Wie bäden, daut soo väl Menschen aus mäajlich noch no dise Woarnunk horchen un nu aunfangen, met ons toop Jehowa to deenen. Oba waut es met dee, waut nich no dise Woarnunk horchen, wua veleicht uk onse Famielje met en es? Veleicht es daut Jehowa sien Wellen, soone to raden, waut Gloowen wiesen, wan dee seenen, daut daut Groote Babel gaunz venicht es. Wan daut soo es, dan es daut nu soo drinjent aus noch kjeenmol ea, daut wie de Menschen wieda woarnen. Waut wie dee nu sajen, es veleicht waut, wua dee lota aun denkjen woaren (see uk Hesekiel 33:33). Veleicht denkjen dee aun de Woarnunk, waut wie dee jesajcht haben, un daut brinjt dee veleicht bat doa, daut dee met ons toop wellen Jehowa deenen, ea daut too lot es. Krakjt soo aus de Jefenkjnis-Aunjestalda en Filippi Gloowen wees, nodäm daut “daut een grootet Ieedbäben” jeef, woaren eenje, waut nu veleicht nich no ons horchen, dan Gloowen wiesen, wan daut Groote Babel woat gaunz venicht sennen (Apj. 16:​25-34). w24.05 16-17 V. 9-10

Wie lieren een deel Wieetvollet von daut, waut de Apostel Paulus aun de hebräische Christen schreef. Eenje von dee wieren em Jeisteljen nich veraunjekomen. Rajcht jesajcht fäld dee daut “aun Malkj … enne Städ aun veschlachsomet [jeisteljet] Äten” (Heb. 5:12). Dee hauden de niee Lieren nich aunjenomen, waut Jehowa äant soo bie sacht derch de Vesaumlunk jelieet haud (Spr. 4:18). Biejlikj väl judische Christen hilden sikj noch emma aun daut Jesaz Moses, wan Jesus sien Opfa met daut uk aul rom 30 Joa trigj een Enj jemoakt haud (Tit. 1:10). Doawäajen wull Paulus de Hebräa nu halpen, de deepe Lieren von de Woarheit to vestonen. Sien Breef holp dee to seenen, daut et väl bäta wia, Jehowa opp dee Wajch auntobäden, aus Jesus daut enjefieet haud. Dis Breef jeef dee uk dän Moot, wieda de goode Norecht to prädjen, wan see uk Jäajenstaunt hauden von de Juden (Heb. 10:​19-23). w24.04 6 V. 15

Von don aus Adam un Eva sikj opp dän Soton siene Sied un jäajen Jehowa stalden, sent aul hundade Millionen Menschen jestorwen. Waut woat met aul dee sennen, waut jestorwen sent? Eene kjliene Grupp von Christus siene Nofolja, aulsoo 144,000, woaren oppstonen toom em Himmel läwen un woaren onstoaflich sennen (Opb. 14:1). Un eene groote Häad von true Mana un Frues, waut Jehowa leewden, woaren wada toom Läwen komen en daut “Oppstonen … fa de Jerajchte” un dee woaren fa emma kjennen oppe Ieed läwen, wan dee en daut dusentjoasche Rikj un bie de latste Proow tru bliewen (Dan. 12:13; Heb. 12:1). En dise dusent Joa woaren “de Ojjerajchte” de Jeläajenheit haben, sikj to endren un Gott tru to deenen. Bie “de Ojjerajchte” sent uk soone met en, waut Jehowa nich deenden ooda mau rajcht bloos “Schlajchtet deeden” (Joh. 5:29; Luk. 23:​42-43). Oba doa wieren eenje Menschen, waut sea schlajcht wieren. Gott es sikj eenich jeworden, dee nich mea opptowakjen (Luk. 12:​4-5). w24.05 2 V. 3; 6 V. 15; 7 V. 17

Wäa doa well, daut Jehowa met am tofräd es, mott “von Hoaten de Woarheit” räden (Psa. 15:2). Doa es mea met en, aus bloos nich to lieejen. Jehowa well, daut wie gaunz un goa opprechtich sent (Heb. 13:18). Dauts wichtich, wiels Jehowa es daut “oppscheislich waut de vekjieede [ooda hinjalestje] Menschen doonen, oba de HAR es de jerajchte sea noaun” (Spr. 3:32). Eena, waut “von Hoaten de Woarheit rät”, woat nich bloos ver aundre Gott siene Jebooten hoolen, un wan am kjeena sitt, dan Schlajchtet doonen. Dee es nich hinjalestich. Een hinjalestja Mensch denkjt veleicht, daut Jehowa siene Jebooten nich emma de baste sent (Jak. 1:​5-8). Veleicht woat dee Jehowa en soone Sachen ojjehuarsom sennen, waut hee nich fa wichtich talt. Un wan daut soo lat, daut doa nuscht Schlajchtet bie rut kjemt, wan hee ojjehuarsom es, fangt hee veleicht aun, schlemret to doonen, un sien Gottesdeenst wudd dan een Jeheichel sennen (Liera 8:11). Doawäajen well wie en aules opprechtich sennen. w24.06 10 V. 7-8

