XIINXALLOTE BIRXICHO 3
Yihowa Qinaannohe Gede Kaaˈlannohe
“Kaaliiqi Yooseefi ledo noo daafira, heeshsho baala qiniitusi.”—KAL. 39:2, 3.
FAARSO 30 Annaˈya, Maganoˈyanna Jaalaˈya
GUULCHO a
1-2. (a) Qarru iillannonke woyite dhagge assiˈra hasiissannonkekkihu mayiraati? (b) Konni birxichira maa ronseemmo?
YIHOWA manna ikkinoommo daafira qarru iillannonke woyite dhagge diassiˈneemmo. Qullaawu Maxaafi kulannonte gede “Maganu gashshoote eate lowo qarra adha [hasiissannonketa]” anfoommo. (Soq. 14:22) Iillannonkehu mitu qarri Maganu abbannoti haaro alame dagga geeshsha woˈmunni woˈma baˈˈannokkita anfoommo; hatte yannara “reyo woy dadillu woy wiˈla woy shetto . . . diheedhanno.”—Aju. 21:4.
2 Yihowa qarru iillannonketa dihoolanno. Ikkirono isi qarra dandiine saˈneemmo gede kaaˈlannonke. Soqqamaasinchu Phaawuloosi Roomaho heeˈranno Kiristaanira mayinoro wodanchi. Isi umo isiranna ammanate roduuwisira iillinonsaha batinye qarra kulino. Hakkiinni isi togo yee borreessino: “Ninke kayinni baxinonkehu isi widoonni konne coye baala woˈmunni woˈma qeelle saˈneemmo.” (Rom. 8:35-37, NW) Togoo yaa Yihowa qarru iille noohe yannara nafa qinaannohe gede kaaˈlannohe yaate. Hanni Yihowa Yooseefira qinaannosi gede kaaˈlinosihu hiittoonniitironna ateno kaaˈlannohehu ma garinniitiro laˈno.
HEDEWEELCHO HEEˈNOOMMO GARI SOORRAMANNO WOYITE
3. Yooseefi heeshsho hedeweelcho soorrantinohu hiittoonniiti?
3 Yaiqoobi beettosi Yooseefi lowo geeshsha baxanno. (Kal. 37:3, 4) Hakko daafira bayiruuddu roduuwisi Yooseefi lowo geeshsha hinaassu. Insa faro afidhuti Yooseefi Miidiyaami daddalaasinera hirtu. Kuri daddalaasine lowo xibbe kiilo meetire xeertidhe nootewa Gibitse massite Yooseefi Feriooni agaraasine roorrichi Phoxifaarira hirtino. Yooseefi heeshsho hedeweelcho soorrantino; annisi lowo geeshsha baxannosi beetti Gibitsete mittu manchi borojjicho ikkino!—Kal. 39:1.
4. Yooseefira iillinosi gedee qarri iillankera dandaannohu hiittoonniiti?
4 Qullaawu Maxaafi ‘baalunku mannira bushu coyi iillanno’ yaanno. (Ros. 9:11, Holii Bayibili Iiziyi tu Ridi) Mito woyite “manna baalaho” iillanno qarri iillannonke. (1 Qor. 10:13) Woy Yesuusi rosaano ikkinoommo daafira qarru iillannonke. Lawishshaho mannu qacifatankera, giwankera woy ammanankenni kainohunni darammeemmo gede nafa assankera dandaanno. (2 Xim. 3:12) Iillannonke qarri ikkihano ikkiro Yihowa qinaannonke gede kaaˈlannonke. Isi Yooseefira qinaannosi gede kaaˈlinosihu hiittoonniiti?
Yihowa Yooseefi Gibitsete Phoxifaari borojjicho ikkanno gede hirrisi yannara nafa qinaannosi gede kaaˈlinosi (Gufo 5 lai)
5. Phoxifaari Yooseefira qinaannosi gede kaaˈlinosihu aye ikkinota huwatino? (Kalaqama 39:2-6)
5 Kalaqama 39:2-6 nabbawi. Phoxifaari Yooseefi dandoo noosi wedellichanna diinaggaawe loosannoha ikkinota wodanchino. Qoleno Phoxifaari, Yooseefi togooha ikkinohu mayiraatiro afino. Isi, Yihowa Yooseefira ‘assiri baalu qinaannosi’ gede assinota afino. b Gedensoonni Phoxifaari Yooseefi gamba yiino soqqamaancho assiˈrinosi. Qoleno isi minisi woˈmaho hajajaancho assiˈrinosi. Tini mayi guma abbituyya? Phoxifaari dureessa ikkino.
