Yu Ben Sa Wani Teki Disi Leki a Moro Bun Fasi fu Libi gi Yusrefi?

EFU yu na wan dopu Kresten kaba, dan sondro tweifri lobi gi Gado e buweigi na ati fu yu fu du en wani. Boiti dati, a diniwroko trutru musu de wan spesrutu pisi fu yu libi. Te yu luku en bun, dan Yesus Krestes ben gi ala den bakaman fu en a komando fu de sma di e meki disipel (Mateus 28:19, 20). Iya, a kan de so taki yu abi wan grontapu wroko now fu man sorgu yusrefi. Ma leki wan bakaman fu Yesus, èn leki wan Kotoigi fu Yehovah, dan na a fosi presi yu na wan Kresten dinari di musu si a Kownukondre preikiwroko leki a moro prenspari sani na ini a libi.—Mateus 24:14.

Kande yu doro pikinmoro na a kaba fu den tini yari fu yu, noso yu pasa 20 yari kaba. A kan, taki yu prakseri furu fu san yu o du nanga yu libi. Te yu e luku ala den sani di yu kan du, dan kande a moro prenspari sani di yu e suku, na wan fasi fu libi di e gi satisfaksi.

Luku dan, san Jørgen fu Deinsikondre e taki fu a bosroiti di a teki. Jørgen e taki dati a fasi fu libi di a teki, na „wan moro bun fasi fu libi pe yu kan poti prakseri na a moro prenspari wroko di de fu du”. Wan uma na Grikikondre di nen Eva èn di abi 31 yari, e taki: „Te mi e teki mi libi gersi a libi fu den speri fu mi, dan ala ten mi e kon si taki mi libi abi wan marki di bun moro leki a libi fu den. A libi di mi abi e gi mi moro satisfaksi èn a e gi mi prisiri.” Sortu fasi fu libi e gi wan sma so furu satisfaksi? Fa yu kan kon abi so wan fasi fu libi?

Gado E Sori Yu San Yu Musu Du?

A kan de wan muilek sani srefisrefi fu bosroiti sortu wroko yu sa du na ini yu libi. Fu taki en leti, son sma kande ben sa wani fu Gado sori den krinkrin san a wani taki den musu du.

Di Moses ben de na ini Midian, dan Yehovah ben gi en a komando fu drai go baka na Egipti èn fu tyari den Israèlsma komoto na katibo (Exodus 3:1-10). Gado en engel ben kon na Gideon, di ben poti na wroko fu frulusu Israèl fu a kondre di ben kwinsi den (Krutubakra 6:11-14). David ben luku skapu di Gado ben taigi Samuèl fu salfu en leki a nyun kownu fu Israèl (1 Samuèl 16:1-13). Gado no e tiri wi na so wan fasi na ini a ten disi. Na presi fu dati, wi abi fu prakseri fu sani èn teki wi eigi bosroiti fa wi sa gebroiki a koni di wi kisi fu Gado.

Yehovah opo „wan bigi doro” gi yongu Kresten na ini a ten disi „di e tyari go na aktiviteit” (1 Korentesma 16:9). Fa so? Na ini den lasti tin yari di pasa, den Kownukondre preikiman kon moro furu. Den ben de nanga moro leki 2.125.000 preikiman, ma nownow moro leki 6.000.000 de na heri grontapu. Suma e yepi fu meki den milyunmilyun Bijbel, buku, brochure, tijdschrift, nanga traktaat di de fanowdu fu gi sma nyanyan na yeye fasi èn fu preiki a bun nyunsu na heri grontapu? Den sma di abi a kefalek moi grani disi, na den memre fu a Bethelfamiri na heri grontapu.

Wan Libi Di E Gi Satisfaksi

A wortu Bethel wani taki „Oso fu Gado”, èn den Kresten friwani wrokoman di e dini na a edekantoro, èn na den bijkantoro fu a Watch Tower Society, e tan na Bethel-oso (Genesis 28:19, futuwortu). Wi ben kan teki den disiten Bethelfamiri gersi nanga ’osofamiri di bow nanga koni’; den orga bun èn den abi lobi gi Yehovah leki fondamenti.—Odo 24:3.