Wie aus Jehowa siene Deena leewen de Woarheit, waut en Gott sien Wuat to finjen es. Doaropp stett wie onsen Gloowen (Reem. 10:17). Wie sent ons secha, daut Jehowa de Christenvesaumlunk enjerecht haft; dee es “een Stenda un eene Stett fa de Woarheit” (1. Tim. 3:15). Daut jeft nuscht, waut de Soton wudd dolla jleichen, aus wan wie wudden opphieren opp de Schreft un opp de Aunwiesungen to vetruen, waut Gott siene Organisazion ons jeft (Efs. 4:14). Boolt woat de Soton hinjalestje Läajes brucken, om Lenda proowen bat doa to brinjen, daut dee sikj jäajen Jehowa stalen (Opb. 16:​13-14). Wie weeten uk, daut de Soton noch dolla proowen woat, Jehowa siene Deena to veleiden (Opb. 12:9). Doawäajen es daut wichtich, daut wie ons selfst lieren, dän Unjascheet tweschen de Woarheit un de Läajes to seenen, un ons dan aun de Woarheit hoolen (Reem. 6:17; 1. Pet. 1:22). Dits needich, daut wie de groote Liedenstiet äwaläwen kjennen! w24.07 8 V. 1-3

Aus Jehowa de Israeliten daut Jesaz jeef, vespruaken dee, daut to hoolen. Un Jehowa vespruak äant, daut hee äant beschitzen un säajnen wudd, wan see wudden jehuarsom sennen. Oba wan dee sikj wudden jäajen am stalen un biejlikj aundre Jetta aunbäden, dan wudd hee dee nich mea säajnen un dee wudden motten lieden. Oba daut meent nich, daut dee gaunz veloaren wieren. Dee wudden sikj wada kjennen “no däm HARN … [äaren] Gott kjieren” (5. Mo. 30:​1-3, 17-20). Daut bediet, dee wudden kjennen een Leetsennen haben. Dan wudd Jehowa dee wada aus siene Frind talen un säajnen. Jehowa sien Volkj stald sikj emma wada jäajen am. Doawäajen musten dee lieden. Oba Jehowa hieed nich opp, sien Volkj to halpen, daut dee am wada deenen kunnen. Hee schekjt emma wada Profeeten, sien Volkj to sajen, daut dee sullen een Leetsennen haben un wada no am komen (2. Kjen. 17:​13-14). w24.08 9 V. 4-5

No Jesus sienen Doot jinjen de hebräische Christen en Jerusalem un Judäa derch schwoare Tieden. Boolt nodäm daut de Christenvesaumlunk oppjestalt wort, worden dee sea vefolcht. Rom 20 Joa lota jinkj Jesus siene Nofolja daut em Tieteljen sea knaup, veleicht wäajen doa em Launt eene Hungaschnoot jewast wia (Apj. 11:​27-30). Dan rom daut Joa 61 n. Chr. brocht Jehowa dän Apostel Paulus bat doa, äant eenen Breef to schriewen. En dise Tiet hauden de Christen noch nich soone groote Vefoljunk, aus see lota wudden haben. Oba daut, waut en dän Breef stunt, wia krakjt daut, waut äant fäld, om fa daut reed to sennen, waut boolt komen wudd. De Breef aun de Hebräa kjeem to de rajchte Tiet, wäajen de Fräd, waut see dan hauden, boolt wudd to Enj sennen. En sienen Breef jeef Paulus gooden Rot, waut de Christen halpen wudd, en dise Liedenstiet uttohoolen, waut boolt komen wudd. w24.09 8 V. 1-2

Wan ons daut schwoa es, dan sent onse Breeda un Sestren een kloara Bewies, daut Jehowa ons leeft. Dee kjennen ons treesten, doaderch daut dee ons toohorchen, wan wie ons utschedden, ooda wan dee met ons toop sent. Veleicht moaken dee ons Moot derch eenen Bibelvarsch ooda dee bäden met ons toop (Reem. 15:4). Eenjemol kaun een Brooda ooda eene Sesta ons halpen, doaraun to denkjen, woo Jehowa eene Sach sitt, un daut kaun ons halpen, ruja to sennen. Onse Gloowesbreeda kjennen ons biejlikj uk doaderch halpen, daut dee fa ons Äten moaken, wan wie gaunz dol sent. Om daut wie von aundre Help kjrieen, woa wie veleicht doano froagen motten (Spr. 17:17). Veleicht weeten dee nich, woo wie ons feelen ooda waut ons fält (Spr. 14:10). Du wurscht kjennen met goode Frind doaräwa räden. Lot dee weeten, waut fa die eene Help wudd sennen. Du wurscht uk kjennen met eenen ooda twee Eltestasch räden, met dee du die maklich feelst. Fa eenje Sestren wia daut een Troost, met eene riepe Sesta to vetalen. w24.10 10 V. 15-16

