Sori Taki Yu E Tan Wakti!
Sori Taki Yu E Tan Wakti!
„Mi sa sori taki mi e tan wakti a Gado fu mi frulusu. A Gado fu mi sa arki mi.”—MIKA 7:7.
1, 2. (a) Fa wan fowtu fasi fu si sani, ben du den Israèlsma ogri na ini a gran sabana? (b) San kan pasa nanga wan Kresten di no e kweki wan yoisti fasi fu si sani?
FURU sani ini a libi wi kan si leki bun sani noso takru sani. Dati e anga fu a fasi fa wi e si a sani. Di den Israèlsma ben de na ini a gran sabana, dan na wan wondru fasi den ben kisi mana fu nyan. Den ben musu luku lontu èn si fa a presi drape ben drei srefisrefi, èn dan den ben musu taigi Yehovah tangi taki toku a ben gi den nyanyan. Dan den ben o sori wan bun fasi fu si sani. Na presi fu dati, den ben memre den furu nyanyan di den ben kisi na Egipti èn den ben kragi taki a mana no ben switi fu nyan. Fu tru den ben abi takru fasi fu denki!—Numeri 11:4-6.
2 So srefi na ini a ten disi, a fasi fa wan Kresten e denki, kan meki en firi prisiri noso kan meki en firi taki a de na ini dungru. Efu wan Kresten no abi a yoisti fasi fu si sani, dan makriki a kan lasi en prisiri, èn dati ben sa de wan seryusu tori, bika Nehemia ben taki: „A prisiri fu Yehovah na [wi] fortresi” (Nehemia 8:10). Wan bun nanga prisiri fasi fu si sani e yepi wi fu tan tranga, èn a e meki a gemeente de na ini vrede èn na ini wánfasi.—Romesma 15:13; Filipisma 1:25.
3. Fa wan yoisti fasi fu si sani, ben yepi Yeremia na ini tranga ten?
3 Ala di Yeremia ben libi na ini tranga ten, toku a ben sori wan bun fasi fu denki. Srefi di a ben si den kefalek ogri sani di ben pasa di Yerusalem ben fadon na ini 607 b.G.T., toku Yeremia ben abi wan bun fasi fu si sani. Yehovah no ben sa frigiti Israèl, èn a nâsi ben sa tan na libi. Yeremia ben skrifi na ini a buku Kragisingi: „A de den lobi bun-ati fasi fu Yehovah, di meki taki wi no kon na wi kaba, bika den sari-ati fasi fu en no sa kon na wan kaba noiti. Ibri mamanten den de nyunyun. A getrowfasi fu Yu de pasa marki” (Kragisingi 3:22, 23). Ala ten, den futuboi fu Gado ben suku fu tan abi wan bun fasi nanga prisiri fasi fu si sani, srefi na ini den moro muilek situwâsi.—2 Korentesma 7:4; 1 Tesalonikasma 1:6; Yakobus 1:2.
4. Sortu fasi fu si sani Yesus ben abi doronomo? Èn fa a fasi disi ben yepi en?
4 Siksi hondro yari baka Yeremia, wan bun fasi fu si sani ben yepi Yesus fu horidoro. Wi e leisi: „Fu a prisiri ede di ben poti na en fesi, meki a ben horidoro na wan pina-udu, a ben wisiwasi syen, èn a go sidon na a reti anu fu a kownusturu fu Gado” (Hebrewsma 12:2). Awansi sortu gens noso frufolgu ben wakti Yesus — srefi a hebi pen fu dede na wan pina-udu — toku a ben tan prakseri „a prisiri di ben poti na en fesi”. A prisiri dati ben de a grani di Yesus ben abi fu regtfardiki a reti di Yehovah abi fu tiri ala sani èn a santa di Yesus ben santa Yehovah nen; a prisiri dati ben de tu a tyari di Yesus sa tyari bigi blesi gi a libisma famiri di e gi yesi na ini a ten di e kon.
