FIRDETE barra yinanni wote mayi qulli yaannohe? Batinynyu manni, biliyoonete kiirranni manni mittu mittunku Maganu zuufaane albaanni firdete shiqanno yee hedanno. Hakkiinnino mittu mittunkura firde uyinanni. Mitu iima gannate eanno; gamu kayinni hegerera giiramanno yaanno. Ikkollana Qullaawu Maxaafi firdete yanna lainohunni rosiisannori konninni baxxinoho. Maganu Qaali hatti yanna waajjinannita ikkitukki hexxonnitanna mannu ooso guuta ikkitanno yannaati yee xawisanno.

Ajuu[j]a 20:11, 12 (NW) aana hawaariya Yohaannisi Firdete Barra lainohunni togo yiino: ‘Hakkunni gedensaanni lowota waajjo zuufaanenna aanase ofolle nooha laummo. Hatte yannara uullanna iimi albisinni xooqqu; hanseno dianfoonni. Reyino mannano shiimmaddanna jajjabba zuufaanete albaanni uurrite heedheenna laummo. Borrono fanni; heeshshote borro ikkitinoti wole borrono fanantu. Reyino mannirano borrote giddo borreessinoonni garinni loosinsa gede farandinsa.’ Tenne xiqise aana faradanno yinoonnihu ayeeti?

Maganu Yihowa mannu oosora bayira Daanynyaati. Ikkollana firdete looso woleho uyino. Hawaariya Phaawuloosi Soqqamaanote Looso 17:31 aana togo yino: “Isi doodhino manchi [widoonni] qole daga duuchchate halaalu [firde faradanno] barra murino.” Kuni doorroonni Daanynyi Yesuusi Kiristoosiiti. (Yohaannisi 5:22) Ikkina Firdete Barri mamoote jammarannoyya? Tini firdete yanna mageeshsha keeshshitanno?

Ajuu[j]ate maxaafi, Firdete Barri Armageedooni oli uullate aana noota Sheexaanu alame huni gedensaanni jammarannota  xawisanno. * (Ajuu[j]a 16:14, 16; 19:19–20:3) Armageedooni gedensaanni Sheexaanunna agaanintesi kume diro qilete giddo usurantanno. Hatte yannara iima ragidhannori 144,000 daanynyoota ikkite, “[Kiristoosi] ledo kume diro mookkanno.” (Ajuu[j]a 14:1-3; 20:1-4; Roomu Sokka 8:17) Firdete Barri 24 saate giddo goofannoha ikkikki kume diro keeshshitanno yannaati.

Hattee kumu diri yannara, Yesuusi Kiristoosi ‘[lubbote] nooriranna reyitinorira [firde faradanno].’ (2 Ximootewosi 4:1) ‘Lubbote noore’ yiniri, Armageedooni olinni gatte saˈannoreeti. Insa “[batinynye] manna” yinanni. (Ajuu[j]a 7:9-17) Qoleno hawaariya Yohaannisi, firdete ‘zuufaane albaanni uurrinoha reyino manna’ laino. Yesuusi eino qaali garinni, ‘waammate giddo noori qaalesi [Kiristoosiha] macciishshite’ reyotenni kaˈanno. (Yohaannisi 5:28, 29; Soqqamaanote Looso 24:15) Ikkina konni mannira firde uyinannihu mayi garinniiti?

Hawaariya Yohaannisi laino ajuujara, ‘borro faˈnanteenna reyino mannira borrote giddo borreessinoonni garinni loosinsa gede firde uyinoonninsa.’ Tini borro mannu reyara albaanni assinore borreessinoonni maxaaffaati? Deeˈni; korkaatuno mannaho firde uyinannihu reyara albaanni assinorinni diˈˈikkino. Tenne mayinni anfeemmo? Qullaawu Maxaafi togo yaanno: ‘Reyino manchi cubbisinni keeraaˈmino.’ (Roomu Sokka 6:7) Konni daafira, reyino manni bashsho assino cubbinni keeraaˈme reyotenni kaˈˈanno. Konni korkaatinni, faˈnantu borro Maganu kuni manni ma assara hasiˈrannoro kultannote yaate. Armageedooni ola gatte saˈannorino ikko reyotenni kaˈannori hegerera heeˈra dandiitanno gede, Maganu hajajo ayirrisa hasiissannonsa; togo yaano Yihowa kumu diri giddo aanno hajajono ayirrisa hasiissannonsa yaate. Konni daafira, mannaho firde uyinannihu Firdete Barra assanno assooti garinniiti.

Firdete Barra biliyoonetenni kiirranni manni Maganu alaama rosanna konni alaami garinni heeˈra mite yee jammaranno. Togo yaano hatte yannara lowo manna rosiinsanni yaate. Addaho, “uullate aana heedhannori xalalle rossanno.” (Isayyaasi 26:9) Ikkeennano  baalunku manni Maganu fajjo garinni heeˈranno yaa diˈˈikkino. Isayyaasi 26:10 togo yitanno: “Bushu manchi ayirrinsisirono, xalalle dirosanno. Xalalle woˈmitino uullarano kuni manchi miicanno; isi Yihowa ayirrinynye dilaˈˈanno.” Togoohu bushu manni Firdete Barra reyiro layinkita dikaˈˈanno.—Isayyaasi 65:20.

Firdete Barri jeefora, gatino manni guuta ikke heeˈra jammaranno. Konni daafira, Firdete Barra mannu ooso hundihu Maganu alaami garinni guuta ikkitanno. (1 Qorontoosi 15:24-28) Hakkiinnino jeefote fatani daanno. Sheexaanu usuraminowiinni tidhame manna mitte hige fattananno; kunino goofimarchu fatanaati. (Ajuu[j]a 20:3, 7-10) Konne fatana qeele saˈˈanno manni, aante nooti Qullaawu Maxaafi masaalo insa aana woˈmitanna hagiidhanno: “Keeraano uulla ragidhanno; ise aanano hegerera heedhanno.” (Faarso 37:29) Addaho, Firdete Barri ammanamino mannira baalaho lowo atoote abbanno!