A di fu tu brifi gi Timoteyus 1:1-18
1 Mi, Paulus, na wan apostel fu Krestes Yesus fu di Gado wani. Mi abi a howpu fu kisi a libi di a pramisi den bakaman fu Krestes Yesus.
2 Mi e skrifi a brifi disi gi yu, Timoteyus, mi lobi pkin.
Meki Gado, a P’pa, nanga wi Masra Yesus Krestes sori yu bun-ati nanga sar’ati. Meki a freide fu den de nanga yu.
3 Mi e taki Gado tangi taki mi kan dini en leki fa den afo fu mi ben du dati. Mi e dini en nanga wan krin konsensi èn mi no e fergiti fu taki fu yu te mi e begi fayafaya dei nanga neti.
4 Te mi e prakseri fa yu ben e krei, dan mi e angri fu si yu. Bika te mi o si yu, mi o prisiri srefsrefi.
5 Mi e memre taki yu no ben e hoigri, ma taki yu abi trutru bribi. Na yu granm’ma Lowis nanga yu m’ma Enise fosi ben abi so wan bribi èn mi sabi taki yu abi a srefi bribi dati tu.
6 Na fu dati ede mi e memre yu fu no wiswasi san Gado gi yu di mi poti mi anu na yu tapu.
7 Bika a santa yeye di Gado gi wi no meki wi tron fredeman, ma a e gi wi krakti, a e meki wi sori lobi èn a e meki wi de nanga krin ferstan.
8 Sobun, no syen fu preiki fu wi Masra èn no syen gi mi di de na strafu fu Masra ede. Ma yusrefi musu de klarklari fu nyan pina gi a bun nyunsu èn yu musu fertrow tapu Gado taki a o gi yu a krakti fu hordoro.
9 A ferlusu wi èn a kari wi fu de santa sma. A no den sani di wi du, meki a kari wi. Ma a kari wi fu di ensrefi wani èn fu di a sori wi bun-ati. Langa ten psa kba, a sori wi bun-ati nanga yepi fu Krestes Yesus.
10 Ma sensi di Krestes Yesus wi Ferlusuman sori ensrefi, a bun-ati disi de krin fu si. A puru dede, èn nanga a bun nyunsu a tyari kon na krin fa wi kan kisi libi nanga wan skin di no man pori.
11 A poti mi leki preikiman, leki apostel èn leki leriman fu a bun nyunsu disi.
12 Na fu dati ede mi e pina tu, ma mi no e syen fu dati, bika mi sabi a sma di mi e bribi. Mi sabi taki ala san mi poti na ini en anu a o man kibri teleki a krutudei doro.
13 Tan hori yusrefi na den leri di mi tyari kon na krin gi yu. Den leri disi bun.* Tan sori a bribi nanga a lobi di yu abi fu di yu na wan bakaman fu Krestes Yesus.
14 Meki a santa yeye di de na ini wi, yepi yu fu kibri a gudu disi di yu ben kisi.
15 Yu sabi taki ala sma na ini a distrikt Asia gwe libi mi. Figelus nanga Hermogenes na tu fu den sma disi.
16 Meki Masra abi sar’ati nanga na osofamiri fu Oneisiforus, bika furu leisi a ben kon gi mi dek’ati. A no ben syen taki mi ben tai nanga keti na straf’oso.
17 Ma di a ben de na Rome, a du furu muiti fu suku mi èn a feni mi.
18 Meki Masra Yehovah* abi sar’ati nanga en na a krutudei. Yu sabi heri bun sortu bun sani a du na Efeise.
