Fu San Ede Wi Musu Gi Wisrefi?

Bill na wan man di pasa 50 yari. A abi wan osofamiri èn a e leri sma fa fu bow oso. A heri yari langa a e wroko furu wiki fu yepi sreka sani fu bow Kownukondre zaal gi den gemeente fu Yehovah Kotoigi. Boiti dati, a e yepi fu bow den zaal disi, ala di ensrefi e pai den kostu so taki a kan du a wroko disi. Emma di kisi bun skoro, na wan koni uma di abi 22 yari di no trow ete. Na presi fu feti soso baka den sani di a wani doro èn baka den sani di a lobi nomo, a e wroko moro leki 70 yuru ibri mun leki wan dinari fu yepi sma fu kon frustan Bijbel. Maurice nanga Betty de nanga pensyun kaba. Na presi fu no wroko so furu moro, den froisi go na wan tra kondre fu yepi sma drape fu leri sabi a prakseri di Gado abi nanga grontapu.

DEN sma disi no e denki taki den moro bun leki tra sma. Den na gewoon sma nomo di e du san den denki taki bun. Fu san ede den e gebroiki den ten, den krakti, den koni nanga den sani di den abi, fu yepi trawan? Fu di den abi furu lobi gi Gado èn gi a sma na den sei. A lobi disi ben meki taki ibriwan fu den wani gi densrefi trutru.

San a wani taki fu gi wisrefi? We, fu gi wisrefi no wani taki dati wi musu libi wan libi sondro prisiri. A no wani taki dati wi no e du sani gi wisrefi moro kwetikweti, so taki wi no e prisiri noso no de koloku moro. Soleki fa The Shorter Oxford English Dictionary e taki, efu wan sma e gi ensrefi dan a wani taki nomo dati „a no e poti prakseri na en eigi tori noso en eigi koloku noso na den sani di a wani. A e du disi fu di a abi wan fruplekti noso fu di a wani taki sani musu waka bun nanga trawan.”

Yesus Krestes—A Moro Bun Eksempre

A wan-enkri gebore Manpikin fu Gado, Yesus Krestes, na a moro bun eksempre fu wan sma di ben wani gi ensrefi. Bifo a ben tron wan libisma, dan a ben musu fu abi wan tumusi bun libi di ben meki taki a ben de koloku srefisrefi. A ben abi wan krosibei matifasi nanga en Tata èn so srefi nanga den tra yeye mekisani. Boiti dati, a Manpikin fu Gado ben gebroiki en krakti nanga koni fu du muilek nanga span wroko, neleki „wan basi wrokoman” (Odo 8:30, 31). A ben libi trutru na ini situwâsi di ben de tumusi bun; den situwâsi ben de moro bun leki iniwan sani di srefi a moro gudu sma na grontapu oiti ben kan abi. Baka Yehovah Gado, a ben abi wan hei posisi èn wan bigi grani na ini hemel.

Ma toku a Manpikin fu Gado „ben libi ala  den grani di a ben abi, èn a ben kon de neleki wan srafu èn a ben kon de neleki wan libisma” (Filipisma 2:7). Fu di a ben kon tron wan libisma èn fu di a ben gi en libi leki wan lusu-paiman fu puru na ogri di Satan ben tyari kon, meki a ben de klariklari fu libi ala den bun sani di a ben abi, na baka (Genesis 3:1-7; Markus 10:45). Dati ben wani taki dati a ben musu kon libi na mindri a sondu libisma famiri na ini wan grontapu di didon na ini a makti fu Satan Didibri (1 Yohanes 5:19). A ben wani taki tu dati a ben sa musu frudrage pen, broko-ede, nanga sari. Ma awinsi san a ben musu du, toku Yesus ben teki a fasti bosroiti fu du a wani fu en Tata (Mateus 26:39; Yohanes 5:30; 6:38). Dati ben tesi a lobi nanga a loyaalfasi fu Yesus dorodoro. A ben wani gi so furu fu ensrefi? „A ben saka ensrefi”, na so na apostel Paulus ben taki, „èn ben gi yesi te na dede, iya, dede na wan pina-udu.”—Filipisma 2:8.

