Heeshshote Heeˈneemmohu Mayiraati?
Qullaawu Maxaafi mayyaanno?
Mannu tenne xaˈmo duuchu garinni xaˈmara dandaanno; lawishshaho, ‘Kalaqammoommohu isi mayiraati?’ ‘Heeshshote heeˈraˈya mayi waaga afidhino?’ yee xaˈmara dandaanno. Qullaawu Maxaafi kalaqammoommohu Maganu ledo jaalooma kalaqiˈne heeˈrate ikkinota kulanno. Hanni tenne daafira Qullaawu Maxaafi kulannoha mito halaale laˈno.
Maganu Kalaqaanchonkeeti. Qullaawu Maxaafi “Kalaqinonkehu isooti” yaanno.—Faarso 100:3; Yohaannisi Ajuuja 4:11.
Maganu mannano ikko wole baalankare kalaqinohu dimullaati.—Isayaasi 45:18.
Maganu kalaqinonkehu ‘ayyaanaamittete coyiˈra’ hasatto heedhannonke gede asseeti; tini qolte ‘Heeshshote heeˈneemmohu mayiraati?’ yine xaˈmineemmo gedeno assitannonke. (Maatewoosi 5:3, NW) Maganu ayyaanaamittete hasattonke wonshiˈnammora hasiˈranno.—Faarso 145:16.
Ayyaanaamittete hasattonke wonshiˈra dandiineemmohu Maganu ledo jaalooma kalaqiˈnummoroti. Mitootu Maganu jaala ikka didandiinanni yite hedduruno, Qullaawu Maxaafi kayi “Maganunniwa shiqqi yiiyye; isino kiˈnewa shiqqi yaanno” yee kulanno.—Yaiqoobi 4:8; 2:23.
Maganu jaala ikkate isi hede kalaqinonke garinni heeˈra hasiissannonke. Rosiisaancho 12:13 Maganu manna kalaqinohu mayiraatiro kultanni, “Kuni mannu woˈmunkura hasiisinohona, Magano ayirrisi; hajajosino agadhi” yitanno.
Maganu albillitte qarra baala hune iso magansidhannoriranna jaallasi ikkitinorira hegere heeshsho aannonsa woyite, woˈmunni woˈma isi hede kalaqinonke garinni heeˈneemmo.—Faarso 37:10, 11.