Ri carta xtaq bʼi chke ri Romanos 8:1-39
-
Ri ley re ri espíritu santo kuya kikʼaslemal ri winaq, keresaj pa uqʼabʼ ri makaj y ri kamikal (1-11)
-
Ri u espíritu ri Dios kukʼutu che qas oj ralkʼwal ri Dios (12-17)
-
«Ri e bʼanom rumal ri Dios xaq keyem chik are chiʼ ri Dios keʼuqʼalajisaj ri qas ralkʼwal» (18-25)
-
Ri espíritu santo kchʼaw pa qawiʼ (26, 27)
-
«Ri xeʼuchaʼ ri Dios ojer» (28-30)
-
Rumal che ri Dios xojraj, xojchʼakanik (31-39)
8 Ri xa jun kibʼanom rukʼ ri Cristo Jesús, kqʼat ta tzij pa kiwiʼ rech kkʼajisax kiwach.
2 Ri ley re ri espíritu santo ri kuya kʼaslemal, keresaj ri u discípulos ri Cristo Jesús pa uqʼabʼ ri ley re ri makaj y ri kamikal.
3 Rumal che ajmakibʼ ri winaq, ri Ley xkowin ta che kesaxik pa ri makaj. Rumal laʼ ri Dios xutaq lo ri Ukʼojol je jas jun winaq rech kresaj ri makaj. Rukʼ wariʼ jetaneʼ ri Dios xuqʼat tzij puwiʼ ri makaj rech kusachisaj uwach,
4 rech kojkowinik kqabʼan ri utz taq jastaq ri kubʼij ri Ley. Jeriʼ kqaya ta bʼe che ri makaj ktaqan puwiʼ ri qa cuerpo, xaneʼ are kqaya bʼe che ri u espíritu ri Dios ktaqan pa qawiʼ.
5 Rumal che ri kkaj kkibʼan ri kraj ri ki cuerpo, are kbʼe kikʼuʼx riʼ chrij ri kraj ri ki cuerpo, pero ri kkiya bʼe kkʼam kibʼe rumal ri espíritu are kbʼe kikʼuʼx riʼ chrij ri jastaq rech ri espíritu.
6 Ri winaq ri kbʼe ukʼuʼx chrij ri kraj ri cuerpo, kkam na. Pero ri winaq ri kbʼe ukʼuʼx chrij ri kraj ri espíritu, kuriq kʼaslemal y jororibʼal.
7 Xuqujeʼ we jun winaq are kbʼe ukʼuʼx chrij ri kraj ri u cuerpo kubʼan ukʼulel ri Dios, rumal che ri cuerpo kkowin taj kunimaj ri u ley ri Dios.
8 Rumal laʼ ri kkiya bʼe che ktaqan ri ki cuerpo pa kiwiʼ keqaj ta chuwach ri Dios.
9 Pero we kʼo ri u espíritu ri Dios iwukʼ kibʼan ta riʼ ri kraj ri i cuerpo xaneʼ are kibʼan ri kraj ri espíritu. Rumal che we jun winaq junam ta uchomanik rukʼ ri Cristo,* rech ta ri Cristo ri winaq riʼ.
10 Paneʼ ri u cuerpo jun winaq kkam rumal ri makaj, pero we xa jun ubʼanom rukʼ ri Cristo, ri espíritu kuya ukʼaslemal rumal che are jun utz winaq chuwach ri Dios.
11 Rumal laʼ we ri u espíritu ri Dios ri xwalijisan ri Cristo Jesús chkixoʼl ri kaminaqibʼ kʼo iwukʼ, xuqujeʼ ri Dios kukoj na ri u espíritu rech kuya ukʼaslemal ri i cuerpo.*
12 Rumal laʼ qachalal, rajawaxik taj kqanimaj ri kraj ri qa cuerpo.
13 Rumal che we kibʼan ri kraj ri i cuerpo kixkam wi na riʼ, pero kixkʼasiʼ na we kiya bʼe che ri espíritu kixutoʼ rech kibʼan ta chi ri kraj ri i cuerpo.
14 Rumal che juntir ri kkaj kkʼam kibʼe rumal ri u espíritu ri Dios, qas e ralkʼwal ri Dios.
15 Ri u espíritu ri Dios kubʼan ta esclavo chqe ni kuya ta xibʼin ibʼ chqe, xaneʼ kubʼan chqe chi kojok ralkʼwal ri Dios y kubʼan chqe chi kqabʼij: «¡Abba!»,* kraj kubʼij, «Tat».
16 Rumal ri u espíritu ri Dios kubʼan ta kebʼ qakʼuʼx che qas oj ralkʼwal ri Dios.
17 Rumal laʼ, we qas oj ralkʼwal ri Dios kuya na qa herencia y junam ri kuya na chqe rukʼ ri Cristo, xuqujeʼ we ri oj kqariq kʼax junam rukʼ ri xuriq ri Cristo junam knimarisax na qaqʼij rukʼ.
18 Ri in kinchomaj che ri kʼax tajin kqariq kamik, kjunamataj ta rukʼ ri kubʼan na ri Dios che unimarisaxik qaqʼij chkiwach konojel.
19 Juntir ri e bʼanom rumal ri Dios xaq keyem chik are chiʼ ri Dios keʼuqʼalajisaj ri qas ralkʼwal.
20 Rumal che ri e bʼanom rumal ri Dios xbʼan chke che kʼo ta kipatan, xa ta rumal che ri areʼ xkaj xkiriq wariʼ, xaneʼ are ri Dios xuya bʼe kkiriqo, paneʼ xubʼan wariʼ xaq ta xeʼuya kan chilaʼ xaneʼ xeʼutoʼo.
