En de Bibel rät daut von jerajchte Menschen, waut ojjerajcht worden, soo aus de Kjennich Salomo. Hee kjand Jehowa un wist, woo hee am deenen sull, un doawäajen säajend Gott am sea. Oba lota funk Salomo aun, faulsche Jetta to deenen. Jehowa wort sea doll wäajen Salomo siene Sinden un daut gaunze Volkj Israel must fa hundade Joaren sea doarunja lieden (1. Kjen. 11:​5-9; 2. Kjen. 23:13). Daut stemt, de Bibel sajcht, daut Salomo “en de Davidstaut begroft” wort – de ieeschte hebräische Schreften sajen, “daut Salomo met siene Väavodasch toop ruen deed” (1. Kjen. 11:43). Un dautselwje sajcht daut uk von soone true Mana aus de Kjennich David. Bediet daut dan, daut Salomo wada woat toom Läwen komen, bloos wiels de Schreft dit von am sajcht? Nä, de Bibel sajcht soont nich. Daut Oppstonen es een Jeschenkj von onsen leeftoljen Voda. Hee jeft dee daut, wäm hee well eene Jeläajenheit jäwen, am fa emma to deenen (Hiob 14:​13-14; Joh. 6:44). Woat Salomo dit Jeschenkj kjrieen? Jehowa weet de Auntwuat, wie nich. Oba wie sent ons secha, daut Jehowa daut Rajchte doonen woat. w24.05 4 V. 9

Wan wie ons Jehowa hanjäwen, dan sent wie Jast en sien bilteljet Zelt. Doa hab wie äwajenuach jeisteljet Äten un kjennen met aundre toop sennen, waut uk Jehowa siene Jast sent. Dän sien bilteljet Zelt es nich bloos opp eene Städ to finjen, oba aulawäajen, wua siene true Deena sent (Opb. 21:3). Oba waut es met de true Deena, waut aul jestorwen sent? Sent dee noch Jast en Jehowa sien Zelt? Jo! Woo weet wie daut? Wiels Jehowa dee noch gaunz kloa em Denkj haft. Jesus säd: “Oba daut de Doodes oppstonen woaren, muak mau rajcht Moses kloa, aus hee von daut Spekja-Bosch schreef. Doa nand hee Jehowa ‘Abraham sien Gott, Isaak sien Gott un Jakob sien Gott.’ Hee es nich de Doodje äa Gott, oba de Läwendje äara, wiels fa am läwen dee aula” (Luk. 20:​37-38). w24.06 3 V. 6-7

Aus Zadok no Hebron jinkj, haud hee sien Kjrichsjereetschoft metjebrocht un wia reed toom kjamfen (1. Chr. 12:39). Hee wia reed, met David toop em Kjrich to gonen, om de Israeliten fa äare Fiend to beschitzen. Veleicht haud Zadok nich väl Erfoarunk em Kjrich, oba hee wia een äwanämenda Mensch. Woo lieed de Priesta Zadok, soo äwanäment to sennen? Hee kjand väl Mana, waut stoakj un äwanäment wieren. Gaunz secha lieed hee von dee. De Kjennich David biejlikj wia äwanäment un jinkj “daut israelitische Häa em Kjrich veropp”, un daut brocht de Israeliten secha bat doa, am en aules to unjastetten (1. Chr. 11:​1-2). David veleet sikj emma opp Jehowa, daut hee am halpen wudd, jäajen siene Fiend to kjamfen (Psa. 138:3). Zadok lieed uk noch von aundre Mana soo aus Jojada un sien Sän Benaja, waut een Kjrieja wia, un uk von de aundre 22 Volkjsleida, waut opp David siene Sied wieren (1. Chr. 11:​22-25; 12:​27-29). w24.07 3 V. 5-6

Saulus von Tarsus haud Christus siene Nofolja grausom vefolcht. De mieeschte Christen dochten secha, daut hee sikj kjeenmol wudd endren. Oba Jesus wist, daut Saulus sikj endren un een Leetsennen kjrieen kunn. Hee un sien Voda sagen, daut doa Goodet en Saulus wia. Jesus säd: “Ekj hab mie disen Maun jewält” (Apj. 9:15). Jesus holp Saulus mau rajcht derch een Wunda, een Leetsennen to kjrieen (Apj. 7:58 – 8:3; 9:​1-9, 17-20). Aus Saulus een Christ wort – un lota aus de Apostel Paulus bekaunt wort –, räd hee foaken doavon, woo dankboa hee wia, daut Jehowa un Jesus soo leeftolich to am wieren un am soo väl Metleet jewäsen hauden (1. Tim. 1:​12-15). Opp eene Sauz wort de Apostel Paulus en, daut de Vesaumlunk en Korint nuscht doajäajen jedonen haud, daut doa wäa eene sintelje Sort Sex driewen deed. Woo jinkj Paulus met dise Sach om? Von daut, waut de Apostel Paulus säd, lia wie, woo leeftolich Jehowa siene Deena trajchtwiest un woo wichtich daut es, Metleet to wiesen. w24.08 13 V. 15-16

