Skip to content

Skip to table of contents

 LESONA 63

Tusitusiga i le Puipui

Tusitusiga i le Puipui

Ina ua mavae sina taimi, ona avea lea o Pelesara ma tupu o Papelonia. I se tasi pō, na ia valaaulia ai le toʻaafe o tagata e sili ona tāua i le atunuu mo se faigaʻai tele. Na ia faatonuina ana auauna e aumai ipu auro na aveesea e Nepukanesa mai i le malumalu o Ieova. Na feinu Pelesara ma ē na latou faiʻaiga i na ipu, ma vivii atu i o latou atua. I lea lava taimi, na faafuaseʻi ona vaaia ai le lima o se tagata ua amata ona tusia ni faaupuga uigaese i le puipui o le potuʻai.

Na matuā fefe Pelesara. Na ia aami ana taulāitu ma faapea atu iā i latou: ʻO so o se tasi e mafai ona ia faamatalaina le uiga o nei upu, o le a ou tofia o ia e avea ma tagata lona tolu e sili ona maualuga i Papelonia.’ Ua latou taumafai e faamatala le uiga o na faaupuga, ae e leai se tasi na mafai ona faamatalaina. Ona sau ai lea o le masiofo ma faapea atu: ʻO loo iai se tagata e igoa iā Tanielu, sa masani ona ia faamatalaina le uiga o miti ma tupua iā Nepukanesa. E mafai ona ia faamatalaina iā te oe le uiga o na upu.’

Na alu atu Tanielu i le tupu. Na faapea atu Pelesara iā te ia: ʻAfai e mafai ona e faitauina ma faamatala le uiga o le tusitusiga, o le a ou avatu iā te oe se filifili auro ma o le a avea oe ma tagata lona tolu e sili ona maualuga i Papelonia.’ Na tali mai Tanielu: ʻOu te lē manaʻo i au meaalofa, ae o le a ou taʻuina atu le uiga o nei upu. Sa faamaualuga lou tamā o Nepukanesa, ae na faamaulaloina o ia e Ieova. Na e iloa mea uma na tutupu iā te ia, ae e te leʻi faaaloalo iā Ieova e ala i le inuina o uaina i ipu auro mai i Lona malumalu. O lea, ua tusia ai e le Atua upu nei: Mene, Mene, Tekele ma Uperesa. O le uiga o nei upu e faapea, o le a faatoʻilaloina Papelonia e tagata Metai ma Peresia, ma o le a lē toe avea oe ma tupu.’

Na foliga mai e leai se tasi na mafai ona faatoʻilaloina Papelonia. Na puipuia lenei aai i pā tetele ma se vaitafe loloto. Ae i le pō lava lenā, na osofaʻia ai e tagata Metai  ma Peresia le aai o Papelonia. Na faatafe ese e Kuresa le tupu o Peresia le vaitafe, ina ia mafai ai e ana fitafita ona savavali seʻia oo i pā o le aai. Ina ua latou oo atu i inā, o loo matala faitotoʻa o le aai. Na ō atu faavave i totonu le ʻautau, ua faatoʻilalo le aai ma fasiotia le tupu. Ona avea ai lea o Kuresa ma tupu o Papelonia.

I totonu o le tasi tausaga, na faalauiloa atu ai e Kuresa le mea lenei: ʻNa faatonuina aʻu e Ieova e toe fausia lona malumalu i Ierusalema. O so o se tasi o ona tagata e manaʻo e fesoasoani, e mafai ona toe foʻi.’ O lea, e pei lava o le folafolaga a Ieova, o le toʻatele o tagata Iutaia na toe foʻi i Ierusalema ina ua mavae le 70 tausaga talu ona faaumatia. Na toe faafoʻi e Kuresa ipu auro, ipu siliva ma isi mea na aveesea e Nepukanesa mai i le malumalu. Po o e mātauina le auala na faaaogā ai e Ieova Kuresa e fesoasoani i Ona tagata?

“Ua paʻū o ia! Ua paʻū Papelonia le Aai Tele, ua avea ma mea e nonofo ai temoni.”—Faaaliga 18:2