Ina ua ave e Nepukanesa perenise o Iuta i Papelonia, na ia tofia se tagata aloaʻia e igoa iā Asepenasa e vaavaaia i latou. Na ia faatonuina Asepenasa ina ia saʻili ni tama talavou e malolosi ma atamamai mai iā i latou. E tolu tausaga o le a aʻoaʻoina ai nei tama talavou. O nei toleniga o le a sauniunia ai i latou e avea o ni tagata tāua i Papelonia. Na tatau ona aʻoaʻoina nei tama talavou ina ia iloa faitau, tusitusi ma tautatala i le gagana Akaia o Papelonia. Sa tatau ona latou aai i meaʻai sa aai ai le tupu ma tagata sa iai i lona maota. O le toʻafā o nei tama talavou, o o latou igoa o Tanielu, Hanania, Mesaelu, ma Asaraia. Na suia e Asepenasa o latou igoa i igoa Papelonia o Peletisara, Sataraka, Mesako ma Apeteniko. Po o le a avea nei aʻoaʻoga ma itu e latou te lē toe auauna ai iā Ieova?

 Na maumauaʻi nei tama talavou e toʻafā e usiusitaʻi iā Ieova. Na latou iloa e lē tatau ona aai i meaʻai a le tupu, ona e lē mamā nisi meaʻai e tusa ai ma le Tulafono a Ieova. O lea, na latou fai atu ai iā Asepenasa: ʻFaamolemole aua e te faamalosia i matou e aai i meaʻai a le tupu.’ Na tali mai Asepenasa: ʻPe afai e tou te lē aai ma e vaai mai le tupu e tou te lē o malolosi, o le a ia fasiotia aʻu.’

Na mafaufau Tanielu i se isi auala. Na ia fai atu i le leoleo na tofia e vaavaaia i latou: ʻFaamolemole ia aumai na o fualaau faisua e matou te aai ai ma vai e inu ai mo aso e sefulu. Ona faatusatusa lea o i matou ma tama talavou o loo aai i meaʻai a le tupu.’ Na malie le leoleo na tofia e vaavaaia i latou i lea fuafuaga.

Ua mavae aso e sefulu, ma ua sili atu le tino lelei o Tanielu ma ana uō e toʻatolu nai lo o isi tama talavou uma. Na fiafia Ieova ona sa latou usiusitaʻi iā te ia. Na ia foaʻi atu foʻi iā Tanielu le atamai e malamalama ai i vaaiga ma miti.

Ina ua uma le vaitaimi na aʻoaʻoina ai tama talavou, ona ave lea e Asepenasa o nei tama talavou e toʻafā i luma o Nepukanesa. Na talanoa le tupu ma i latou, ma na ia iloa ai e sili atu le popoto ma le mataalia o Tanielu, Hanania, Mesaelu ma Asaraia nai lo o isi tama talavou uma. Ona filifilia lea e le tupu o nei tama talavou e galulue i lona maota. Na masani ona fesili atu le tupu iā i latou mo ni fautuaga i mataupu tāua. Na faia e Ieova i latou ia sili atu ona atamamai nai lo o tagata atamamai ma taulāitu uma a le tupu.

E ui lava e ese le atunuu sa iai Tanielu, Hanania, Mesaelu ma Asaraia, ae e leʻi galo ai iā i latou o i latou o tagata o Ieova. Po o le a e manatua pea foʻi Ieova, e tusa pe tou te lē iai faatasi ma ou mātua?