Met de Tiet wees Jehowa, woo onvolkomne Menschen am noda komen kunnen. De ieeschta Mensch, waut no Adam un Eva äare Sind Gloowen aun Jehowa haud, wia dee äa tweeda Sän, Abel. Wiels hee Jehowa leewd, wull hee am jefaulen un noda komen. Doawäajen opfad Abel waut fa am. Hee wia een Schopshoad, un soo neem hee waut von siene kjliene Schopkjes, schlacht dee un opfad dee fa Jehowa. Woo docht Jehowa doaräwa? Daut sajcht: “Am jefoll daut Opfa, waut hee jeef” (1. Mo. 4:4). Jehowa jleicht uk aundre Opfa von Menschen, waut am leewden un opp am vetruden, biejlikj Noah (1. Mo. 8:​20-21). Doaderch, daut hee dise Opfa aunneem, wees Jehowa, daut sindje Menschen am jefaulen un noda komen kjennen. w24.08 3 V. 5-6

Ojjerajchtichkjeit kaun ons sea toosaten un mootloos moaken (Liera 7:​7, JHF). Soo jinkj daut mau rajcht true Deena von ieeschtemma soo aus Hiob un Habakuk (Hiob 6:​2-3; Hab. 1:​1-3). Dauts gaunz jeweenlich, ons soo aus dit to feelen, oba wie motten doawäajen oppaussen, daut wie nich waut Dommet doonen, wiels doaderch kunn de Loag noch schlemma woaren. Eenjemol lat daut soo, daut dee, waut Ojjerajchtet doonen, kjeene Strof doafäa kjrieen. Dan wunda wie veleicht, aus sikj daut verheipts loont, daut Rajchte to doonen. Soo jinkj daut eenen Psalmenschriewa. Hee sach, daut goode Menschen von aundre schlajcht behaundelt worden, un daut dise schlajchte Menschen een goodet Läwen hauden. Hee säd: “Dit es soo aus de gottloose sent, onen Sorjen” (Psa. 73:12). Wäajen de Ojjerajchtichkjeit, waut hee sach, wia hee gaunz vetwiewelt un docht, daut sikj daut goanich loond, Jehowa to deenen. Hee säd: “Aus ekj dit aula proowd to vestonen, wia daut too unjadrekjent fa mie” (Psa. 73:​14, 16). w24.11 3 V. 5-7

Wie veharlichen Jehowa, wiels hee een butajeweenelja Gott es. Jehowa es aulmajchtich; hee haft Krauft onen Enj (Psa. 96:​4-7). Siene groote Weisheit es kloa doaraun to seenen, waut hee jemoakt haft. Hee haft ons daut Läwen jejäft un uk aules, waut ons toom läwen fält (Opb. 4:11). Hee es tru (Opb. 15:4). Aules, waut hee sikj väanemt, fieet hee derch, un hee helt sikj emma doaraun, waut hee vesprakjt (Jos. 23:14). Doawäajen säd de Profeet Jeremia äwa Jehowa: “Noanich mank de jelieede von de Velkja, ooda mank äare Kjennichs, es wua eena soo aus du best” (Jer. 10:​6-7). Ons himlischa Voda es werkjlich butajeweenlich, un wie haben goode Uasoak, am Respakjt to wiesen. Oba Jehowa vedeent nich bloos onsen Respakjt, hee vedeent uk onse Leew. Äwa aules well wie Jehowa veharlichen, wiels wie am sea leewen. w25.01 3 V. 5-6

Gott siene Jäajna proowen, de goode Sachen von Jehowa siene Organisazion soo hantodreien, daut et no waut Schlajchtet lat. Biejlikj hab wie von de Schreft jelieet, daut Jehowa velangt, daut wie sellen em Kjarpalichen rein sennen, een reinet Läwen fieren un am soo deenen, aus hee daut haben well. Hee sajcht, daut soone, waut Schlajchtet doonen un nich doamet opphieren, sellen ut de Vesaumlunk rutjesat woaren (1. Kor. 5:​11-12; 6:​9-10). Wie hoolen ons aun dit Jeboot ut de Bibel. Oba onse Jäajna sajen, daut wie de Menschen nich leewen, daut wie dee hunjsch rechten un daut wie nuscht met dee to doonen haben, waut een kjlienet bät aundasch sent aus wie. Wie motten doaraun denkjen, wäa de Organisazion schoden well. De Soton vebreet de Läajes äwa Jehowa siene Organisazion. Hee es “de Voda von de Läajes” (Joh. 8:44; 1. Mo. 3:​1-5). Soo, wie kjennen doamet räakjnen, daut de Soton siene Menschen brucken woat, om oppjemoakte Jeschichten äwa Jehowa siene Organisazion to vebreeden. w24.04 10-11 V. 13-14