6. Yooseefira, iillinosi coyi daafira mayi macciishshaminosi?
6 Hanni Yooseefira mayi macciishshaminosiro hedate woˈnaali. Isi baalunku coyinni roore hasiˈrannori maati? Phoxifaari naadasiranna baˈraasasiraati? Isi roore hasiˈrannohu borojjimmatenni fule annisiwa higa ikkara dandaanno. Yooseefira Phoxifaari mini giddo roorre baala uyinoonnisiha ikkirono, isi Yihowa magansiˈrannokki manchi borojjichooti. Yihowa, Phoxifaari Yooseefi borojjimmatenni fushshanno gede diassino. Yooseefira albillitte rooru qarri iillannosi.
COYI ROORE BUSHANNI HAˈRANNO WOYITE
7. Yooseefira iillinosi qarri bushanni haˈrinohu hiittoonniiti? (Kalaqama 39:14, 15)
7 Kalaqama fooliishsho 39 kultannonte gede, Phoxifaari minaama Yooseefi ille worte laˈino; hattono iso soˈrisiisate duucha higge woˈnaaltino. Yooseefi kayinni horonta maahoyye diyiino. Jeefote ise Yooseefira lowo geya hanqitino daafira seyataera woˈnaalino yite kaphunni kassassinosi. (Kalaqama 39:14, 15 nabbawi.) Tenne macciishshiti Phoxifaari Yooseefi usurranni gede assino; hakkiinni Yooseefi usurame boode diro keeshshino. (Kal. 39:19, 20) Yooseefi usurroonnihu hiittoowaati? Yooseefi “usuru” mine kulate horoonsiˈrinohu Ibiraawootu afii qaali “bale” woy “qile” yineno tira dandiinanniho; tini Yooseefi usuraminohu tunsote ikkinotanna isi hexxo mudhinota leellishshanno. (Kal. 40:15) Qoleno Qullaawu Maxaafi mite yanna geeshsha Yooseefi, lekkasi cagaagetenni usurroonnitanna goowisira siwiilu shibo worroonnita kulanno. (Far. 105:17, 18) Yooseefira iillinosi qarri albinni roore bushanni haˈrino. Isi addaxxinanni borojjichi usuranya ikkino.
8. Iillinonke qarri roore bushanni haˈrirono maa addaxxa dandiineemmo?
8 Giddokkita kulte Yihowa huucciˈrittorono iillinohe qarri roore bushanni haˈrino yanna no? Togoo coyi iillankera dandaanno. Yihowa tenne Sheexaanu gashshino alame giddo qarru iillannonketa dihoolanno. (1 Yoh. 5:19) Ikkirono Yihowa iillannohere baala afannotanna towaatannoheta addaxxa dandaatto. (Mat. 10:29-31; 1 Phe. 5:6, 7) Qoleno isi “Horo diagureemmohe; dicallachisheemmohe” yee qaale eino. (Ibi. 13:5) Yihowa iillinohe qarri hexxo mudhatto gede assihero nafa dandiite saˈˈatto gede kaaˈlannohe. Hanni Yihowa togoo yannara Yooseefi kaaˈlinosi gara laˈno.
Yooseefi usurame noo yannaranna usuranya baalaho roorre uyinisi yannara Yihowa ledosi no (Gufo 9 lai)
9. Yooseefi usurame noo yannara Yihowa ledosi noota leellishannori maati? (Kalaqama 39:21-23)
9 Kalaqama 39:21-23 nabbawi. Yooseefi usurame noote qarru yannara nafa Yihowa qinaannosi gede kaaˈlinosi. Hiittoonni? Phoxifaari assinte gede usuru mini roorrichi Yooseefi ammaninosi hattono ayirrisinosi. Mulenni usuru mini roorrichi usuru mine noo usuranyoota baalanka Yooseefi anga worino. Isinni Qullaawu Maxaafi, “Usuru mini roorrichino Yooseefi anga noore mittoreno dilaˈˈanno” yaanno. Xa Yooseefira loosannohu danchu loosi noosi. Tini dihendoonnite! Gashshaanchu minaama seyatino yine kassansoonni usuranyira togoo hadara hiitto aa dandiinanni? Qullaawu Maxaafi tenne xaˈmora dawaro qolanni Kalaqama 39:23 togo yaanno: “Kaaliiqi ledosi noo daafira, assannori baalu qiniisi.”