Väl Menschen paussen opp, waut dee äten, un doonen foaken ekserseisen, om jesunt to bliewen. Oba dee denkjen nich, daut see woaren fa emma läwen kjennen. Dee denkjen, daut et nich mäajlich es, un dee wellen daut uk nich mol, wäajen daut Läwen soo schwoa es, wan eena oolt woat. Oba Jesus säd, daut et mäajlich wia, “daut eewje Läwen” to haben, soo aus Johanes 3:16 un 5:24 wiesen. Opp eene Sauz jeef Jesus derch een Wunda dusende Menschen Broot un Fesch. Daut wia butajeweenlich. Oba daut, waut hee dän näakjsten Dach to dee säd, waut am no Kapernaum hinjaraun jekomen wieren, wia noch butajeweenelja. Hee säd, daut de Menschen vom Doot oppstonen kjennen un eewjet Läwen haben (Joh. 6:​39-40). Jesus siene Wieed wiesen, daut väle, waut jestorwen sent, oppstonen kjennen un daut du un diene Famielje kjennen eewjet Läwen haben. w24.12 8 V. 1-2

Eene Organisazion, waut fa de Jesuntheit veauntwuatlich es, haft korz rutjefungen, daut väl Ehemana äare Frues schlajcht behaundlen, hunjsch to dee räden ooda dee opp aundre Wäaj toosaten. Eenje von dise Mana behaundlen äare Frues fein ver aundre, oba tus sent see hunjsch to dee. Wuarom behaundlen eenje Ehemana äare Frues schlajcht? Veleicht haben dee daut tus von äaren Voda jelieet un doawäajen jleewen dee, daut soon Benämen jeweenlich es. Aundre doonen soont, wiels de Mieeschte en äare Kultua daut doonen. Dee denkjen veleicht, daut wan dee äare Frues schlajcht behaundlen, dan wiesen dee doamet, wäa de Wieet es. Aundre Mana haben daut nich jelieet, sikj to beoabeiden, biejlikj wan dee doll sent. Eenje kjikjen foaken Pornografie un denkjen, daut eene Fru bloos een Dinkj es, wua see sikj met tofrädstalen kjennen. De Forscha haben uk rutjefungen, daut dise Trubbels en de Tiet von de COVID-19-Krankheit bloos noch oaja jeworden sent. Oba nuscht von dit es eene Uträd, soon Benämen to haben. w25.01 8 V. 2-3

“Leew Jehowa, dienen Gott, met dien gaunzet Hoat, met diene gaunze Seel, met aul diene Krauft un met dien gaunzet Vestaunt” (Luk. 10:27). Jesus wia daut dietlich, daut dit daut wichtichste Jeboot von daut Jesaz Moses wia. Soo, wie sellen Jehowa leewen met aules, waut wie haben un waut wie sent. Doa sent onse Wenschen, onse Jefeelen un onse Krauft met en. Oba wie motten Jehowa uk met ons Vestaunt leewen – doa es met en, woo wie äwa Sachen denkjen. Wan wie uk nich gaunz krakjt vestonen kjennen, woo Jehowa denkjt, sell wie oba proowen, soo to denkjen aus hee. Wäajen Jesus krakjt soo docht aus sien Voda, kjenn wie bäta vestonen, woo Gott denkjt, wan wie ons daut unjastonen, woo Jesus docht (1. Kor. 2:16). w25.03 8 V. 1

Jesus wia een volkomna Maun, krakjt soo aus Adam wia, ea dee sindijd (1. Kor. 15:45). Soo, derch sienen Doot betold Jesus Adam siene Sind un soo kunn hee daut trigjkjrieen, waut Adam veloaren haud (Reem. 5:19). Soo wort Jesus “de latsta Adam”. Doa brukt kjeen aundra volkomna Mensch fa daut betolen, waut Adam veloaren haud, wiels Jesus storf “bloos een Mol, … un daut rieekjt fa emma too” (Heb. 7:27; 10:12). Bat nu hab wie jeseenen, daut Jehowa fa eenen Wajch sorjd, daut onse Sinden kunnen vejäft woaren un daut wie kunnen goode Frind woaren met am. Oba daut dit mäajlich wia, must daut Leesjelt ieescht betolt woaren. Daut Leesjelt wort doamet betolt, daut Jesus sien Bloot fa ons utgoot (Heb. 9:14). w25.02 5 V. 12-13

