Ri carta xtaq bʼi chke ri Romanos 6:1-23
6 ¿Jas kichomaj? ¿La utz riʼ we kqaya ta kan ubʼanik ri makaj rech ri Dios kutoqʼobʼisaj más qawach?
2 ¡Utz taj! Rumal che ya xojel pa uqʼabʼ ri makaj, ¿jas bʼaʼ che kqaya na bʼe ktaqan pa qawiʼ?
3 ¿La ma ta iwetaʼm chi juntir ri xqabʼan qa bautismo xa jun qabʼanom chi rukʼ ri Cristo Jesús? Y ¿la ma ta xqabʼan qa bautismo pa ri ukamikal?
4 Rumal laʼ, jetaneʼ xojmuq rukʼ areʼ are chiʼ xqabʼan qa bautismo pa ri ukamikal. Rumal ri u poder ri Tataxel xwalijisax ri Jesús chkixoʼl ri kaminaqibʼ, ri oj xuqujeʼ kojwalijisaxik rech kqariq jun kʼakʼ kʼaslemal.
5 We xa jun qabʼanom rukʼ ri Cristo rumal ri kamikal xuriqo xuqujeʼ jetaneʼ oj kaminaq rukʼ, rumal laʼ kojwalijisax na je jas ri xbʼan che ri areʼ.
6 Are chiʼ xxekebʼax ri areʼ cho ri cheʼ, jetaneʼ xkanaj kan ri ojer qakʼaslemal cho ri cheʼ,* rech ktaqan ta chi ri makaj puwiʼ ri qa cuerpo, rumal laʼ oj kʼo ta chi pa uqʼabʼ ri makaj.
7 Rumal che are chiʼ jun winaq kkamik ksach kan uwach ri umak.
8 Oj kaminaq rukʼ ri Cristo y qas kqakojo che xuqujeʼ kojkʼojiʼ na rukʼ.
9 Qetaʼm che ri Cristo kkam ta chik, rumal che ya xwalijisax chkixoʼl ri kaminaqibʼ, y ktaqan ta chi ri kamikal puwiʼ.
10 Ri areʼ xa jumul xuya ri ukʼaslemal pa kamikal rech xukʼis tzij puwiʼ ri makaj, y kamik ri ukʼaslemal kukoj chi che ubʼanik ri kqaj chuwach ri Dios.
11 Chibʼanaʼ che jetaneʼ ix kaminaq chi chuwach ri makaj, pero ix kʼaslik rech kibʼan ri kqaj chuwach ri Dios, rumal che ix u discípulo ri Cristo Jesús.
12 Rumal laʼ kiya ta bʼe ktaqan ri makaj puwiʼ ri i cuerpo ri xa kkamik, rech xaq ta kibʼan ri kraj ri i cuerpo.
13 Kiya ta chi bʼe rech ri makaj ktaqan puwiʼ ri i cuerpo che ubʼanik ri itzelal. Xaneʼ chijachaʼ ri i cuerpo pa uqʼabʼ ri Dios che ubʼanik ri utzilal y chiyaʼ ri ikʼaslemal che ri Dios, jetaneʼ xixkʼastaj lo pa ri kamikal.
14 Ri ix tajin ta chi kinimaj ri kubʼij ri Ley, rumal che ri Dios ukʼutum chi ri nimalaj rutzilal chiwe, rumal laʼ ri makaj ktaqan ta chi piwiʼ.
15 ¿La kraj kubʼij wariʼ che kojmakunik, rumal che ri Dios ukʼutum ri nimalaj rutzilal chqe y rumal che tajin ta chi kqanimaj ri kubʼij ri Ley? Are ta laʼ ri kubʼij.
16 ¿La ma ta iwetaʼm che we amaqʼel kinimaj jun winaq kixok resclavo riʼ? Rumal laʼ we kiya bʼe ktaqan ri makaj piwiʼ xa ix resclavo riʼ y kixkam riʼ. Pero we are kiwaj kixok resclavo ri Dios y kinimaj, kixux utz taq winaq riʼ chuwach.
17 Pero kqamaltyoxij che ri Dios rumal che kamik rukʼ ronojel iwanimaʼ kinimaj ri xkʼut chiwach, paneʼ ojer kanoq ix resclavo ri makaj.
18 Rumal che xixesax pa uqʼabʼ ri makaj, ix resclavo chi ri Dios y kibʼan ri utz chuwach.
19 Pero rumal che xa oj winaq kinkoj tzij che kʼax ta uchʼobʼik. Ojer kanoq xikoj ri i cuerpo che ubʼanik tzʼilalaj taq jastaq y itzelalaj taq jastaq, pero chanim riʼ chikojoʼ ri i cuerpo che ubʼanik ri utz y che ubʼanik ri chʼajchʼoj chuwach ri Dios.
20 Rumal che are chiʼ xixkʼojiʼ na pa uqʼabʼ ri makaj, rajawaxik taj xibʼan ri utz.
21 Rumal laʼ, ¿jas xibʼano are chiʼ xixkʼojiʼ na pa uqʼabʼ ri makaj? Xibʼan kʼixbʼalalaj taq jastaq ri xa kixukʼam bʼi pa ri kamikal.
22 Pero rumal che kamik ix kʼo ta chi pa uqʼabʼ ri makaj xaneʼ ix resclavo chi ri Dios, rumal laʼ chʼajchʼoj chi ri ikʼaslemal y rukʼ wariʼ kiriq ri kʼaslemal kʼo ta ukʼisik.
23 Rumal che ri kukʼam lo ri makaj are ri kamikal,* pero ri kusipaj ri Dios are ri kʼaslemal kʼo ta ukʼisik rumal ri Cristo Jesús, ri Qajaw.
