Skip to content

Skip to table of contents

 LESONA 102

Le Faaaliga na Vaaia e Ioane

Le Faaaliga na Vaaia e Ioane

A o faafalepuipuiina le aposetolo o Ioane i le motu o Patamo, na faaali ai e Iesu iā te ia se faasologa o vaaiga po o ata e 16 e faatatau i le lumanaʻi. O nei vaaiga na faaalia ai le auala o le a faapaiaina ai le suafa o Ieova, le oo mai o lona Malo, ma le faia o lona finagalo i le lalolagi e pei ona faia i le lagi.

I se tasi o vaaiga, ua vaaia ai e Ioane o loo afio Ieova i lona nofoālii mamalu i le lagi, o loo siʻomia e toeaina e 24 o loo oofu i ofu papaʻe ma ua i o latou ulu o pale auro. Ua sau mai i le nofoālii o uila ma leo o faititili. Ua ifo atu toeaina e 24 iā Ieova ma tapuaʻi atu iā te ia. I se isi vaaiga, ua vaaia ai e Ioane se motu o tagata e toʻatele mai i atunuu, ituaiga, ma gagana uma o loo tapuaʻi iā Ieova. O loo leoleoina i latou e Iesu le Tamaʻi Mamoe, ma taʻitaʻiina atu i latou i vai o le ola. Mulimuli ane i se isi vaaiga, ua amata ona pule Iesu o se Tupu i le lagi faatasi ai ma toeaina e 24. I le vaaiga na sosoo ai, ua vaaia ai e Ioane Iesu o loo tau ma Satani le tarako ma ana temoni. Ua lafoina ese i latou e Iesu mai i le lagi i le lalolagi.

 Ona vaaia lea e Ioane o se vaaiga matagofie o le Tamaʻi Mamoe ma le 144,000 o loo tutū i luga o le mauga o Siona. Ua ia vaaia foʻi se agelu o loo feleleaʻi i le lalolagi atoa, ma faailoa atu i tagata ina ia matataʻu i le Atua ma avatu iā te Ia le mamalu.

I le isi vaaiga, ua amata le taua o Amaketo. I lenā taua, ua faatoʻilalo ai e Iesu ma lana ʻautau ia Satani ma lana faiga amioleaga o mea. I le vaaiga mulimuli, ua vaaia ai e Ioane le matagofie o le autasi i le lagi ma le lalolagi. Ua faaumatia atoatoa Satani ma lana fanau. Ua faapaia e i latou uma i le lagi ma le lalolagi le suafa o Ieova, ma tapuaʻi atu tau lava o ia.

“Ou te faatupuina le feitagaʻi i le va o oe ma le fafine, ma i le va o lau fanau ma lana fanau. O le a ia tuʻimomomoina oe i le ulu, ae o le a e tuʻimomomoina o ia i le mulivae.”—Kenese 3:15