Ester 4:1-17
4 Te fu kaba Mordekai+ kon yere ala sani di Haman du.+ Ne Mordekai priti en dyakti, a weri krosi di sma gwenti weri te den e sari+ èn a trowe asisi+ na tapu en skin. Dan a go na mindrisei fu a foto èn a bari krei bun tranga.+
2 Bakaten a doro te na a portu fu Kownu.+ Ma a no ben man pasa go doro, fu di nowan sma ben abi primisi fu pasa a portu fu Kownu efu den ben e weri krosi di sma gwenti weri te den e sari.
3 Na ini ala den difrenti kontren+ pe boskopuman meki bekènti san Kownu taki èn sortu wèt a poti, den Dyu ben de nanga bigi sari.+ Den ben e bari krei èn den no ben e nyan.*+ Furu fu den ben e didon na ini asisi+ èn na tapu krosi di sma gwenti weri te den e sari.+
4 Ne den yongu uma nanga den man di ben e wroko gi Ester,+ go na en èn den fruteri en san pasa. A sani disi ben hati a wefi fu Kownu trutru. Dati meki a seni tra krosi gi Mordekai fu a weri, na presi fu den krosi di a ben e weri fu sori taki a e sari. Ma Mordekai no ben wani den krosi di Ester seni gi en.+
5 Ne Ester kari Hatak,+ wan fu den man di Kownu poti leki dinari fu Ester. A seni Hatak fu go aksi Mordekai san pasa.
6 Sobun, Hatak go na Mordekai di ben de na a pren fu a foto, na fesi a portu fu Kownu.
7 Dan Mordekai fruteri Hatak ala san pasa nanga en.+ A fruteri en tu omeni moni Haman ben pramisi fu tyari go na a presi pe sma ben e kibri a moni fu Kownu,+ so taki den ben kan pai sma fu kiri den Dyu.+
8 Baka dati Mordekai gi Hatak wan brifi+ di e taki fu a wèt di ben meki na a foto Susan.+ Dati na a wèt di taki dati sma musu kiri ala den Dyu. Hatak ben musu sori Ester a brifi disi èn a ben musu taigi en+ fu go begi Kownu fu sori sari-ati gi den Dyu.+ Ester ben musu go langalanga na Kownu fu aksi efu en pipel ben kan kisi yepi.+
9 Baka dati Hatak+ go na Ester èn a taigi en san Mordekai taki.
10 Dan Ester seni Hatak go taigi Mordekai+ a sani disi:
11 „Ala futuboi fu Kownu èn ala sma na ini den difrenti kontren fu a kondre, sabi taki Kownu poti wán wèt+ nomo gi sma di e kon na ini a fesidyari+ fu en: efu wan man noso uma kon na ini a fesidyari fu Kownu, sondro taki Kownu kari en, dan a sma dati musu dede. Soso te Kownu langa en gowtu tiki gi a sma, a sma dati o tan na libi.+ We, na dritenti dei kaba Kownu no seni kari mi.”
12 Di Mordekai kisi a boskopu fu Ester,
13 a seni piki Ester: „No denki taki noti no o pasa nanga yu èn nanga den Dyu na ini na oso fu Kownu, te sma o kiri ala den tra Dyu.+
14 Efu yu no taki noti now, dan den Dyu o kisi yepi èn frulusu na wan tra fasi.+ Ma yu nanga yu papa famiri o dede. Kande na fu dati ede yu tron na uma fu Kownu, so taki yu kan yepi yu pipel now.”+
15 Ne Ester seni piki Mordekai:
16 „A bun. Go kari ala den Dyu di e libi na a foto Susan+ èn dri dei nanga dri neti+ langa un no musu nyan noso dringi wan sani+ fu mi ede. Mi nanga den yongu uma di e wroko gi mi,+ o du dati tu. Baka dati mi o go na Kownu, awinsi a wèt no e gi mi primisi fu du dati. Efu mi musu dede,+ dan meki mi dede.”
17 Dan Mordekai gowe èn a du ala san Ester taigi en fu du.
Futuwortu
^ Noso: „faste.” Luku „Moro sani”, nr. 24.
