De Breeda, waut goode, christelje Ieejenschoften haben, sent eene groote Help fa de Vesaumlunk. Eena, waut nich bloos opp sienen Stekj stonen blift, sitt doano, daut doa Fräd es. Dee horcht aundre too un prooft to vestonen, woo dee denkjen. Wurscht du biejlikj reed sennen, bie een Eltestatoopkomen daut to unjastetten, waut de Mieeschte entscheiden, wan daut nich jäajen een Jesaz ooda Gruntsauz ut de Bibel jeit? Velang nich, daut aules soo jedonen woat, aus du daut haben west. Horch no aundre äare Iedeeen (1. Mo. 13:​8-9; Spr. 15:22). Enne Städ kort to sennen, sie leeftolich un respakjtvoll. Sie frädlich un nemm dän ieeschten Schrett, om met aundre Fräd to moaken – mau rajcht en schwoare Loagen (Jak. 3:​17-18). Wan du leeftolich rätst, kaun daut halpen, daut aundre, mau rajcht onse Jäajna, nich soo doll sent (Rech. 8:​1-3; Spr. 25:15; Mat. 5:​23-24). w24.11 23 V. 13

Jesus “storf bloos een Mol”, oba hee deit doawäajen noch emma waut fa ons (Reem. 6:10). Opp waut vonne Wajch? Hee sitt noch emma doano, daut wie aul daut Goode kjrieen kjennen, waut derch daut Leesjelt mäajlich es. Kjikj wie mol, waut hee deit. Hee es ons Kjennich un Huaga Priesta un daut Haupt von de Vesaumlunk (1. Kor. 15:25; Efs. 5:23; Heb. 2:17). Hee haft de Oppgow, de Jesaulwde un de groote Häad tooptosaumlen – dise Oppgow woat hee foadich haben, ea de groote Liedenstiet to Enj es (Mat. 25:32). Hee sitt uk doano, daut siene true Deena aules em Jeisteljen haben, waut dee en dise latste Doag fält (Mat. 24:45). Un en de dusent Joa woat hee wieda Goodet fa ons doonen. Jesus jeef sikj gaunz fa ons han un es een butajeweeneljet Jeschenkj von Jehowa! w25.01 24 V. 12

Wan Jehowa onse Sinden vejeft, es daut soo, aus wan wie verheipts nich jesindicht hauden, un hee woat ons lota uk nich doafäa strofen. Doaderch kjenn wie uk wada goode Frind sennen met onsen himlischen Voda. Oba wie wellen em Denkj hoolen, daut et een Jeschenkj es, daut hee ons opp iernst vejäwen deit. Dit Jeschenkj jeft hee ons wäajen sien grootet Metleet un wäajen hee ons leeft, un nich, wiels wie ons daut vedeent haben. Sent wie nich aula sea dankboa doafäa, daut Jehowa ons “opp iernst vejäwen” deit? (Psa. 130:4; Reem. 4:8). Oba daut Jehowa ons vejäwen kaun, mott wie waut Wichtjet doonen. Waut es daut? Jesus säd: “Wan jie aundre Menschen äare Sinden nich vejäwen, woat jun Voda junt june Sinden uk nich vejäwen” (Mat. 6:​14-15). Soo aus Jehowa mott wie aundre vejäwen. w25.02 13 V. 18-19

Waut es met de Menschen von Sodom un Gomorra? De jerajchta Lott läwd mank dee. Oba weet wie neiw, aus Lott werkjlich to aulem doa jeprädicht haud? Nä. Wan dee uk schlajcht wieren, wisten dee oba bäta? Daut sitt nich soo. De Bibel sajcht biejlikj, daut doa mol “junge un oole [Mana]” von dise Staut no Lott kjeemen un wullen met de Mana Schaund driewen, waut bie Lott em Hus wieren. Eenje von dise Mana wieren mau nate Junges un kunnen veleicht nich mol vestonen, woo schlajcht daut wia, waut see deeden (1. Mo. 19:4; 2. Pet. 2:7). Weet wie daut werkjlich, daut de metliedenda Gott Jehowa nich eenen von dise Menschen wada oppwakjen woat? Nä, wie weeten daut nich neiw. Jehowa säd to Abraham, daut en dee Staut nich mol tieen jerajchte Menschen wieren (1. Mo. 18:32). Soo, daut wieren ojjerajchte Menschen un doawäajen wia daut rajcht, daut Jehowa dee fa äa Schlajchtet venichten deed. Oba kjenn wie opp iernst sajen, daut nich eena von dee woat en daut “Oppstonen von … de Ojjerajchte” wada toom Läwen komen? Nä, wie kjennen daut nich neiw sajen! w24.05 2 V. 3; 3 V. 8