Wan wie Schwierichkjeiten haben, dan well wie aun daut Wichtichste denkjen. De Soton behaupt, daut wan wie Schwierichkjeiten haben, woa wie Jehowa dän Rigjen dreien. Soo doano, waut wie doonen, wan wie derch waut Schwoaret gonen, kjenn wie Jehowa schaftich ooda truarich moaken (Hiob 1:​10-11; Spr. 27:11). Oba wan wie Jehowa tru bliewen, dan wies wie, daut wie am leewen un daut de Soton een Läajna es. Jeit die daut knaup ooda horchen de Menschen nich too, wua du prädichst? Hast du Jäajenstaunt von de Rejierunk ooda sest irjent aundre Schwierichkjeiten? Wan jo, dan denkj doaraun, daut du de Jeläajenheit hast, Jehowa sien Hoat schaftich to moaken. Hool uk em Denkj, daut hee daut kjeenmol woat tooloten, daut du woascht schwanda aufjeprooft woaren, aus du uthoolen kaust. Hee woat die de Krauft jäwen toom uthoolen. w24.06 22 V. 9

Weetst du daut, waut fa Sachen die daut dolste vesieekjen? Wäa siene Schwakheiten nich toosteit ooda jleeft, daut dee stoakj jenuach es, irjent eene Sind to wadastonen, schmäat sikj selfst aun (1. Joh. 1:8). Paulus säd, daut mau rajcht soone, waut “vom Jeist jeleit woaren”, eene Sind begonen kjennen, wan dee nich waka bliewen (Gal. 6:1). Wie motten opprechtich sennen un onse Schwakheiten toostonen (2. Kor. 13:5). Wan wie ieescht weeten, waut vonne Sachen ons daut dolste vesieekjen, waut sell wie dan doonen? Wie sellen doaropp schaufen, daut ons daut nich soo schwoa felt, dise Vesieekjungen auftowiesen! Doatoo mol een Biespel. To de Bibeltiet kunnen dee sikj leichta derch de Puaten en de Staut nennbräakjen aus derch de Mieren – de Puaten wieren je schwaka aus de Mieren. Doawäajen deeden se de Stautspuaten emma goot bewoaken. Krakjt soo mott wie besonda no dee Schwakheiten oppaussen, bie woone wie daut dolste aufjeprooft woaren (1. Kor. 9:27). w24.07 15 V. 5-7

Bie dee goode Woakjen es uk daut Prädichtwoakj met en. Soo, wan wie Gott sien Wuat läsen un doaräwa nodenkjen, woat ons Gloowen aun Jehowa stoakja un wie kjennen bäta vestonen, wuarom daut soo wichtich es, aundre von sien Kjennichrikj to prädjen. Daut Gott sien Wuat ons werkjlich togood kjemt, mott wie nich bosich sennen, wan wie daut läsen, studieren un doaräwa nodenkjen. Nemm die goot Tiet doafäa. Wan du eenen Bibelvarsch läst un dän nich fein vestonen kaust, dan lot dän nich bloos toch. See leewa, waut se en dän Index der Wachtturm-Publikationen ooda de Help toom nosieekjen fa Jehowa siene Zeijen äwa disen Bibelvarsch utjelajcht haben. Wan du die goot Tiet nemst toom studieren, dan woascht du dien Vetruen doaropp stoakjen, daut Gott sien Wuat de Woarheit sajcht (1. Tes. 5:21). Je sechra du die doaräwa best, je scheena woat die daut gonen, aundre von dee Sachen to vetalen, waut du jelieet hast. w24.04 15 V. 4-5

David säd, Jehowa es “goot un reed to vejäwen” (Psa. 86:5). Micha schreef: “Kunn doa noch wua een Gott sennen soona aus du, dee … onse Sinden vejeft un daut orrajchte togood helt?” (Micha 7:18). Un Jesaja säd: “De beesa saul nich mea soo läwen aus ieescht, un de Sinda saul aundre Jedanken fieren. Lot am trigj nom HARN komen, daut hee am kaun jenstich sennen. Lot am sikj no Gott kjieren, dee väl vejeft” (Jes. 55:7). Woo kunn de Vesaumlunk en Korint Jehowa nodoonen? Dee sullen dän Maun, waut een Leetsennen haud, wada oppnämen un dän daut kloa wiesen, daut dee am leewden. Wan de Vesaumlunk dise Aunwiesunk nokjeem, dan wudden dee wiesen, daut see “en aules jehuarsom wieren”. Wan de Maun uk mau een poa Moonat trigj ut de Vesaumlunk rutjesat wort, haud am daut oba aul jeholpen, een Leetsennen to haben. Doawäajen wia daut nich needich, daut de Eltestasch noch lenja wachten met dän enne Vesaumlunk wada bienämen. w24.08 17-18 V. 12-13

