Sa iai se tamāloa pipili na nofo i tafatafa o le faitotoʻa o le malumalu i aso uma ma ʻaisi i tagata. I se tasi aoauli, na ia iloa atu ai Peteru ma Ioane o loo ō i totonu o le malumalu. Na ia faapea atu iā i laʻua: ʻFaamolemole aumai se meaalofa mo aʻu.’ Na tali mai Peteru: ʻE iai se mea e sili atu nai lo o tupe ou te avatua mo oe. I le suafa o Iesu, inā tulaʻi ia ma savali!’ Ona fesoasoani lea o Peteru i le tamāloa ina ia tū i luga, ma na amata ona savali le tamāloa. O le fiafia tele o tagata i lea vavega, na talitonu ai foʻi ma le toʻatele o isi tagata.

Peitaʻi na feita le ʻaufaitaulaga sili ma le ʻau Satukaio. Na latou puʻeina aposetolo ma ave i le faamasinoga, ma fesili atu iā i laʻua: ʻO ai na tuuina atu iā te oulua le mana e faamālōlōina ai lenei tamāloa?’ Na tali mai Peteru: ʻNa ma maua le mana mai iā Iesu Keriso, o lē na outou fasiotia.’ Ua faapea atu ma le leotetele taʻitaʻi lotu: ʻUa sā ona toe tautala se tagata e faatatau iā Iesu.’ Ae na faapea atu aposetolo: ʻE tatau ona ma faamatala atu mea e faatatau iā te ia. E lē mafai ona ma lē taʻuina atu na mea.’

O le taimi lava na tatala ai Peteru ma Ioane, na la ō atu i isi soo ma faamatala atu iā i latou le mea na tupu. Na latou tatalo faatasi ma talosaga atu iā Ieova e faapea: ʻFaamolemole, fesoasoani mai ina ia o matou lototetele e faia pea lau galuega.’ Na foaʻi mai e Ieova iā i latou le agaga paia, ma na faaauau ai ona latou talaʻi ma faia pea faamālōlōga. Na atili ona toʻatele ē na avea ma tagata talitonu. Na matuā lotoleaga le ʻau Satukaio, ma o le māfuaaga lea na latou puʻea ai aposetolo ma ave i le falepuipui. Ae ina ua pō, na auina mai ai e Ieova se agelu na tatalaina faitotoʻa o le falepuipui ma faapea atu i aposetolo: ʻInā ō ia i le malumalu ma aʻoaʻo atu i inā.’

I le taeao na sosoo ai, na maua ai e le Faamasinoga Sili se faamatalaga e faapea: ʻO loo loka le falepuipui, ae ua leai tamāloloa sa lokaina ai. O loo iai i latou i le malumalu ma o loo aʻoaʻo atu i tagata.’ Na toe puʻe foʻi nei aposetolo ma ave i le Faamasinoga Sili. Na faapea atu le  ositaulaga sili: ʻNa matou faatonuina outou e sā ona toe aʻoaʻo atu e faatatau iā Iesu!’ Ae na tali mai Peteru: “E tatau ona matou usiusitaʻi i le Atua o le pule, nai lo o tagata.”

Na matuā feita taʻitaʻi lotu, ma na latou mananaʻo e fasioti le ʻauaposetolo. Peitaʻi, na tulaʻi mai se Faresaio e igoa iā Kamalielu ma faapea atu: ʻIa faaeteete. Atonu o loo faatasi le Atua ma nei tagata. Pe tou te mananaʻo e tau faasaga i le Atua?’ Na latou faalogo i lana fautuaga. Ina ua uma ona sasa le ʻauaposetolo i tootoo, ona toe faatonuina lea o i latou e sā ona toe talaʻi ma faasaʻoloto i latou. Ae e leʻi taofia ai le ʻauaposetolo mai i le talaʻi atu. Na faaauau pea ona latou talaʻi atu ma le lototetele le tala lelei, i totonu o le malumalu ma i lea fale i lea fale.