Mau rajcht nodäm de groote Liedenstiet aunjefongen haft, kaun daut sennen, daut eenje, waut daut seenen, daut “daut groote Babel” venicht es, doaraun denkjen, daut Jehowa siene Zeijen aul fa väl Joaren doavon jerät hauden. Woaren eenje noch wiesen, daut dee aun Jehowa jleewen, wan dee dit seenen? (Opb. 17:5). Wan daut soont jeft, dan wudd daut soo sennen aus daut, waut en Ägipten en Moses siene Tiet passieed. De Schreft sajcht, daut “väle, dee nich Israeliten wieren, jinjen met an met,” aus de Israeliten von Ägipten veleeten. Eenje fungen veleicht aun, aun Jehowa to jleewen, aus dee sagen, daut de Tieen Ploagen krakjt soo passieeden, aus Moses äant jesajcht haud (2. Mo. 12:38). Waut, wan soo waut passieet, wan daut Groote Babel ieescht venicht es? Woat ons daut dan schod sennen, daut eenje Menschen noch woaren met ons toop Jehowa deenen kjennen jroz ver Harmagedon? Secha nich! Wie wellen onsen himlischen Voda nodoonen, waut doa “metliedent, voll Jnod, nich leicht doll, un sea leeftolich un truhoatich” es (2. Mo. 34:6). w24.05 11 V. 12-13

Woo kaun daut utkomen, wan wie nich mea aun “de goode Sort Wieed” fausthoolen? Doatoo mol een Biespel. Daut sitt soo, daut doa to de Aposteltiet manke Christen vetalt wort, daut Jehowa sien Dach aul jekomen wia. Veleicht wia doa een Breef, waut de Apostel Paulus minkj sull jeschräwen haben, waut soont säd. Eenje Christen von Tessalonich jleewden daut un vetalden daut uk wieda, onen sikj daut to unjastonen, aus daut soo wia. Wan dee daut hauden em Denkj jehoolen, waut Paulus äant säd, aus hee noch doa bie äant wia, wudden se äant nich veleit haben (2. Tes. 2:​1-5). Paulus rod de Breeda too, nich aules fuaz to jleewen. Om dee to halpen, daut dee daut nich wada soo jinkj, schreef hee opp Enj von sienen tweeden Breef aun de Tessalonicha dit: “Ekj, Paulus, jreess junt; dit schriew ekj met miene ieejne Haunt. Dit es, woo ekj en jieda Breef schriew, aun waut jie seenen kjennen, daut ekj daut jeschräwen hab” (2. Tes. 3:17). w24.07 12 V. 13-14

De hebräische Christen äa Gloowen wudd sea aufjeprooft woaren, je schlemma daut en Judäa wort. Eenje von dee hauden aul groote Vefoljunk beläft, oba de Mieeschte hauden dän Christengloowen en eene frädelje Tiet aunjenomen. De Apostel Paulus räd doavon, daut see aul väl Schwoaret derchjegonen wieren, oba hee säd, daut see noch nich soont beläft hauden aus Jesus, waut mau rajcht sien Läwen jäwen must (Heb. 12:4). Wäajen doa emma mea dän Christengloowen aunneemen, wieren de Juden sea wuttich un schauften emma dolla doajäajen. Biejlikj een poa Joa ea Paulus sienen Breef schreef, bungen sikj mea aus 40 Juden “aun eenen Fluch un säden, daut see nich äten uk nich drinkjen wudden, bat see Paulus wudden haben dootjemoakt” (Apj. 22:22; 23:​12-14). Wan de Christen uk soo väl Jäajna hauden un mau rajcht wudden vefolcht woaren, musten dee doawäajen wieda Toopkomes haben, de goode Norecht prädjen un äaren Gloowen stoakj hoolen. w24.09 12 V. 15

Johanes wia een gooda Frint un een Apostel von Jesus (Mat. 10:2). Johanes wia väl met Jesus toop, aus see prädjen deeden, un hee sach uk, woo dee Wunda deed. Hee bleef uk bie Jesus en schwoare Tieden. Hee sach, woo Jesus dootjemoakt wort, un sach am uk nodäm aus hee vom Doot oppjestonen wia. Hee sach, woo de ieeschtemmasche Christenvesaumlunk emma jrata wort. Aum Aunfank wia daut bloos eene kjliene Grupp true Deena, oba lota wort de goode Norecht “mank aule Menschen unjarem Himmel jeprädicht” (Kol. 1:23). Aus Johanes aul sea oolt wia, haud hee de Iea, “eene Openboarunk von Jesus Christus, waut Gott am jeef,” opptoschriewen (Opb. 1:1). Johanes schreef een Evangelium un uk noch dree Breew, waut Poat von de Bibel sent. En sienen dredden Breef räd hee to eenen truen Deena, waut Gajus heet, dän hee väl räakjend aus sienen jeisteljen Sän (3. Joh. 1). Daut, waut dis trua, elra Maun schreef, haft Jesus siene Nofolja bat vondoag dän Dach aula väl Moot jejäft. w24.11 12 V. 15-16