San wi kan taki fu Bethel pe a libi gersi wan osofamiri-libi? Wan memre fu a Bethelfamiri na Estonia di abi 25 yari, e taki: „Mi e prisiri taki mi de na mindri mati fu Yehovah ala ten. Disi e tan de a moro warti sani gi mi na Bethel.”—Psalm 15:1, 2.

Na heri grontapu, so wan 19.500 sma abi a  grani now fu du Bethel diniwroko (Psalm 110:3). Na Amerkankondre, 46 procent fu den wan di de na Bethel na sma di abi 19 yari te go miti 29 yari. Neleki Yesaya, den taki: „Dya mi de! Seni mi” (Yesaya 6:8). Yesaya — di gi ensrefi abra na Yehovah kaba — ben de klariklari fu gi ensrefi fu du moro diniwroko. Disi wani taki dati a ben musu libi wan tu sani na baka di a ben kan kisi wini fu den. Den wan di e du Bethel diniwroko e libi den oso na baka, so srefi a birti di den gwenti. Den e libi den mama fu den tu, den papa fu den, den brada, sisa, nanga mati fu den. Den de klariklari fu tyari den òfer disi „fu a bun nyunsu ede”.—Markus 10:29, 30.

Na a tra sei, blesi na yeye fasi de na Bethel srefisrefi! Wan yongu memre fu a Bethelfamiri na Rosiakondre e fruteri: „Te wi de klariklari fu gi wisrefi, dan wi kan leri furu sani di sa yepi wi fu libi na ini a nyun grontapu. Mi kan taki dati na ini mi kefal, den blesi di Yehovah gi mi de moro furu srefisrefi leki den òfer di mi tyari.”—Maleaki 3:10.

A Libi na Bethel

Fa a libi de na Bethel? Den memre fu a Bethelfamiri e agri taki a libi na Bethel na wan bun libi, a e gi den satisfaksi, èn a span srefi. Yens, di abi 43 yari, e prisiri fu du Bethel diniwroko. Fu san ede? A e taki: „Fu di mi e firi taki wi abi wan prati na a tranga muiti di e du fu klari wan prenspari wroko. Mi man frustan o bigi èn o prenspari a wroko fu Yehovah de.”

Bigin nanga munde te go miti satra, a dei na Bethel e bigin nanga a mamanten anbegi. Disi na wan takimakandra fu Bijbel di wan owruman di abi ondrofeni, e tiri. Ala munde neti a Bethelfamiri e studeri Bijbel nanga makandra wan yuru langa, nanga yepi fu A Waktitoren. Son leisi baka a studie, den e arki wan lezing fu wan tori di teki puru na ini Bijbel, èn di de spesrutu gi a Bethelfamiri.

San e pasa te wan sma e kon na Bethel fu a fosi leisi? Fu meki nyun memre kon sabi fa a libi de na Bethel, dan lepi brada fu a famiri e hori lezing fu difrenti tori di abi fu du nanga Bethel diniwroko. Na ini a fosi yari fu en Bethel diniwroko, wan nyun memre fu a Bethelfamiri e go na wan tumusi bun alawiki skoro di e hori wan tu wiki langa. A skoro seti fu meki a nyun memre frustan den Buku fu Bijbel moro bun. Den nyun Bethel wrokoman e nyan bun tu fu wan aparti Bijbel-leisiprograma. Na ini a fosi yari di den nyun memre fu a famiri de na ini Bethel diniwroko, den musu leisi a heri Bijbel.

