra na Yehovah èn mi teki dopu na Winnipeg na ini 1942. Na ini 1943 lanti gi pasi baka meki Yehovah Kotoigi du a wroko fu den, èn a preikiwroko ben go na fesi moro nanga moro. Bijbel waarheid ben abi moro krakti tapu mi tu. Mi ben kisi a grani fu dini leki wan owruman na ini a gemeente, èn fu hori lezing gi den sma di e tan na difrenti presi ini a kontren pe a gemeente ben preiki. Boiti dati, mi ben go preiki na presi pe Kotoigi no ben preiki ete. Fu di mi go na difrenti bigi kongres na ini Amerkankondre, meki mi go na fesi trutru leki Kresten.

Mi e du moro na ini a diniwroko fu Yehovah

Na ini 1950, mi ben tron wan pionier, èn na ini december fu a yari dati mi kisi a kari fu dini leki kringopziener. Mi ben si en leki wan grani taki Charlie Hepworth leri mi fa fu du a wroko fu wan kringopziener na ini den gemeente krosibei fu a foto Toronto. A brada disi ben abi ondrofeni na ini a wroko disi èn a ben tan du a wroko getrow. Na ini a lasti wiki di mi ben kisi leri, mi ben prisiri fu de nanga mi brada Alex di ben e du kringwroko kaba na ini Winnipeg.

Soleki fa mi fruteri na a bigin, dan mi noiti sa frigiti a fosi leisi di mi ben de leki kringopziener na wan kring konmakandra. A no de fu taki dati mi ben broko mi ede nanga fa sani ben o waka. We, a distriktopziener fu wi, Brada Jack Nathan, ben gi wi alamala furu fu du èn disi gi wi prisiri. Wi ben taki fu den moro prenspari penti fu a kring konmakandra nanga den sma di ben de drape. Wan-fru-wan, wi fruteri ondrofenitori, wi hori demonstrâsi fa fu du oso-fu-oso wroko, fa fu tyari gobaka, èn fa fu hori oso-bijbelstudie. Wi singi Kownukondre singi. Nofo nyanyan ben de. Wi dringi kofi èn wi nyan kuku pikinmoro ibri tu yuru. Son sma ben sribi na tapu den bangi èn na tapu a podium, èn trawan ben sribi na tapu a gron. Tapu sonde a bigi winti saka pikinso èn fu dati ede 96 sma ben de na a publikitaki. Na ondrofeni disi leri mi fu horidoro na ini muilek situwâsi.

 Baka dati mi go dini leki kringopziener na a noordsei fu a distrikt Alberta, na a distrikt British Columbia, èn na ini a kontren di nen Yukon Territory. Son e tan skèin heri dei na den presi disi. Mi gowe libi a foto Dawson Creek di de na ini British Columbia èn mi teki na Alaska Highway, wan bigi pasi di no makriki fu pasa, fu doro na a foto Whitehorse, na ini a kontren fu Yukon (ala nanga ala dati ben de 1477 kilometer). Te mi ben e gi kotoigi na pasi, dan mi ben musu horidoro èn mi ben musu luku bun sosrefi. Bun furu snew nanga ijs ben fadon komoto fu den bergi, a sei fu den bergi ben grati, èn mi no ben man si so bun fu di a winti ben wai a snew. Den sani disi ben de wan tyalensi gi mi trutru.