Wäajen Jelt-Trubbels sent eenje sikj eenich jeworden, eene Oabeit auntonämen, wua see musten von de Famielje wajchtrakjen. Oba väle sent lota enjeworden, daut et eene schlajchte Entscheidunk wia. Ea du eene niee Oabeit aunnemst, saust du nich bloos äwa daut nodenkjen, woo daut em Tieteljen utkomen woat, oba uk, woo daut em Jeisteljen utkomen woat (Luk. 14:28). Äwalaj mol: “Waut woat daut aun mienen Ehestaunt doonen, wan ekj woa wiet wajch sennen von mienen Ehepoatna? Woa ekj Tiet haben fa de Toopkomes un fa dän Prädichtdeenst?” Un wan du Kjinja hast, dan kaust du mol äwa dise wichtje Froag nodenkjen: “Woa ekj miene Kjinja ‘met Jehowa siene Trajchtwiesunk un sienen Rot’ opptrakjen kjennen, wan ekj nich bie dee sie?” (Efs. 6:4). Recht die no Jehowa sienen Rot enne Städ no diene Famielje ooda Frind äaren, waut sikj nich no de Schreft rechten. w25.03 29 V. 12

Een Christ, waut nich riep es, jeit leicht to veleiden derch “aulahaunt Lieren”, haulwe Woarheiten, Pludarie, oppjemoakte Jeschichten ooda von de Aufjefolne. Veleicht es dee uk aufjenstich, jleicht to strieden, es leicht beleidicht ooda jeft no, wan dee aufjeprooft woat (1. Kor. 3:3). De Bibel vejlikjt em Jeisteljen riep woaren met eenen Mensch, waut oppwaust (Efs. 4:15). Doa sent väl Sachen, waut een Kjint nich weet, un daut brukt Help. Saj wie mol, eene Mutta un äare kjliene Dochta wellen äwa eene Gauss gonen. Secha wudd de Mutta ar aune Haunt nämen. Wan de Dochta ieescht ella es, woat de Mutta ar loten auleen äwa de Gauss gonen, oba see woat ar denkjen halpen, daut see ieescht no beid Sieden kjikjen saul, aus doa waut kjemt. Un wan de Dochta ieescht groot es, dan woat see ut sikj selfst oppaussen. Krakjt soo es daut, wan een riepa Christ waut entscheiden mott. Dan denkjt dee äwa biblische Gruntsauzen no, om to weeten, woo Jehowa äwa de Sach denkjt, un dan deit hee daut Rajchte. w24.04 3 V. 5-6

Fa Joaren wieren Jehowa siene Frind bloos dee, waut met am toop em Himmel wieren. Lota muak hee dan uk Menschen oppe Ieed, un dee wieren uk siene Jast. Eenje von dee wieren biejlikj Henoch, Noah, Abraham un Hiob. De Bibel wiest, daut dit siene Frind wieren, wiels dee “en Jemeenschoft met Gott” läwden (1. Mo. 5:24; 6:9; Hiob 29:4; Jes. 41:8). Met de hundade Joaren haft Jehowa emma wada Menschen aus Jast enjelot (Hes. 37:​26-27). Biejlikj von Hesekiel siene Profezeiunk kjenn wie lieren, daut Gott sikj daut werkjlich wenscht, daut siene true Deena een goodet Veheltnis met am haben. Hee vesprakjt, “eenen Frädensbunt met an [to] moaken”. Dise Profezeiunk rät von dee Tiet, wan dee, waut de himlische Hopninj haben, un uk dee, waut de irdische Hopninj haben, en Eenichkjeit woaren en sien bilteljet Zelt aus “eene Häad” sennen (Joh. 10:16). Wanea es dise Tiet? Nu! w24.06 2 V. 2; 3 V. 4-5