„Tan Hori a Fasi fu Denki Disi na ini Unu”

Wi e kisi a deki-ati fu waka baka na eksempre fu Yesus. „Tan hori a fasi fu denki disi na ini unu, di ben de na ini Krestes Yesus tu”, na so Paulus ben gi wi deki-ati (Filipisma 2:5). Fa wi kan du disi? Wán fasi na fu di wi „e hori ai, no soso fu lobi fu luku fa a de nanga un eigi afersi, ma so srefi fu lobi fu luku fa a de nanga trawan” (Filipisma 2:4). Opregti lobi „no e suku en eigi belang”.—1 Korentesma 13:5.

Sma di lobi fu broko den ede nanga trawan, furutron sori taki den gi densrefi fu dini trawan sondro fu prakseri den eigi wini. Ma nownowde, furu sma abi a gwenti fu prakseri densrefi nomo. Sma na ini grontapu e denki densrefi fosi. Wi musu luku bun nanga a fasi fa grontapu e denki. Efu dati abi krakti tapu a fasi fa wi e si sani èn tapu a fasi fa wi e denki, dan kande wi sa meki den sani di wi e winsi kon de tumusi prenspari. Dan a broko di wi e broko wi ede nanga wisrefi sa abi krakti tapu ala sani di wi e du. A sa abi krakti tapu a fasi fa wi e gebroiki wi ten, wi krakti, nanga den sani di wi abi. Fu dati ede wi musu feti tranga, so taki a denki disi no abi krakti tapu wi.

Srefi rai di kon fu sma di e meine en trutru nanga wi, kan meki taki wi no de so fayafaya moro fu gi wisrefi. Di Petrus ben frustan san ben o pasa efu Yesus ben tan gi ensrefi, dan a ben taki: „De bun gi yusrefi, Masra” (Mateus 16:22). Soleki fa a sori dan a no ben feni en makriki fu bribi taki Yesus ben wani dede srefi gi a soevereiniteit fu en Tata, so srefi gi a frulusu fu a libisma famiri. So bun, a ben pruberi fu gi Yesus a rai fu no go doro fu gi ensrefi na so wan fasi.

’Drai Yu Baka gi Yusrefi’

San Yesus ben du dan? A tori e taki moro fara: „A drai, a luku den disipel fu en, dan a piri-ai gi Petrus èn a ben taki: ’Komoto na mi baka, Satan, bika yu no abi a denki fu Gado ma di fu libisma.’” Dan Yesus ben kari na ipi fu kon na en, makandra nanga den disipel fu en èn a ben taki: „Efu iniwan sma wani waka na mi baka, dan meki a drai en baka gi ensrefi èn teki en pina-udu èn waka na mi baka doronomo.”—Markus 8:33, 34.

So wan 30 yari baka di Petrus ben gi Yesus a rai disi, dan Petrus ben sori taki, na a ten dati, a ben frustan san a wani taki fu gi yusrefi. A no ben gi den kompe-bribiman deki-ati fu no du so furu muiti moro èn fu de bun gi densrefi. Na presi fu dati, dan Petrus ben gi den deki-ati fu tranga den yeye fu du a wroko èn fu no seti densrefi moro akruderi den lostu fu grontapu di den ben abi fositen. Awinsi tesi ben de, toku den ben musu poti a wani fu Gado na a fosi presi ini den libi.—1 Petrus 1:6, 13, 14; 4:1, 2.

A fasi fu libi di sa gi iniwan fu wi a moro bigi prisiri, na te wi e meki Yehovah kon tron wi eiginari. Wi sa kisi a moro bigi prisiri tu te wi e waka na Yesus baka na wan getrow fasi èn te wi e meki  Gado tiri ala den sani di wi e du. Paulus ben gi wan moi eksempre fu disi. A ben frustan o seryusu so wan fasi fu libi de èn a ben de Yehovah grantangi. Dati meki a ben libi den sani di a ben sa kan doro na ini a grontapu, fu di den ben sa kan puru en prakseri fu du a wani fu Gado. „Mi fu mi sei”, na so a ben taki, „sa breiti srefisrefi fu pai èn fu gi misrefi fu pai dorodoro” fu dini den afersi fu trawan (2 Korentesma 12:15). Paulus ben gebroiki den bekwaamfasi fu en fu horibaka gi den afersi fu Gado, no di fu ensrefi.—Tori fu den Apostel 20:24; Filipisma 3:8.