Mi ben fruwondru fu si taki a waarheid ben doro te na den farawe presi fu a Noordsei. Wan leisi, mi nanga Walter Lewkowicz go na wan pikin oso di ben de krosibei fu a dorpu Lower Post, na ini British Columbia. Na oso disi ben de na Alaska Highway, krosibei fu a lanki fu Yukon Territory. Wi ben sabi taki wan sma ben libi na ini na oso fu di wi ben man si na wan pikin fensre taki faya ben leti. A ben de kande neigi yuru na neti, èn wi naki na a doro. Wan man kari wi kon na inisei nanga wan tranga sten, èn wi go na inisei. Wi fruwondru fu si wan owru man di ben didon e leisi wan Waktitoren na tapu en bedi! Fu taki en leti, a ben abi wan moro nyun tijdschrift leki den wan di wi ben e pristeri. A ben fruteri wi taki a ben kisi a tijdschrift nanga post. Fu di wi no ben go na a gemeente pasa aiti dei kaba, meki wi no ben abi den moro nyun tijdschrift ete. A man taigi wi taki a nen Fred Berg. Aladi a ben kisi den tijdschrift wan tu yari kaba, toku disi ben de a fosi leisi di Yehovah Kotoigi ben kon na en. Fred meki wi tan nanga en a neti dati. Wi ben man fruteri en furu tru tori fu Bijbel, èn wi seti sani sosrefi taki tra Kotoigi di ben pasa doronomo na a presi dati, ben go na en.

Furu yari langa mi dini den gemeente fu dri pikin kring leki kringopziener. Den gemeente disi de fu a foto Grande Prairie, di de na a owstusei fu a distrikt Alberta, te go miti na èilanti Kodiak, di de na a westsei fu Alaska. Ala nanga ala disi e teki moro leki 3500 kilometer.

Mi prisiri fu si taki Yehovah e sori ala sma bun-ati, awansi den e tan na farawe presi. Mi kon si tu taki Gado en yeye abi krakti tapu a denki nanga na  ati fu den wan di abi a yoisti denki fu a têgo libi. Wan fu den sma di ben abi a yoisti denki fu a têgo libi ben de Henry Lepine fu Dawson City, na ini Yukon. Now a presi disi nen Dawson. Henry ben e libi na wan farawe presi. Te yu e luku en bun, dan 60 yari langa a no ben komoto na a presi disi pe sma ben e suku gowtu. Ma a yeye fu Yehovah meki a man disi di ben abi 84 yari, teki waka sowan 1600 kilometer fu go na wan kring konmakandra na ini a foto Anchorage, aladi a noiti no ben go na wan gemeente konmakandra. A ben lobi a programa èn a ben prisiri srefisrefi fu abi demakandra nanga trawan. Baka di Henry drai go baka na Dawson City, a tan getrow te na dede. Furu sma di ben sabi Henry ben aksi densrefi fu san ede na owru man disi ben go na so wan farawe presi. A sani disi meki taki wan tu tra owru sma teki a waarheid tu. Sobun wi kan taki dati Henry ben gi bun kotoigi, aladi a no ensrefi ben yepi den sma disi fu kon na ini waarheid.

Mi kisi a bun-ati fu Yehovah

Na ini 1955 mi prisiri fu kisi a kari fu go na a di fu 26 klas fu a Waktitoren Bijbelskoro Gilead. A leri di mi kisi drape tranga a bribi fu mi èn a yepi mi fu kon moro krosibei na Yehovah. Di mi klari a skoro mi go doro nanga a kringwroko na ini Kanada.

Pikinmoro wán yari langa mi dini na ini a distrikt Ontario. Baka dati mi go dini na ini a moi kondre Alaska. Mi e memre den moi bigi pasi ete di e lon pasa den moi krin watra di e brenki na ini a son. Mi e memre sosrefi fa mi ben e kren den bergi di ben abi snew na tapusei fu den. Na ini a waran pisi ten fu a yari, den lagipresi nanga den opo presi gersi wan tumusi moi matamata fu bromki di abi ala sortu kloru. A loktu nanga a watra krin. Beer, wolfu, bigi sortu dia, nanga tra sortu werdri meti di e libi na ini a kontren disi e waka lontu fri.

