Ri carta xtaq bʼi chke ri Romanos 9:1-33
9 Rumal che in u discípulo ri Cristo tajin kinbʼij ri qastzij. Y rumal che ri espíritu santo ukʼamom nubʼe qas wetaʼm pa wanimaʼ* che qastzij wi ri kinbʼij
2 che kinbʼisonik y amaqʼel kqʼoxow ri wanimaʼ.
3 Kwaj che in kkʼajisax nuwach chkiwach ri e wachalal ri e teren ta chrij ri Cristo, we rukʼ wariʼ keʼintoʼ.
4 Ri wachalal ri’ are ri israelitas, ri xechaʼik rech xeʼok ralkʼwal ri Dios, chkiwach xukʼut wi ri unimal uqʼij, chke xuya wi ri pactos y ri Ley, chke are’ xubʼij wi ri kubʼan na y chke xuya wi bʼe kkiqʼijilaj.
5 E areʼ e ralkʼwal ri qatiʼt qamam y kukʼ xalax wi ri Cristo. Amaqʼel chyoq uqʼij ri Dios ri ktaqan puwiʼ ronojel. Amén.
6 Pero kraj ta kubʼij che ma ta xbʼantaj ri xubʼij ri Dios. Rumal che e juntir ta ri e ralkʼwal ri «Israel» e israelitas.
7 Paneʼ e petinaq pa ri u familia ri Abrahán, chuwach ri Dios qas ta e ralkʼwal ri Abrahán, rumal che tzʼibʼam kanoq: «Rumal rech ri Isaac kekʼiyar na ri awalkʼwal».
8 Wariʼ kraj kubʼij che e juntir ta ri e ralkʼwal ri Abrahán, qas e ralkʼwal ri Dios. Xaneʼ ri qas e ralkʼwal ri Abrahán chuwach ri Dios are ri xeʼubʼan kan prometer che kekʼojiʼ na.
9 Are waʼ ri xubʼan kan prometer ri Dios: «Je taq qʼij waʼ kinpetik y ri Sara kkʼojiʼ na jun ral».
10 Y xaq xiw ta jumul xbʼan ri promesa, xaneʼ xuqujeʼ xbʼan rukʼ ri Rebeca are chiʼ xekʼojiʼ ri alaj taq u gemelos* rukʼ ri qamam Isaac.
11 Are chiʼ majaʼ kekʼojiʼ ri akʼalabʼ y majaʼ kkikʼutu we utz o utz ta ri kkibʼano, ri Dios ubʼim chi kanoq jachin ri kuchaʼo. Rumal che ri Dios kuchaʼ jachin ri kraj y xa ta rumal ri kubʼan ri winaq.
12 Xbʼix kʼu che ri Rebeca: «Ri nabʼeʼal kok na resclavo ri uchaqʼ».*
13 Rumal laʼ xtzʼibʼax kanoq: «Más xwaj ri Jacob chuwach ri Esaú».*
14 ¿La xa tajin kqabʼij chi ri Dios utz ta ri kubʼano? ¡Jeʼ taj!
15 Rumal che xubʼij che ri Moisés: «Ri winaq ri kwaj kintoqʼobʼisaj uwach kintoqʼobʼisaj na uwach, y ri winaq ri kwaj kel nukʼuʼx che, kel na nukʼuʼx che».
16 Rumal laʼ, xa ta rumal che ri winaq kraj ktoqʼobʼisax uwach o kukoj uchuqʼabʼ rech ktoqʼobʼisax uwach, xaneʼ are ri Dios kilowik jachin kutoqʼobʼisaj uwach.
17 Pa jun parte pa ri Utzij ri Dios, ri Dios xubʼij che ri faraón: «Xinya ta bʼe katkamik rech awumal at kinkʼut ri nu poder chkiwach ri winaq, jeriʼ ketaʼmax ri nubʼiʼ pa ronojel ri uwach ulew».
