Alu i mataupu o loo iai

Alu i le lisi o mataupu

 LESONA 83

Fafaga e Iesu le Faitau Afe

Fafaga e Iesu le Faitau Afe

A o lata i le taimi e amata ai le Paseka i le 32 T.A., na toe foʻi ane ai le ʻauaposetolo mai i la latou talaʻiga. Sa lē lavavā i latou. O lea na ave ai i latou e Iesu i se vaa e agaʻi i Petesaita, ina ia mafai ai ona latou mālōlō. Ae ina ua lata le vaa i le matafaga, na iloa atu ai e Iesu le faitau afe o tagata na mulimuli atu iā i latou. E ui lava na manaʻo Iesu e iai na o ia ma ona aposetolo, ae na ia faafeiloaʻia ma le agalelei tagata. Na ia faamālōlō o latou tagata mamaʻi, ma amata ona aʻoaʻo atu iā i latou. Na aʻoaʻo atu e Iesu iā i latou le Malo o le Atua i le aso atoa. Ina ua oo i le afiafi, na ō atu ona aposetolo iā te ia ma faapea atu: ʻE mautinoa ua fia aai tagata. Ia tuu atu i latou e ō ina ia faatau mai ni a latou meaʻai.’

Na faapea atu Iesu: ʻE lē tatau ona ō i latou, ae ia avatu iā i latou ni meaʻai e aai ai i inei.’ Na fesili le ʻauaposetolo: ʻPe e te manaʻo e matou te ō ma faatau mai ni falaoa mo i latou?’ Na faapea mai Filipo o se tasi o le ʻauaposetolo: ʻE tusa pe e tele ni a matou tupe, ae e lē lava e faatau mai ai ni falaoa e fafaga ai lenei motu o tagata.’

Na fesili atu Iesu: ʻO le ā le tele o meaʻai o loo iai?’ Na tali mai Aneterea: ʻE na o falaoa e lima ma tamaʻi iʻa e lua. E lē taitai lava na meaʻai.’ Na faapea atu Iesu: ʻAumai falaoa ma iʻa iā te aʻu.’ Na ia fetalai atu i tagata ina ia nonofo i luga o le vao ma faapotopoto i vaega e taʻi 50 ma taʻi 100. Ona tago lea o Iesu i falaoa ma iʻa, ua tepa aʻe i le  lagi ma faafetai. Na ia tuu atu meaʻai i ona aposetolo, ma na latou tufatufaina atu i tagata. Ua aai ma ua maoona tagata uma, o tane e toʻa 5,000 faatasi ai ma fafine ma tamaiti. Ina ua uma, ona faaputu lea e le ʻauaposetolo o mea na totoe ina ia aua neʻi maʻimau se meaʻai. Sa tutumu ato e sefulu lua. E ese le ofoofogia o lenei vavega, a ea?

O le ofo tele o tagata, na latou mananaʻo ai e fai Iesu ma o latou tupu. Ae na silafia e Iesu e leʻi oo i le taimi e tofia ai o ia e Ieova e avea ma tupu. O lea na ia auina ese atu ai le motu o tagata, ma faatonu ona aposetolo e ō i le isi itu o le sami o Kalilaia. Na latou ō i le vaa, ma na alu na o Iesu i luga o le mauga. Aiseā? Talu ai sa ia manaʻo i se taimi paganoa e tatalo atu ai i lona Tamā. Po o le ā lava le pisi o Iesu, ae sa ia faaavanoa le taimi e tatalo ai.

“Aua tou te galulue mo meaʻai e pala, a o le meaʻai e tumau ai i le ola e faavavau, lea e tuuina atu e le Atalii o le tagata iā te outou.”—Ioane 6:27