Jehowa siene Deena unjastetten Gott sien Kjennichrikj von gaunzen Hoaten, oba doatoo motten dee foaken äwanäment sennen (Mat. 6:33). Biejlikj brucken dee Moot, om en dise schlajchte Welt de goode Norecht von daut Kjennichrikj to prädjen un daut to doonen, waut Jehowa fa rajcht talt. Un wiels de Welt emma mea veschiedne Iedeeen äwa de Politikj haft, brucken dee uk Moot, daut dee sikj opp kjeenem siene Sied stalen (Joh. 18:36). Väle von Jehowa siene Deena jeit daut em Tieteljen knaup ooda sent enjestopt ooda vekjielt worden, wäajen dee nich enne Politikj ooda em Millitäadeenst metmoaken. Wie kjrieen Krauft un Moot, wan wie äwa deejanje nodenkjen, waut äwanäment wieren toom Jehowa un sien Kjennichrikj unjastetten. Ons Kjennich, Jesus Christus, säd daut gaunz auf, daut hee nuscht wudd met de Politikj to doonen haben en dän Soton siene Welt (Mat. 4:​8-11; Joh. 6:​14-15). Hee veleet sikj emma doaropp, daut Jehowa am Krauft jäwen wudd. w24.07 2 V. 4; 4 V. 7

Jehowa leet daut oppschriewen, waut em Goaden Eden passieed, soo daut wie vestonen kjennen, wuarom hee de Sind soo sea haust. De Sind trant ons von onsen Voda un fieet toom Doot (Jes. 59:2). Dauts, wuarom de Soton de Sind jleicht, un doawäajen proowd hee, Adam un Eva toom Sindjen to brinjen, un hee deit daut noch emma met aule Menschen. Aus hee em Goaden Eden de ieeschte Menschen toom Sindjen veleit haud, docht hee secha, daut hee Gott sien Väanämen tonuscht jemoakt haud. Oba hee wist daut nich, woo groot Jehowa siene Leew wia. Gott endad sien Väanämen fa Adam un Eva äare Nokomen nich. Hee leeft de Menschen un socht fuaz no eenen Utwajch (Reem. 8:​20-21). Jehowa wist, daut eenje von Adam un Eva äare Nokomen sikj daut wälen wudden, am to leewen un to jehorchen. Un krakjt fa deejanje haft Jehowa daut mäajlich jemoakt, daut dee am noda komen kjennen un von Sind un Doot friekomen. w24.08 3 V. 3-4

De Mieeschte von Jehowa siene Deena sent sea drock. Väle motten utschaufen, om fa sikj selfst ooda fa de Famielje to sorjen (1. Tim. 5:8). Väle motten sikj uk om soone von äa Frintschoft kjemren, waut krank ooda aul ella sent. Un wie aula motten doano seenen, daut wie jesunt bliewen, un daut brukt uk Tiet. Dan hab wie noch Oppgowen enne Vesaumlunk. Eene wichtje Oppgow es, daut wie soo väl aus mäajlich em Deenst gonen. De Schreft to läsen, es fa ons Christen eent von “daut gaunz Wichtichste”; doawäajen mott wie daut doonen. De gaunz ieeschta Psalm sajcht, daut een schaftja Mensch “siene Freid aun däm HARN sien Jesaz haft, un sikj Dach un Nacht doamet beschafticht” (Psa. 1:​1-2). Daut wiest kloa, daut wie motten eene Tiet oppoat saten toom de Schreft läsen. Wanea es de baste TiHARet, de Schreft to läsen? Daut kaun fa jiedrem eenen veschieden sennen. Om daut ruttofinjen, denkj mol äwa no: “Woa ekj jieda Dach to dise Tiet de Bibel läsen kjennen?” w24.09 3 V. 5-6

Fält riepe Christen daut kjeenmol aun Help? Doch. Soone, waut riep sent, motten eenjemol uk no Help froagen. Eena, dee noch nich riep es, well, daut aundre am sajen, waut hee doonen saul, ooda fa am entscheiden. Oba wan een riepa Christ eenen aundren no Help frajcht, waut veleicht weisa ooda erfoarna es, dan vejat hee daut nich, daut hee selfst siene Entscheidunk moaken saul un daut Jehowa von am velangt, “siene ieejne Veauntwuatunk [to] droagen”. Utjewosne Menschen lat nich aula äwareen. Krakjt soo haben nich aule riepe Christen äwareene Ieejenschoften. Eenje sent biejlikj sea weis un aundre sea äwanäment, eenje sent sea friejäwrich un aundre sea metfeelent. Un dan noch: Twee riepe Christen, waut en deeselwje Loag sent, kjennen gaunz veschiedne Entscheidungen moaken, waut oba beid no de Schreft no rajcht sent. Dauts foaken soo, wan daut om Sachen jeit, waut met daut Jewessen to doonen haben. Oba dee seenen doano, veeent to bliewen, enne Städ sikj unjarenaunda to rechten, wäajen dee veschieden entscheiden (Reem. 14:10; 1. Kor. 1:10). w24.04 4 V. 7-8