San na a bakapisi fu ala den leri disi di den e kisi? Joshua, wan memre fu a Bethelfamiri na Hong Kong èn di abi 33 yari, e piki: „Bethel trutru meki mi warderi Yehovah moro. Mi kan abi demakandra nanga furu brada di abi furu ondrofeni èn di gebroiki a moro bigi pisi fu den libi kaba fu dini Yehovah. Mi e prisiri spesrutu fu den programa di seti fu yepi wi na yeye fasi, soleki a mamanten anbegi nanga a Waktitoren-studie makandra nanga a famiri. Boiti dati, mi lobi na orga di sani orga bun, so srefi a sempel fasi fu libi. Disi e yepi mi fu no broko mi ede nanga sani di no de fanowdu. Mi e leri tu fa mi musu handri na wan bun fasi leki Kresten, èn mi kisi wini ala ten fu di mi du dati.”

Den memre fu a Bethelfamiri e gebroiki moro furu fu a ten nanga muiti fu den, fu du san den gi densrefi fu du. Dati wani taki dati den e gebroiki a krakti èn a koni fu den moro furu fu du a wroko di den kisi fu du na Bethel. Furu difrenti sani musu du. Sonwan e wroko nanga drukpers, noso na a presi pe den e tai den buku di druk èn di den e seni go na furu gemeente. Trawan e wroko na kukru, na a kamra pe den e nyan, noso pe den e wasi krosi. A wroko di den kan kisi na fu krin a presi, fu wroko gron, fu bow sani, èn so moro fara. Sonwan abi a frantwortu fu sorgu gi den wrokosani na ini den afdeling disi. Trawan e sorgu den sma di kon siki, noso e wroko na ini kantoro. Ala wroko na Bethel di den e kisi fu du, abi en tyalensi ma den e gi prisiri. A wroko e gi den winimarki srefisrefi tu. A wroko na Bethel e gi satisfaksi, spesrutu bika a e meki Kownukondre afersi go na fesi, èn den sma di e du en, e du dati fu di den lobi Gado.

Den memre fu a Bethelfamiri e seni go na difrenti gemeente pe den musu wroko makandra nanga a gemeente. Drape den e si nanga den eigi  ai fa a wroko di den e du e gi sma wini. Den e prisiri fu go na den konmakandra fu a gemeente èn fu teki prati na a preikiwroko. Dati meki den memre fu a Bethelfamiri kon abi wan tranga banti nanga den brada nanga sisa fu den na ini den gemeente pe den e go.—Markus 10:29, 30.

Rita, wan memre fu a Bethelfamiri na Ingrisikondre, e taki: „Mi de nanga tangi na ati srefisrefi fu a gemeente! Te mi de na den konmakandra èn na ini a preikiwroko, dan mi bribi e kon tranga srefisrefi te mi e si lobi brada, sisa, pikin-nengre nanga owrusma drape! Awansi fa a no fa, toku den de drape. Dati e yepi mi fu du mi Bethel diniwroko nanga moro faya.

A libi na Bethel no wani taki dati sma drape e wroko nomo, e go na konmakandra, e du preikiwroko, èn e studeri. A famiri abi fri ten so srefi fu du sani di e gi den kowru-ati. Ten na ten, den e orga sani fu hori wan prisiri dei gi a famiri, so taki den e prisiri èn e gi makandra deki-ati na yeye fasi. Na so fasi den e prisiri fu si den kefalek moi sani di furu brada nanga sisa man du. Den e kisi fu yere ondrofenitori so srefi fu a libi fu trawan di e dini na Bethel èn dati e gi deki-ati. Den e prisiri tu te den e fisiti makandra na ini den fri ten fu tranga makandra èn fu gi makandra deki-ati. A kan de so taki wan tu presi de pe den kan du sport, so srefi bibliotheek pe den kan leisi, noso kan ondrosuku difrenti tori. Èn wi no musu frigiti den prisiri takimakandra di den abi te den e sidon na a nyanyan-tafra.

Tom, wan memre fu a Bethelfamiri na Estonia, e taki: „No fara fu Bethel, yu abi a se èn wan moi busi de krosibei tu pe mi nanga mi wefi lobi fu koiri. Son leisi mi e prei golf tu, so srefi wan sport di den e kari hockey, èn tennis makandra nanga mati di mi abi na ini a gemeente èn na Bethel. Èn te a weer moi, dan wi e teki wi baisigri go rèi pikinso.”

