Ri carta xtaq bʼi chke ri Romanos 1:1-32
-
Ri xubʼan ri Pablo che umajixik ri u carta (1-7)
-
Ri Pablo kraj kbʼe che kilik ri romanos (8-15)
-
«Ri utz winaq kkʼasiʼ na rumal che kukubʼsaj ukʼuʼx chrij ri Dios» (16, 17)
-
Ri itzel taq winaq kuya taj kkibʼij che kekowin taj kketaʼmaj uwach ri Dios (18-32)
-
Ri winaq kekowinik kketaʼmaj uwach ri Dios rumal ri jastaq ubʼanom (20)
-
1 In in Pablo, rajchak ri Cristo Jesús, xinkoj che apóstol y xinchaʼik rech kintzijoj ri utzalaj taq noticias chrij ri Dios.
2 Ri utzalaj taq noticias ri xubʼij ri Dios chke ri u profetas tzʼibʼatal kan pa ri santolaj Utzij.
3 Ri profetas riʼ xechʼaw chrij ri Ukʼojol ri Dios, ri xalax pa ri u familia ri David.
4 Pero ri Dios xukoj ri u espíritu santo che ukʼastajisaxik ri Ukʼojol chkixoʼl ri kaminaqibʼ, rech xukʼutu che qas are Ukʼojol (ri areʼ are ri Qajaw Jesucristo.
5 Rumal ri Jesús, ri Dios ukʼutum nimalaj utzilal chqe. Ri Jesús xinuchaʼo rech kinok apóstol y rech keʼintoʼ juntir ri winaq ri man e judíos taj, rech kkikubʼsaj kikʼuʼx chrij, keniman che y nim kkil ri ubʼiʼ.
6 Ri ix, ix jun chkixoʼl ri winaq riʼ, ri xixbʼan invitar rech kixok u discípulo ri Jesucristo).
7 Loqʼalaj taq qachalal re Roma, ri ix chaʼtal rumal ri Dios, kintzʼibʼaj bʼi wajun carta chiwe:
Are ta bʼaʼ ri Qatat Dios y ri Qajaw Jesucristo chekʼutuw ri nimalaj utzilal chiwe y keyoʼw jororibʼal chiwe.
8 Kinmaltyoxij che ri nu Dios pa ubʼiʼ ri Jesucristo, rumal che juntir ri winaq utz kechʼaw chiwij, kkibʼij che kikubʼsaj ikʼuʼx chrij ri Dios.
9 Ri Dios ri kinpatanij rukʼ ronojel wanimaʼ y ri inukojom rech kintzijoj ri utzalaj taq noticias chrij ri Ukʼojol, retaʼm che ri in amaqʼel kinbʼan orar piwiʼ.
10 Xuqujeʼ kintaʼ che ri Dios, we ri areʼ kraj y we ri in kinkowinik kinbʼe che ichʼabʼexik.
11 Ya kwaj kwil iwach rech kinkowinik kixintoʼo, jeriʼ kʼo jun utz iwachilanik rukʼ ri Dios,
12 y kqatoʼlaʼ qibʼ rech kqaya ta kan ukubʼsaxik qakʼuʼx chrij ri Dios.
13 Qachalal kʼi mul xwaj xinbʼe iwukʼ pero in kowinaq taj in bʼenaq. Rumal che kwaj kintzijoj ri utzalaj taq noticias chke ri winaq rech keʼok u discípulos ri Jesús, junam rukʼ ri nubʼanom pa nikʼaj chi tinamit.
14 Kinnaʼ in che rajawaxik keʼintoʼ* e juntir ri winaq, ri griegos y ri e griegos taj, ri kʼo kinoʼj y ri kʼo ta kinoʼj.
15 Rumal laʼ rajawaxik kinbʼe pa Roma rech xuqujeʼ kintzijoj ri utz taq noticias chiwe.
16 Kinkʼix taj kintzijoj ri utzalaj taq noticias, rumal che are laʼ ri kukoj ri Dios rech keʼubʼan salvar ri winaq ri kkikubʼsaj kikʼuʼx chrij. Nabʼe xtzijox chke ri judíos tekʼuriʼ chke ri griegos.
17 Ri kkikubʼsaj kikʼuʼx chrij ri Dios qas kkilo che ri utzalaj taq noticias keʼutoʼ che ubʼanik ri utz kril ri Dios y are chiʼ kkibʼan wariʼ más kkikubʼsaj kikʼuʼx chrij, junam rukʼ ri tzʼibʼam kanoq: «Ri utz winaq* kkʼasiʼ na rumal che kukubʼsaj ukʼuʼx chrij ri Dios».