Waut kaust du doonen, wan du die mol wieetloos feelst? Läs soone Bibelvarzhen, waut die wiesen, daut du väl wieet best fa Jehowa, un denkj doaräwa no. Doo die nich met aundre vejlikjen un kjikj uk nich no daut, waut du nich doonen kaust. Jehowa velangt nich mea von die, aus du doonen kaust (Psa. 103:​13-14). Wan die ea mol wäa schlajcht behaundelt haft, dan denkj doaraun, daut et nich diene Schult wia. Vejät uk nich, daut Jehowa deejanje halpt, waut schlajcht behaundelt woaren, un daut hee soone rechten woat, waut aundre schlajcht behaundlen (1. Pet. 3:12). Twiewel doa nienich aun, daut Jehowa die brucken kaun, om aundre to halpen. Hee haft die de Iea jejäft, sien Metoabeida to sennen en daut Prädichtwoakj (1. Kor. 3:9). Wäajen daut, waut du aul beläft hast, kaust du aundre leichta vestonen un met dee metfeelen. Un du kaust väl doonen, om dee to halpen. w24.10 7-8 V. 6-7

Jehowa es sea doarom todoonen, woo ons behaundelt woat. De Schreft sajcht: “De räakjent jerajcht sennen sea väl” (Psa. 37:28). Jesus vesechad ons, daut Jehowa “bosich doano seenen woat, daut [aulem] jerajcht behaundelt woat”, wan daut ieescht de rajchte Tiet doatoo es. Un boolt woat Gott aul dän Schoden wada gootmoaken, waut wie jeläden haben, un aule Ojjerajchtichkjeit utroden (Psa. 72:​1-2). Äwadäm daut wie no de Tiet luaren, wua aules woat jerajcht sennen, halpt Jehowa ons, met Ojjerajchtichkjeit rajcht omtogonen (2. Pet. 3:13). Hee lieet ons, nuscht Onkluaket to doonen, wan ons wäa ojjerajcht behaundelt. Derch sienen Sän jeft hee ons daut baste Biespel, woo wie met Ojjerajchtichkjeit rajcht omgonen kjennen. Un hee jeft ons uk gooden Rot, waut wie doonen kjennen, wan ons ojjerajcht behaundelt woat. w24.11 2-3 V. 3-4

Jesus säd to siene Apostel, see sullen de Menschen waut to äten jäwen. Daut wia een Trubbel, wäajen doa rom 5,000 Mana wieren. Un met Frues un Kjinja toop wieren daut rom 15,000 Menschen, waut Äten fäld (Mat. 14:21). Dan säd Andreas: “Hia es een kjliena Jung un dee haft fief Bieta Joascht-Broot un twee kjliene Fesch. Oba waut es dit fa soo väl Menschen?” (Joh. 6:9). Joascht-Broot wia fa de Oame un fa de aundre Menschen waut Jeweeneljet, un de kjliene Fesch wieren veleicht jedrieejde un solte Fesch. Oba daut, waut de Jung doa haud, wia nich jenuach, daut de gaunze Häad äten kunn, ooda jo? Jesus wull oppnäment sennen. Doawäajen säd hee to de Menschen, daut see sikj en Gruppen oppem Grauss dolsaten sullen (Mar. 6:​39-40; Joh. 6:​11-13). Dan säd Jesus dankscheen to sienen Voda fa daut Broot un de Fesch. Daut wia paussent, Gott doafäa to danken, wiels von am aulet Äten kjemt. Waut lia wie von dit? Wie kjennen Jesus nodoonen, wan wie ver jieda Moltiet bäden. Dan leet Jesus daut Äten mank de Menschen vedeelen, un dee eeten sikj saut. w24.12 3 V. 3-4