Wie läwen en eene Tiet, wua besondre Sachen passieren woaren! Jesus woat boolt jiedrem eenen rechten. Jesus säd, waut enne Welt passieren wudd, ea hee aulem rechten wudd. Hee jeef een “Tieekjen”, aun woont de Tiet wudd to seenen sennen, daut hee doa wia, wan am uk kjeena met de Uagen seenen wudd. Daut Tieekjen wudd uk wiesen, daut daut Enj von dise Welt dicht bie wia (Mat. 24:3). Dit Tieekjen finjt eena en Matäus, Kapitel 24 un 25, en Markus, Kapitel 13 un en Lukas, Kapitel 21. Jesus vetald dree Jlikjnisen, om ons eenje goode Woarnungen to jäwen. Daut sent de Jlikjnisen von de Schop un de Kosen, von de väabedochte Mejalen un dee, waut nich kluak wieren, un von de Talenten. Jieda Jlikjnis moakt dietlich, daut Jesus de Menschen doano rechten woat, waut dee nu doonen. w24.09 20 V. 1-2

Ons bastet Biespel es Jesus Christus. Hee deed aules ut Leew – Leew fa sienen Voda un Leew fa de Menschen. Dise Leew brocht am bat doa, sikj sea auntostrenjen un soont fa aundre to doonen, waut läach aunjeseenen wia (Mat. 20:28; Joh. 13:​5, 14-15). Breeda, wan jie uk ut Leew no jeistelje Zielen sträwen, biejlikj Vesaumlungshelpa to woaren, woat Jehowa junt säajnen un halpen, bat doa to komen (1. Pet. 5:5). Enne Welt woaren soone Menschen foaken jeloft, waut doa emma proowen, de Baste to sennen. Oba mank Jehowa siene Deena nich. Wan een Brooda waut ut Leew deit, soo aus Jesus, dan es dee nich doano ut, huach aunjeseenen to sennen, Macht to haben ooda äwa aundre to harschen. Wan soona, waut bloos well huach aunjeseenen sennen, enne Vesaumlunk wudd een Aumt kjrieen, wudd dee secha nich wellen irjent eefache Oabeiten doonen, waut doa needich sent, om sikj om Jehowa siene Schop to kjemren. Dee wudd sikj doatoo veleicht too groot doonen (Joh. 10:12). w24.11 15 V. 6-7

Oppe gaunze Welt fält daut aun mea “Mana aus Jeschenkja” (Efs. 4:8). Best du een jedeepta Brooda un steit daut “en diene Krauft … goodet to doonen”? (Spr. 3:27). Best du reed, doaropp to schaufen, een Vesaumlungshelpa to woaren? Ooda wurscht du mau rajcht reed sennen, diene Breeda aus Eltesta to deenen? Wurscht du die daut veleicht kjennen soo enrechten, die fa de School fa Kjennichrikjsvekjindja auntojäwen? Bie dise School kaust du lieren, woo du noch mea fa Jesus doonen kaust. Oba waut, wan du die to aul daut nich emstaund feelst? Dan bäd Jehowa om sienen heiljen Jeist, daut du jieda Oppgow nokomen kaust, waut du kjrichst (Luk. 11:13). Daut Jesus ons en de latste Tiet aunleiden deit, es doaraun to seenen, daut hee “Mana aus Jeschenkja” aunjestalt haft (Mat. 28:20). Sent wie nich dankboa, daut wie eenen Kjennich haben, waut leeftolich, friejäwrich un om ons bekjemmat es, un daut hee Breeda aunjestalt haft, om fa ons to sorjen? w24.10 23 V. 16-17

Woo woat daut met de Sachen sennen, wuaderch Gott siene Deena nu soo väl Weedoag un Lieden haben? Met de Tiet woaren dee Sachen gaunz “vejäten sennen; daut woat fa [Gott] siene Uagen vestoaken sennen” (Jes. 65:16). Jehowa woat met onse Trubbels een Enj moaken, un met de Tiet woaren ons de Weedoag nich mea em Senn komen, wiels dee woaren gaunz veschwungen sennen. Mau rajcht nu feel wie ons aul väl ruja, wan wie bie onse Toopkomes sent. Doa feel wie ons jeloten un denkjen nich soo väl aun daut Schwoare, waut wie enne Welt beläwen. Wie halpen onse Breeda un Sestren uk, ruja to sennen, wan wie dee soone Ieejenschoften wiesen, waut to dän Jeist siene Frucht jehieren. Daut sent biejlikj Leew, Freid, Fräd, leeftolich sennen un ruich enjestalt sennen (Gal. 5:​22-23). Es daut nich een groota Säajen, daut wie kjennen to Jehowa siene Organisazion jehieren? Dee, waut en daut jeistelje Paradies bliewen, woaren uk noch seenen, woo sikj daut gaunz erfellen woat, waut Gott vespruak, daut hee wudd “eenen nieen Himmel un eene niee Ieed” moaken. w24.04 22 V. 9-10

