2 Samuel 3:1-39
3 Na so a feti na mindri den sma fu Saul nanga den sma fu David ben e go nanga langa.+ Ma dei fu dei David ben e kon moro tranga,+ aladi den sma fu Saul ben e lasi makti moro nanga moro.+
2 Na a pisi ten dati David kisi manpikin+ na Hebron.+ A fosiwan ben de Amnon+ di a kisi nanga Ahinowam,+ wan uma fu Yisreyel.
3 A di fu tu manpikin fu en ben de Kileyab+ di a kisi nanga Abigayil,+ na uma di ben trow fosi nanga Nabal fu Karmel. A di fu dri ben de Absalom+ di a kisi nanga Maka, na umapikin fu Talmai,+ a kownu fu Geisur.
4 A di fu fo ben de Adonia+ di a kisi nanga Hagit.+ A di fu feifi ben de Sefatya+ di a kisi nanga Abital.
5 A di fu siksi ben de Yitreyam+ di a kisi nanga Ekla, wan tra wefi fu David. Disi na den manpikin di David kisi na Hebron.
6 Na a ten di den sma fu Saul nanga den sma fu David ben e feti nanga makandra, Abner+ ben e tan du sani fu kisi moro makti na mindri den sma fu Saul.
7 Di Saul ben de na libi, a ben de nanga wan uma di ben nen Rispa,+ na umapikin fu Aya.+ Bakaten Isboset+ aksi Abner: „Fu san ede yu didon nanga na uma+ fu mi papa?”
8 Abner ati bron+ srefisrefi di Isboset aksi en a sani disi. A taigi Isboset: „Na si yu e si mi leki wan wisiwasi dagu+ di komopo fu Yuda? Te nanga now mi sori na osofamiri fu yu papa Saul, den brada fu en èn den bun mati fu en, bun-ati. Mi sorgu taki David no ben man kisi yu. Dan now yu e kon rigeri nanga mi, fu di mi didon nanga wan uma?
9 We, meki Gado strafu mi èn meki a du moro leki dati srefi,+ efu mi no sorgu taki ala sani pasa soleki fa Yehovah sweri gi David.+
10 A ben taki dati a ben o puru a kownukondre na a anu fu Saul en famiri èn taki a ben o meki David tiri Israel nanga Yuda, sobun a heri kontren fu Dan te go miti Berseiba.”+
11 Ne Isboset no piki Abner noti moro, fu di a ben frede Abner.+
12 Wantewante Abner seni boskopuman go na David. A seni aksi David: „Suma abi a kondre disi?” A taki tu: „Meki wan frubontu nanga mi, dan yu o si taki mi o horibaka gi yu. Mi o yepi yu fu meki ala sma na ini Israel teki yu sei.”+
13 Ne David taki: „A bun. Mi o meki wan frubontu nanga yu. Ma yu musu du wan sani gi mi fosi. Tyari Saul umapikin Mikal,+ kon gi mi. Solanga yu no tyari en kon, yu no musu kon dyaso moro.”+
14 Boiti dati, David seni boskopuman go tu na Isboset,+ a manpikin fu Saul. A taki: „Seni mi wefi Mikal kon gi mi. Fu trow nanga en, mi ben abi fu koti a fesisei-buba fu a syenpresi+ fu wán hondro Filistea man puru.”
15 Dati meki Isboset seni sma go teki Mikal na en masra Paltiyel,+ a manpikin fu Lais.
16 Ma Mikal masra tan waka na en baka teleki den doro Bahurim.+ A heri pasi a ben e krei gi Mikal. Ne Abner taigi en: „Drai go baka na yu oso!” Na so a man drai go baka na en oso.
17 Disiten, Abner seni boskopu gi den owru man fu Israel. A taigi den: „Na ini a ten di pasa,+ unu ben wani taki David tiri unu leki kownu.
18 We, dan un du wan sani, bika Yehovah srefi taigi David: ’Mi o meki mi futuboi David+ frulusu mi pipel Israel fu den Filisteasma èn fu ala den tra feanti fu den.’”
19 Abner go taki sosrefi nanga den Benyaminsma.+ Baka dati a go taki tu nanga David na Hebron èn a fruteri David ala sani di a pipel fu Israel nanga den Benyaminsma ben agri fu du.
20 Di Abner nanga tutenti tra man doro na David na Hebron, David sreka wan bigi nyanyan+ gi Abner nanga den man di ben kon nanga en.