21 Are chiʼ kopan ri qʼij che keresaj pa uqʼabʼ ri makaj y ri kamikal, kyaʼ na jun ki cuerpo che kqʼay ta chik y keʼok na ralkʼwal.
22 Xuqujeʼ qetaʼm che juntir ri e bʼanom rumal ri Dios kʼa tajin kebʼisonik y kʼa tajin kkiriq kʼax kamik.
23 Ri oj ri yaʼom ri espíritu santo chqe, che are jun chke ri nabʼe taq tewchibʼal re ri qa herencia, xuqujeʼ kojbʼisonik are taq qeyem na kojok ralkʼwal ri Dios, y kojkowinik kojok ralkʼwal ri Dios rumal che ri Cristo xojuloqʼo y jeriʼ xojubʼan salvar chuwach ri qa cuerpo ri kmakunik y kkamik.
24 Are chiʼ ri Dios xojresaj pa ri makaj, xubʼij chqe ri kraj kuya na chqe. Y we ya xyaʼ che ri winaq ri xbʼix che, rajawaxik ta chik kreyeʼj. Pero we ri tajin kreyeʼj majaʼ kyaʼ che, rajawaxik kreyeʼj na rukʼ ronojel ranimaʼ.
25 Xuqujeʼ we ri oj majaʼ kyaʼ chqe ri qeyeʼm, rajawaxik kqeyeʼj na rukʼ paciencia.
26 Ri espíritu santo kojutoʼ are chiʼ kʼo ta qachuqʼabʼ, rumal che jujun taq mul kqariq taj jas ri kqataʼ pa ri qa oración rumal ri kʼax tajin kqariqo. Pero rumal ri espíritu santo, ri Dios kuchʼobʼ ri kʼo pa ri qanimaʼ.
27 Ri Dios ri retaʼm ri kʼo pa qanimaʼ, kuchʼobʼ ri kutaʼ ri espíritu santo pa kiwiʼ ri e chaʼom, rumal che ri kutaʼ ri espíritu santo are ri kqaj chuwach ri Dios.
28 Qetaʼm che juntir ri kubʼan ri Dios kuya utzilal chke ri winaq ri keloqʼoqʼen che, ri winaq riʼ are ri e uchaʼom rech kbʼantaj ri kraj.
29 Ojer loq ri Dios xuchomaj keʼuchaʼ jun grupo winaq, y xubʼano che ri xeʼuchaʼo xejunamataj rukʼ ri Ukʼojol, xaq xiw che ri Ukʼojol are ri nabʼeʼal chke ri e rachalal.
30 Ri winaq ri xeʼuchaʼ ri Dios ojer, are waʼ ri xeʼusikʼij, y ri xeʼusikʼij are waʼ ri xeʼux utz taq winaq chuwach, y ri xeʼux utz taq winaq chuwach xunimarisaj kiqʼij.
31 Rumal laʼ, ¿jas kʼu kqabʼij chik? We ri Dios kʼo qukʼ, ¿jachin taneʼ kkowinik kwalij chqij?
32 Ri Dios xutoqʼobʼisaj ta uwach ri Ukʼojol, xaneʼ xujach pa kamikal rumal qech, rumal laʼ qas qetaʼm che kuya na ronojel ri ubʼim chqe.
33 Kʼo ta jun winaq kkowinik kumol tzij chkij ri uchaʼom ri Dios. Rumal che are ri Dios kbʼinik jachin ri utz taq winaq chuwach.
34 Kʼo ta jun kqʼatow tzij pa kiwiʼ, rumal che ri Cristo Jesús xkamik y xkʼastajisax chkixoʼl ri kaminaqibʼ, kʼo chi pa ri uwikiqʼabʼ* ri Dios y ri areʼ kchʼaw pa qawiʼ.
35 ¿La kʼo jun jastaq kqʼaten ri Cristo rech kojuloqʼoqʼej ta chik? ¿La kuya kan qaloqʼoqʼexik ri Cristo rumal che kqariq kʼax, rumal che kbʼan kʼax chqe, o rumal che ri winaq kkaj kojkikamisaj? ¿La kuya kan qaloqʼoqʼexik rumal che kojbʼisonik, rumal che kqariq wiʼjal, rumal che oj powr, o rumal che xa kebʼ kubʼij puwiʼ ri qakʼaslemal?
36 Rumal che tzʼibʼam kanoq: «Umak awech ronojel taq qʼij xaq kebʼ kubʼij pa qawiʼ, jetaneʼ oj chij ri kamisaxik qij».
37 Pero maltyox che ri xojraj, xojchʼakan pa kiwiʼ juntir ri jastaq riʼ.
38 Qas wetaʼm che kʼo ta jun jastaq kbʼanowik che ma ta kojuloqʼoqʼej chi ri Dios. Ni ri kamikal, ni ri kʼaslemal, ni ri ángeles, ni ri qʼatal taq tzij, ni ri jastaq tajin kbʼantaj kamik, ni ri kbʼantaj na, ni ri kʼo ki poder,
39 nijun jastaq ri kʼo chikaj, ni ri kʼo ikam* y nijun jastaq ubʼanom ri Dios kkowinik kubʼano che ma ta kojuloqʼoqʼej chi ri Dios, ri xukʼut rumal ri Cristo Jesús, ri Qajaw.
