Ri carta xtaq bʼi chke ri Romanos 7:1-25
7 Qachalal, ri ix ri iwetaʼm ri kubʼij ri Ley. ¿La ma ta iwetaʼm che are chiʼ jun winaq kʼa kʼasal na, ri Ley ktaqan puwiʼ?
2 Jun ejemplo, ri Ley kubʼij chi ri ixoq ri kʼulanik ximital* rukʼ ri rachajil are taq chiʼ k’a kʼasal na ri rachajil. Pero we kkam ri rachajil, ri Ley kubʼij che chilaʼ kkʼis wi kan ri kikʼulanem.
3 Rumal laʼ, are jun makaj* we jun ixoq kkʼuliʼ rukʼ jun achi are taq chiʼ kʼa kʼasal na ri rachajil. Pero we kkam ri rachajil y kkʼuliʼ rukʼ jun chi achi, man makaj taj ri tajin kubʼano, rumal che ri Ley kubʼij che ya xkʼis ri kikʼulanem.
4 Qachalal xa junam rukʼ, ri u cuerpo ri Cristo xojresaj pa uqʼabʼ ri Ley y xbʼan wariʼ rech kojqʼax pa uqʼabʼ ri xkʼastajisax lo chkixoʼl ri kaminaqibʼ, rumal laʼ kamik kuya chik kojkojik rech kqapatanij ri Dios.
5 Are chiʼ tajin kqabʼan ri kraj ri qa cuerpo, ri Ley xukʼut chqawach ri utz taj kbʼanik. Rumal che we kqabʼan ri kraj ri qa cuerpo xa kojukʼam bʼi pa ri kamikal.
6 Pero kamik ya xojesax pa uqʼabʼ ri Ley, rumal laʼ ktaqan ta chi pa qawiʼ. Oj resclavo chi ri Dios rumal che kqaya bʼe che ri espíritu santo kukʼam qabʼe y xa ta rumal ri kubʼij ri Ley ri xtzʼibʼax kan ojer.
7 ¿La xa tajin kqabʼij che utz ta ri Ley? ¡Xa taj! Rumal che we ta ma ta kʼo ri Ley, ma ta xwetaʼmaj in riʼ ri utz taj kbʼanik. Jun ejemplo, we ta ma ta kʼo ri Ley ma ta xwetaʼmaj riʼ che utz taj kqarayij ri jastaq ke ri e nikʼaj chik. Rumal che ri Ley kubʼij: «Utz taj we karayij ri kʼo rukʼ jun chik».
8 Rumal ri Ley xinchʼobʼo jas ri makaj, y xwilo che pa ri wanimaʼ kʼo ronojel uwach itzel taq rayinik. Rumal laʼ we ta ma ta kʼo ri Ley, ma ta xwil riʼ che ri makaj tajin ktaqan pa nuwiʼ.
9 Are chiʼ majaʼ kyaʼ ri Ley ri in in kʼaslik, pero are chiʼ xyaʼ ri Ley xkʼastaj lo ri makaj y xinkam kan in.
10 Y xinchʼobʼo che ri Ley xa ta kuya kʼaslemal chwe xaneʼ kinukʼam bʼi pa ri kamikal.
11 Rumal che ri Ley xukʼut chnuwach jas ri makaj, y ri makaj xinubʼan engañar y xinukamisaj.
12 Ri Ley petinaq rukʼ ri Dios, rumal laʼ santo, qas utz ri kubʼij y kuya utzilal chqe.
13 ¿La xa tajin kinbʼij che jun utz jastaq xinukamisaj? ¡Je taj! Are ri makaj tajin kinkamisanik. Utz ri Ley, rumal che xukʼut chnuwach che ri makaj tajin kinukamisaj, xuqujeʼ xukʼut chnuwach che ri makaj sibʼalaj lawalo ri kubʼano.
14 Qetaʼm che ri Ley petinaq rukʼ ri Dios, pero ri in xa in ajmak, in kʼayim pa uqʼabʼ ri makaj.
15 Rumal laʼ kinbʼan taj ri kwaj kinbʼano, xaneʼ are kinbʼan ri itzel kwilo. Wetaʼm taj jasche jelaʼ kinbʼano.
16 Wetaʼm che utz ri Ley, pero xaq are tajin kinbʼan na ri kwaj taj kinbʼano.
17 Pero in ta chik tajin kinbʼanow ri jastaq riʼ, xaneʼ are ri makaj ktaqan pa nuwiʼ.
18 Wetaʼm in che kʼo ta jun utz jastaq kinkowinik kinbʼano rumal che in ajmak, paneʼ kwaj kinbʼan ri utz, pero kinkowin ta che ubʼanik.
19 Kinbʼan ta ri utz taq jastaq ri kwaj kinbʼano, xaneʼ are kinbʼan ri kwaj taj kinbʼano. Ri e utz taj.
20 Rumal laʼ we are kinbʼan ri utz taj, in ta chik ri tajin kinbʼanowik, xaneʼ are ri makaj ri tajin ktaqan pa nuwiʼ.
21 Wilom che are waʼ ri kinkʼulmaj: are chiʼ kwaj kinbʼan ri utz, are kinbʼan ri utz taj.
22 Pa ri wanimaʼ nim kwil ri u ley ri Dios.
23 Kwilo che ri makaj ktaqan pa ri nu cuerpo, paneʼ pa ri wanimaʼ kinkoj nuchuqʼabʼ rech kinbʼan ri utz, pero ri nu cuerpo kinukʼam bʼi pa makaj.
24 ¡Kʼax wech waʼ! ¿Jachin bʼaʼ kintoʼw chuwach ri nu cuerpo ri xa tajin kinukʼam bʼi pa ri kamikal?
25 Kinmaltyoxij che ri Dios rumal che xuya ri Qajaw Jesucristo rech xinresaj pa ri makaj. Pa ri wanimaʼ in resclavo ri u ley ri Dios, pero rukʼ ri nu cuerpo in resclavo ri ley che kkʼaman bʼi pa ri makaj.
