Skip to content

Skip to table of contents

 LESONA 47

Na Faamalosia e Ieova Elia

Na Faamalosia e Ieova Elia

Na faalogo Iesepela i le mea na tupu i perofeta a Paala, ma na matuā ita ai o ia. Na ia avatu se feʻau iā Elia e faapea: ʻO le aso a taeao o le a e oti ai, e pei lava o le mea na tupu i perofeta a Paala.’ Na matuā fefe Elia ma sola ai i le toafa. Na ia tatalo: ʻIeova, ua lē mafai ona ou onosaia lenei mea. Ia aveese loʻu ola.’ Na lagona e Elia le vaivai tele, o lea na ia moe ai i lalo o se laau.

Na fafagu o ia e se agelu ma fai atu iā te ia i se leo mālū: ʻNofo ia i luga e ʻai.’ Na iloa atu e Elia se falaoa lapotopoto i luga o maa aasa, ma se faguvai. Ona ʻai lea o ia ma inu, ona toe taoto ai lea. Na toe fafagu foʻi o ia e le agelu ma faapea atu: ʻNofo ia i luga e ʻai. E te manaʻomia le malosi ina ia faaauau ai lau faigāmalaga.’ Ona nofo lea o ia i luga, ua ʻai ma inu. Ona faaauau lea o lana malaga mo ao e 40 ma pō e 40 seʻia taunuu i le mauga o Horepa. O i inā na alu atu ai Elia i se ana ina ia moe ai. Peitaʻi na fetalai mai Ieova iā te ia: ʻElia, o le ā lau mea lenā e fai i inā?’ Na tali atu Elia: ʻUa lē tausia e tagata Isaraelu la latou folafolaga na fai atu iā te oe. Na latou faaleagaina ou fata faitaulaga ma fasiotia au perofeta. Ua latou taumafai foʻi e fasioti aʻu.’

Na faapea mai Ieova iā te ia: ʻIa e alu i fafo ma tū i luga o le mauga.’ Ona agi mai lea o se matagi malosi, sosoo ai ma se mafuiʻe ma se afi. Mulimuli ane, ona faalogoina lea e Elia o se leo itiiti e toʻafilemu. Na ia ufiufi ona mata i lona ofu tele ma tū i fafo o le ana. Ona fesili mai lea o Ieova, pe aiseā na ia sola ese ai. Na tali atu Elia: ʻE na o aʻu lava ua totoe.’ Ae na faapea mai Ieova: ʻO loo iai foʻi isi tagata e 7,000 i Isaraelu o loo tapuaʻi mai pea iā te aʻu. Ia e alu ma tofia Elisaia e avea ma perofeta e sui iā te oe.’ O le taimi lava lenā na alu ai Elia ma faia e pei ona faatonuina o ia e Ieova. Pe e te manatu o le a fesoasoani foʻi Ieova iā te oe, pe afai e te faia mea e finagalo i ai o ia? E mautinoa o le a ia fesoasoani iā te oe. Seʻi o tatou talanoaina le mea na tupu i le vaitaimi na leai ai se timu.

“Aua neʻi popole i se mea, ae ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai.”—Filipi 4:6