Ri carta xtaq bʼi chke ri Romanos 3:1-31
3 Tekʼuriʼ, ¿jas utzilal kuriq jun we judío? Y ¿jas utzilal kuriq jun we ubʼanom circuncidar ribʼ?
2 Kʼi utzilal kkiriq ri judíos, jun chke ri utzilal riʼ are che ri Dios xuya kan ri Utzij chke.
3 Rumal laʼ we kʼo jujun judíos kkikubʼsaj ta kikʼuʼx chrij ri Dios, ¿la kraj kubʼij wariʼ che ri Dios kubʼan ta chi ri ubʼim?
4 Are ta laʼ ri kraj kubʼij, paneʼ ri winaq kkibʼan molom tzij, ri Dios qas kubʼij ri ubʼeʼal je jas ri tzʼibʼam kanoq: «Rumal ri kabʼij, kakʼutu che at utz y are chi’ kmol tzij chawij, kakʼut na che qastzij ta ri kkibʼij».
5 E jujun winaq kkichomaj che are chiʼ kqabʼan ri utz taj, kilitajik che ri Dios utz ri kubʼano. Xuqujeʼ kkibʼij che ri Dios utz ta ri kubʼano are chiʼ kukʼajisaj qawach.
6 ¡Utz ta wajun chomanik riʼ!, rumal che ri Dios kubʼan ri utzilal. We ta ma ta kubʼano, ¿jas ta kʼu lo kubʼan che uqʼatik tzij pa kiwiʼ ri winaq?
7 Pero we rumal ri molom tzij kinbʼij, más kchʼobʼotaj ri qastzij chrij ri Dios y más kyaʼ uqʼij, ¿jas kʼu che kbʼixik che in ajmak y kqʼat tzij pa nuwiʼ?
8 E kʼo jujun winaq kkibʼij che oj kqabʼij wariʼ: «Chqabʼanaʼ itzel taq jastaq rech kqariq utzilal». Ri e winaq riʼ taqal chke kqʼat tzij pa kiwiʼ.
9 Ri oj judíos, ¿la más oj utz na chkiwach ri nikʼaj chi winaq? Je taj, rumal che je jas ri qakʼutum chik qonojel oj ajmakibʼ, paneʼ oj judíos o oj griegos.
10 Junam rukʼ ri tzʼibʼatal kanoq: «Kʼo ta nijun winaq ri qas kubʼan ri utz, nijun.
11 Kʼo ta jun winaq kuchʼobʼo jas ri rajawaxik kubʼano, y nijun winaq kraj kretaʼmaj uwach ri Dios.
12 Juntir kiyaʼom kan ri Dios, juntir kʼo ta kipatan; nijun winaq ukʼutum utzilal, nijun winaq».
13 «Ri kiqul jetaneʼ jun muqbʼal ri jaqatal uchiʼ; kkikoj ri kaqʼ che ubʼanik molom tzij». «Ri tzij kel lo pa kichiʼ jetaneʼ ki veneno ri kumatz».
14 «Itzel taq tzij kel lo pa kichiʼ y xaq kkirayij itzelal chkij ri winaq».
15 «Xaq kikʼatik kekamisanik».
16 «Amaqʼel kkibʼan kʼax chke ri winaq y kkiya bʼis chke,
17 y ketaʼm taj jas rajawaxik kkibʼano rech kkʼojiʼ utzilal chkixoʼl kukʼ ri nikʼaj chik».
18 «Kʼo ta ki respeto che ri Dios».
19 Qetaʼm chik che ri Ley xyaʼ chke ri winaq ri e kʼo chuxeʼ ri utaqanik ri Ley, rech nijun winaq kubʼij che kʼo ta umak y ma ta yaʼtal che kkʼajisax uwach rumal ri Dios.
20 Y we jun kunimaj ri Ley kraj ta kubʼij chi utz winaq chuwach ri Dios, xaneʼ ri Ley kojutoʼ che uchʼobʼik jas ri qas makaj.
21 Pero kamik kqilo che kojkowinik kojqaj chuwach ri Dios paneʼ kqanimaj ta chik ri kubʼij ri Ley, are waʼ ri kitzʼibʼam kan ri Profetas y ri kubʼij ri Ley,
22 apawijeʼ taneʼ ri keʼel wi ri winaq kekowinik keqaj chuwach ri Dios, we kekojon chrij ri Jesucristo.
23 Juntir oj ajmakibʼ rumal laʼ kojkowin taj kojux perfectos junam rukʼ ri Dios,
24 pero kojkowinik kojqaj chuwach ri Dios rumal che ri Cristo Jesús xuya ri ukʼaslemal rech kojubʼan salvar. Ri Dios xusipaj wariʼ chqe rumal ri nimalaj rutzilal.
25 Ri Dios xuya ri Jesús junam rukʼ jun ofrenda rech ri winaq keʼutzir rukʼ* we kekojon chrij ri ukikʼel ri Jesús. Ri areʼ xukʼutu che are jun utzalaj Dios* rumal che rukʼ paciencia xukuy ri makaj ri bʼanom ojer kanoq.
26 Xuqujeʼ kamik ri areʼ tajin kukʼutu che are jun utzalaj Dios, rumal che ri winaq ri kekojon chrij ri Jesús e utz taq winaq chuwach ri areʼ.
27 ¿La utz kqanimarisaj qibʼ? Utz taj. ¿Jasche* qetaʼm che utz taj? ¿La are ri Ley che xyaʼ che ri Moisés kbʼinik? Are taj. Xaneʼ are ri ley ri kbʼinik che rajawaxik kqakubʼsaj qakʼuʼx chrij ri Dios.
28 Ri oj qetaʼm che ri utz winaq chuwach ri Dios are ri kukubʼsaj ukʼuʼx chrij, man are ta ri kunimaj ri kubʼij ri Ley.
29 Ri Dios, ¿la xaq xiw ki Dios ri judíos? Xaq xiw taj, xaneʼ xuqujeʼ ki Dios ri man e judíos taj.
30 Rumal che xa jun Dios kʼolik, ri utz taq winaq chuwach areʼ are ri kkikubʼsaj kikʼuʼx chrij, paneʼ kibʼanom circuncidar kibʼ o kibʼanom taj.
31 ¿La kraj kubʼij wariʼ che nim ta chi kqil ri Ley rumal che kqakubʼsaj qakʼuʼx chrij ri Dios? Je taj, xaneʼ tajin kqakʼutu che nim kqil wi ri Ley.
Notas
^ Chawilaʼ ri diccionario.
^ O «jun Dios justo».
^ Pa nikʼaj chi lugar jewaʼ kbʼix che: «Suche», «Sutan».