10. Yooseefira baalunku coyi qiniinosiha lawinosikkihu mayiraatiro xawisi.
10 Hanni xaano Yooseefira mayi macciishshaminosiro hedi. Kaphunni kassanse usurrisihu gedensaanni isi baalunku coyi qinaannoe yee hedinoha lawannohe? Yooseefi roore hasiˈranno coyi maati? Usuru mini roorrichi ayirrisasira hasiˈranno? Yooseefi roore hasiˈranno coyi usuru mininni fulate. Wole agurina isi, usuru mininni fulanni noo usuranyi Ferioonira kule usuru mininni fulanno gede assasira nafa xaˈmino. (Kal. 40:14) Ikkirono hakku manchi bayichonkonni Ferioonira dikulino. Hakko daafira Yooseefi hakkuyi gedensaanni lame diro woˈma usuru mine keeshshino. (Kal. 40:23; 41:1, 14) Ikkirono Yihowa Yooseefira qinaannosi gede kaaˈla diagurino. Hiittoonni?
11. Yihowa Yooseefira hiittee baxxitino dandoo uyinosi? Tini Yihowa hedinori woˈmanno gede assitinohu hiittoonniiti?
11 Yooseefi usuru mine noo yannara Yihowa Gibitsete moote lame yaachishshanno haaqee haaqiiˈranno gede assino. Feriooni tenne haaqee tiro afate lowo geeshsha quqquxamino. Moote Yooseefira haaqee tirate dandoo noosita afiti usuru mininni woshshiishe abbino. Yihowa kaaˈleennasi Yooseefi haaqeete tiro kulino; hattono kaajja amaale amaalesi Feriooni maalaˈlanno gede assino. Feriooni Yihowa konni wedellichi ledo noota afiti Gibitsete gobba baalate sagale beehanno gede shoominosi. (Kal. 41:38, 41-44) Gedensoonni Gibitsetenna Yooseefi maate heedhannote Kanaani gobbara buutote hude ubbu. Xa Yooseefi maatesi gatisa dandaanno; tini Buuramino Moote daanno kali gate saˈˈanno gede assitanno.
12. Yihowa Yooseefira qinaannosi gede assinohu hiitte doogganniiti?
12 Hanni Yooseefira tuncu yiinosiha dhagge ikkanno coye hedi. Phoxifaari borojjichosi Yooseefi baxxino garinni laˈˈanno gede assinohu ayeti? Usuru mini roorrichi usuranya Yooseefi ayirrisanno gede assinohu ayeti? Feriooni yaachishshanno haaqee haaqiiˈranno gede assinohunna Yooseefira tenne haaqee tirate dandoo uyinohu ayeti? Yooseefi Gibitsete gobbara sagale beehannoha asse shoomanno gede Feriooni kakkayisinohu ayeti? (Kal. 45:5) Yooseefira baalunku coyi qinaannosi gede assinohu Yihowaati. Yooseefi roduuwi iso shaate gano gantinoha ikkirono, Yihowa konne coye soorre isi hedinori woˈmanno gede assino.
YIHOWA QINAANNOHE GEDE ASSANNOHU HIITTOONNIITI?
13. Yihowa iillannonkehu mittu mittunku coyira mereero eanno? Xawisi.
13 Yooseefi daafira kultanno xaggenni maa ronseemmo? Yihowa iillannonke coyi baalaho mereero dieanno. Isi iillannonkeha mitto mittonka busha coye danchurira qole soorranno? Disoorranno. Qullaawu Maxaafi hatto yee dirosiisanno. (Ros. 8:9; 9:11) Ikkirono, Yihowa qarru iillannonke woyite afannotanna kaaˈlannonke gede raarreemmo raare macciishshannota anfoommo. (Far. 34:15; 55:22; Isa. 59:1) Hakkiino sae Yihowa iillannonke qarra qeelle saˈneemmo gede kaaˈlannonke. Hiittoonni?
14. Yihowa qarru yannara kaaˈlannonkehu hiittoonniiti?
14 Yihowa kaaˈlannonketi mitte doogo sheshonna jawaante afiˈneemmo gede assate; isi duucha woyite tenne assannohu hasiisse noonke yannaraati. (2 Qor. 1:3, 4) Turkiministaanete heeˈrannohu Iziizi yinanni rodii woˈnaalshi tenne leellishanno; ammaˈnasinni kainohunni iso lame diro usurroonnisi. Isi togo yiino: “Yoote minira haaˈne haˈnie barra mittu rodii, ‘Sammi yitine ane calla hexxitiniro, jawaantenna gato afidhinanni’ yaannoha Isayaasi 30:15 noo qummeeshsha leellishinoe. Kuni qummeeshshi woˈmanka woyite wodanaaˈmeemmonna baalunku coyira Yihowa addaxxeemmo gede kaaˈlinoe. Konne qummeeshsha hiincaˈya usurame noommo yanna baalantera kaaˈlitinoe.” Roore hasiisse noohe yannara Yihowa sheshonna jawaante oye kaaˈlinohe yanna qaagatto?