Sori Taki Yu E Tan Wakti
5. Na ini sortu spesrutu situwâsi, a tan di wi e tan wakti, sa yepi wi fu si sani na wan yoisti fasi?
5 Efu wi e kweki a fasi fu denki di Yesus ben abi, dan wi no sa lasi a prisiri fu Yehovah; a prisiri disi wi no sa lasi srefi efu sani no e waka ala ten leki fa wi ben denki noso o ten wi ben denki dati den ben o pasa. A profeiti Mika ben taki: „Fu mi sei, mi sa tan fruwakti Yehovah. Mi sa sori taki mi e tan wakti a Gado fu mi frulusu” (Mika 7:7; Kragisingi 3:21). Wi kan sori taki wi e tan wakti tu. Fa? Na furu fasi. Wán sani na taki wi e firi kande taki wan brada di de na ini wan frantwortu posisi, meki wan fowtu, èn a fowtu dati musu kon reti baka wantewante. Efu wi e sori taki wi e tan wakti, dan wi sa prakseri den sani disi fosi: ’Trutru a ben meki wan fowtu, noso na mi no si a tori bun? Efu a ben meki wan fowtu, dan a kan taki Yehovah e meki a sani disi pasa fu di En sabi taki a brada sa kon bun baka èn taki a no de fanowdu fu poti sani reti baka wantewante?’
6. Fa a wakti di wan sma e wakti sa yepi en nanga wan problema di e trobi en?
6 Te wi abi wan problema di e trobi wi noso te wi e feti nanga wan swakifasi, dan a kan de fanowdu fu tan wakti. Kon wi taki dati wi e aksi Yehovah fu yepi wi, ma a problema no e lusu. Dan fa wi o du? Wi sa musu tan du ala san wi man fu lusu a problema, èn baka dati wi musu bribi den wortu fu Yesus: „Tan aksi, èn unu sa kisi; tan suku, èn unu sa feni; tan naki na tapu doro, èn a doro sa opo gi unu” (Lukas 11:9). Tan begi, èn wakti tapu Yehovah. Te a de wan yoisti ten gi Yehovah, dan tapu en eigi fasi a sa piki a begi fu yu.—1 Tesalonikasma 5:17.
7. Fa a wakti di wi e wakti sa yepi wi fu frustan Bijbel moro krin?
7 Te Bijbel profeititori e kon tru, dan wi e frustan den Buku fu Bijbel moro krin. Ma sontron, wi kan denki taki wan tu sani no ben tyari kon na krin na a yoisti ten. Te a no e kon tru tapu a ten di wi ben sa wani en fu kon tru, dan wi ben sa wani fu wakti? Memre taki Yehovah ben feni en bun fu tyari „a santa kibritori fu a Krestes” kon na krin safrisafri na ini wan pisi ten fu so wan 4000 yari (Efeisesma 3:3-6). Dan wi abi reide fu lasi pasensi? Wi e tweifri taki wan „getrow èn koni srafu” ben poti na wroko fu gi Yehovah en pipel „den nyanyan na a reti ten”? (Mateus 24:45). Fu san ede wi sa lasi a prisiri di wi abi fu Gado, nomo fu di wi no e frustan ala sani krinkrin ete? Memre taki na Yehovah e taki o ten èn fa En sa tyari den ’frutrow afersi’ fu en kon na krin.—Amos 3:7.
8. Fa a pasensi fu Yehovah ben wroko bun gi so furu sma?
8 Wan tu sma kan lasi-ati fu di den e firi taki baka so furu yari fu getrow diniwroko, toku den no san tan na libi fu si „a bigi èn frede dei fu Yehovah” (Yoèl 2:30, 31). Toku den kan kisi deki-ati efu den e luku a bun sani di e kon fu dati. Petrus ben gi leki rai: „Teki a pasensi fu wi Masra leki frulusu” (2 Petrus 3:15). A pasensi fu Yehovah ben gi milyunmilyun tra opregti sma pasi fu leri a waarheid. Dati a no wan moi sani? Moro fara, o moro Yehovah abi pasensi, o moro ten wi abi fu „tan wroko gi [wi] eigi frulusu nanga frede èn nanga beifi”.—Filipisma 2:12; 2 Petrus 3:11, 12.