21 Ne Abner taigi David: „Mi lespeki Kownu, meki mi go na Israel fu tyari ala Israelsma kon na wán fu dini yu. Dan den kan meki wan frubontu nanga yu èn yu o tron kownu fu ala sma di yu wani tiri.”+ Sobun, David meki Abner gowe èn Abner gowe sondro fu David du en wan sani.+
22 Bakaten, Yoab nanga den futuboi fu David drai kon baka fu wan feti. Den tyari wan lo sani kon tu di den ben teki fu den feanti fu den.+ Na a pisi ten dati Abner no ben de nanga David na Hebron, fu di David ben seni en gowe sondro fu du en wan sani.
23 Di Yoab+ nanga den srudati fu en kon, sma go fruteri Yoab taki Abner,+ a manpikin fu Ner,+ ben kon na Kownu èn taki Kownu seni Abner gowe sondro fu du en wan sani.”
24 Dati meki Yoab go na Kownu èn a taigi en: „San yu du?+ Luku, Abner kon na yu, dan yu no du noti nanga en. Fu san ede yu seni en gowe?
25 Yu sabi suma na Abner, a manpikin fu Ner. Yu ben musu sabi taki a kon dyaso fu kori yu, fu di a wani sabi pe yu e go èn san yu e du.”+
26 Ne Yoab komoto na David, dan a seni boskopuman go teki Abner. Na a pisi ten dati, Abner ben doro kaba na Sira-peti. Ma den boskopuman meki Abner drai kon baka.+ Disiten, David no ben sabi noti fu a tori.
27 Di Abner drai go baka na Hebron,+ Yoab taigi Abner taki a ben wani taki nanga en wawan.+ Sobun, a tyari Abner go na wan uku fu a portu. Ma di den doro drape, Yoab sutu Abner nanga wan feti-owru na en ondrobere.+ Na so Yoab kiri Abner, fu di Abner ben kiri en brada Asael.+
28 Bakaten di David yere a tori, a taki wantewante: „Yehovah sabi taki mi nanga den sma na ini mi kownukondre, no abi noti fu du nanga a dede+ fu Abner, a manpikin fu Ner.
29 Na Yoab nanga a heri osofamiri fu en papa musu tyari a frantwortu fu a dede+ fu Abner. Ala ten, man musu de na ini Yoab en osofamiri+ di siki na den syenpresi,+ di abi gwasi,+ di e meki titei,+ di o dede nanga feti-owru noso di no abi nyanyan.”+
30 Yoab nanga en brada Abisai+ kiri Abner,+ fu di Abner kiri den brada Asael na a ten di den ben e feti na Gibeon.+
31 Ne David taigi Yoab nanga ala den sma di ben de nanga en: „Un priti un krosi,+ dan un weri rowkrosi+ èn bari krei gi Abner.” Di den sma ben e waka nanga a dragi, dan Kownu David srefi ben e waka na den baka.
32 Dan den go beri Abner na Hebron. Di den ben de na a beripe, Kownu David bari krei gi Abner èn ala den sma di ben de drape bigin krei tu.+
33 Dan Kownu singi wan sari singi gi Abner. A singi:„Na dede Abner ben musu dede leki wan sma di no abi frustan?+
34 Yu anu no ben tai+Èn yu futu no ben de na ini kopro bui.+Yu dede leki wan man di sma di e du kruktudu+ kiri.”Ne ala den sma bigin krei+ baka gi Abner.
35 Baka wan pisi ten na a srefi dei dati, sma ben tyari brede+ kon gi David fu trowstu en. Ma David sweri: „Meki Gado strafu mi+ èn meki a du moro leki dati srefi, efu mi nyan brede noso iniwan sani fosi son dongo.”+
36 Di den sma yere disi, den agri nanga Kownu, bika ala ten te Kownu ben e du wan sani, den sma ben e agri nanga dati.+
37 Na so den sma fu David èn heri Israel kon sabi taki a no Kownu taigi sma fu kiri Abner, a manpikin fu Ner.+
38 Baka dati Kownu taigi den futuboi fu en: „Un no sabi taki a man di dede tide ben de wan granman, wan bigiman na ini Israel?+
39 Den salfu+ mi leki kownu, ma toku mi no abi nofo makti tide fu kan opo du wan sani nanga den manpikin fu Seruya,+ bika den man disi ogri srefisrefi.+ Sobun, meki Yehovah srefi pai den ogriwan fu den ogri di den e du.”+