Woo veharlicht Jesus sienen Voda, aus hee oppe Ieed wia? Hee säd emma, daut hee Wunda moaken kunn, wäajen Jehowa am de Krauft doatoo jejäft haud (Mar. 5:​18-20). Daut, waut Jesus von sienen Voda säd un woo hee aundre behaundeld, brocht uk Iea opp Jehowa. Opp eene Sauz deed Jesus en een Vesaumlungshus von de Juden lieren. Mank de Toohorcha wia eene Fru, waut aul 18 Joa eenen beesen Jeist jehaut haud. De beesa Jeist muak ar sea kromm, soo daut see sikj nich jlikj bieejen kunn. Daut mott sennen werkjlich schwoa jewast! Ut Metleet jinkj Jesus no dise Fru un säd gaunz leeftolich to ar: “Fru, du best von diene Krankheit loos.” Dan läd hee siene Henj opp ar, un plazlich buach see sikj jlikj un “veharlicht Gott”; see wia sea dankboa, daut see jeheelt wort! (Luk. 13:​10-13). Dise Fru haud jenuach Uasoak, Jehowa to veharlichen, un wie uk. w25.01 3 V. 3-4

Kjenn wie aules trigjkjrieen, waut Adam un Eva veloaren haben? Nich ut ons selfst (Psa. 49:​8-10). Onen Jehowa siene Help wudd wie nich de Hopninj haben, fa emma to läwen ooda vom Doot opptostonen. Met ons wudd daut krakjt soo sennen, aus wan een Tia dootjeit (Liera 3:19; 2. Pet. 2:12). Ons himlischa Voda haft ons een Jeschenkj jejäft, waut de Sind betolt, dee wie von Adam metjeorwen haben. Waut es daut fa een Jeschenkj? Jesus säd: “Gott leewd de Menschen oppe Welt soo sea, daut hee sienen eensich jemoakten Sän jeef, soo daut jieda eena, dee doa wiest, daut hee Gloowen aun dän haft, nich venicht woat, oba daut eewje Läwen haben kaun” (Joh. 3:16). Dit Jeschenkj kjemt ons noch opp eene aundre Wajch togood: Wie kjennen goode Frind sennen met Jehowa. Derch dit wundascheene Jeschenkj kjennen onse Sinden, ooda Schulden, utjestrikjt woaren. w25.02 3 V. 3-6

Waut holp Saulus, sikj deepen to loten? Aus Jesus to Saulus von utem Himmel räd, wort Saulus blint (Apj. 9:​3-9). Fa dree Doag eet hee nuscht un docht secha äwa daut no, waut hee beläft haud. Saulus wia sikj dan secha, daut Jesus de Messias wia un daut siene Nofolja dän woaren Gloowen hauden. Wie kjennen väl von Saulus lieren. Stolt un Menschenforcht wudden am haben kunt doavon aufhoolen, sikj deepen to loten, oba hee leet daut nich too. Saulus wia reed, een Christ to woaren, wan hee uk wist, daut hee wudd vefolcht woaren (Apj. 9:​15-16; 20:​22-23). Un no siene Doop veleet hee sikj wieda opp Jehowa, daut dee am met aul siene Schwierichkjeiten halpen wudd (2. Kor. 4:​7-10). Wan du die aus eent von Jehowa siene Zeijen deepen latst, dan woat dienen Gloowen veleicht aufjeprooft woaren ooda du woascht Schwoaret beläwen, oba du woascht kjeenmol auleen sennen. Du kaust die gaunz secha sennen, daut Gott un Christus die emma biestonen woaren (Filip. 4:13). w25.03 4 V. 8-9

Dauts sea fein, wan wie ons daut väanämen, enne Bibel to läsen. Oba wie motten noch mea doonen, daut wie doa eenen Nutzen von haben. Denkj wie mol äwa dit Biespel: De Plaunten brucken Wota, daut dee nich dootgonen. Oba woo es daut, wan daut en eene korte Tiet sea räajent? Dan es de Ieed gaunz naut. Un wan daut dan wieda räajent, halpt de Plaunten daut nuscht, wäajen daut Wota nich en de Ieed nenntrakjt. Dauts bäta, wan daut nich soo sea räajent, wäajen soo kaun daut Wota en de Ieed nenntrakjen un de Plaunten halpen to waussen. Krakjt soo es daut, wan wie de Bibel läsen: Wan wie daut bloos bosich doonen, dan woa wie nich kjennen äwa daut nodenkjen, daut em Denkj hoolen un daut nokomen, waut wie läsen (Jak. 1:24). Best du daut mol enjeworden, daut du de Bibel bloos bosich läsen deetst? Waut saust du dan doonen? Läs sachta. Proow, doaräwa notodenkjen, waut du jroz läsen deist ooda waut du aul jeläst hast. Du wurscht die kjennen väanämen, een kjlien bät lenja to studieren, daut du Tiet hast toom nodenkjen. w24.09 4 V. 7-9