9. Efu wi no man du furu ini a diniwroko fu Yehovah, dan fa a wakti di wi e tan wakti sa yepi wi fu horidoro?
9 Efu wi e tan wakti, dan dati sa yepi wi fu no lasi-ati te wi e kisi gens, e kon siki, e kon moro owru, noso e kisi tra problema di kan muilek wi na ini a Kownukondre diniwroko. Yehovah e fruwakti fu wi taki wi e dini en nanga wi heri ati (Romesma 12:1). Ma toku, Gado en Manpikin di e firi „sari gi a mofinawan èn gi a pôtiwan”, no e aksi moro fu wi leki san wi man du, èn na so a de tu nanga Yehovah (Psalm 72:13). So bun, wi e kisi deki-ati fu du san wi man, fu wakti nanga pasensi teleki den situwâsi fu wi kenki — den kan kenki na ini a seti fu sani disi noso na ini a wán di e kon. Memre taki: „Gado no de onregtfardiki, so taki a sa frigiti a wroko fu unu èn a lobi di unu ben sori gi a nen fu en, fu di unu ben dini den santawan èn e tan dini den.”—Hebrewsma 6:10.
10. Sortu fasi di no komoto fu Gado, wan sma di e tan wakti no musu teki abra? Broko-broko disi pikinso.
10 A wakti di wi e tan wakti sa yepi wi tu fu no du sani na wan bigimemre fasi. Wan tu sma di fadon komoto na bribi, ben de sma di no ben wani wakti. Kande den ben firi taki sani ben musu kenki, kande a fasi fa wi ben frustan Bijbel ben musu kenki noso a fasi fa na organisâsi ben drai ben musu kenki. Toku den no ben wani erken taki na Yehovah en yeye e pusu a getrow èn koni srafu fu kenki sani te Yehovah feni taki a de a yoisti ten fu kenki sani; èn kenki no e feni presi te wi e firi taki sani musu kenki kande. Boiti dati, ibri kenki di e feni presi musu kruderi nanga Yehovah en wani, èn a fasi fa wi e denki fu a tori, no musu de a sani di e meki a kenki feni presi. Den sma di fadon komoto na bribi e meki wan bigimemre fasi tiri den èn a fasi dati e pori den denki èn e meki den naki futu fadon. Ma efu den ben teki a fasi fa Krestes ben denki, dan den ben kan tan de nanga prisiri èn tan nanga Yehovah en pipel.—Filipisma 2:5-8.
11. Fa wi kan meki bun gebroiki fu a ten di wi e teki fu tan wakti? Èn baka den eksempre fu suma wi e waka?
11 A no de fu taki dati fu tan wakti, no wani taki dati wan sma musu lesi noso no musu du diniwroko moro. Wi abi sani fu du. Fu eksempre, wi musu studeri Bijbel nanga wisrefi èn na so fasi sori a srefi fasi fu denki fu yeye afersi di den getrow profeiti èn den engel srefi ben sori. Petrus e taki fu a prakseri di wi musu prakseri den sani disi: „Fu a frulusu disi, den profeiti di ben taki profeititori fu a no-frudini bun-ati gi unu, ben aksi sani fayafaya èn ben ondrosuku sani finifini. . . . Na ini den srefi sani dati den engel e angri fu luku” (1 Petrus 1:10-12). Boiti taki wi musu studeri nanga wisrefi, dan wi musu go na den konmakandra tu dorodoro, èn wi musu begi dorodoro (Yakobus 4:8). Den wan di e sori taki den sabi a yeye nowtu fu den fu di den e nyan yeye nyanyan dorodoro èn e kon makandra nanga kompekresten, e sori taki den teki a fasi fa Krestes e denki.—Mateus 5:3.
Si den Sani Leki Fa Den De Trutru
12. (a) Sortu fri Adam nanga Efa ben suku? (b) San ben de a bakapisi di a libisma famiri teki a fasi fu Adam nanga Efa abra?