18 Ri Dios pa ri kaj, sibʼalaj petinaq royowal chkij ri itzel taq winaq, rumal ri itzelal kkibʼano kkiya ta bʼe che e nikʼaj chik kketaʼmaj chrij ri qastzij.
19 Pero ri e areʼ kekowinik kketaʼmaj uwach ri Dios, rukʼ juntir ri jastaq kkilo, rumal che ri Dios kʼo ta jun jastaq rowam* chqawach.
20 Rumal laʼ, ri winaq riʼ kekowinik kketaʼmaj uwach ri Dios ri kilitaj taj, rumal ri jastaq ubʼanom. Kekowinik kkil ri u poder ri man kkʼis taj y che areʼ are ri qas Dios, rumal laʼ kuya taj kkibʼij che ma ta kekowinik kketaʼmaj uwach.
21 Paneʼ ketaʼm uwach ri Dios, xkiya ta uqʼij y ni xemaltyoxin che. Xuqujeʼ ri xkichomaj kʼo ta upatan y xkikowirisaj ri kanimaʼ rumal laʼ kʼo ta xkichʼobʼo.
22 Paneʼ kkibʼij kʼo kinoʼj pero xa e kon.*
23 Are xkiya kiqʼij ri winaq ri xa kekamik y are ta xkiya uqʼij ri Dios ri man kkam ta wi. Xuqujeʼ xkiya kiqʼij ri chikop ri kerapanik, ri chikop ri kajibʼ kaqan y ri chikop ri kkijururej kibʼ.
24 Rumal che ri winaq xkaj xkibʼan ri xkaj, ri Dios xuya bʼe chke xkibʼan tzʼil taq jastaq, rumal laʼ ri areʼ xkibʼan kʼixbʼalalaj taq jastaq rukʼ ri ki cuerpo.
25 Xkikoj ta ri qastzij kbʼix chrij ri Dios are xkikoj ri molom taq tzij, are xkiya uqʼij ri jastaq y are ta xkiya uqʼij ri xbʼanow juntir ri jastaq. Pero ri Dios ri xbʼanow juntir ri jastaq xaq xiw ri areʼ rajawaxik amaqʼel kyaʼ uqʼij. Amén.
26 Rumal laʼ, ri Dios xuya bʼe chke xkibʼan tzʼilalaj taq makaj ri kʼixbʼal ubʼanik, ri ixoqibʼ xkaj ta chik xeqʼoyiʼ kukʼ achijabʼ xaneʼ kukʼ ixoqibʼ xkaj xeqʼoyiʼ wi. Pero ri Dios je ta xubʼan che kibʼanik.
27 Xuqujeʼ ri achijabʼ xkaj ta chik xeqʼoyiʼ kukʼ ixoqibʼ, xaneʼ xkirayij ubʼanik tzʼilalaj taq jastaq kukʼ achijabʼ rumal laʼ xemakun kukʼ. Pero kkʼajisax na kiwach rumal ri xkibʼano.
28 Rumal che xkaj taj xketaʼmaj uwach ri Dios, ri areʼ xuya bʼe chke kkichomaj itzel taq jastaq, rumal laʼ kkibʼan ri yaʼtal ta ubʼanik.
29 Kkibʼan ronojel uwach makaj, kkibʼan tzʼil taq jastaq, kkirayij pwaq, y kkibʼan itzelal. Xaq titikil kkinaʼo, kekamisanik, kechʼojinik, kkibʼan engaño y kikʼatik kkibʼan kʼax chke nikʼaj chik. Kʼo ta tzij kkikʼolo*
30 y keyoqʼonik,* itzel kkil ri Dios, nim ta kekil ri nikʼaj chik, kkibʼan nim che kibʼ y kkitzijoj juntir ri kʼo kukʼ y ri kekowin che ubʼanik. Xaq xiw kkichomaj ubʼanik itzelal, kekinimaj ta ri kitat kinan.
31 Kechoman taj, kkibʼan ta ri kkibʼij, keloqʼoqʼen taj y e chikop taq winaq.
32 Ri areʼ ketaʼm ri utz ta kril ri Dios kbʼanik y ketaʼm we kkibʼan we jastaq riʼ taqal chke kekamisaxik. Pero paneʼ ketaʼm wariʼ, kkiya ta kan ubʼanik ri itzelal y utz kkilo are chiʼ ri nikʼaj chik kkibʼan itzelal.