De Eltestasch sellen de Aunwiesungen, waut see kjrieen, fein studieren un dee soo goot aus mäajlich nokomen. Dee kjrieen Aunwiesungen, woo dee de veschiedne Poats biem Toopkomen leiden sellen, woo dee äare Jebäda sellen sennen, wan dee ver de Vesaumlunk bäden, un woo dee fa Christus siene Schop sorjen sellen. Wan de Eltestasch de Aunwiesungen nokomen, waut dee von de Organisazion kjrieen, dan feelen de Breeda un Sestren sikj secha un von Jehowa jeleeft. Wan wie von de Eltestasch Rot kjrieen, dan sell wie daut wellich nokomen. Wan wie daut doonen, dan moak wie dee äare Oabeit leichta. De Bibel rot ons too, no deejanje to horchen un unjadon to sennen, waut de Leidunk haben (Heb. 13:​7, 17). Wuarom kaun daut eenjemol schwoa sennen? Wäajen dise Mana onvolkomen sent. Wan wie no dee äare schlajchte Sieden kjikjen enne Städ no dee äare goode, dan unjastett wie en Werkjlichkjeit onse Jäajna. Opp waut vonne Wajch? Wan wie bloos no de Eltestasch äare schlajchte Sieden kjikjen wudden, dan kunn wie uk aunfangen, schlajcht äwa de Organisazion to denkjen un nich mea opp dee to vetruen. w24.04 10 V. 11-12

Woaren aule, waut en de groote Liedenstiet stoawen, fa emma doot bliewen, onen de Hopninj, wada toom Läwen to komen? De Bibel wiest kloa, daut Jehowa un siene Armeeen deejanje en Harmagedon venichten woaren, waut gaunz jäajen am schaufen. Dise Menschen woaren nich wada oppstonen (2. Tes. 1:​6-10). Oba woo es daut met soone, waut en de groote Liedenstiet stoawen, wäajen dee biejlikj krank ooda oolt sent, derch een Ekjsident ooda wäajen aundre äant dootmoaken? (Liera 9:11; Sach. 14:13). Kunnen eenje von dise Menschen mank de “Ojjerajchte” sennen, waut enne niee Welt wada oppstonen woaren? (Apj. 24:15). Wie weeten daut eefach nich. Oba wie weeten von veschiednet, waut lota passieren woat. Biejlikj weet wie, daut de Menschen en Harmagedon doano jerecht woaren, waut dee fa Christus siene Breeda jedonen haben (Mat. 25:40). Un dee, waut Christus un de Jesaulwde unjastetten, woat hee aus Schop talen. w24.05 10-11 V. 9-11

“Schwoare Tieden, met dee meist nich woat foadich to woaren sennen” – dits, waut de Bibel von dee Tiet sajcht, en dee wie läwen (2. Tim. 3:1). Jehowa siene Deena motten en dise Welt met deeselwje Schwierichkjeiten foadich woaren, waut de aundre uk aula motten, un dan haben dee noch Jäajenstaunt ooda woaren vefolcht. Waut halpt ons, Jehowa wieda to deenen, wan wie uk soon Schwoaret beläwen? Eene Help es, daut wie Jehowa kjanen un weeten, “hee es een Gott, dee doa läft” (Jer. 10:10; 2. Tim. 1:12). Jehowa es eene werkjelje Persoon, waut ons bie Schwierichkjeiten halpt un no Jeläajenheiten sieekjt, ons bietostonen (2. Chr. 16:9; Psa. 23:4). Wan wie doaraun denkjen, daut hee een läwendja Gott es, dan kjenn wie de Krauft kjrieen, irjent Schwierichkjeiten uttohoolen, waut wie beläwen. w24.06 20 V. 1-2

