KIRISTAANU Kiristoosi reyo Qaaggooshshe ayirrisanno gede hajajo uyinoonni. Konne ayyaana “Mootichchu Hurbaateno” yinanni. (1 Qorontoosi 11:20, NW) Kuni ayyaani hasiisannoha ikkinohu mayiraati? Konne ayyaana ayirrisa hasiissannohu mamooteeti? Ayirrinsannihuna hiittoonniiti?

Yesuusi Kiristoosi konne ayyaana xintinohu 33 M.D. Yihudootunniha Faasiku ayyaana ayirrinsanni hashshaati. Faasiku ayyaana ayirrinsannihu dirunni mitte hinge Nisaani yinannihu Yihudootu aganira 14⁠^ki barraati. Nisaani agani jammarannohu aganu buuda abbanno woteeti. Mito wote aganu buuda abbannohu badheessu aganira umi saamminteraati. Yihudootu Faasiku ayyaana ayirrisate hakko barrinni jammarte 14 barra kiirtanno. Konne ayyaana ayirrissannohu arrishsho eˈuhu gedensaanniiti.

Yesuusi hawaariyaatesi ledo Faasiku ayyaana ayirrisihu gedensaanni Asqorootu Yihuda fulanno gede asse Mootichchu Hurbaati ayyaana xintino. Kuni hurbaati Yihudootunniha Faasiku ayyaana riqiwino daafira ayirrisa hasiissannohu dirunni mitte hinge callaati.

Maatewoosi Wongeeli togo yaanno: ‘Sagale ittanna Yesuusi tima haaˈre, galatu huuccatto asse, hiiqqaqqe rosaanosira, “Hiiˈe  kuni maalaˈyaati” yee uyinsa. Finiinchono haaˈre, galatu huuccatto asse kae togo yee uyinsa: “Duuchchunku konni finiinchinni agge. Tini lowo manni cubbi [maarora] duˈnantannote gondooru mundeeˈyaati.”’—Maatewoosi 26:26-28.

Mitu mitu mannira Yesuusi tima addu maalisira hattono woyine addu mundeesira soorrinoha lawannonsa. Ikkollana Yesuusi tima uyinsa yannara bisisi ikkinori dino. Yesuusi hawaariyaate addinta isiha addu maala ittino? Qolteno addu mundeesi aggino? Deeˈni. Hatto assitinoha ikkoommero Maganu higge garinni kabbaade soˈrootinna shagaggi assannoreeti. (Kalaqo 9:3, 4; Zelewaawuyaani 17:10) Luqaasi 22:20 aana Yesuusi, “Kuni finiinchi haaru gondoorira kiˈnera yee duneemmo mundeeˈyaati” yiinonsa. Hakku finiinchi umisi “haaro gondooro” ikkino yaate? Deeˈni. Korkaatuno gondooroho yaa sheemaateho yaate ikkinnina illete leellannore diˈˈikkino.

Konni daafira timuno ikko woyine lawishshaholla. Timu cubbu nookkiha Kiristoosi maala riqiwannoho. Yesuusi uyinonsa timi Faasiku hurbaatinni gatinoho. Kuni timi irsho nookkiha gannoonniho. (Wolaphpho 12:8) Qullaawu Maxaafi irsho cubboho lawishsha asseno horoonsiˈranno. Konni daafira timu Yesuusi sayise uyinoha cubbu nookkiha woyi guuta maalasi riqiwannoho.—Maatewoosi 16:11, 12; 1 Qorontoosi 5:6, 7; 1 Pheexiroosi 2:22; 1 Yohaannisi 2:1, 2.

Duume woyine Yesuusi mundee riqibbanno. Tini mundee haaro gondooro waagu heeˈrannosi gede assitanno. Yesuusi, tini mundee duˈnantannohu ‘cubbu maarora’ ikkinota coyiˈrino. Konni daafira Maganu mannu ooso keeraano asse laˈˈansara dandaanno. Qolteno mannu ooso Yihowa ledo haaro gondooro ea dandiitanno. (Ibiraawuyaani 9:14; 10:16, 17) Kuni gondoori woyi sheemaati 144,000 ammanamino Kiristaani iimira haˈra dandaanno gede faro faninonsa. Insa mannu ooso baala atoote afidhanno gede nugussanna kakkalaano ikkite iima soqqantanno.—Kalaqo 22:18; Ermiyaasi 31:31-33; 1 Pheexiroosi 2:9; Ajuu[j]a 5:9, 10; 14:1-3.

Konni ayyaanira qixxaawanno tima itanna hattono konni ayyaanira qixxaabbino woyine qamasa dandiitannori ayeooti? Haaru gondoori miilla ikkitinore callaati. Insano iimira haˈrate hexxo noonsareeti. Insa iima nugussa ikkate doorantinota Maganu ayyaani kulannonsa. (Roomu Sokka 8:16) Hakkii saˈeno kuri  doorantinori Yesuusi ledo Gashshootu sheemaate eˈino.—Luqaasi 22:29.

Gannate ikkitanno uullara hegerera heeˈrate hexxo noonsarina? Insano Yesuusira hajajante Mootichchu Hurbaati ayyaana ayirrissanno. Ikkollana konni ayyaanira qixxaawino tima diˈˈittanno hattono konni ayyaanira qixxaabbino woyine diqamassanno. Yihowa Farciˈraasine dirunni mitte higge Nisaani 14⁠ⁿⁿⁱ Mootichchu Hurbaate ayirrissanno. Alamete deerrinni iimi hexxo noonsata coyiˈrino manni shiima kume ikkirono, konne ayyaana duuchchunku Kiristaani kaffi asse laˈˈanno. Tini yanna baalunku Kiristaani Yihowanna Yesuusi Kiristoosi mannu oosora leellishshinoha bayira baxille seekkite assaabbanno yannaati.—Yohaannisi 3:16.