Ri carta xtaq bʼi chke ri Romanos 5:1-21
5 Kamik oj utz winaq chik chuwach ri Dios rumal che kqakubʼsaj qakʼuʼx chrij, rumal laʼ kojkowinik kkʼojiʼ jororibʼal chqaxoʼl rukʼ ri Dios rumal ri xubʼan ri Qajaw Jesucristo pa qawiʼ.
2 Rumal che kqakubʼsaj qakʼuʼx chrij ri Jesús kojkowinik kojqebʼ rukʼ ri Dios y kojqaj chuwach. Xuqujeʼ kojkikotik rumal che ri areʼ kuya na nim qaqʼij.
3 Chojkikotoq are chiʼ kqariq kʼax rumal che ri kʼax kojutoʼo rech kojkowir más chuwach ri kʼax;
4 we kqachʼij ri kʼax kojqaj chuwach ri Dios y we kojqaj chuwach, qas qetaʼm che ri are’ kojutewchij na.
5 Y ri tewchibʼal che kuya na ri Dios chqe qastzij kbʼantaj na y rumal che kojuloqʼoqʼej uyaʼom ri espíritu santo chqe.
6 Pa ri tiempo ri ubʼim kan ri Dios, ri Cristo xkam rumal kech ri ajmakibʼ, xubʼan wariʼ are chiʼ oj ajmakibʼ na.*
7 Kʼo ta jun winaq kraj kuya ri ukʼaslemal puwiʼ jun winaq che xaq xiw kunimaj ri Ley,* pero weneʼ kʼo jun kraj kuya ri ukʼaslemal puwiʼ jun utzalaj winaq.
8 Pero ri Dios xukʼutu che kojraj are chiʼ xuya ri Cristo rech kkam umak qech, are chiʼ oj ajmakibʼ na.
9 Y, kamik rumal ri ukikʼel ri Jesús ri xutixo oj utz taq winaq chik chuwach ri Dios, rumal laʼ kʼo ta jun kʼax riʼ kqariqo are chiʼ kpe ri royowal ri Dios pa kiwiʼ ri winaq.
10 Paneʼ ojer kanoq oj ukʼulel ri Dios, pero rumal ri ukamikal ri Ukʼojol oj ramigos chik. Y rumal che oj ramigos chik, qas qetaʼm che ri Dios kojubʼan kan salvar.
11 Sibʼalaj kojkikotik rumal che ri Dios xuya ri Qajaw Jesucristo rech kkam rumal qech, rumal che rumal ri areʼ oj ramigos chi ri Dios.
12 Rumal jun achi xok lo ri makaj cho ri uwach ulew y ri makaj xukʼam lo ri kamikal, rumal laʼ juntir ri winaq kekamik rumal che juntir e ajmakibʼ...
13 Ri makaj kʼo chi cho ri uwach ulew are chiʼ majaʼ kyaʼ ri Ley, rumal laʼ kuya taj kbʼixik chi jun winaq ajmak we man kʼo ta ri Ley.
14 Umajom lo rukʼ ri Adán kʼa xekʼis pa ri u tiempo ri Moisés, ri kamikal taqanaq pa kiwiʼ ri winaq, paneʼ xemakun taj junam rukʼ ri Adán. Ri Adán kjunamataj jubʼiqʼ rukʼ ri kpe na.
15 Ri xusipaj ri Dios, junam ta rukʼ ri makaj ri xuya kan ri Adán. Rumal che xa rumal ri umak jun achi xekam e kʼi winaq. Pero rumal ri nimalaj utzilal xukʼut ri Jesucristo pa kiwiʼ ri winaq, kekowinik kkiriq ri kusipaj ri Dios rumal ri nimalaj rutzilal.
16 Ri xusipaj ri Dios junam ta rukʼ ri makaj ri xuya kan jun achi, rumal che xa rumal jun makaj kkʼajisax kiwach ri winaq, pero ri kusipaj ri Dios kubʼano che kkʼajisax ta kiwach ri winaq paneʼ kibʼanom kʼi makaj.
17 Rumal ri makaj xubʼan jun achi, ri kamikal xtaqan pa kiwiʼ ri winaq. Pero xa rumal jun achi, ri Jesucristo, kʼo kekowinik keʼok che reyes. Kekowinik kkibʼan wariʼ rumal ri nimalaj rutzilal ri Dios y ri xusipaj, rech keʼux utz taq winaq chuwach.
18 Xa rumal jun makaj, juntir ri winaq kekamik y xa rumal jun utzilal xbʼanik, juntir ri winaq keʼux utz taq winaq chuwach ri Dios y kyaʼ ri kʼaslemal chke.
19 Xa rumal jun achi che xniman taj, juntir e ajmakibʼ y xa rumal jun achi che xnimanik, juntir keʼux utz taq winaq chuwach ri Dios.
20 Are chiʼ xyaʼ ri Ley xilitajik che más ajmakibʼ ri winaq, pero are chiʼ xkʼiyar más ri makaj más xilitaj ri nimalaj rutzilal ri Dios.
21 Ri makaj y ri kamikal tajin ketaqan pa kiwiʼ ri winaq y rumal ri nimalaj rutzilal ri Dios, ri winaq keʼux na utz chuwach. Ri winaq ri’ kekowinik kkiriq na kʼaslemal k’o ta ukʼisik rumal ri Qajaw Jesucristo.
