Alu i mataupu o loo iai

Alu i le lisi o mataupu

 LESONA 22

Se Vavega i le Sami Ulaula

Se Vavega i le Sami Ulaula

O le taimi lava na faalogo ai Farao ua ō ese tagata Isaraelu mai i Aikupito, na toe sui ai loa lona mafaufau. Na ia faatonuina ana ʻautau: ʻIa sauni aʻu kariota uma o le taua, ma tatou ō e tuliloa i latou. Sa lē tatau ona tatou tuuina atu i latou e ō.’ O lea na ō ai loa Farao ma ana fitafita e tuliloa tagata Isaraelu.

Sa taʻitaʻia e Ieova ona tagata, e ala i se ao faaniutū i le ao ma se afi faaniutū i le pō. Na ia taʻitaʻia i latou ma taunuu ai i le Sami Ulaula, ma o i inā na faatonuina e Ieova e faatutū ai o latou faleʻie.

Ona iloa atu lea e tagata Isaraelu o Farao ma ana ʻautau o loo tuliloa atu i latou. O le taimi lea ua leai se mea e latou te sosola i ai, auā ua latou iai i le va o le sami ma ʻautau a Farao. Na latou alalaga atu iā Mose: ʻO le a matou feoti. Sa tatau ona tuu pea i matou i Aikupito.’ Ae ua tali atu Mose: ʻAua tou te fefefe. Ia faatalitali ona iloa lea o le auala o le a faasaoina ai i tatou e Ieova.’ Sa matuā talitonu lava Mose iā Ieova, a ea?

Na faapea mai Ieova i tagata Isaraelu e talai o latou faleʻie ma sauni e ō. I lenā lava pō, na siitia ai e Ieova le ao ma tuu i le va o tagata Aikupito ma tagata Isaraelu. Sa pogisa le itu na iai tagata Aikupito, ae malamalama le itu na iai tagata Isaraelu.

Na faapea atu Ieova iā Mose e faaloaloa lona lima i le sami. Ona  aumaia lea e Ieova o se matagi malosi na agi i le pō atoa. Na vaeluaina le sami, ma mātūtū ai le ogatotonu o le sami. O lea na mafai ai e le faitau miliona o tagata Isaraelu ona savavali i luga o lenei eleele mātūtū, ae ua avea le sami ma pā maualuga i le itu taumatau ma le itu tauagavale.

Na tuliloa atu pea e le ʻautau a Farao tagata Isaraelu seʻia oo i le ogatotonu o le sami. O lea na faapogaia ai e Ieova le fenuminumiaʻi o le ʻautau a Farao. Na amata ona taavavale ese uili o kariota. Na alalaga atu le ʻautau: ʻInā tatou sosola ese ia, auā o loo tau Ieova mo i latou.’

Na faapea atu Ieova iā Mose: ʻIa faaloaloa lou lima i luga o le sami.’ O le taimi lava lea na toe foʻi mai ai le sami i luga o le ʻautau a Aikupito, ma feoti ai Farao ma ana ʻautau uma. E leai se tasi na faasaoina.

I le isi itu o le sami, na usu e se motu o tagata e toʻatele pese o viiga i le Atua: “Pese iā Ieova, auā ua matuā faamamaluina o ia. O le solofanua ma lē ua tiʻetiʻe ai ua ia lafoina i le sami.” A o pepese tagata, sa sisiva fafine ma tā meafaifaaili tagitagi. Na matuā fiafia tagata uma ona ua faasaʻolotoina i latou.

“Ia tatou lototetele ma faapea atu: ʻO Ieova o loʻu fesoasoani ia; ou te lē fefe lava. O le ā la se mea e mafai ona faia e tagata iā te aʻu?’”—Eperu 13:6