Een Ehemaun, waut siene Fru leeft, wiest ar, daut hee ar schazt. Hee sitt ar aus een feinet Jeschenkj von Jehowa (Spr. 18:22; 31:10). Doawäajen jeit hee leeftolich un respakjtvoll met ar om, biejlikj wan dee Sex haben. Wan dee Sex haben, dan woat de Maun ar daut nich bemotten, irjentwaut to doonen, wuaderch see sikj ommaklich ooda wieetloos feelt ooda een schlajchtet Jewessen kjricht. Un hee sitt doano, daut hee selfst een reinet Jewessen ver Jehowa haben kaun (Apj. 24:16). Ehemana, siet junt secha, daut Jehowa aules sitt un väl räakjent, waut jie doonen, om june Frues derch daut to ieren, waut jie sajen un doonen. Sie die eenich, diene Fru doaderch to ieren, daut du nuscht deist, waut ar toosaten kaun, oba leeftolich un respakjtvoll met ar omjeist. Wan du daut deist, dan wiest du, daut du ar leefst un schazt. Wan du diene Fru ieren deist, dan woascht du nich bloos met ar Frind sennen, oba daut Wichtichste es, du woascht met Jehowa Frind bliewen (Psa. 25:​14, NW). w25.01 13 V. 17-18

Wauts een Unjascheet von Jehowa siene Deena un soone, waut sikj bloos Christen nanen? Gott siene Deena sent flietich em Prädichtdeenst. Waut kaun ons halpen, wieda flietich em Deenst to sennen ooda soogoa noch flietja to woaren? Von Jesus sien Biespel kjenn wie lieren, woo wie kjennen flietich em Prädichtdeenst sennen. Aus hee oppe Ieed wia, haud hee emma eenen Iewa fa dän Deenst. Un je noda daut Enj von sienen Deenst kjeem, je mea deed hee. Krakjt soo aus de Goadenbesorja sikj dree Joa om eenen Fiejenboom kjemmad, dee oba nich Frucht druach, krakjt soo prädijd Jesus de Juden ojjefäa dree Joa, oba de Mieeschte von dee worden nich siene Nofolja. Un krakjt soo aus de Goadenbesorja nich Hopninj oppjeef, daut de Fiejenboom noch mol wudd Frucht droagen, krakjt soo jeef Jesus nich met de Menschen opp un leet nich no en sienen Deenst (Luk. 13:​6-9). Wan wie daut nokomen, waut hee lieed, un am nodoonen, dan woa wie uk wieda kjennen flietich sennen. w25.03 14-15 V. 1-4

Waut es, wan du denkjst, daut du wäm jefungen hast, waut doa kunn een gooda Ehepoatna sennen? Wurscht du dee fuaz sellen sajen, daut du waut von dee west? De Schreft sajcht, daut een kluaka Mensch emma weis haundelt. Daut wudd weis sennen, dee ieescht fa eene Tiet to beoobachten, onen daut et oppfelt, ea du dee daut sajchst, daut du waut von ar west. Woo wurscht du wäm beoobachten kjennen, onen daut et oppfelt? Veleicht bie de Vesaumlunk ooda wan de Breeda jrodsoo wua toop sent, wurscht du seenen kjennen, woo de Persoon daut haft un woo dee em Jeisteljen es, woo dee sikj oppstalt, wäm dee to Frind haft un äwa waut dee rät (Luk. 6:45). Haft dee sikj biejlikj soo waut väajenomen, aus du hast? Du wurscht kjennen met de Eltestasch von dee äare Vesaumlunk räden ooda uk met aundre riepe Breeda un Sestren, waut dee goot kjanen (Spr. 20:​18, NW). Du wurscht uk kjennen froagen, waut fa goode Sieden dee haft un wuafäa dee bekaunt es (Rut 2:11). Wan du wäm beoobachten deist, dan doo daut soo, daut et fa ar nich ommaklich es. Doo dee äare Jefeelen respakjten. Proow nich, dän gaunzen Tiet rom ar to sennen un uk nich aules to weeten äwa ar. w24.05 22 V. 7-8