Wie motten wieda opp Jehowa siene Organisazion vetruen. Wuarom? De Breeda vom Väastaunt sent fuaz reed, waut to endren, wan daut kloa woat, daut de Endrunk needich es. Daut kaun waut von onsen Deenst fa Jehowa sennen ooda eene biblische Lia. Dee doonen daut, wiels dee nuscht soo sea jankat, aus Jehowa to jefaulen. Dee strenjen sikj uk sea aun, daut äare Entscheidungen sikj opp Gott sien Wuat stetten. En Werkjlichkjeit saul jieda Deena von Jehowa dautselwje doonen. De Apostel Paulus schreef: “Hool die wieda aun de goode Sort Wieed” (2. Tim. 1:13). Met “de goode Sort Wieed” sent de christelje Lieren jemeent, waut wie enne Bibel finjen (Joh. 17:17). Aules, waut wie jleewen, stett sikj opp dise Lieren. Jehowa siene Organisazion haft ons jelieet, aun dise Lieren fausttohoolen. Un soo lang, aus wie daut doonen, woa wie em Jeisteljen beschizt sennen. w24.07 11-12 V. 12-13

Wäajen de Apostel Petrus daut selfst beläft haud, woo väl wieet daut wia, wan eena een Leetsennen haft un Vejäwunk kjricht, kunn hee uk aundre doavon lieren. Een Stoot no daut Pinjstfast räd Petrus ver eene Häad Juden un säd, daut dee dän Messias omjebrocht hauden. Oba hee muntad dee opp: “Habt een Leetsennen un wenjt om, soo daut june Sinden kjennen jelascht woaren un soo daut Jehowa junt kaun Moot un Krauft jäwen” (Apj. 3:​14-15, 17, 19). Petrus wees, daut een Sinda derch sien Leetsennen omwenjen well. Daut bediet, daut dee sien orrajchtet Denkjen endat un opphieet, soont to doonen, waut schlajcht es, un aunfangt, soont to doonen, waut Gott jleicht. De Apostel wees uk noch, daut Jehowa de Sinden soo to sajen auflaschen wudd – daut meent, gaunz wajchnämen. Waut fa eene scheene Hopninj daut nich es fa Christen, wan dee eene Sind begonen haben, mau rajcht wan daut eene groote es! w24.08 12 V. 14

Wan wie ons secha sent, daut daut Enj von dise Welt gaunz dicht bie es, dan woa wie nich no Jelt hinjaraun sennen. Daut sajcht, daut de Menschen en de groote Liedenstiet “woaren äa Selwa oppe Gaussen schmieten”, wiels “dän Dach, wan däm HARN sien Oaja kjemt, woaren Selwa un Golt kjeenem raden” (Hes. 7:19). Wie wellen nich doaropp schaufen, soo väl Jelt tooptokleiwen aus afens mäajlich, oba wie wellen goode Entscheidungen moaken, waut ons halpen, goot fa ons un onse Famielje to sorjen un Jehowa to deenen. Daut wudd biejlikj nich eene goode Entscheidunk sennen, wan wie ons onneedich enne Schult nennjeewen, un daut wudd ons uk sea auflenkjen, wan wie soo väl Sachen hauden, daut et een deel Tiet brukt, ons om aules to kjemren. Wie motten uk sea oppaussen, daut dee Sachen, waut wie aul haben, nich too wichtich woaren fa ons (Mat. 6:​19, 24). Wie komen nu emma noda no daut Enj von dise Tiet, un irjentwanea woa wie entscheiden motten, aus wie opp Jehowa vetruen woaren ooda opp ons Hab un Goot. w24.09 11 V. 13-14

Veleicht kom wie von eenje Schwakheiten gaunz loos, oba jäajen aundre mott wie fa lenja kjamfen. Soo wia daut bie dän Apostel Petrus. Hee haud Menschenforcht un doawäajen veluach hee Jesus dree Mol (Mat. 26:​69-75). Lota, aus hee ver daut judische hechste Jerecht äwanäment von Jesus prädicht, leet daut soo, daut Petrus dise Schwakheit äwakomen haud (Apj. 5:​27-29). Oba een poa Joa lota eet hee nich mea met de nichjudische Christen toop, “wiels hee haud Angst fa dee, waut to de Beschnädne jehieeden” (Gal. 2:​11-12). Soo, Petrus must wada jäajen dise Schwakheit kjamfen un veleicht kjeem hee doa kjeenmol gaunz loos von. Ons kaun daut krakjt soo gonen aus Petrus. Oba wie kjennen eene Schwakheit, wua wie noch nich gaunz von loosjekomen sent, unja Kontroll hoolen, wan wie Jesus sienen Rot aunnämen: “Blieft waka” (Mat. 26:41). Mau rajcht en soone Tieden, wan wie ons stoakj feelen, mott wie doawäajen soone Loagen utem Stich gonen, wua wie kunnen aufjeprooft woaren. Un wie motten wieda dee Sachen doonen, waut ons aul jeholpen haben, onse Schwakheit to wadastonen (2. Pet. 3:14). w24.07 18-19 V. 17-19

