HANNI TENNE HEDI: Hashsha tunsichunni doogo hadhanni nootto. Tunse xiˈminoha ikkirono, anga warri yite xabbanno baatire adhootto daafira hakkeeshsha dimasootto. Baatire uullara qolte ganatto wote mulekki noori baalu leellannohe. Albira qolte ganatto wote kayinni xeertowa noori baalu waraˈa yee leellannohe.

Qullaawu Maxaafino mite doogganni laˈniro baatirete gedeeti. Saˈu birxichuwara ronsummonte gede, Maganu Qaali mulenke noo qarra yaano barru baala iillannonke fonqolo dandee saˈˈate kaaˈlannonke. Ikkollana Qullaawu Maxaafi kaaˈlo tenne calla diˈˈikkitino. Qullaawu Maxaafi albillittete daafira hagiirsiissanno hexxo kulannonke; tini qolte hegere heeshshowa massitanno doogo anfeemmo gedenna hatte doogo haˈneemmo gede kaaˈlitannonke. (Faarso 119:105) Hiittoonni?

Hanni Qullaawu Maxaafi albillittete hexxo daafira kulannota lame doogo laˈno. Maganu Qaali, 1 hagiirraame heeshsho heeˈneemmo garanna 2 Kalaqaanchu ledo hegere jaalooma kalaqiˈra dandiineemmo gara kulannonke.

Qullaawu Maxaafi qarra qeele saˈˈate kaaˈlitanno amaale aannonke; ikkollana Qullaawa Maxaafa wole qarra tirate calla kaaˈlitanno maxaaffa gede assine laˈˈa dihasiissannonke. Qullaawu Maxaafi uminke daafira calla heda agurre wolootu daafirano hendeemmo gede rosiisannonke. Hagiirraame heeshsho heeˈneemmohu hatto assinummoro callaati.

Lawishshaho hanni “adhannonkunni aannohu baˈraaˈrinoho” yaannoha Qullaawu Maxaafiha xintu seera hedi. (Soqqamaasinete Looso 20:35) Qarraminoha laˈe kaaˈlootto yanna qulli yitannohe? Woy mitu manni mitiinsinonsa coye hasaaphanna seekkite macciishshootto yanna qaagatto? Qarrantinore kaaˈlakkinni lowo geeshsha dihagiidhootto?

Baalunkunni roore hagiidhineemmohu, anga qollankere yine hendummokki woloota kaaˈlineemmoha ikkirooti. Mittu borreessaanchi, “Anga qolahera agadhittokkinni qarramino mancho kaaˈlattoha ikkiro oottorinni roorsite afiˈratto” yiino. Hakko iso anga qole afannokki manna uminke fajjonni kaaˈlineemmoha ikkiro, lowo atoote afiˈneemmo. Qarrantinore kaaˈlineemmoha ikkiro Kalaqaanchu ledo mitteenni loonsanni heeˈnoommo yaa dandiinanni; korkaatuno isi buxanete uyinoonnire isira liqiissinoonnihu gede asse laˈˈanno. (Lawishsha 19:17) Yihowa qarrantinore kaaˈlate assineemmore lowo geeshsha naadanno, hattono gannate ikkitanno uullara hegere heeshsho oye assinoommore baala qolannonke; tini hagiirsiissanno hexxooti!​—Faarso 37:29; Luqaasi 14:​12-14. *

Qullaawu Maxaafi baalunkunni roore hagiirraame heeshsho heeˈrate kaaˈlitannonketi halaalaancho Magano Yihowa magansiˈra ikkitinota kulanno. Maganu Qaali, Yihowara guweenyanna ayirrinye uyinammosira hattono hajajammeemmosi gede jawaachishannonke. (Rosiisaancho 12:13; Yohaannisi Ajuuja 4:​11) Tenne amaale harunsineemmoha ikkiro Kalaqaanchonke hagiirsiinseemmo; kuni qole kaajja coyeeti. Maganu ‘egennaamma ikkitine hagiirsiisseˈˈe’ yee amaalinonke. (Lawishsha 27:11) Mitto coye dhoodhineemmo wote Qullaawu Maxaafihu xintu seeri garinni doodhineemmoha ikkiro, iimi Anninke wodana tashshi assineemmo. Mayira? Korkaatuno isi ninkera hedanno daafira biddishshasi harunsine horo afiˈnammora hasiˈranno. (Isayaasi 48:​17, 18) Kalqete alamera Aliidiha ikkino Magano magansiˈratenna iso hagiirsiisanno garinni heeˈratenni roore tashshi assannori dino!

Qullaawu Maxaafi Kalaqaanchinke ledo jaalooma kalaqiˈneemmo gede rosiisannonke. Qullaawu Maxaafi, “Maganunniwa shiqqi yiiyye; isino kiˈnewa shiqqi yaanno” yee amaalannonke. (Yaiqoobi 4:8) Mito wote woˈmanka dandaanno Kalaqaanchi ledo jaalooma kalaqiˈra dandaattokkiha lawahera dandaanno. Ikkollana Qullaawu Maxaafi Magano ‘hasiˈnummoro afiˈra’ dandiineemmotanna Isi ‘ninkewiinni xeertiˈrinokkita’ kulannonke. (Soqqamaasinete Looso 17:27) Qullaawu Maxaafi Maganu ledo kalaqiˈnanni jaaloomi daafira amaalannonke amaale albillittete heeshshonkerano lowo geeshsha kaaˈlitannote. Hiittoonni?

Hanni tenne hedi: Aye geeshsha sharrammummorono jeefote diina ikkitinota reyo miliqa didandiineemmo. (1 Qorontoosi 15:26) Yihowa kayinni hegere Maganooti. Isi horo direyanno, jaallasino hegerera heedhara hasiˈranno. Qullaawu Maxaafi giddo nooti “Insa heeshshonsa diri baalunkunni qawaaxxidhe heedhanno” yitanno hedo Yihowa iso hasidhannori hagiirraame heeshsho heedhara hasiˈrannota leellishshanno.​—Faarso 22:26.

Ikkina hegere geeshsha Maganu ledo jaalooma kalaqiˈra dandaattohu hiittoonniiti? Qullaawu Maxaafinni isi daafira rosa agurtooti. (Yohaannisi 17:3; 2 Ximootewoosi 3:​16) Qaalesi huwata dandaatto gede kaaˈlahera huuccatto assiˈri. Qullaawu Maxaafi, ayyaannasi afiˈrate agurrummokki ‘Magano huucciˈnummoro’ Isi aannonketa kulannonke. * (Yaiqoobi 1:​5) Rosootto roso harunsattoha ikkiro, Maganu Qaali xaano ikko hegerera ‘lekkakkira caabbicho, doogokkira xawaabba’ ikkannohe.​—Faarso 119:105.