Nos tin bon motibu pa mira morto komo nos enemigu i tuma medida realístiko pa protehá nos bida. (1 Korintionan 15:26) Ma un miedu eksagerá di morto basá riba kreensia falsu òf superstishon ta pone hende biba “den sklabitut henter nan bida.” (Hebreonan 2:15) Ora bo haña sa e bèrdat, lo e libra bo di un miedu eksagerá di morto, pasobra e miedu ei por kita bo goso di bida.—Huan 8:32.

E bèrdat tokante morto

•   E mortonan no sa nada. (Salmo 146:4) Bo no tin nodi di tin miedu ku lo bo pasa doló òf sufri despues ku bo muri, pasobra Beibel ta kompará morto ku soño.—Salmo 13:3; Huan 11:11-14.

•   E mortonan no por hasi nos daño. Asta hende ku un tempu tabata violento ta “impotente den morto.” (Proverbionan 21:16) Beibel ta bisa ku “nan odio i nan zelo a peresé kaba.”—Eklesiástes 9:6, Beibel Santu.

•   Morto no nesesariamente ta e fin definitivo di nos eksistensia. Pa medio di un resurekshon, Dios lo trese hende ku a muri bèk na bida.—Huan 5:28, 29; Echonan 24:15.

•   Dios ta primintí ku lo yega e dia ku “lo no tin morto mas.” (Revelashon 21:4) Relashoná ku e dia ei, Beibel ta bisa: “E hustunan lo heredá e tera, i lo biba den dje pa semper.” (Salmo 37:29, Beibel Santu) E ora ei nan lo ta kompletamente liber di miedu di morto.