Numeri 34:1-29
34 Yehovah taigi Moses tu:
2 „Taigi den Israelsma: ’Now unu o go na ini a kondre Kanan. A kondre dati o de fu unu. Disi na a kondre Kanan:
3 Na zuidsei, yu abi Sin-sabana na sei Edom. Na zuidsei a kondre e bigin te na a kaba fu a Sowtu Se na owstusei.
4 Dan a e pasa zuidsei fu Akrabim-bergipasi èn a e go doro na Sin te na a zuidsei fu Kades-Barneya. Dan a e beni go na Hasar-Adar èn a e go na Asmon.
5 Na Asmon a e beni go na a lagipresi pe Egepte-liba e lon èn te fu kaba a e doro na a Se.*
6 Na west-sei, a kondre e bigin na a syoro fu a Bigi Se. Dati na a west-sei fu a kondre.
7 Na noordsei, a kondre e bigin na a Bigi Se èn a e go na Hor-bergi.
8 Fu Hor-bergi a e go na a bigin fu Hamat èn a e go doro teleki Seidad.
9 Dan a e go na Sifron èn te fu kaba a e doro Hasar-Enan. Disi na a noordsei fu a kondre.
10 Na owstusei, a kondre e bigin na Hasar-Enan èn a e go na Seifam.
11 Dan a e saka fu Seifam go na Ribla na a owstusei fu Ayin. Dan a e saka go doro te na a owstusei fu a se fu Kineret.
12 Baka dati a e saka go na Yordan-liba èn te fu kaba a e doro na a Sowtu Se. Disi na a heri kondre di unu o kisi.’”
13 Baka dati Moses taigi den Israelsma: „Disi na a kondre di unu o prati gi unsrefi. Baka te unu iti lòt soleki fa Yehovah taki, dan den neigi nanga afu lo musu prati a kondre.
14 A lo fu Ruben èn a lo fu Gad ben teki wan pisi kontren gi densrefi kaba, èn na afu lo fu Manase ben teki wan pisi kontren tu.
15 Den tu nanga afu lo disi teki a pisi kontren na Yordan-liba na abrasei fu Yerikow. A kontren fu den e go te na owstusei pe son e opo.”
16 Dan Yehovah taigi Moses:
17 „Den man di o prati a kondre gi unu na Priester Eleasar nanga Yosua, a manpikin fu Nun.
18 Un musu teki wán edeman fu ibri lo fu yepi unu prati a kondre.
19 Disi na den nen fu den edeman: Kaleb di de a manpikin fu Yefune fu a lo fu Yuda,
20 Semuwel di de a manpikin fu Amihud fu a lo fu Simeon,
21 Elidad di de a manpikin fu Kislon fu a lo fu Benyamin,
22 na edeman Buki di de a manpikin fu Yogli fu a lo fu Dan,
23 na edeman Haniyel di de a manpikin fu Efod fu a lo fu Manase di de a manpikin fu Yosef,
24 na edeman Kemuwel di de a manpikin fu Siftan fu a lo fu Efrayim,
25 na edeman Elisafan di de a manpikin fu Parnak fu a lo fu Seibulon,
26 na edeman Paltiyel di de a manpikin fu Asan fu a lo fu Isaskar,
27 na edeman Akihud di de a manpikin fu Selomi fu a lo fu Aser,
28 na edeman Pedael di de a manpikin fu Amihud fu a lo fu Naftali.”
29 Disi na den man di Yehovah poti fu gi den Israelsma wan pisi gron na ini a kondre Kanan.
Futuwortu
^ Dati na a Bigi Se noso a Mindrikondre Se.