De Eltestasch denkjen nich fuaz, daut een Sinda nich woat een Leetsennen haben. Eenje kjrieen een Leetsennen aul bie daut ieeschte Mol, wan daut Eltesta-Kommitee sikj met dee traft, oba aundre fält veleicht mea Tiet. Waut kjennen de Eltestasch dan doonen? Veleicht plonen dee daut, sikj mea aus een Mol met dän Sinda to trafen. No daut ieeschte Mol fangt de Sinda veleicht aun, doaräwa notodenkjen, waut dee am doa jesajcht haben. Veleicht frajcht dee Jehowa uk om Vejäwunk, un wiest doaderch, daut hee deemootich es (Psa. 32:5; 38:19). Daut näakjste Mol, wan de Eltestasch sikj met dän Sinda trafen, haft dee veleicht aul eene aundre Enstalunk, aus waut dee bie daut ieeschte Mol haud. De Eltestasch wiesen dän Sinda Metjefeel un behaundlen dän leeftolich, wiels dee dän halpen wellen, een Leetsennen to haben. Dee bäden doarom, daut Jehowa äare Aunstrenjungen säajnen mucht, un hopen, daut de Brooda wada to Besennunk kjemt un een Leetsennen kjricht (2. Tim. 2:​25-26). w24.08 23 V. 12-13

Jehowa well nich, daut wäa venicht woat! Hee well, daut de Sinda wada kjennen Frind met am woaren (2. Kor. 5:20). Doawäajen haft hee siene Deena, waut am veloten haben, noch emma oppjemuntat, een Leetsennen to haben un wada trigj no am to komen. De Eltestasch haben daut Väarajcht, met Jehowa tooptoschaufen un soone to halpen, waut groote Sinden begonen haben, een Leetsennen to kjrieen (Reem. 2:4; 1. Kor. 3:9). Daut jeft groote Freid em Himmel, wan een Sinda een Leetsennen haft! Ons himlischa Voda Jehowa freit sikj jiedatsmol sea, wan eent von siene veloarne Schop trigj no de Vesaumlunk kjemt. Woat onse Leew fa Jehowa nich emma jrata, wan wie doaräwa nodenkjen, woo väl Metjefeel un Metleet hee haft un woo sea hee ons leeft? (Luk. 1:78). w24.08 31 V. 16-17

Wan Jesus daut toojeloten haud, daut se am toom Kjennich muaken, wudd hee Poat von de Politikj jewast sennen. Doawäajen jinkj Jesus auleen nom Boajch. Wan aundre am uk unja Druck saden, menjd hee sikj oba nich enne Politikj nenn. Es daut nich eene goode Lia fa ons? Secha woaren de Menschen nich von ons velangen, daut wie derch een Wunda Broot moaken ooda Kranke heelen sellen. Dee woaren uk nich proowen, ons toom Kjennich ooda Harscha to moaken. Oba veleicht hucken dee ons aun, daut wie ons mank de Politikj menjen sellen, doaderch daut wie wälen ooda wiesen, daut wie wäm unjastetten, waut de Sachen minkj vebätren woat. Oba Jesus sien Biespel wiest, waut wie doonen sellen. Hee menjd sikj nich mank de Politikj un säd lota mau rajcht: “Mien Kjennichrikj es nich Poat von dise Welt” (Joh. 17:14; 18:36). De Christen vondoag dän Dach sellen soo denkjen un haundlen aus Jesus. Wie unjastetten Gott sien Kjennichrikj, vetalen aundre doavon un bäden doarom (Mat. 6:10). w24.12 4 V. 5-6

Wan du studieescht, dan kjikj doano, woo du daut nokomen kaust, waut du lieescht. Biejlikj proow, soo aus Jehowa jerajcht to sennen, doaderch daut du aulem äwareen behaundelst. Doo de Leew no, waut Jesus fa sienen Voda haft, doaderch daut du reed best, daut to doonen, waut Jehowa haben well, un aundre halpst, wan die daut daut Läwen uk schwanda moakt. Du kaust Jesus uk doaderch nodoonen, daut du aundre äwa de goode Norecht vetalst, soo daut dee uk de Jeläajenheit haben, aun daut Leesjelt Gloowen to kjrieen. Je mea wie äwa daut Leesjelt lieren un daut räakjnen, je dolla woa wie Jehowa un sienen Sän leewen. Un dan woaren dee ons uk emma dolla leewen (Jak. 4:8). Well wie wieda de Bibel un onse Bieekja brucken, om mea äwa daut Leesjelt to lieren. w25.01 25 V. 16-17