San Yu Kan Du fu Kan Go Wroko na Bethel?

A no de fu taki dati na a fosi presi, Bethel na wan presi pe lepi Kresten e du santa diniwroko gi Yehovah. Den e wroko drape gi den brada nanga  sisa fu den na heri grontapu di e bribi a srefi leki den, so taki den kan kisi wini. Den wan di e tron memre fu a Bethelfamiri musu doro spesrutu markitiki. San yu musu du efu yu wani go wroko na Bethel?

Den wan di e kisi primisi fu du Bethel diniwroko musu abi wan bun nen na ini a gemeente, neleki Timoteus di ben dini makandra nanga na apostel Paulus (1 Timoteus 1:1). „Den brada na Listra èn na Ikonium ben taki bun sani fu” Timoteus (Tori fu den Apostel 16:2). Ala di Timoteus ben yongu, toku a ben sabi den Buku fu Bijbel èn a ben kisi bun leri fu a waarheid (2 Timoteus 3:14, 15). Na so tu, den sma di e kisi primisi fu du Bethel diniwroko musu sabi Bijbel.

Den memre fu a Bethelfamiri musu gi densrefi dorodoro. Timoteus ben gi ensrefi dorodoro èn a ben de klariklari fu poti Kownukondre afersi na a fosi presi na ini en libi na presi fu prakseri en eigi afersi nomo. Dati ben de so krin fu si  taki Paulus ben kan taki fu en: „Bika mi no abi no wan tra sma di abi wan yeyefasi leki di fu en, di trutru sa sorgu gi den sani di abi fu du nanga unu. Bika ala den trawan e prakseri den eigi afersi nomo, no den di fu Krestes Yesus. Ma unu sabi sortu buweisi a ben gi fu ensrefi, taki, neleki wan pikin nanga wan papa, a ben wroko nanga mi leki wan srafu fu meki a bun nyunsu bekènti.”—Filipisma 2:20-22.

Den sma di e du Bethel diniwroko musu de man nanga uma di tranga na yeye fasi. Den sani di seti gi den memre fu a Bethelfamiri, e meki taki den man gro na yeye fasi. Den e du dati fu di den e studeri Bijbel, e go na Kresten konmakandra èn e teki prati na a preikiwroko doronomo, èn so srefi fu di den abi demakandra nanga lepi Kresten. Na so fasi den wan na Bethel e kisi yepi fu du soleki fa Paulus ben gi leki rai: „Tan waka na ini wánfasi nanga en, meki rutu èn bow kon tranga na ini en èn kon stanfaste na ini a bribi, neleki fa unu ben leri, abi bribi pasa marki, ala di unu e taki wortu fu tangi.”—Kolosesma 2:6, 7.

Te yu e luku a wroko di e du na Bethel, dan den wan di e kisi a grani fu du a diniwroko disi, musu tranga na skin sei, èn den musu gosontu. Efu yu doro den markitiki di wi kari, efu yu abi 19 yari noso yu de moro owru, èn efu yu dopu no moro mendri leki wán yari, dan wi e gi yu deki-ati fu prakseri fu du Bethel diniwroko.

Wi Alamala Abi wan Prati

A no de fu taki dati wi leki Kresten e angri fu poti Kownukondre afersi na a fosi presi na ini wi libi èn wani du wi diniwroko gi Yehovah nanga wi heri ati (Mateus 6:33; Kolosesma 3:23). Wi kan gi den wan di e dini na Bethel deki-ati so srefi fu tan du santa diniwroko drape. Èn den yongu brada spesrutu di doro den markitiki fu du Bethel diniwroko, e kisi deki-ati fu du muiti fu kisi a kefalek moi grani disi.

Bethel diniwroko na wan fasi fu libi di e gi wan sma wini na yeye fasi. A ben kan de a moro bun fasi fu libi gi yu trutru. Na dati a de gi Nick di ben bigin dini na Bethel di a ben abi 20 yari. Baka tin yari fu Bethel diniwroko, a e taki: „Nofotron mi e begi Yehovah fu taigi en tangi gi a no-frudini bun-ati di a sori mi. San mi ben kan aksi moro? Dyaso wi de na mindri getrow Kresten di e du ala san den man fu dini Yehovah.”