12 Di Gado ben meki a fosi man nanga uma, dan a ben abi a reti fu taki san bun èn san ogri (Genesis 2:16, 17). Adam nanga Efa ben wani de fri fu Gado en tiri, èn san ben pasa fu dati ede wi kan si na heri grontapu noyaso. Na apostel Paulus ben taki: „Nanga wán man, sondu ben kon na grontapu èn nanga sondu dede kon, èn na so dede panya go na ala libisma, fu di den alamala ben sondu” (Romesma 5:12). Siksi dusun yari fu a historia fu libisma sensi a ten fu Adam, sori o tru den wortu fu Yeremia de: „Mi sabi heri bun, o Yehovah, taki a no de na a sma fu grontapu fu a bepaal en pasi. A no de na wan man di e waka srefi fu bepaal pe fu poti en futu na pasi” (Yeremia 10:23). Te wi e erken taki den wortu dati fu Yeremia na tru wortu, dan a no wani taki dati wi lasi. Den wortu dati e sori fa sani de trutru. Den e fruklari san pasa ala den hondrohondro yari di „a wan libisma tiri a tra libisma nanga ogri bakapisi gi en”, fu di libisma ben tiri densrefi sondro yepi fu Gado.—Preikiman 8:9.
13. Te Yehovah Kotoigi e luku san libisma kan du, dan fa den e sori taki den e si sani fa den de trutru?
13 Te wi e luku a situwâsi fu a libisma famiri, dan Yehovah Kotoigi e frustan taki wi no man du ala sani di wi ben sa wani du na ini a seti fu sani noyaso. Wan bun fasi fu si sani kan yepi wi tan nanga prisiri, ma dati no de wan lusu gi ala problema. Na ini wan fu den yari fu 1950 te go miti 1955, wan Amerkan kerki fesiman ben tyari wan buku kon na doro di ben nen The Power of Positive Thinking. A buku ben gi leki rai taki wan sma kan lusu furu problema nomo efu a abi wan bun fasi fu si sani. Wan bun fasi fu denki na trutru wan moi sani. Ma ondrofenitori e sori taki sani de di kan hori ibriwan fu wi na baka fu doro den sani di wi wani doro; den sani dati na a sabi di wi abi, a bekwaamfasi fu wi, den gudu fu wi, èn wan lo tra sani moro. Èn efu wi luku na heri grontapu, dan den problema bigi tumusi fu libisma lusu den na wan bun fasi — awansi o bun den e denki tu!
14. Yehovah Kotoigi abi wan takru fasi fu denki? Broko-broko dati pikinso.
14 Fu di Yehovah Kotoigi e si den sani disi fa den de trutru, dati meki trawan e krutu nanga den Kotoigi taki den abi wan takru fasi fu denki. Ma na presi fu abi wan takru fasi fu denki, Yehovah Kotoigi e taigi sma fayafaya fu a Wan-enkri Sma di kan meki sani waka bun ala ten gi libisma. Èn nanga a fasi disi, den e teki a fasi fa Krestes e denki (Romesma 5:12). Èn den e tan du furu fu yepi trawan kisi wan bun matifasi nanga Gado. Den sabi taki te fu kaba, na a sani disi sa de a moro bun sani gi trawan.—Mateus 28:19, 20; 1 Timoteus 4:16.