Daut Jlikjnis en dän Varsch fa vondoag wiest, waut Jehowa deit, wan doa wäa een Leetsennen haft: Hee schmitt dänjanjen siene Sinden soo wiet wajch, daut hee dee nich mea seenen kaun. Hiskia siene Wieed kaun eena uk soo sajen: “Du hast daut met miene Sinden soo jemoakt, aus wudd ekj dee verheipts nich mol jedonen haben.” De Bibel brukt noch een aundret Jlikjnis toom dit dietlich moaken. Daut finj wie en Micha 7:​18-19. Daut sajcht doa, daut Jehowa onse Sinden en daut deepe Mäa schmitt. Daut wudd ieeschtemma sennen ommäajlich jewast, waut trigj utem Mäa ruttonämen. Derch dise Jlikjnisen hab wie jelieet, daut wan Jehowa ons vejäwen deit, dan bruck wie ons nich lenja schuldich feelen; hee nemt ons dise Laust auf. Dauts krakjt soo, aus David mol säd: “Freid haben dee, dee äare gottloose Woakjen vejäft sent, un deejanje, dee äare Sinden sent bedakjt worden” (Reem. 4:7). Dauts, waut daut meent, opp iernst to vejäwen! w25.02 9 V. 7-8

Vondoag dän Dach es doa een bilteljet Paradies oppe Ieed, wua een deel Menschen bennen sent un drock sent met Goodet doonen. Doa sent uk millionende Menschen, waut doa werkjlich Fräd haben. Dee, waut en dit Paradies bennen sent, sent sikj eenich, daut kjeenmol to veloten. Dee wellen uk soo väl Menschen aus mäajlich halpen, daut dee met äant toop doa sent. Waut es daut fa een Paradies? Daut es daut jeistelje Paradies! Opp eene besondre Wajch haft Jehowa eene biltelje Städ jemoakt, wua siene Deena Fräd un Eenichkjeit haben, wan dee uk en Soton siene schlajchte un jefäadelje Welt läwen, wua Menschen eena dän aundren haussen (1. Joh. 5:19; Opb. 12:12). Ons leeftolja Voda sitt, woo de Menschen en dise Welt lieden motten, un hee sorcht doafäa, daut siene Deena sikj secha feelen, soo daut dee am wieda kjennen met Freid deenen. Sien Wuat sajcht, daut dit jeistelje Paradies soo es aus eene “Tooflucht” un “aus een jewessada Goaden” (Jes. 4:6; 58:11). Wiels Jehowa dee säajent, kjennen dee, waut en dit Paradies läwen, schaftich sennen un sikj secha feelen en dise latste, schwoare Doag (Jes. 54:14; 2. Tim. 3:1). w24.04 20 V. 1-2

Wan du die befrieen west, dan hast du secha aul doaräwa jebät. Jehowa vesprakjt nich, daut jieda eena von siene Deena eenen Ehepoatna finjen woat. Oba hee es doawäajen doarom todoonen, waut die fält un woo die daut jeit, un hee kaun die doamet halpen, eenen Ehepoatna to finjen. Doawäajen saj Jehowa wieda, waut du west un woo du die feelst (Psa. 62:9). Bäd uk om Jedult un Weisheit (Jak. 1:5). Jehowa vesprakjt, daut hee die daut Needje jäwen woat un die halpen woat, die jeleeft to feelen, mau rajcht wan du uk nich fuaz wäm finjst, waut doa kunn een gooda Ehepoatna sennen (Psa. 55:23). Pauss bloos opp, daut et nich daut Wichtichste en dien Läwen woat, eenen Ehepoatna to kjrieen (Filip. 1:10). Woare Freid kjemt nich doavon, daut eena befriet ooda onbefriet es, oba doavon, daut eena een gooda Frint met Jehowa es (Mat. 5:3). Un wan du noch onbefriet best, dan es die daut leichta, mea em Deenst to doonen (1. Kor. 7:​32-33). Doawäajen nutz dise Tiet ut. w24.05 21 V. 4; 22 V. 6

Woo lang sell jie toop spazieren? Haustich waut to entscheiden, kjemt foaken schlajcht ut (Spr. 21:5). Doawäajen sell jie soo lang spazieren, bat jie dän aundren goot kjanen. Oba jie sellen nich lenja spazieren, aus waut doa needich es. De Bibel sajcht uk: “Eene Hopninj dee sikj vetrakjt, moakt eenem krank” (Spr. 13:12). Woo kjennen aundre dee unjastetten, waut spazieren? Wie wudden dee kjennen fa eene Moltiet hankroagen, fa ons Famieljenstudium ooda met ons toop Scheengonen to haben (Reem. 12:13). Kaust du veleicht met dee toop sennen, met dee toop wajchfoaren ooda dee no dien Hus kroagen, daut see äwa perseenelje Sachen räden kjennen? (Gal. 6:10). Wan een Jung un eene Mejal die froagen, aus du met dee toop wajchfoaren kaust, dan see daut aus eene goode Mäajlichkjeit aun, dee to unjastetten. Pauss opp, daut du dee nich gaunz auleen latst, oba kjikj uk doano, wanea dee Tiet fält, von perseenelje Sachen to räden. w24.05 30 V. 13-14