[Faki/Prenki na tapu bladzijde 22]

San Owruman èn Papa Nanga Mama Kan Du?

Owruman nanga opziener di e reis musu gi deki-ati, spesrutu na yonkuman, fu gi den nen gi Bethel. No so langa pasa, wan ondrosuku ben hori na mindri yongu memre fu a Bethelfamiri. Na ondrosuku dati ben sori taki 34 procent fu den ben kisi deki-ati, na a fosi presi fu Kresten opziener, fu poti Bethel diniwroko leki wan marki na ini den libi. Iya, a kan de so taki a gemeente fu den sa misi den. Ma a bun fu hori na prakseri san den owruman ben du ini a tori fu Timoteus. Sondro tweifri Timoteus ben de wan bun eksempre gi tra yongu sma na ini Listra nanga Ikonium. Toku den owruman no ben tapu en fu go du diniwroko makandra nanga Paulus. Den no ben si en leki wan tumusi bigi lasi gi a gemeente, efu den ben o meki Timoteus gowe nanga na apostel.—1 Timoteus 4:14.

Kresten papa nanga mama spesrutu, musu gi den pikin fu den deki-ati fu teki a yoisti bosroiti ini a tori disi. Na ondrosuku di wi kari kaba, e sori taki 40 procent fu den yonguwan, ben fruteri taki den sma di moro furu ben gi den deki-ati fu go du Bethel diniwroko, ben de a papa nanga mama fu den. Wan sisa di e dini na Bethel wan tu yari kaba, ben taki: „A fasi fu libi di mi papa nanga mama abi na ini Yehovah en diniwroko, ben gi mi deki-ati fu go du Bethel diniwroko. Fu di mi si fa den ben gi densrefi na ini a furuten diniwroko, meki mi ben kon frustan kaba taki disi ben o de a moro bun fasi fu libi di mi kan teki èn di e gi satisfaksi.”

[Faki na tapu bladzijde 24]

Den E Warderi a Bethel Diniwroko

„Mi e si mi diniwroko na Bethel leki wan tumusi warti sani. A e gi mi satisfaksi te mi e si taki mi dini Yehovah heri dei, èn taki mi sa du dati baka tamara, a tra tamara, èn so moro fara. Disi e gi mi wan bun konsensi èn a e meki mi prakseri bun sani nomo.”

„Bethel na wan presi pe yu kan gebroiki ala yu ten nanga yu krakti fu dini Yehovah sondro taki wan sani e puru yu prakseri. Disi e gi prisiri na ini na ati. Ma yu kan si Yehovah en organisâsi fu wan tra sei tu. Yu e firi taki yu de moro krosibei a presi fu pe a bigi wroko fu na organisâsi dati e orga, èn disi e meki a wroko na Bethel moro span.”

„A kon di mi kon na Bethel na a moro bun sani di pasa nanga mi. Dyaso noiti wi no kaba nanga leri. Èn dyaso mi no e kisi leri fu mi eigi wini nomo, ma fu man du moro gi Yehovah. Dyaso mi wroko noiti no sa de fu soso.”

„A koni di mi abi fu du sani, mi kan gebroiki bun na Bethel èn dati e gi mi satisfaksi. Mi de koloku tu, bika mi e gebroiki a koni dati gi Yehovah èn gi den brada nanga sisa.”

„A wroko di mi ben du fosi, no ben gi mi trutru satisfaksi nanga koloku. Someni yari kaba, mi ben angri fu wroko makandra nanga den brada nanga sisa fu mi èn fu wroko gi den. Na fu dati ede mi kon na Bethel. Mi e kisi trutru satisfaksi, fu di mi sabi taki ala a muiti di mi e du, sa meki trawan kisi wini na yeye fasi èn sa meki Yehovah kisi grani.”