Yeremia 13:1-27
13 Yehovah taigi mi: „Go bai wan banti fu linnen-krosi èn tai en na yu mindribere. Ma no meki a kon nati.”
2 Ne mi bai a banti èn mi tai en na mi mindribere soleki fa Yehovah taki.
3 Dan Yehovah taki nanga mi ete wan leisi. A taki:
4 „Teki a banti di yu bai èn di yu tai na yu mindribere. Opo go na Eufraat-liba, dan yu kibri en drape na ini wan bergi-olo.”
5 Dati meki mi go kibri en na Eufraat-liba, soleki fa Yehovah taigi mi.
6 Ma baka wan heri pisi ten Yehovah taigi mi: „Opo go na Eufraat-liba èn teki a banti di mi ben taigi yu fu kibri drape.”
7 Sobun, mi go na Eufraat-liba èn mi diki a banti puru na a presi pe mi ben kibri en. Ne mi si taki a banti pori. A no ben bun fu gebroiki moro.
8 Dan Yehovah taigi mi:
9 „Disi na san Yehovah taki: ’Na a srefi fasi mi o pori Yuda, fu di a abi bigifasi. Mi o pori Yerusalem tu, fu di a abi bigifasi psa marki.
10 A pipel disi ogri, den e weigri fu arki mi èn den e du nomo san a takru ati fu den wani. Den e anbegi tra gado èn den e boigi gi den tu. Ma den o tron leki a banti disi di no bun fu gebroiki moro.’
11 ’Neleki fa wan banti tai steifi na a mindribere fu wan man, na so mi ben meki ala den sma fu Israel nanga ala den sma fu Yuda tai hori na mi’, na so Yehovah taki. ’Den ben o tron mi pipel èn den ben o meki mi kisi biginen, glori, prèise nanga grani. Ma den no ben arki mi.’
12 Yu musu taigi den tu: ’Disi na san Yehovah, a Gado fu Israel, taki: „Wan bigi kroiki meki fu poti win na ini.”’ Dan den o taigi yu: ’Yu denki taki wi no sabi taki wan bigi kroiki meki fu poti win na ini?’
13 Dan yu musu taigi den: ’Disi na san Yehovah taki: „Neleki fa wan sma e furu wan bigi kroiki nanga win, na so mi o furu unu nanga win teleki unu kon drungu. Iya, ala den sma di e libi na ini a kondre disi, den kownu di e sdon na tapu a kownusturu fu David, den priester, den profeiti nanga ala den sma di e tan na ini Yerusalem o kon drungu.
14 Mi o naki den na makandra meki den broko. Iya, mi o naki p’pa nanga manpkin broko”, na so Yehovah taki. „Mi no o sari den èn mi no o abi nowan firi gi den. Noti no o tapu mi fu pori den.”’
15 Arki èn poti prakseri.
Un no musu abi heimemre, bika na Yehovah taki den sani disi.
16 Gi un Gado Yehovah glori,fosi a tyari dungru konèn fosi unu stotu un futu na tapu den bergi te son dongo.
Unu o winsi taki leti ben de,ma a o meki ala sani kon dungru.Iya, a o meki ala sani kon dungru srefsrefi.
17 Efu unu no wani arki,dan mi o krei kibrikibri fu di unu abi bigifasi.
Mi ai o lon watra èn mi o krei langalanga watra-aifu di sma teki den skapu fu Yehovah tyari gwe nanga tranga.
18 Taigi a kownu nanga en m’ma: ’Un go sdon na wan lagi presi,bika den o puru den moi kroon fu unu na un ede.’
19 Den portu fu den foto na zuidsei tapu* èn nowan sma de fu opo den.
Nanga tranga den tyari ala den sma fu Yuda gwe. Nowan fu den tan abra.
20 Opo yu ede luku den feanti di e kon fu noordsei.
Pe den skapu de di yu kisi? Pe den moi skapu fu yu de?
21 San yu o taki te yu o kisi strafufu den sma di yu ben si leki bun mati sensi ten?
Yu o kisi hebi pen leki wan uma di de fu meki en pkin.
22 Yu o prakseri: ’Fu san ede den sani disi e psa nanga mi?’
Na fu di yu du wan lo ogri, meki den puru den koto fu yu.
Yu bakafutu o hati yu.
23 Wan sma fu Kus* man kenki a kloru fu en skin?
Wan penitigri man kenki den flaka na en skin?Na so unu srefi no o man kenki tu fu du bun, fu di un leri fu du soso ogri.
24 Dati meki mi o panya unu na ala sei neleki te a winti fu a sabana e wai drei grasi gwe.
25 Na disi o psa nanga yu* èn na disi mi o gi yu,fu di yu fergiti mi èn yu e tan fertrow na tapu sani di no tru”, na so Yehovah taki.
26 „Mi o opo yu koto fu tapu yu fesi,dan sma o si yu syenpresi.
27 Den o si taki yu waka gi yu trowpatna, taki yu e bari leki wan krasi asièn taki yu e libi wan morsu hurulibi.
Na tapu den pkin bergi èn na den gronmi si a morsu libi di yu libi.
Bigi ogri o miti yu, Yerusalem!
O langa yu o go doro nanga a doti libi disi?”