15-16. Toori woˈnaalshinni maa rosootto?
15 Duucha woyite Yihowa qarra dandiine saˈneemmo gede kaaˈlinonketa huwanteemmohu qarru hoˈlihu gedensaanniiti. Toori yinanni rodoo tini halaale ikkase huwattino. Qaaqqise Maasooni lee diro woˈma kaanserete dhibbi waadisihu gedensaanni lubbamino. Toori lowo geeshsha xissiisidhinoti dihuluullissannote. Ise, “Mitte ama kawii saˈe xissiisidhanno gede assannori no yee dihedeemma” yitino. Ise ledde togo yitino: “Qaaqqiˈya qarramanna laˈˈammante ani qarramummaro woyyanno; wolootu annuwinna amuuwino tennera sumuu yitannoti dihuluullissannote.”
16 Toori iillinose qarri buutonniha ikkirono ise gedensoonni Yihowa konne qarra dandiite saˈanno gede kaaˈlinose gara huwattino. Ise togo yitino: “Hatte yanna hedeemma woyite, qaaqqiˈya dhiwami yannara Yihowa shaqqillunni kaaˈlinoe gara qaageemma. Lawishshaho Maasooni lowo geeshsha dhiwameenna mannu iso laˈˈara fajjinannikki yannara nafa, roduuwu lame saate woˈma makeenunni hadhe iso laˈˈate hospitaale daggino. Hospitaale daye kaaˈlannonke manna horo hoonge diegenninoommo. Qoleno roduuwu maalaamittete hasiisannonkere baala wonshitinonke. Lowo geeshsha qarrissanno yannara nafa woˈmanka woyite hasiisannonkere afiˈnoommo.” Yihowa Toorira qarra dandiite saˈanno gede hasiisannosere uyinose; Maasoonino kaaˈlinosi.—“ Yihowa Hasiise Noonkere Uyinonke” yitanno saaxine lai.
YIHOWA ASSINOHERE HABBOOTI
17-18. Qarru yannara Yihowa kaaˈlanni noonketa huwanteemmonna iso galaxxineemmo gede kaaˈlannonkeri maati? (Faarso 40:5)
17 Faarso 40:5 nabbawi. Ilaala gooddiˈranno manchi mixo ilaalu guunxo iillate. Ikkirono gooddiˈranno woyite doogote uurre biifinore laˈˈanni hagiidha dandaanno. Hatteente gede, qarra dandiite noottoha ikkiro nafa Yihowa qinaannohe gede kaaˈlanni noohehu hiittoonniitiro taxxi yite hedate woˈmanka woyite yanna gaaˈma dandaatto. Mittu mittunku barri jeefora ateneeto togo yite xaˈmi: ‘Teyo Yihowa maassiˈrinoehu ma garinniiti? Qarru iillanni nooeha ikkiro nafa dandee saeemmo gede Yihowa kaaˈlanni nooehu hiittoonniiti?’ Yihowa qinaannohe gede kaaˈlinoheha ajayi ajeenna mitto coye hedate woˈnaali.
18 Iillinohe qarri hoˈlanno gede huuccidhanni noottoha ikkara dandaanno. Hatto assakki garahonna hasiissannote. (Fil. 4:6) Ikkirono xa afiˈnoommo atooteno wodancha hasiissannonke. Baalunkunni roore Yihowa jawaachishannonketanna qarra dandiine saˈneemmo gede kaaˈlannonketa kule qaale einonke. Hakko daafira woˈmanka woyite Yihowa kaaˈlora iso galaxxi. Hatto assittoro Yihowa Yooseefi kaaˈlinte gede qarru yannara nafa qinaannohe gede kaaˈlanni nooheta wodanchatto.—Kal. 41:51, 52.
FAARSO 32 Yihowa Wido Ikki!
a Lowo fonqoli iillannonke woyite ‘qiniinonkekkihu’ gede assine hendammora dandiineemmo. Qiniinonke yine hendeemmohu iillinonke qarri hoˈlanno woyite ikkara dandaanno. Ikkirono Yooseefira iillinosirinni mitto qara roso yaano qarru giddo heeˈneemmo woyite nafa Yihowa qinaannonke gede kaaˈlannonketa ronseemmo. Konni birxichira Yihowa qinaannonke gede kaaˈlannonkehu hiittoonniitiro ronseemmo.
b Qullaawu Maxaafi Yooseefi borojjicho ikke noo yannara umo soorraminoha konne coye kulannohu boode kiirora callaati; kayinni kuni coyi ikkinohu lowo diri giddo ikkara dandaanno.
