Ri carta xtaq bʼi chke ri Romanos 2:1-29

  • Ri Dios kuqʼat na tzij pa kiwiʼ ri judíos y ri griegos (1-16)

  • Ri judíos y ri Ley (17-24)

  • «Ri qastzij circuncisión are ri kbʼan pa ranimaʼ ri winaq» (25-29)

2  Apastaneʼ ri abʼanik utz taj kaq’at tzij puwiʼ jun winaq. Rumal che tajin kabʼan at ri tajin kubʼan ri are’, we kaqʼat tzij xuqujeʼ tajin kaqʼat tzij pawiʼ at. 2  Qetaʼm che ri Dios kuqʼat na tzij pa kiwiʼ ri winaq ri kkibʼan wariʼ y qetaʼm che ri areʼ qas utz kubʼan che uqʼatik tzij. 3  Ri at ri kaqʼat tzij pa kiwiʼ ri nikʼaj chik rumal ri jastaq kkibʼano pero xuqujeʼ ri at tajin kabʼano, ¿la kachomaj che ri Dios kuqʼat ta tzij pawiʼ? 4  ¿O la xa nim ta kawil wi che ri Dios sibʼalaj utz awukʼ, kutoqʼobʼisaj awach y kʼo u paciencia awukʼ? ¿La xa kachʼobʼ taj che ri Dios tajin katutoʼo rech kabʼan arrepentir awibʼ? 5  Pero rumal che kata ta tzij y kabʼan ta arrepentir awibʼ, kawil na uwach ri royowal ri Dios are chiʼ kuqʼat na tzij pa kiwiʼ ri winaq. 6  Ri Dios kuya na utojbʼalil chke ri winaq chkijujunal rumal ri xkibʼano. 7  Ri winaq ri kkaj nim keʼil wi rumal ri Dios y kkiya ta kan ubʼanik ri utz, kyaʼ na jun kʼaslemal kʼo ta ukʼisik chke y jun ki cuerpo ri kqʼay taj; 8  pero ri xaq chʼaʼoj kkaj, kkibʼan itzelal y kkinimaj ta ri qastzij petinaq rukʼ ri Dios, kkil na uwach ri royowal ri Dios y kkʼajisax na kiwach. 9  E juntir ri winaq, ri judíos y ri griegos, kkiriq na kʼax rumal ri itzelal kkibʼano. 10  Pero ri winaq ri kkibʼan ri utz, ri judíos y ri griegos, nim keʼil na rumal ri Dios y kkiriq na jororibʼal. 11  Rumal che ri Dios junam kubʼan che kilik ri winaq. 12  Juntir ri kemakunik rumal che ketaʼm ta ri kubʼij ri Ley* qas kekam wi paneʼ kʼo ta ri Ley rech kqʼat tzij pa kiwiʼ, pero juntir ri ketaʼm ri kubʼij ri Ley y kemakunik kqʼat na tzij pa kiwiʼ je jas ri kubʼij ri Ley. 13  Ri e utz taq winaq chuwach ri Dios are ta ri xaq xiw kkita ri kubʼij ri Ley, xaneʼ are ri kkinimaj ri kubʼij ri Ley. 14  Rumal che ri winaq ri e judíos taj kʼo ta ki Ley pero ketaʼm ri utz y ri utz taj kbʼanik, jetaneʼ tajin kkinimaj ri Ley, rukʼ wariʼ kkikʼutu che jetaneʼ kʼo jun Ley pa kanimaʼ. 15  Ri areʼ kkikʼutu che tzʼibʼatal ri Ley pa kanimaʼ. Rumal che kkinaʼ pa kanimaʼ are chiʼ utz o utz taj ri tajin kkibʼano. 16  Waʼ ri xinbʼij, are ri kbʼantaj na are chiʼ ri Dios kukoj na ri Cristo Jesús che uqʼatik tzij pa kiwiʼ ri jastaq ri kkibʼan ri winaq chkʼuyal.* Wariʼ are jun chke ri utz taq noticias ri tajin kintzijoj. 17  Ri at kabʼij che at judío kabʼan ri kubʼij ri Ley y nim kabʼan che awibʼ rumal che awetaʼm uwach ri Dios, 18  kabʼij che awetaʼm ri kraj ri Dios kabʼano y kabʼan ri utz rumal che kʼutum chawach ri kubʼij pa ri Ley, 19  kabʼij che kakʼam kibʼe ri e moy,* y che at jun luz chke ri e kʼo pa qʼequʼmal, 20  kabʼij che katkowinik keʼatoʼ ri kʼo ta kinoʼj, y at maestro chke ri alaj taq akʼalabʼ, y kachʼobʼ jubʼiqʼ chrij ri Dios rumal ri kubʼij pa ri Ley..., 21  y ri at ri keʼatijoj ri nikʼaj chik, ¿jas kʼu che ri at kabʼan ta ri kakʼut chkiwach? We kabʼij chke e nikʼaj chik «Utz taj katelaqʼik», ¿jas kʼu che ri at katelaqʼik? 22  We ri at kabʼij «Matqʼoyiʼ rukʼ jun winaq ri man are ta akʼulaj», ¿jas kʼu che ri at kabʼan awe? We ri at itzel kawil ri taq tyox, ¿jas kʼu che katelaqʼan pa taq ri templo? 23  Ri at ri nim kabʼan che awibʼ rumal che awetaʼm ri kubʼij pa ri ley, pero kakʼutu che nim ta kawil ri Dios rumal che kanimaj ta ri kubʼij pa ri Ley. 24  Rumal laʼ xtzʼibʼax kanoq: «Umak iwech ix ri man e judíos taj nim ta chi kkil ri ubʼiʼ ri Dios». 25  Ri circuncisión* xaq xiw kixutoʼ we kinimaj ri kubʼij ri Ley. Pero we kinimaj taj, jetaneʼ ibʼanom ta circuncidar iwibʼ. 26  We kʼo jun winaq ubʼanom ta circuncidar ribʼ pero kunimaj ri kubʼij pa ri Ley, jetaneʼ ubʼanom circuncidar ribʼ chuwach ri Dios. 27  Y ri at ri kʼutum chawach chrij ri circuncisión y chrij ri kubʼij ri Ley pero kanimaj taj, kqʼat na tzij pawiʼ rumal ri winaq ri ubʼanom ta circuncidar ribʼ y kunimaj ri kubʼij ri Ley. 28  Rumal che ri qas judío are ta ri kubʼij chi judío y ri qas circuncisión are ta ri kbʼan che ri cuerpo. 29  Xaneʼ ri qas judío are ri kunaʼ pa ranimaʼ che judío y ri qastzij circuncisión are ri kbʼan pa ranimaʼ ri winaq rumal ri espíritu santo, man are ta unimaxik ri Ley. Are ri Dios kyaʼow nim uqʼij ri winaq riʼ, man are ta ri e winaq keyaʼow nim uqʼij.

Notas

^ Pa nikʼaj chi lugar jewaʼ kbʼix che: «ri kkibʼan ri winaq chawal».
^ Pa nikʼaj chi lugar jewaʼ kbʼix che: «e potzʼ».

Copyrights for this publication