18 Rumal laʼ, are ri Dios kilowik jachin kraj kutoqʼobʼisaj uwach, pero kuya bʼe che jun winaq kkowir ri ranimaʼ.
19 Rukʼ ri xinbʼij weneʼ kichomaj: «¿Jas kʼu che e ajmakibʼ ri winaq chuwach ri Dios? ¿La k’o jun kqʼatenik rech kubʼan ta ri kraj kubʼano?».
20 Pero ri at ri xa at winaq jasche katwalij chrij ri Dios, ¿la kʼo lo jun jastaq kubʼij che ri xbʼanowik «¿jasche jewaʼ xabʼan che nubʼanik?»?
21 Ri winaq ri kchakun chrij ri kachʼ ulew, ¿la ma ta are kchaʼowik jas kubʼan che ukojik ri ulew? Are kchaʼowik we kukoj che ubʼanik jun tʼuy rech kkoj pa jun qʼij nim ubʼanik o kukoj che ubʼanik jun tʼuy ri kkoj ronojel taq qʼij.
22 Jelaʼ xubʼan ri Dios, ri areʼ xraj kukʼut ri royowal y ri u poder chkiwach ri itzel taq winaq, pero xubʼan taj, rumal che kʼo u paciencia kukʼ ri winaq ri petinaq royowal chke* y ri taqal chke ksachisax kiwach.
23 Ri Dios xubʼan wariʼ rech kukʼut ri nimal uqʼij chkiwach ri winaq ri kutoqʼobʼisaj kiwach.* Ri winaq riʼ are ri knimarisax na kiqʼij rumal ri Dios.
24 Oj waʼ ri winaq ri xojuchaʼ ri Dios, jujun xojuchaʼ chkixoʼl ri judíos y jujun xeʼuchaʼ chkixoʼl ri man e judíos taj.
25 Tajin kbʼantajik je jas ri xbʼix kan pa Oseas: «Kinbʼij na nutinamit chke ri e nutinamit taj y keloqʼoqʼex na ri xeloqʼoqʼex taj.
26 Y pa ri lugar ri xbʼix wi chke ‹ix nutinamit taj›, chilaʼ kbʼix wi na ralkʼwal ri kʼaslik Dios chke».
27 Xuqujeʼ ri Isaías xubʼij kan wariʼ chrij ri Israel: «Paneʼ ri e ralkʼwal ri Israel sibʼalaj e kʼi je jas ri sanyabʼ re ri mar, xa e kebʼ oxibʼ kebʼan kan salvar».
28 Rumal che ri Jehová* kuqʼat na tzij puwiʼ ri uwach ulew y ri xuchaʼ ubʼanik pa ri uqʼatoj tzij aninaq kubʼano.
29 Xuqujeʼ ri Isaías xubʼij kanoq: «We ta ri Jehová ri ktaqan pa kiwiʼ ri ángeles ma ta xojutoʼo rech kekʼasiʼ kan jujun chke ri qawinaq, xsach ta qawach riʼ je jas ri Sodoma y Gomorra».
30 ¿Jas kʼu kqabʼij chrij waʼ? Kqabʼij chi ri winaq ri man e judíos taj paneʼ tajin ta kkikoj kichuqʼabʼ rech keʼux utz taq winaq, pero xeʼux utz taq winaq chuwach ri Dios rumal che xkikubʼsaj kikʼuʼx chrij.
31 Paneʼ ri tinamit Israel xkikoj kichuqʼabʼ che unimaxik ri Ley rech keqaj chuwach ri Dios pero xekowin taj.
32 ¿Jasche xekowin taj? Rumal che xkichomaj che rukʼ ri kkibʼano keqaj chuwach ri Dios y are ta xkikubʼsaj kikʼuʼx chrij. Xetzaq puwiʼ ri «abʼaj ri ktzaqisanik».
33 Junam rukʼ ri tzʼibʼam kanoq: «¡Chiwilampeʼ!* Pa Sion kinya na jun abʼaj ri ktzaqisanik y jun nimalaj abʼaj ri kuqʼatej kibʼe, pero ri kukubʼsaj ukʼuʼx chrij man kel ta na ukʼixbʼal».
