Yeremia 21:1-14
21 Yeremia ben kisi wan boskopu fu Yehovah. Na a ten dati Kownu Sedekia ben seni Pasyur, a manpkin fu Malkia, èn Sefanya, a manpkin fu Priester Maseya, fu aksi Yeremia:
2 „Grantangi, aksi Yehovah san wi musu du, bika Kownu Nebukadnesar* fu Babilon kon feti nanga wi. Kande Yehovah kan du wan kfalek sani fu yepi wi, so taki a kownu kan hari gwe.”
3 Ne Yeremia taigi den: „Disi na san un musu taigi Sedekia:
4 ’Yehovah, a Gado fu Israel, taki: „Mi o sorgu taki unu no o man gebroiki den fetsani fu unu teige a kownu fu Babilon. Unu no o man feti nanga den Kaldeyasma di de lontu a heri skotu na dorosei fu a foto. Mi o tyari den kon na wán na mindrisei fu a foto disi.
5 Mi srefi o feti nanga unu. Mi o langa mi anu fu naki unu nanga ala mi krakti èn nanga atibron. Iya, nanga bigi atibron mi o kon feti nanga unu.
6 Mi o naki ala sma di e tan na ini a foto disi. Libisma nanga meti o dede. Wan takru siki o kiri den.”’
7 ’Yehovah taki: „Te takru siki, fet’owru nanga angri kiri furu fu den sma fu a foto, dan Kownu Sedekia fu Yuda, den futuboi fu en nanga wan tu sma o tan abra ete. Ma mi o libi den sma disi gi Kownu Nebukadnesar* fu Babilon. Iya, den feanti nanga den sma di e suku fu kiri den, o kiri den nanga fet’owru. A kownu no o abi nowan firi gi den èn a no o sari den srefsrefi.”’
8 Yu musu taigi a pipel disi: ’Disi na san Yehovah taki: „Luku, mi e gi unu na okasi fu besroiti efu unu wani teki a pasi fu libi noso a pasi fu dede.
9 Efu wan sma tan na ini a foto disi, a o dede fu di fet’owru, angri nanga takru siki o kiri en. Ma efu wan sma kmoto na ini a foto èn a gi ensrefi abra na den Kaldeyasma di lontu a foto, dan a no o dede. A o tan na libi.”’*
10 ’„Mi drai baka gi a foto disi. Mi o meki bigi ogri miti a foto disi èn nowan bun o psa nanga en. Mi o libi en gi a kownu fu Babilon èn a o bron en nanga faya”, na so Yehovah taki.
11 Yehovah abi wan boskopu tu gi na osofamiri fu a kownu fu Yuda.
12 Un sma fu David, disi na san Yehovah taki:
„Efu ibri m’manten unu e koti krutu na wan reti fasièn efu unu e yepi sma te bedrigiman du ogri nanga den,dan mi ati no o bron nanga unu moro.Den ogri di unu e du, e meki mi ati bron.Na atibron fu mi de leki wan faya di o bron unu èn nowan sma o man kiri en.”’
13 ’Un sma di e tan na a foto di de na tapu a stonbergi fu a lagipresi,mi o strafu unu’, na so Yehovah taki.
’Sonwan fu unu e taki: „Suma o man saka kon na wi?
Suma o man broko kon na ini den oso fu wi?”
14 Ma mi o aksi unu frantwortu fu den sani di unu e du.Mi o sutu faya gi a busi fu a foto
èn a faya o bron ala sani na en lontu’,na so Yehovah taki.”