De Eltestasch proowen ruttofinjen, waut eenen Sinda bat doa brocht, de Sind to begonen. Wort dee biejlikj em Jeisteljen schwak, wäajen dee opphieed, pinkjlich to studieren ooda em Deenst to gonen? Haft dee oppjehieet, jieda Dach un von Hoaten to bäden? Leet hee sikj von schlajchte Wenschen unjakjrieen? Wäa sent siene Frind un waut fa Tietvedrief haft dee? Waut haben dise Entscheidungen doaraun jedonen, woo dee denkjt un waut dän jankat? Es dee sikj em Kloaren doaräwa, woo sien himlischa Voda sikj doaräwa feelt, waut dee jedonen haft? De Eltestasch stalen dänjanjen Froagen, daut dee selfst doaräwa nodenkjt, waut am bat doa brocht, em Jeisteljen schwak to woaren un to sindjen. Oba dee doonen daut opp eene leeftolje Wajch un froagen dän kjeenmol perseenelje Sachen, waut äant nich fält to weeten (Spr. 20:5). De Eltestasch kjennen uk Jlikjnisen brucken toom dänjanjen halpen, doaräwa notodenkjen, waut dee jedonen haft un wuarom daut schlajcht wia. Bie daut ieeschte Mol trafen met de Eltestasch, fangt dänjanjen daut veleicht aun, schod to woaren, waut vonne Entscheidungen hee jemoakt haft un woo hee doaräwa docht, ooda hee kjricht soogoa een Leetsennen. w24.08 22 V. 9-11

Jesus prädijd flietich “de goode Norecht von Gott sien Kjennichrikj”, wiels hee wist, daut Gott dit von am haben wull. Fa Jesus wia de Deenst daut Ieeschte en sien Läwen. Mau rajcht en de latste Moonaten en sienen Deenst jinkj hee “von eene Staut no de aundre un von een Darp no daut aundre” un lieed de Menschen (Luk. 13:22). Hee lieed uk aundre Jinja ut, daut dee met am toop prädjen kunnen (Luk. 10:1). Vondoag dän Dach wellen Jehowa un Jesus uk, daut daut Prädjen von de goode Norecht daut ieeschte kjemt (Mat. 24:14; 28:​19-20). Ons woat daut halpen, flietja em Prädichtdeenst to sennen, wan wie de Menschen soo seenen, aus Jehowa deit. Hee well, daut soo väl Menschen aus mäajlich de goode Norecht hieren un dee aunnämen (1. Tim. 2:​3-4). Doawäajen lieet hee ons ut, daut Woakj noch bäta to doonen, waut Läwes rat. Mau rajcht wan dee nu uk nich aunfangen, Jehowa to deenen, haben dee veleicht noch de Jeläajenheit, ea de groote Liedenstiet to Enj es. w25.03 15-16 V. 5-7

Waut doo wie, wan doa wäa no een Toopkomen kjemt, waut ut de Vesaumlunk rutjesat wort? En soone Loag mott jieda Christ daut selfst no sien Jewessen no entscheiden, waut hee met de Schreft oppjeschoapt haft. Eenje wudd daut veleicht nuscht baudren, dänjanjen to bejreessen un welkom to heeten. Oba wie wudden doawäajen nich lang met dän spazieren ooda sest toop Tiet vebrinjen. Eenje denkjen nu veleicht: “Sajcht de Schreft oba nich, daut Christen, waut soonen bejreessen, Poat haben aun dän siene beese Woakjen?” (2. Joh. 9-11). Wan wie ons de Varzhen doaver un doahinja unjastonen, woat daut dietlich, daut et hia von Aufjefolne rät un von soone, waut aundre toom Sindjen brinjen wellen (Opb. 2:20). Soo, wan doa wäa de Aufjefolne äare Lieren vebreet ooda prooft, aundre toom Schlajchtet doonen mettorieten, dan wudden de Eltestasch soonen nich besieekjen. Secha es doa Hopninj, daut soone uk een Leetsennen haben kjennen. Oba bat daut bat doa es, wudd wie deejanje nich bejreessen un uk nich no een Toopkomen kroagen. w24.08 30-31 V. 14-15

Nodäm daut Jesus eene Häad Menschen haud to äten jejäft, schekjt hee siene Apostel met een Boot trigj no Kapernaum. Hee jinkj dan auleen nom Boajch un brocht sikj doaderch fa de Menschen utem Stich, waut am wullen toom Kjennich moaken (Joh. 6:​16-20). Aus de Apostel hinjawäajes oppem Wota wieren, kjeem doa een Storm opp. De Wint wia sea stoakj un doa wieren groote Walen. Dan kjeem Jesus no dee oppem Wota jegonen un säd to dän Apostel Petrus, daut hee uk kunn oppem Wota gonen (Mat. 14:​22-31). Aus Jesus ieescht oppem Boot wia, wort daut wintstell. Doawäajen säden de Jinja: “Du best werkjlich Gott sien Sän” (Mat. 14:33). Oba dee kunnen noch emma nich vestonen, waut dit Wunda met daut Wunda von daut Broot to doonen haud. Markus schreef: “[De Apostel] wieren … bloos sea vewundat, wiels dee hauden de Lia von daut Broot noch nich kunt bejriepen” (Mar. 6:​50-52). Dee kunnen daut noch nich vestonen, waut vonne groote Krauft Jehowa Jesus jejäft haud toom veschiedne Wunda doonen. w24.12 5 V. 7