Kjeen Mensch es jeemols soo friejäwrich jewast aus Jesus. Aus hee oppe Ieed wia, brukt hee siene Macht, Wunda to doonen, om aundre to halpen (Luk. 9:​12-17). Sien jratstet Jeschenkj wia, daut hee sien Läwen fa ons jeef (Joh. 15:13). Jesus bleef wieda friejäwrich, aus hee vom Doot oppstunt. Krakjt soo aus hee vespruak, fruach hee Jehowa no sienen heiljen Jeist toom ons lieren un treesten (Joh. 14:​16-17, Fn.; 16:13). Vondoag dän Dach woa wie uk derch de Toopkomes wieda von Jesus utjelieet, om de Menschen äwa de gaunze Ieed to lieren, am notofoljen (Mat. 28:​18-20). De Apostel Paulus schreef, daut Jesus “Mana aus Jeschenkja” jeef, nodäm daut hee nom Himmel fua (Efs. 4:​7-8). Hee räd doavon, daut Jesus dise Mana jeef toom de Vesaumlungen opp veschiedne Wäaj unjastetten (Efs. 1:​22-23; 4:​11-13). Wie weeten, daut dee nich volkomen sent un Fäla moaken (Jak. 3:2). Oba Jesus Christus brukt dise Mana, waut Jeschenkja sent, doawäajen toom ons halpen. w24.10 18 V. 1-2

David säd to sienen Sän Salomo, daut hee wudd een gooda Leida sennen un daut Jehowa am säajnen wudd, soo lang aus hee Jehowa jehorchen deed. Dauts schod, oba aus Salomo ella wort, funk hee aun, aundre Jetta auntobäden. Jehowa jleicht daut nuscht un hee hieed opp, Salomo Weisheit to jäwen, daut hee de Menschen opp eene leeftolje un jerajchte Wajch rejieren kunn (1. Kjen. 11:​9-10; 12:4). Waut lieet ons daut? Wan wie Jehowa jehuarsom sent, dan deit hee ons säajnen un halpen (Psa. 1:​1-3). Wie weeten, daut Jehowa ons nich vesproaken haft, ons Rikjtum un Aunseenen to jäwen soo aus Salomo. Oba wan wie Gott jehorchen, dan woat hee ons de Weisheit jäwen, daut wie goode Entscheidungen moaken kjennen (Spr. 2:​6-7; Jak. 1:5). Jehowa sien Rot kaun ons halpen, wan wie Entscheidungen moaken äwa Oabeit, School, Jelt un Tietvedrief. Un wan wie Gott sienen weisen Rot nokomen, dan kjenn wie met am Frind bliewen un eewjet Läwen haben (Spr. 2:​10-11). Wie woaren uk goode Frind un een scheenet Famieljenläwen haben. w24.11 10-11 V. 11-12

De Elren haben veschiedne Mäajlichkjeiten, met äare Kjinja äwa de Bibel un äwa Gott to räden. Dise Mäajlichkjeiten komen veleicht opp, wan jie junt een Museum beseenen. Jie kjennen june Kjinja oppmoakjsom moaken opp Dinja ooda Sachen, waut ieeschtemma passieet sent, un waut daut met de Bibel to doonen haft. Daut kaun dee halpen, een jratret Vetruen to kjrieen, daut et werkjlich soo es, waut de Bibel sajcht. Weeten june Kjinja, daut Gott sien Nomen opp eenen Steen es, waut Moabitischa Steen jenant woat un 3,000 Joa oolt es? Bie de Utstalinj “De Bibel un Gott sien Nomen” en de Hauptoffiz von Jehowa siene Zeijen en Warwick, New York es een nojemoakta Moabitischa Steen. De Moabitischa Steen wiest uk, daut de Kjennich Mescha von Moab sikj jäajen Israel stald. Dit stemt krakjt met de Bibel toop (2. Kjen. 3:​4-5). Wan june Kjinja met äare ieejne Uagen dän Bewies seenen, daut de Bibel krakjt un opp to veloten es, woat dee äa Gloowen stoakja woaren. w24.12 14 V. 4; 15 V. 6