Numeri 23:1-30
23 Dan Bileam taigi Balak: „Meki seibi altari gi mi dyaso èn sreka seibi mankaw nanga seibi manskapu fu tyari leki ofrandi.”
2 Wantewante Balak du soleki fa Bileam taki. Baka dati Balak nanga Bileam tyari wan mankaw nanga wan manskapu leki ofrandi na tapu ibriwan fu den altari.
3 Bileam taigi Balak: „Go tanapu na a bron-ofrandi fu yu, dan mi o gowe. Kande Yehovah o kon taki nanga mi. Efu a kon na mi, dan mi o fruteri yu ala san a taigi mi.” Baka dati, a go na wan pikin bergi pe bon no ben de.
4 Di Gado kon na Bileam, dan Bileam taigi en: „Mi poti den seibi altari sei na sei, èn mi tyari wan mankaw nanga wan manskapu leki ofrandi na tapu ibriwan fu den altari.”
5 Yehovah taigi Bileam: „Go baka na Balak èn taigi en san mi taki.”
6 Sobun, Bileam drai go baka na Balak. A si Balak nanga ala den heihei man fu Moab e tanapu na a bron-ofrandi.
7 Dan a bigin taki wan puwema:„Balak, a kownu fu Moab, pruberi fu tyari mi komopo fu Aram,Fu den bergi na owstusei. A taki:’Grantangi, kon fluku Yakob gi mi.Iya, kon krutu Israel, grantangi.’
8 Ma fa mi kan fluku den wan di Gado no fluku?Fa mi kan krutu den wan di Yehovah no krutu?
9 Mi e si den te mi de na tapu den stonbergi,Iya, te mi de na tapu den pikin bergi mi e si den.A heri pipel e tan drape den wawan,Den no e si densrefi leki den tra pipel.
10 Suma kan teri den sma fu Yakob di furu leki finifini doti?Suma man teri a di fu fo pisi fu Israel srefi?Meki mi dede leki wan reti-ati sma.Meki mi libi kon na wan kaba neleki a libi fu den.”
11 Ne Balak taigi Bileam: „San yu du nanga mi? Mi kari yu fu kon fluku den feanti fu mi, dan now yu e blesi den pasa marki.”
12 Bileam piki en: „A no san Yehovah taigi mi, mi musu taki?”
13 Dan Balak taigi en: „Grantangi, kon nanga mi na wan tra presi pe yu kan si den. Yu no o si den alamala, soso wan tu fu den yu o si. Dan yu musu fluku den te yu de drape.”
14 Sobun, Balak tyari en go na Sofim, wan presi na a ede fu Pisga-bergi. Drape Balak meki seibi altari èn a tyari wan mankaw nanga wan manskapu leki ofrandi na tapu ibriwan fu den altari.
15 Baka dati Bileam taigi Balak: „Go tanapu na a bron-ofrandi fu yu, dan mi o go drape fu taki nanga en.”
16 Ne Yehovah taigi Bileam: „Go baka na Balak èn taigi en san mi taki.”
17 Sobun, a go na Balak èn a si Balak nanga ala den heihei man fu Moab e tanapu na a bron-ofrandi. Dan Balak aksi en: „San Yehovah taki?”
18 Dan a bigin taki a puwema disi:„Balak, opo èn arki.Poti yesi arki mi, yu manpikin fu Sipor.
19 Gado a no wan libisma taki a o fruteri lei,A no wan manpikin fu libisma taki a sa du wan sani di o hati en bakaten.Te a taki wan sani, a o du en trutru, a no so?A ben o taki wan sani, dan a no du en?
20 Luku, mi kon dyaso fu blesi sma,Èn Gado blesi sma trutru. Mi no man kenki dati.
21 A no o gi pasi taki sma wisi Yakob.A no o gi pasi taki sma du ogri nanga Israel.Yehovah en Gado de nanga en.Nanga wan tranga sten sma e prèise en leki a kownu fu den.
22 Gado e tyari den komoto na Egepte.Den e lon esi-esi neleki wan mankaw fu a sabana.
23 Bika nowan sma kan fluku Yakob.Nowan lukuman kan du ogri nanga Israel.Now sma kan taki fu Yakob nanga Israel:’Luku san Gado du!’
24 Luku, wan pipel sa opo leki wan lew,Iya, leki wan lew a sa opo.A no sa didon solanga a no nyan wan meti.A o dringi a brudu fu den wan di a kiri.”
25 Dan Balak taigi Bileam: „Efu yu no man fluku den, dan yu no musu blesi den tu.”
26 Bileam piki Balak: „Mi no ben taigi yu taki mi ben o du ala san Yehovah taigi mi fu du?”
27 Dan Balak taigi Bileam: „Grantangi, kon meki mi tyari yu go na ete wan tra presi. Kande a tru Gado o feni en bun te yu fluku den gi mi na a presi dati.”
28 Dan Balak tyari Bileam go na a ede fu Peor-bergi, pe den ben kan si a presi Yesyimon.
29 Bileam taigi Balak: „Meki seibi altari gi mi dyaso èn sreka seibi mankaw nanga seibi manskapu fu tyari leki ofrandi.”
30 Ne Balak du soleki fa Bileam taki èn a tyari wan mankaw nanga wan manskapu leki ofrandi na tapu ibriwan fu den altari.
