Na heri grontapu furu sma di e taki dati den e waka baka Yesus Krestes de hebi na ini politiek. Son sma e horibaka gi son politiekman noso politiek partij fu di den wani taki sma kon na ini a kerki fu den noso den wani taki sma tyari densrefi neleki den. Dati meki furu tron den politiekman e taki bun fu a fasi fa son sma e tyari densrefi èn fu kerki so taki den kan hari den sortu sma disi kon na den sei. A e pasa furu tron tu taki kerki fesiman e teki prati na den verkiezing fu man kisi wan posisi na ini a regering. Son leisi wan distrikt noso wan heri kondre srefi e taki dati den na fu wan Kresten kerki.

 San yu e denki? Yu denki taki den bakaman fu Yesus Krestes musu bumui nanga politiek? Yu kan kisi piki tapu na aksi disi te yu e luku a libi fu Yesus. Yesus ben taki: „Mi gi unu na eksempre, so taki unu kan du tu san mi du gi unu” (Yohanes 13:15). Sobun, te a abi fu du nanga politiek, dan sortu eksempre Yesus gi wi?

 Nôno. Yesus no ben e bumui nanga den politiek afersi fu grontapu.

 Yesus no ben e suku politiek makti. Di Satan Didibri ben wani gi Yesus „ala den kownukondre fu grontapu”, dan Yesus weigri fu tron a tiriman fu den kondre disi (Mateyus 4:8-10). a Wan tra leisi, sma ben wani dwengi Yesus fu go ini politiek fu di den ben feni taki a ben o de wan bun tiriman. Bijbel e taki: „Fu di Yesus ben sabi taki den ben wani grabu en fu meki a tron kownu, meki a gowe baka na a bergi en wawan” (Yohanes 6:15). Yesus ben weigri fu du san den sma ben wani fu di a no ben wani abi noti fu du nanga politiek.

 Yesus no ben e teki sei na ini politiek afersi. Na ini a ten fu Yesus, den Dyu no ben wani pai a regering fu Rome belasting-moni èn den ben feni taki den Romesma no ben abi leti fu aksi den a moni dati. Di den pruberi fu meki Yesus teki sei na ini a tori disi, a no go hari-trusu nanga den efu den ben musu pai belasting-moni noso efu den no ben musu du dati. A taigi den: „Pai Grankownu san na fu Grankownu, ma pai Gado san na fu Gado” (Markus 12:13-17). Na presi fu teki sei na ini a tori disi, a sori den taki den ben musu pai Grankownu noso a regering fu Rome di ben e tiri den. Ma nanga den wortu disi a sori tu taki son leisi wan sma no kan gi yesi na lanti. Wan sma no kan gi lanti san na fu Gado. Sobun, a no kan gi en libi abra na wan kondre noso den tiriman fu wan kondre èn a no kan anbegi den.​—Mateyus 4:10; 22:37, 38.

 Yesus ben e horibaka gi Gado Kownukondre na hemel èn a ben e leri sma sani fu a Kownukondre dati tu (Lukas 4:43). Yesus no ben e bumui nanga politiek fu di a ben sabi taki a no libisma tiriman, ma na Gado Kownukondre ben o meki grontapu kon de soleki fa Gado wani dati (Mateyus 6:10). A ben sabi taki Gado Kownukondre no ben o wroko makandra nanga wan libisma regering fu tyari kenki kon. Na presi fu dati a ben o puru ala den regering so taki en wawan ben o tiri heri grontapu.​—Danièl 2:44.

 Nôno. Yesus ben taigi den bakaman fu en taki den „no [ben musu] de wan pisi fu grontapu” èn na dati den ben du tu (Yohanes 15:19). Den ben teki na eksempre fu Yesus èn den no ben e bumui nanga den politiek afersi fu grontapu (Yohanes 17:16; 18:36). Na presi fu bumui nanga politiek, den du a wroko di Yesus ben gi den: Den tan preiki èn leri sma sani fu Gado Kownukondre.​—Mateyus 28:18-20; Tori 10:42.

 A moro prenspari sani gi den fosi Kresten ben de fu gi yesi na Gado, ma den ben sabi tu taki den ben musu abi lespeki gi lanti (Tori 5:29; 1 Petrus 2:13, 17). Den ben e gi yesi na lanti èn den ben e pai belasting-moni (Romesma 13:1, 7). Aladi den no ben e bumui na ini politiek, toku den ben e kisi wini fu lantiwet nanga tra sani di lanti ben seti gi den sma fu a kondre.​—Tori 25:10, 11; Filipisma 1:7.

 Bijbel e sori krin taki Yesus nanga den fosi bakaman fu en no ben e bumui nanga politiek. Dati meki Yehovah Kotoigi na heri grontapu no e bumui nanga politiek srefisrefi. Neleki den fosi Kresten, den e du a wroko di Yesus ben gi den: Den e preiki „a bun nyunsu disi fu a Kownukondre”.​—Mateyus 24:14.