Ina ua mavae le tele o tausaga o taʻitaʻia e Iosua tagata o Ieova, ona maliu lea o ia ina ua 110 ona tausaga. A o ola o ia, sa tapuaʻi tagata Isaraelu iā Ieova. Ae ina ua maliu o ia, ona amata lea ona latou tapuaʻi i tupua e pei ona sa faia e tagata Kanana. Talu ai e leʻi tapuaʻi pea tagata Isaraelu iā Ieova, na faataga ai e Ieova Iapino le tupu o Kanana e faaoo faigatā i tagata Isaraelu. Na talosaga atu tagata Isaraelu iā Ieova mo le fesoasoani. O lea na filifilia ai e Ieova le taʻitaʻi fou o Parako. O le a fesoasoani Parako i tagata Isaraelu e toe foʻi iā Ieova.

Na aami e le perofeta fafine e igoa iā Tepora ia Parako e sau ina ia faailoa atu i ai le feʻau lenei a Ieova: ʻAve tane e toʻasefulu afe ma ō atu e faafeiloaʻi le ʻautau a Iapino i le alāvai o Kisona. O i inā o le a outou fasiotia ai Sesera, le taʻitaʻi o le ʻautau a Iapino.’ Na fai atu Parako iā Tepora: ʻOu te alu pe afai e te sau e ta te ō.’ Na tali mai Tepora: ʻE ta te ō lava. Ae ia manatua e lē o oe e fasiotia Sesera. Na fetalai mai Ieova o le a fasiotia o ia e se fafine.’

Na ō Tepora faatasi ma Parako ma lana ʻautau i le mauga o Tapora e sauni ai mo le taua. O le taimi lava na faalogo ai Sesera i lenā mea, ona ia faapotopoto lea o ana kariota o taua ma ʻautau i le ālia o Kisona. Na  faapea atu Tepora iā Parako: ʻO le aso lenei o le a tuuina atu ai e Ieova iā te oe le manumalo.’ Na ō ifo Parako ma lana ʻautau e toʻasefulu afe mai i le mauga e tau ma le ʻautau malosi a Sesera.

Ona faapogaia lea e Ieova o le ālia o Kisona ina ia tatafe, ma iʻu ai ina lē mafai e kariota a Sesera ona toe ō ese ona ua mamau i le palapala. Ua tuu e Sesera lana kariota ae sola ese. Na manumalo Parako ma lana ʻautau i le ʻautau a Sesera, ae o lea ua sola Sesera. Na sola o ia ma lafi i le faleʻie o se fafine e igoa iā Iaeli. Na avatu e Iaeli iā te ia le fagupaʻu o loo iai le susu ina ia inu ai, ma ufiufi iā te ia i se palanikeke. Ona moe ai lea o Sesera ua matuā vaivai o ia. Ona tolotolo lemū atu lea o Iaeli ma fasioti Sesera, e ala i le tutuʻi o lona ulu i se pine o le faleʻie.

Na alu atu Parako e saʻili Sesera. Ae na sau i fafo Iaeli mai i lona faleʻie ma fai atu iā Parako: ʻSau i totonu, seʻi oʻu faasino atu iā te oe le tagata o loo e saʻilia.’ Ua alu atu Parako i totonu o le faleʻie ma iloa ai ua oti Sesera. Na pepese Parako ma Tepora e viia ai Ieova mo le tuuina mai o le manumalo i tagata Isaraelu. I le isi 40 tausaga na sosoo ai, sa nonofo filemu tagata Isaraelu.