Wan een Jung un eene Mejal spazieren, kaun dee daut scheen gonen. Oba dauts uk waut Iernstet, wäajen dee entscheiden motten, aus dee sikj befrieen wellen ooda nich. Aun dee äaren Kjastdach vespräakjen de Maun un de Fru ver Jehowa, daut see sikj unjarenaunda leewen un respakjten woaren, soo lang aus see läwen. Wie motten doa goot äwa nodenkjen, ea wie irjentwaut vespräakjen. Bie daut Ehevespräakjen es daut besonda needich. Wan een Jung un eene Mejal spazieren, kjennen dee sikj bäta kjanen lieren un eene goode Entscheidunk moaken. Eenje entscheiden, sikj to befrieen, un eenje, uteneentogonen. Wan dee uteneengonen, dan meent daut nich, daut dee daut nuscht jeholpen haft to spazieren. Oba dauts krakjt aundasch – spazieren haft dee jeholpen, eene goode Entscheidunk to moaken. Wuarom es daut wichtich, daut wie rajcht äwa daut Spazieren denkjen? Wan Onbefriede rajcht doaräwa denkjen, dan woaren dee nich met wäm spazieren, met dän see sikj nich befrieen wellen. w24.05 26-27 V. 3-4

De Jugentliche fält eenjemol dän Moot, fa äaren Gloowen entostonen. Veleicht kjrieen dee Angst, wan doa enne School von de Ewoluzion jerät woat. Wuarom? Wiels de Schoollierasch veleicht soo äwa de Ewoluzion räden, aus wan daut werkjlich soo wia. Wan jie Kjinja haben, woo kjenn jie dee halpen, sikj äwa daut secha to sennen, waut dee jleewen? Sajcht dee, daut see sikj nich schämen brucken, wiels see aun eenen Schepfa jleewen. Wuarom nich? Wiels doa soogoa een deel Forscha sent, waut daut vestonen kjennen, daut daut Läwen nich von veselfst kjeem. Dee kjennen dän Bewies seenen, daut doa een kluaka Schepfa es, dee aul daut Butajeweenelje jemoakt haft, waut läft. Doawäajen jleewen dee nich aun de Lia von de Ewoluzion. Waut kaun june Kjinja halpen, sikj noch sechra to sennen, waut see jleewen? Dee kjennen doaräwa nodenkjen, waut aundre Breeda un Sestren bat doa jebrocht haft, daut to jleewen, daut daut Läwen jemoakt wort. w24.12 18 V. 14-15

Jesus wia sikj secha, daut de Menschen noch wudden no de goode Norecht horchen. Daut holp am, iewrich em Deenst to bliewen. Biejlikj een Joa nodäm aus hee aunjefongen haud to prädjen, sach hee een deel, waut doa reed wieren, no de goode Norecht to horchen. Hee säd, dee wieren soo aus een Flekj, waut riep un reed wia toom arnten (Joh. 4:35). Dan rom een Joa lota säd hee to siene Jinja: “De Arnt es groot” (Mat. 9:​37-38). Un noch lota säd hee: “De Arnt es groot, … prachat dän Harn von de Arnt, daut hee Oabeida schekjen saul toom de Arnt enbrinjen” (Luk. 10:2). Jesus jeef kjeenmol Hopninj opp, daut de Menschen eenen Dach wudden no de goode Norecht horchen, un hee freid sikj, aus daut ieescht bat doa wia. Jesus holp siene Jinja, flietich em Deenst to bliewen, doaderch daut hee dee lieed, daut daut Prädichtwoakj noch väl Goodet brinjen wudd. w25.03 18-19 V. 15-16