15. Fa a wroko fu Yehovah Kotoigi e meki a libi fu tra sma kon moro bun?
15 Yehovah Kotoigi no e tapu den ai gi den problema di de na ini a libimakandra — spesrutu den sani di sma e du, di no e kruderi nanga Bijbel, èn di e pori a libimakandra. Bifo wan sma wani tron wan fu den Kotoigi fu Yehovah, dan a musu tyari kenki kon na ini en libi; furutron a sma musu tapu nanga takru gwenti di a abi, èn di no e plisi Gado tu (1 Korentesma 6:9-11). Dati meki Yehovah Kotoigi yepi sma di e arki, fu feti fu wini drungufasi, gebroiki fu drug, hurudu, nanga dòbel. Den sma disi di kenki den libi, leri fu sorgu den osofamiri fu den na wan frantwortu fasi èn na wan opregti fasi (1 Timoteus 5:8). Te den sma disi e kisi yepi na so wan fasi, dan den problema na ini a libimakandra e kon moro mendri — moro mendri sma de di e gebroiki drug, moro mendri sma de di e naki kofu na ini na osofamiri, èn so moro fara. Fu di Yehovah Kotoigi na sma di e saka densrefi na ondro den wet fu a libimakandra èn fu di den e yepi trawan fu kenki den libi, dati meki den e puru pikinso fu a hebi wroko fu den lantiman di abi a wroko fu lusu problema ini a tori fu fa sma e libi nanga makandra.
16. Fu san ede Yehovah Kotoigi no e go na ini grupu di wani kenki a libimakandra?
16 So bun, Yehovah Kotoigi kenki a libi di sma musu libi akruderi bun gwenti nanga gronprakseri na ini grontapu? We, na ini den lasti tin yari di pasa, den Kotoigi gro fu so wan 3.800.000 sma te kon miti so wan 6.000.000 sma. Dati na so wan 2.200.000 sma moro; fu den sma disi furu fu den tapu nanga fowtu sani di den ben du bifo den tron wan Kresten. Furu sma feni wan moro bun libi! Toku a nomru fu den sma disi, pikin srefisrefi te yu e agersi en nanga den sma di gebore na grontapu na ini a srefi pisi ten dati, namku 875.000.000 sma! Yehovah Kotoigi feni en wan prisiri sani fu yepi sma di e arki, ma toku den Kotoigi sabi taki weiniki sma fu a libisma famiri sa waka a pasi fu libi (Mateus 7:13, 14). Ala di den Kotoigi e wakti den kenki di o feni presi na heri grontapu èn di Gado wawan sa man tyari kon, toku den no e go na ini grupu di wani kenki a libimakandra; furutron den grupu disi e bigin nanga bun sani di den wani du, ma te fu kaba na bruya sani e pasa nanga ogridu srefi.—2 Petrus 3:13.
17. San Yesus ben du fu yepi den sma di a ben miti, ma san en no ben du?
17 Fu di Yehovah Kotoigi e waka a pasi disi, dati meki den e sori a srefi frutrow di Yesus ben sori na ini Yehovah di a ben de na grontapu. Na ini a fosi yarihondro, Yesus ben du wondru èn ben dresi furu sma (Lukas 6:17-19). A ben opo dede sma baka srefi (Lukas 7:11-15; 8:49-56). Ma Yesus no ben puru siki na heri grontapu, èn a no ben puru a feanti dede. Yesus ben sabi taki Gado en ten no ben doro ete fu du den sani disi. Nanga den moro bun èn koni fasi di wan volmaakti man abi, Yesus ben kan du furu fu lusu seryusu problema na politiek sei èn problema di sma abi fu libi nanga makandra. Soleki fa a sori, dan wan tu fu den sma na ini a ten fu Yesus, ben wani taki a ben musu teki a makti abra èn lusu den sortu problema disi, ma Yesus no ben wani kwetikweti. Wi e leisi: „Di den sma ben si den marki di a ben du, den ben bigin taki: ’Disi musu de trutru a profeiti di ben o kon na grontapu.’ Dati meki Yesus, di ben sabi taki den ben wani kon grabu en fu meki a tron kownu, ben hari go baka na tapu a bergi, en wawan.”—Yohanes 6:14, 15.
18. (a) Fa ala ten Yesus sori taki a tan wakti? (b) Fa den sani di Yesus e du, kenki sensi 1914?