Fa wi ben sa kan ondrosuku wisrefi fu si efu wi e denki neleki na apostel Paulus? Wi ben sa kan aksi wisrefi sani leki: Fa mi e gebroiki mi ten, mi krakti, mi koni, nanga den sani di mi abi? Mi e gebroiki den sani disi nanga tra warti sani di mi kisi soso fu feni moro wini gi misrefi, noso mi e gebroiki den fu yepi trawan? Mi prakseri kaba efu mi kan du moro fu meki a bun nyunsu bekènti, wan wroko di e kibri sma libi? Mi ben sa kan du dati kande fu di mi e wroko leki wan furuten preikiman? Mi kan abi wan moro bigi prati te den e du den wroko soleki a bow noso na ondrow fu Kownukondre zaal? Mi e teki den okasi di mi kisi wantewante fu yepi den wan di abi yepi fanowdu? Mi e gi Yehovah a moro bun sani di mi abi?—Odo 3:9.

„Moro Koloku De ini a Gi fu Sani”

Ma a de trutru wan koni sani fu gi wisrefi? Iya, na so a de trutru! Fu den sani di Paulus ben ondrofeni na ini en eigi libi, a ben sabi taki so wan fasi fu gi ensrefi e tyari furu blesi kon. A ben meki taki a ben abi furu koloku èn a ben abi trutru prisiri. A ben fruklari a sani disi di a ben miti den owru man fu Efeise na Mileite. Paulus ben taki: „Mi sori unu na ini ala sani taki fu wroko na so wan fasi [pe mi e gi misrefi], unu musu yepi den wan di swaki, èn musu hori den wortu fu Masra Yesus na prakseri, di ensrefi ben taki: ’Moro koloku de ini a gi fu sani, leki ini a kisi fu sani’” (Tori fu den Apostel 20:35). Milyunmilyun sma si taki te den e gi densrefi na a fasi disi, dan dati e tyari furu koloku kon nownow kaba. A sa tyari prisiri kon so srefi na ini a ten di e kon te Yehovah e pai den wan di ben poti den afersi fu En èn di fu trawan bifo den eigi afersi.—1 Timoteus 4:8-10.

Di den ben aksi Bill fu san ede meki a e span ensrefi so fu yepi trawan fu bow Kownukondre zaal, dan a ben taki: „Te mi e yepi den gemeente di sma e si moro furu leki pikin gemeente na a fasi disi, dan mi e firi bun srefisrefi. Mi breiti  taki mi man gebroiki iniwan koni nanga sabi di mi abi gi a bun fu trawan.” Fu san ede meki Emma wani gebroiki en krakti nanga en koni fu yepi trawan fu leri sabi Bijbel waarheid? „Mi no man denki taki mi e du wan tra sani. Ala di mi yongu ete èn mi man du dati, mi wani du so furu nomo leki mi man, fu plisi Yehovah èn fu yepi trawan. Te wi e libi son wan fu den wini di wi ben sa kan kisi na materia sei, dan dati a no wan bigi sani. Mi e du nomo san mi musu du, te mi luku den sani di Yehovah du gi mi.”

Maurice nanga Betty no e sari taki den no bigin wan moro makriki libi, baka di den wroko tranga furu yari fu kweki den pikin fu den èn fu sorgu gi na osofamiri. Now di den de nanga pensyun kaba, den wani go doro fu du wan bun sani nanga den libi èn den wani fu abi wan marki na ini den libi. „Now wi no wani sidon nomo, langa wi futu”, den e taki. „A leri di wi e leri trawan fu Yehovah na ini wan dorosei kondre, e gi wi na okasi fu tan abi wan marki na ini wi libi.”

Yu teki a fasti bosroiti fu gi yusrefi? Disi no sa de makriki. Doronomo den sondu lostu di wi abi leki onvolmaakti libisma e feti nanga a winsi di wi abi fu plisi Gado trutru (Romesma 7:21-23). Ma a de wan feti di wi kan wini efu wi meki Yehovah tiri wi libi (Galasiasma 5:16, 17). A sa memre trutru fa wi ben gi wisrefi fu dini en èn a o gi wi bun furu blesi. Fu tru, Yehovah Gado sa ’opo den sroisi fu hemel gi unu èn trutru kanti wan blesi kon na unu tapu te leki no wan sani e mankeri moro’.—Maleaki 3:10; Hebrewsma 6:10.

[Prenki na tapu bladzijde 23]

Yesus ben wani gi ensrefi. Yu wani du dati tu?

[Prenki na tapu bladzijde 24]

Paulus ben poti ala en prakseri na a Kownukondre preikiwroko