Jehowa beschizt ons. Krakjt soo aus een groota Steen eenen Mensch beschitzen kaun fa eenen grooten Storm, krakjt soo beschizt Jehowa ons en schwoare Loagen. Hee beschizt ons un vesechat ons, daut wan wie en dise schlajchte Welt uk lieden motten, woat daut oba nich fa emma sennen. Un dan vesprakjt hee ons noch mea: Hee woat lota met aules een Enj moaken, waut ons dän Fräd un de Sechaheit wajchnemt (Hes. 34:​25-26). Wie kjennen Jehowa sienen Schutz kjrieen, wan wie to am bäden. Dan jeft hee ons “sienen Fräd”, waut onse Jedanken un ons Hoat beschizt (Filip. 4:​6-7). Jehowa woat emma doa sennen toom ons halpen. Wie kjennen ons opp am veloten, wiels hee “es een Fels … [ooda Groota Steen von] Eewichkjeit” (Jes. 26:​3-4). Hee woat emma läwen un siene Vespräakjungen hoolen, no onse Jebäda horchen un ons de Help jäwen, waut ons fält. Wie kjennen uk opp Jehowa vetruen, wiels hee es dee tru, waut am deenen (2. Sam. 22:26). Hee woat kjeenmol vejäten, waut wie fa am doonen, un woat ons emma säajnen (Heb. 6:10; 11:6). w24.06 27 V. 4-6

Wie motten oppaussen, waut wie ons en onse friee Tiet aunkjikjen ooda doonen un uk waut vonne Frind wie haben, daut wie nich met eemol aunfangen to denkjen, daut rikj woaren daut Wichtichste em Läwen es. Wan wie enwoaren, daut doa waut es, waut onse Leew fa Jehowa schoden kunn, dan sell wie doa fuaz waut met doonen (Mat. 5:​29-30). Wie motten daut nich tooloten, daut wie ons en ons Hoat opp twee Sieden stalen. Wie kunnen aunfangen to denkjen, daut daut Schlajchte ons nich soo sea schoden woat, wan wie ons drock hoolen em Deenst fa Jehowa. Mol een Biespel: Stal die mol väa, du best buten aun eenen kolden, windjen Dach. Dan kjemst du nenn un moakst de Hettinj aun. Wudd die daut waut halpen, wan du de Däa oba groot opleetst? De kolda Wint wudd fuaz en daut gaunze Hus sennen. Waut well wie doamet sajen? Wie motten nich bloos Sachen doonen, waut ons Jehowa noda brinjen, oba wie motten uk fa aules de Däa toomoaken, waut onse Leew fa am schoden kunn un ons Hoat bat doa brinjen kunn, opp twee Sieden to stonen (Efs. 2:2). w24.07 21 V. 6-7

Wie kjennen daut nich gaunz bejriepen, woo grausom Jesus behaundelt wort un woo ommenschlich hee lieden must. Oba hee leet sikj nich von de Ojjerajchtichkjeit dolkjrieen. Enne Städ de Soldoten uttoflieekjen, waut am aum Pol jenoagelt hauden, bäd hee: “Voda, vejeff dee, wiels dee weeten nich, waut dee doonen” (Luk. 23:34). Fa dee to bäden, waut ons schlajcht behaundlen, halpt ons, ruich to bliewen un nich soo doll to woaren un soogoa daut to endren, woo wie äwa dee denkjen. Wie kjennen daut nich weeten, waut wie aules fa Ojjerajchtichkjeiten beläwen woaren, ea daut Enj von dise Welt komen woat. Oba endoont woo daut es, well wie niemols opphieren, bie Jehowa no Help to sieekjen. Well wie ons eenich sennen, dän Rot ut de Schreft wieda notokomen un Jesus doarenn notodoonen, woo hee met Ojjerajchtichkjeit omjinkj. Wan wie daut doonen, woa wie fa secha von Jehowa jesäajent woaren (1. Pet. 3:​8-9). w24.11 7 V. 16-17, 19

Jehowa es nich een endoontja Gott; hee haust de Sind (Psa. 5:​5-7). Jehowa haft en sien Wuat loten Jesazen oppschriewen, un hee velangt, daut wie ons doaraun hoolen. Oba hee weet, daut wie onvolkomen sent un ons doa nich hundat Prozent aun hoolen kjennen (Psa. 130:​3-4). Hee jleicht daut oba uk nich, wan “gottloose Mana … Gott sien grootet Metleet aus Uträd brucken, om een sinteljet, schomplooset Benämen to haben” (Jud. 4). De Schreft sajcht mau rajcht, daut de Gottloose woaren venicht woaren en Harmagedon – aulsoo en Gott sienen Kjrich (2. Pet. 3:7; Opb. 16:16). Jehowa well oba nich, daut doa wäa venicht woat. De Bibel sajcht gaunz kloa, daut hee well, daut aule bat doa komen, een Leetsennen to kjrieen (2. Pet. 3:9). De Eltestasch rechten sikj no Jehowa un proowen, eenen Sinda jeduldich to halpen, sikj to endren un trigj no Jehowa to komen. w24.08 26 V. 1-2