18 Yesus no ben wani notinoti fu du nanga politiek noso soifri sociaal wroko fu yepi sma na ini a libimakandra, bika a ben sabi taki en ten no ben doro ete fu tron kownu èn fu dresi ala sma na ala presi. Srefi di a ben opo go na hemel èn kisi wan yeye libi pe a no man dede noiti moro, dan toku a ben wani wakti a reti ten di Yehovah poti fu du sani (Psalm 110:1; Tori fu den Apostel 2:34, 35). Ma sensi Yesus tron Kownu fu Gado Kownukondre na ini 1914, dan a e go doro „leki winiman èn fu kaba a wini fu en” (Openbaring 6:2; 12:10). Tra sma di e kari densrefi Kresten, no wani teki den Bijbel leri fu a Kownukondre. Fu tru, wi de tangitangi fu saka wisrefi na ondro Yesus leki kownu!
Fu Tan Wakti—Wan Hebi Sani Noso wan Prisiri Sani?
19. O ten a wakti di wan sma e wakti „e meki na ati kon siki”, èn o ten dati na wan prisiri sani?
19 Salomo ben sabi taki fu tan wakti kan de wan hebi sani. A ben skrifi: „Fruwakti di musu skoifi poti na wan tra ten, e meki na ati kon siki” (Odo 13:12). Seiker, efu wan sma e tan fruwakti sani sondro taki a abi bun reide gi dati, dan dati kan meki na ati kon siki èn a sma e lasi-ati. Ma efu wi e wakti moi sani — kande wan trow, wan pikin di o gebore, noso fu miti lobiwan baka — dan dati kan furu wi nanga prisiri fu wakti, langa ten bifo a dei doro srefi. A prisiri dati e kon moro bigi, efu wi e gebroiki a ten fu wakti na wan koni fasi, e sreka wisrefi gi a sani di o pasa.
20. (a) Sortu wondru sani wi e fruwakti seiker-seiker? (b) Fa wi kan feni prisiri te wi e wakti tapu Yehovah fu a du ala san a abi na prakseri?
20 Te wi abi a fasti overtoigi taki den fruwakti fu wi sa kon tru — srefi efu wi no sabi o ten den sa kon tru — dan toku a no abi fu de so taki a ten di wi e wakti „e meki na ati kon siki”. Den getrow anbegiman fu Gado, sabi taki a Dusun Yari Tiri fu Krestes e kon seiker. Den abi na overtoigi taki den o si a ten te dede nanga siki no sa de moro. Nanga fayafaya fruwakti den e prisiri fu wakti a ten te milyardmilyard sma di dede sa opo baka, so srefi den lobiwan fu den (Openbaring 20:1-3, 6; 21:3, 4). Na ini a ten disi pe ala sortu muilek sani e pasa fu di sma e doti a grontapu, den getrow anbegiman fu Gado e prisiri taki den abi a dyaranti fu si a grontapu disi tron wan Paradijs (Yesaya 35:1, 2, 7). Fu tru, a de wan koni sani fu gebroiki a ten di wi musu wakti na wan bun fasi, „ala ten [abi] furu fu du na ini a wroko fu Masra” (1 Korentesma 15:58). Tan nyan yeye nyanyan. Tron wan moro bun mati fu Yehovah. Suku fu abi mati di abi wan ati di e pusu den fu dini Yehovah. Gi kompe bribiman deki-ati. A ten di Yehovah libi abra ete, gebroiki a ten dati bun. Dan a wakti di yu e wakti tapu Yehovah noiti sa meki yu ’ati kon siki’. Na presi fu dati a wakti di yu e wakti sa furu yu nanga prisiri!
Yu Kan Tyari Disi Kon na Krin?
• Fa Yesus ben sori taki a ben tan wakti?
• Na ini sortu situwâsi, Kresten musu sori taki den e tan wakti?
• Fu san ede Yehovah Kotoigi breiti fu wakti tapu Yehovah?
• Fa a wakti di wi e wakti tapu Yehovah kan tron wan sani di e meki wi prisiri?
[Aksi fu a tori disi]
[Prenki na tapu bladzijde 12]
Yesus ben horidoro fu a prisiri ede di ben poti na en fesi
[Prenki na tapu bladzijde 13]
Srefi baka furu yari fu diniwroko, wi kan tan de nanga prisiri
[Prenki na tapu bladzijde 15]
Milyunmilyun sma meki a libi fu den kon moro bun fu di den tron Yehovah Kotoigi