Ma a ben de wan tyalensi fu dini na ini Alaska. Boiti taki a weer ben de wan tyalensi, a ben de wan tyalensi sosrefi fu go na den fara presi. Den gemeente di mi ben musu dini ben de fu na owstusei te go miti a westsei, èn ala nanga ala dati ben de 3200 kilometer. Na ini a ten dati a seti no ben de ete taki a kringopziener e kisi wan oto. Den brada fu den gemeente di mi ben fisiti, ben tyari mi nanga oto fu a wan gemeente go na a trawan. Ma son leisi mi ben musu aksi den man di e rei den bigi truck, noso sma di ben e koiri, fu rei nanga den.

Na so wan leisi wan sani pasa nanga mi di mi ben de na Alaska Highway. Mi ben de na a pisi fu a pasi disi di de na mindri Tok Junction, wan presi na a lanki fu Alaska, nanga Mile 1202, noso na a kontren fu Scotty Creek. A douane kantoro di de na Tok Junction de sowan 160 kilometer moro fara fu a douane kantoro di de na Mile 1202. Mi pasa a douane kantoro fu Amerkankondre di de na Tok Junction èn wan sma rei mi tyari go poti sowan 50 kilometer moro fara. Baka dati mi ben abi fu waka sowan tin yuru langa fu di nowan oto ben pasa, èn mi waka sowan 40 kilometer. Bakaten mi yere taki syatu baka di mi pasa a douane kantoro, nowan wagi ben kan pasa na a pasi drape, fu di bun furu snew ben fadon fu den bergi di ben de krosibei fu a douane kantoro. Na a ten fu mindrineti a ben kon moro kowru. A ben de sowan -23 graden Celsius, èn mi ben musu waka sowan 80 kilometer ete fosi mi ben o doro wan presi pe mi ben kan kibri. Mi ben musu feni wan presi pe mi ben kan rostu, noso sani no ben o waka bun nanga mi kwetikweti.

Di mi ben e tingatinga go doro, dan mi si wan oto na sei pasi. Wan pisi fu na oto ben tapu nanga snew. Mi prakseri taki efu mi ben man go sribi  tapu den sturu na ini na oto, dan mi ben sa man pasa a kowru neti libilibi. Di mi puru nofo snew fu na oto, dan mi ben man opo a doro, èn mi skreki fu si taki nowan enkri sturu no ben de na inisei. Na inisei fu na oto ben de kalikali. Koloku taki mi feni wan leigi pikin oso moro fara na ini a pasi. Baka di mi meki muiti fu broko go na ini na oso, dan mi leti wan faya èn mi ben man rostu wan tu yuru. Na mamanten mi ben man rei nanga wan sma go na a tra presi pe mi ben o tan. Drape mi ben kisi nyanyan di mi ben abi tranga fanowdu èn mi tai mi finga, fu di mi ben koti den.

Yehovah e meki a wroko na Noordsei go na fesi

Mi kisi furu deki-ati a fosi leisi di mi go na a foto Fairbanks. Wi ben abi bun bakapisi na ini a diniwroko, èn sowan 50 sma ben kon na a publikitaki di ben hori tapu sonde. Wi ben hori a konmakandra na ini wan pikin oso pe den zendeling Vernor nanga Lorraine Davis ben e tan. Sma ben de na ini a kukru, a sribikamra, èn na ini a gadri, en den alamala ben kaka yesi fu arki a publikitaki. Wi ben si taki wan Kownukondre zaal ben de fanowdu, fu di so furu sma ben kon fu arki a lezing. Disi ben o abi bun bakapisi gi a preikiwroko na ini Fairbanks. Sobun, nanga yepi fu Yehovah wi ben man bai wan bigi oso di ben de wan dansipresi fosi. Wi tyari na oso go poti na wan moro bun pisi gron. Wi diki wan peti, wi poti toilet nanga wan sistema fu wrokosani fu waran a presi. Baka wán yari wan bun Kownukondre zaal ben de na ini Fairbanks. Baka di den brada ben bow wan kukru sosrefi, dan den hori wan distrikt kongres na ini 1958, èn 330 sma kon na a kongres dati.

