Ri carta xtaq bʼi chke ri Romanos 4:1-25
4 Y ¿jas kqabʼij chrij ri qamam Abrahán?
2 Rumal che we ta xbʼixik chi ri Abrahán are jun utz achi rumal ri chak xubʼano, weneʼ xubʼan nim che ribʼ y wariʼ utz ta kril ri Dios.
3 Rumal laʼ xtzʼibʼax kan wariʼ chrij ri Abrahán: «Chuwach ri Jehová* ri Abrahán are jun utzalaj winaq rumal che xukubʼsaj ukʼuʼx chrij».
4 Jun ajchak, xaq ta ksipax ri urajil, xaneʼ are laʼ ri rajawaxik kyaʼ che, rumal ri uchak kubʼano.
5 Pero ri Dios are ta kril ri kubʼan ri winaq rech kux jun utz winaq chuwach xaneʼ are krilo we kukubʼsaj ukʼuʼx chrij. Jeriʼ ri winaq paneʼ ajmak kkowinik kux jun utzalaj winaq chuwach ri Dios.
6 Junam rukʼ ri xutzʼibʼaj kan ri David, che ri utz winaq chuwach ri Dios sibʼalaj kkikotik, paneʼ kubʼan taj jas ri kubʼij ri Ley. Ri David xubʼij:
7 «Utz kech ri winaq ri xkuy kimak rumal ri xkibʼan kan ojer, y utz kech ri winaq ri xchʼuqutaj ri kimak;
8 utz re ri winaq ri kkʼaq ta ri umak chupalaj* rumal ri Jehová».
9 Rumal laʼ, ¿la xaq xiw utz kech ri winaq ri kibʼanom circuncidar kibʼ o xuqujeʼ utz kech ri kibʼanom ta circuncidar kibʼ? Rumal che kqabʼij: «Ri Abrahán are jun utz winaq chuwach ri Dios, rumal che xukubʼsaj ukʼuʼx chrij».
10 Rumal laʼ, ¿jampaʼ xubʼij ri Dios chi ri Abrahán are jun utz winaq? ¿La xubʼij are chiʼ ubʼanom chi circuncidar ribʼ o are chiʼ majaʼ kubʼano? Majaʼ kubʼan circuncidar ribʼ are chiʼ ri Dios xubʼij che are jun utz winaq.
11 Ri Dios xubʼij che ri Abrahán kubʼan circuncidar ribʼ. Ri circuncisión are jun etal rech kqʼalajinik che are jun utz achi chuwach ri Dios, rumal che are chiʼ majaʼ kubʼan circuncidar ribʼ xukubʼsaj ukʼuʼx chrij. Rumal laʼ jetaneʼ kitat juntir ri winaq ri kkikubʼsaj kikʼuʼx chrij ri Dios, paneʼ kibʼanom ta circuncidar kibʼ.
12 Xuqujeʼ ri Abrahán xaq xiw ta xux kitat ri kibʼanom circuncidar kibʼ, xaneʼ xuqujeʼ xux kitat ri kkikubʼsaj kikʼuʼx chrij ri Dios junam rukʼ ri areʼ. Rumal che ri areʼ xukubʼsaj ukʼuʼx chrij ri Dios are chiʼ majaʼ kubʼan circuncidar ribʼ.
13 Ri Dios xubʼij che ri Abrahán y chke ri e ralkʼwal che kuya na jun kʼakʼ uwach ulew chke, pero xa ta rumal che xkinimaj ri Ley, xaneʼ rumal che ri Abrahán are jun utz winaq y xukubʼsaj ukʼuʼx chrij ri Dios.
14 We ta ri xubʼan prometer ri Dios xaq xiw kuya chke ri winaq ri kkinimaj ri Ley, kʼo ta upatan riʼ chi ri winaq kkikubʼsaj kikʼuʼx chrij y kʼo ta upatan riʼ ri xubʼij che ri Abrahán.
15 Ri Dios kukʼajisaj kiwach ri keniman ta che ri Ley, pero we ma ta kʼo ri Ley kqʼalajin ta riʼ jachin ri knimanik y jachin ri kniman taj.
16 Rumal ri nimalaj rutzilal ri Dios ri areʼ kubʼan na ri ubʼim chqe, rumal che kqakubʼsaj qakʼuʼx chrij. Xuqujeʼ ri Dios kuya na ri tewchibʼal chke ri ralkʼwal ri Abrahán, xaq xiw ta chke ri kkinimaj ri ley xaneʼ xuqujeʼ chke ri kkikubʼsaj kikʼuʼx chrij junam rukʼ ri xubʼan ri Abrahán, ri qatat.
17 (Tzʼibʼam kan wariʼ chrij ri Abrahán: «At nuchaʼom rech katok na kitat e kʼi winaq»). Rumal che ri Abrahán, xukubʼsaj ukʼuʼx chrij ri Dios, ri kyaʼow kikʼaslemal ri kaminaqibʼ y ri kchʼaw chrij jastaq ri majaʼ kbʼantajik pero jetaneʼ ya xebʼantajik.
18 Ri areʼ qas xukojo che kok na kitat e kʼi winaq paneʼ e kʼo ta ralkʼwal, y xukojo are chiʼ xbʼix wariʼ che: «Je kikʼiyal waʼ ri awalkʼwal kekʼojiʼk».
19 Xuqujeʼ xubʼan ta kebʼ ukʼuʼx chrij ri xubʼij ri Dios che, paneʼ ri areʼ kkowin ta chik kkʼojiʼ ralkʼwal, rumal che 100 chi ujunabʼ. Xuqujeʼ riʼj chi ri Sara y kkowin ta chik kkʼojiʼ ral.
20 Pero rumal ri xubʼan prometer ri Dios che, xubʼan ta kebʼ ukʼuʼx. Xaneʼ xukubʼsaj más ukʼuʼx chrij ri Dios y xuya uqʼij.
21 Y qas xukojo che ri Dios kubʼan ri xubʼij che.
22 Rumal laʼ, «xux jun utzalaj winaq chuwach ri Dios».
23 Xaq xiw ta chrij ri Abrahán xbʼix wi ri tzij riʼ: «Xux jun utzalaj achi chuwach ri Dios»,
24 xaneʼ xuqujeʼ xbʼix chqij oj. Ri oj oj utz taq winaq chuwach ri Dios rumal che kqakubʼsaj qakʼuʼx chrij ri xwalijisan ri Qajaw Jesús chkixoʼl ri kaminaqibʼ.
25 Are waʼ ri Jesús ri xjach pa kamikal rumal ri qamak y xkʼastajisaxik rech kojux utz taq winaq chuwach ri Dios.