Wie kjennen onse Dankboakjeit fa Jehowa siene Leew wiesen, wan wie de Tiet von daut Owentmol utnutzen, om Jehowa to wiesen, daut wie fa daut Leesjelt dankboa sent. Wie wellen doano hanplonen, bie daut Owentmol to sennen, un uk aundre enloden. Vetal dee, waut du enloden deist, waut bie daut Owentmol krakjt jedonen woat. De Videos Wuarom must Jesus stoawen? un Denkjt aun Jesus sienen Doot opp jw.org kjennen die doabie halpen. De Eltestasch sellen onbedinjt soone enloden, waut nich mea prädjen gonen. Stal die väa, woo väl Freid daut em Himmel un oppe Ieed jäwen woat, wan eenje von Jehowa siene veloarne Schop jeholpen woat, trigj no Hus to komen! (Luk. 15:​4-7). Bie daut Owentmol well wie ons nich bloos unjarenaunda bejreessen, oba besonda soone, waut doa toom ieeschte Mol hankomen ooda waut doa aul lang nich jewast sent. Wie wellen, daut dee sikj werkjlich oppjenomen feelen (Reem. 12:13). w25.01 29 V. 15

Daut Leesjelt wiest dietlich, daut Jehowa jerajcht es, oba daut halpt ons besonda to vestonen, waut vonne groote Leew hee haft (Joh. 3:16; 1. Joh. 4:​9-10). De Lia von daut Leesjelt wiest, daut Jehowa nich bloos well, daut wie fa emma läwen, oba daut hee sikj uk wenscht, daut wie to siene Famielje jehieren sellen. Äwalaj mol: Aus Adam sindijd, kunn hee nich mea to Jehowa siene Famielje jehieren. Doawäajen sent wie uk nich en Gott siene Famielje nennjebuaren. Oba wäajen daut Leesjelt vejeft Jehowa de Sinden von aul dee, waut Gloowen wiesen un jehuarsom sent, un woat dee lota en siene Famielje oppnämen. Un wie kjennen nu aul goode Frind met Jehowa un met onse Gloowesbreeda sennen. Es daut nich dietlich, daut Jehowa ons sea leeft? (Reem. 5:​10-11). w25.01 21 V. 6

Du wurscht doa secha met envestonen sennen, daut daut Leesjelt een butajeweenlich grootet Jeschenkj es (2. Kor. 9:15). Wäajen Jesus sien menscheljet Läwen aus Opfa hanjeef, kaust du goode Frind sennen met Jehowa Gott. Du hast doaderch uk de Hopninj, noch mol fa emma to läwen. Wie haben jenuach Uasoak, Jehowa onse Dankboakjeit fa daut Leesjelt to wiesen, waut hee ut Leew jeef (Reem. 5:8). Daut wie daut Leesjelt nich vejäten un emma dankboa bliewen, haft Jesus daut Owentmol enjerecht toom aun sienen Doot denkjen (Luk. 22:​19-20). Dit Joa woat daut Owentmol aum Donnadach, dän 2. Aprell 2026 sennen. Gaunz secha well wie aula doa sennen. Wie wudden ons sellen ver un no daut Owentmol de Tiet nämen toom doaräwa nodenkjen, waut Jehowa un sien Sän fa ons jedonen haben. w25.01 20 V. 1-2

Du kaust noch mea äwa de Leew lieren, waut Jehowa Gott un Jesus Christus fa ons haben, wan du doa deep äwa nodenkjst. En de Tiet von daut Owentmol wurscht du kjennen eent ooda een poa Evangelien oppmoakjsom läsen. Proow nich, too väl Kapitels opp eemol to läsen. Enne Städ daut läs sachta un sieekj noch no mea Jrind, wuarom wie wudden Jehowa un Jesus leewen sellen. Wan du aul fa väl Joaren enne Woarheit best, wundascht du veleicht, aus du noch irjentwaut Nieet lieren kaust äwa soone bekaunde Teemasch aus Gott siene Jerajchtichkjeit, siene Leew un daut Leesjelt. Rajcht jesajcht woascht du kjeenmol utjelieet kjrieen äwa soone un uk aundre Teemasch. Soo, nutz daut ut, waut du en onse Bieekja finjen kaust. w25.01 24-25 V. 13-15