Ri carta xtaq bʼi chke ri Romanos 13:1-14
13 Rajawaxik keqanimaj juntir ri ketaqan pa qawiʼ rumal che are ri Dios e kojowinaq y are ri Dios yaʼowinaq jalajoj taq chak chke ri ketaqan pa qawiʼ kamik.
2 Rumal laʼ ri kuyak ribʼ chkij* ri ketaqan pa qawiʼ, xuqujeʼ tajin kuyak ribʼ chrij ri Dios y apachin ri nim ta kril ri uchaʼom ubʼanik ri Dios kqʼat na tzij puwiʼ.
3 We utz ri tajin kqabʼano rajawaxik taj kqaxiʼj qibʼ chke ri qʼatal taq tzij, pero we utz ta ri tajin kqabʼano kqaxiʼj qibʼ riʼ chke ri e qʼatal taq tzij. Pero we ri at kawaj taj kaxiʼj awibʼ chke ri e qʼatal taq tzij maya kan ubʼanik ri utz y ri e areʼ kkiya na nimal aqʼij.
4 Ri Dios e ukojom rech oj kqariq utzilal. Rumal laʼ we utz ta ri tajin kabʼano chaxiʼj bʼaʼ awibʼ, rumal che ri Dios uyaʼom taqanik pa kiqʼabʼ rech kkikʼajisaj kiwach ri kkibʼan itzelal.
5 Rumal laʼ ri ix rajawaxik kixniman chke, pero kibʼan taj xa rumal che kkʼajisax iwach, xaneʼ chixnimanoq rumal che kinaʼ pa iwanimaʼ che are laʼ ri utz kibʼano.
6 Rajawaxik che ri ix kitoj impuestos, rumal che ri Dios e ukojom ri e qʼatal taq tzij rech kekowinik kekipatanij ri winaq.
7 Chiyaʼ chke e juntir ri rajawaxik kyaʼ chke: ri kutaʼ impuesto, chitojoʼ ri impuesto che;* ri rajawaxik knimaxik, chinimaj; ri rajawaxik nim kil wi, nim chiwilaʼ wi.
8 Kikoj ta iwibʼ pa kʼasaj we kixkowin ta che utojik, xaneʼ ri rajawaxik kibʼano are che kiwaj iwibʼ iwonojel, rumal che we kiwaj iwibʼ tajin kibʼan riʼ ri kubʼij ri Ley.
9 Ri Ley kubʼij: «Matqʼoyiʼ rukʼ jun winaq ri man are ta akʼulaj, matkamisanik, matelaqʼik, marayij ri kʼo rukʼ jun chik», y apachike nikʼaj chi mandamiento, xa jun ubʼanom pa waʼ we tzij riʼ: «Chaloqʼoqʼej ri awajil atzʼaqat junam rukʼ ri kabʼan che uloqʼoqʼexik awibʼ at».
10 We kaloqʼoqʼej ri awajil atzʼaqat kabʼan ta kʼax riʼ che. Y tajin kanimaj riʼ ri kubʼij ri Ley we katloqʼoqʼenik.
11 Chibʼanaʼ juntir ri xinbʼij chiwe, ya xopan ri hora rech kixkʼastajik. Rumal che más naqaj chi kʼo wi ri qa salvación chuwach are chiʼ xqamajij ukubʼsaxik qakʼuʼx chrij ri Jesús.
12 Tajin ksaqirik y ya tajin knaqajin ri qʼij ri kojbʼan salvar. Rumal laʼ chqayaʼ kan ubʼanik jastaq ri kebʼan pa qʼequʼm y are chqakojoʼ ri chakubʼal ri kkoj pa ri saqil.
13 Chqabʼanaʼ pa qakʼaslemal ri taqal ubʼanik paqʼij. Mibʼan nimaqʼij ri kbʼan itzel taq jastaq chupam, kixqʼabʼar taj, kibʼan ta tzʼilalaj taq makaj,* kibʼan ta kʼixbʼalalaj taq jastaq,* kiyak ta chʼaʼoj y kinaʼ ta titikil chke ri nikʼaj chik.
14 Xaneʼ areʼ chqatereneʼj ri u ejemplo ri Qajaw Jesucristo y maqachomaj ubʼanik jastaq ri kurayij ri qa cuerpo.
Notas
^ O «ri kniman ta chke».
^ O «tributo». Wajun impuesto riʼ are ri ktaʼ chke ri winaq chkijujunal.
^ Pa griego kbʼix pornéia che. Chawilaʼ ri diccionario.
^ Pa griego kbʼix asélgueia che. Chawilaʼ ri diccionario.