Wie kjennen Jehowa nodoonen, wan wie aundre daut jäwen, waut äant fält, wäajen wie äant leewen. Weetst du biejlikj von eenen Brooda ooda eene Sesta, waut daut aun Äten ooda Kjleeda fält? Jehowa kaun die brucken toom dänjanjen daut jäwen, waut am fält. Jehowa siene Deena sent besonda doafäa bekaunt, daut dee aundre en schwoare Tieden uthalpen. En de Tiet von de COVID-19 Krankheit wieren de Breeda un Sestren biejlikj reed, von äa Äten, äare Kjleeda un aundre wichtje Sachen soone to jäwen, dee daut doaraun fäld. Väle jeewen uk Gowen fa daut weltwiede Woakj. Dee neemen sikj de Wieed en Hebräa 13:16 to Hoaten, wua daut sajcht: “Vejät uk nich, Goodet to doonen un daut met aundre to deelen, waut jie haben, wiels soone Opfa jefaulen Gott sea.” Doaderch kunnen een deel Breeda oppe gaunze Welt, wua waut Schlemmet passieet wia, de Help kjrieen, waut äant fäld. w24.09 27 V. 6-7

Stal die dise Loag väa. Du sieekjst no eene Oabeit, om fa diene Famielje to sorjen. Dee haben die opp twee Städen Oabeit aunjeboden. Du denkjst äwa de Eenselheiten no, waut doa met en sent, biejlikj waut vonne Oabeiten daut sent, waut vonne Tiet daut es, woo wiet du foaren motst un soo wieda. No de Schreft no kaust du irjenteene von dee aunnämen. Veleicht jankat die dolla eene von dee, wäajen daut eene Oabeit es, waut du jleichst, ooda wäajen du mea vedeenen woascht. Oba doa sent noch aundre Sachen, wua du äwa nodenkjen saust, ea du eene Entscheidunk moakst. Woascht du biejlikj eenje Toopkomes motten utloten, wan du eene von dise Oabeiten aunnemst? Ooda woat eent von dee die de Tiet wajchnämen, waut die fält, om fa de Famielje em Jeisteljen un uk aundasch to sorjen? Äwa soont notodenkjen, woat die halpen, “daut gaunz Wichtichste” – aulsoo dienen Deenst fa Jehowa un daut, waut diene Famielje fält – ver daut Tietelje to saten. Dan woascht du eene Entscheidunk moaken, waut Jehowa säajnen woat. w25.01 17 V. 11-13

Mau rajcht wan aundre die schlajcht behaundelt haben, kaust du die doawäajen secha sennen, daut du fa Jehowa väl wieet best un daut hee die leeft. Wan du die bedrekjt feelst, dan denkj doaraun, daut Jehowa waut Goodet en dien Hoat sach un daut hee selfst die no sikj trock (Joh. 6:44). Hee es emma reed, die to halpen, wäajen du sea wieetvoll best fa am. Wie kjennen väl äwa Jehowa siene Leew lieren, wan wie ons Jesus sien Biespel unjastonen. Aus Jesus oppe Ieed wia, wees hee deejanje Metjefeel, waut schlajcht behaundelt worden un sikj doawäajen wieetloos feelden (Mat. 9:​9-12). Waut deed hee biejlikj, aus eene Fru sienen Äwarock aunschieed, waut doa wull von eene schlemme Krankheit jesunt woaren? Hee treest ar un lowd ar fa äaren Gloowen (Mar. 5:​25-34). Jesus deit sienen Voda krakjt no (Joh. 14:9). Doawäajen kaust du die secha sennen, daut Jehowa die väl räakjent un daut hee diene goode Sieden sitt – biejlikj daut du Gloowen hast un am leefst. w24.10 7 V. 4-5

David jinkj en sien Läwen derch väl schwoare Loagen, waut am batem Roaren brochten. Väl Menschen kunnen am nich lieden. Mau rajcht soone, opp dee hee vetrud, deeden am enteischen (1. Sam. 19:​10-11; 2. Sam. 15:​10-14, 30). Opp eene Sauz schreef hee: “Ekj sie von mien stänen meed un utjespält. Ekj hiel aule Nacht soo väl, daut miene Baden naut woaren; mien Kjessen es met Tronen” derchjesuppt (Psa. 6:7). Wan David uk väl Schwoaret beläwd, wia hee sikj oba secha, daut Jehowa am leewd. Hee schreef: “De HAR haft … [mie] hieet hielen” (Psa. 6:9). De Wieed en dän Varsch fa vondoag wiesen ons kloa, daut Jehowa om ons todoonen es. David säd, daut et soo wia, aus wan Jehowa siene Tronen en een Kruckje saumeld ooda en een Buak oppschreef. David wia sikj secha, daut Jehowa sien Lieden sach un daut em Denkj hilt. David wia sikj uk secha, daut sien leeftolja, himlischa Voda daut nich bloos sach, waut hee derchjinkj, oba uk wist, woo am daut toosad. w24.12 22 V. 11-12