Na ini a waran pisi ten fu a yari 1960, mi rei nanga oto go te na a edekantoro fu Yehovah Kotoigi na ini New York fu go na wan skoro di ben de gi ala opziener di e reis. Den opziener disi ben komoto fu Amerkankondre nanga Kanada. Na a skoro disi wi kisi moro sabi fu den nyun seti di ben o kon na ini a wroko disi. Di mi ben de drape, dan Brada Nathan Knorr nanga tra brada di ben abi frantwortu, taki nanga mi, fu di den ben wani sabi efu wan bijkantoro ben kan opo na ini Alaska. Baka wan tu mun, wi ben prisiri fu yere taki Alaska ben o abi en eigi bijkantoro bigin fu 1 september 1961. Brada Andrew K. Wagner ben musu tiri a wroko di a bijkantoro musu du. En nanga en wefi Vera ben dini 20 yari kaba na Brooklyn èn den ben abi ondrofeni tu na ini a kringwroko. Wi warderi en trutru taki a bijkantoro opo na ini Alaska, fu di a kringopziener no abi fu go na so furu presi moro. Na so wan fasi a ben kan poti moro prakseri na den gemeente nanga den farawe kontren.

A waran pisi ten fu a yari 1962 ben de wan prisiri ten na a Noordsei. A bijkantoro fu Alaska ben gi abra na Yehovah èn wan distrikt kongres ben hori na ini a foto Juneau, na Alaska. Nyun Kownukondre zaal ben bow na ini Juneau nanga Whitehorse, sosrefi na ini Yukon, èn wan tu nyun grupu ben seti na den farawe presi.

Mi e drai go baka na Kanada

Wan tu yari mi nanga Margareta Petras di ben libi na ini Kanada, ben skrifi brifi gi makandra. Reta, na so ala sma e kari en, ben bigin pionier na ini 1947. A klari a Gileadskoro nanga bun bakapisi na ini 1955, èn a ben pionier na a owstusei fu Kanada. Di mi aksi en fu trow nanga mi, dan a ben feni en bun. Wi trow na ini Whitehorse na ini februari 1963. Na ini a herfst fu a yari dati mi kisi a wroko fu go leki kringopziener na a westsei fu Kanada èn wi prisiri fu dini 25 yari drape.

Fu di wi kisi problema nanga a gosontu fu wi, meki na ini 1988, wi kisi a wroko fu go dini leki spesrutu pionier na ini a foto Winnipeg, na ini a distrikt Manitoba. Wi ben musu sorgu gi wan Kongreshal sosrefi, èn wi du dati feifi yari langa. Wi e du ala san wi man fu abi wan prati ete na a prisiri wroko di wi e du fu meki disipel. Di wi ben de na ini a kringwroko, wi bigin furu bijbelstudie èn trawan go doro fu studeri nanga den sma disi. Fu di Yehovah e sori wi bun-ati, meki now wi man bigin den bijbelstudie èn wi abi a prisiri sosrefi fu si fa den e go na fesi teleki den gi den libi abra èn e teki dopu.

Mi sabi seiker taki a moro bun fasi fu libi, na fu dini Yehovah. A e gi wi wan bun marki na ini a libi èn a e gi wi prisiri. Boiti dati, a e meki taki a lobi di wi abi gi Yehovah e kon moro bigi ibri dei. Disi e gi wan sma trutru koloku. Awansi sortu wroko wi kisi fu du na ini a diniwroko, noso awinsi na sortu presi fu grontapu wi e tan, wi e agri nanga san a psalm skrifiman ben taki: „Koloku fu a pipel di abi Yehovah leki en Gado!”​—Psalm 144:15.

[Prenki na tapu bladzijde 24, 25]

Na ini a kringwroko

[Prenki na tapu bladzijde 25]

Wi e fisiti Henry Lepine na ini Dawson City. Mi de na kruktu-anusei

[Prenki na tapu bladzijde 26]

A fosi Kownukondre zaal na ini a foto Anchorage

[Prenki na tapu bladzijde 26]

Mi nanga Reta na ini 1998