Bo Manera di Siña Ta Efikas?

TANTU mayornan komo ansianonan i predikadónan dje bon nobo mester ta maestro. Mayornan ta siña nan yunan, ansianonan ta siña e miembronan dje kongregashon kristian i e predikadónan dje bon nobo ta siña hende resien interesá. (Deuteronomio 6:6, 7; Mateo 28:19, 20; 1 Timoteo 4:13, 16) Kiko bo por hasi pa bo manera di siña bira mas efikas? Imitá e ehèmpel i método di maestronan kapas ku e Palabra di Dios ta menshoná. Un di e maestronan ei tabata Èsdras.

Siña for di e Ehèmpel di Èsdras

Èsdras tabata un saserdote ku a bini for dje famia di Aron i ku a biba rònt di 2.500 aña pasá na Babilonia. Na aña 468 promé ku Era Komun el a bai Yerúsalèm pa promové adorashon puru entre e hudiunan ku tabata biba einan. (Èsdras 7:1, 6, 12, 13) P’e kumpli ku e tarea aki, e mester a siña e pueblo Dios su Lei. Kiko Èsdras a hasi p’e garantisá ku su manera di siña tabata efikas? El a dal vários paso esensial. Tuma nota di e pasonan aki na Èsdras 7:10:

“Èsdras a [1] dediká * su kurason [2] pa studia e lei di SEÑOR i [3] pa pon’é na práktika, i [4] pa siña e hendenan di Israel su statutonan i ordenansanan.” (Èsdras 7:10) Laga nos tira un bista breve riba kada un di e pasonan aki i mira kiko nos por siña di nan.

“Èsdras A Dediká Su Kurason”

Meskos ku un kunukero ta prepará su tera dor di plug e promé ku e planta simia, Èsdras a resa pidi Dios yud’é prepará su kurason p’e risibí Su palabra. (Èsdras 10:1) Ku otro palabra, el ‘a inkliná su kurason’ na siñansa di Yehova.—Proverbionan 2:2.

Di mesun manera, Beibel ta deklará ku Rei Yehósafat “a dediká [su] kurason pa buska Dios.” (2 Krónikanan 19:3) Pero kontrali na nan, Beibel ta deskribí un generashon di Israel “ku no a prepará su kurason” komo un generashon “kabesura i rebelde.” (Salmo 78:8) Yehova ta mira “e persona skondí di e kurason.” (1 Pedro 3:4) Sí, “e  ta siña e humildenan su kaminda.” (Salmo 25:9) P’esei anto, ta masha importante pa tur maestro djawe sigui e ehèmpel di Èsdras dor di, na promé lugá, resa pidi Dios yuda nan pone nan kurason den e kondishon apropiado!

“Pa Studia e Lei di SEÑOR”

Pa Èsdras por a bira un maestro kapas, el a studia e Palabra di Dios. Si bo ta bai dòkter pa haña konseho, bo no ta skuch’é ku atenshon i hasi sigur ku bo ta komprendé tur loke e ta bisa i preskribí? Sin duda lo bo hasié pasobra bo bida ta den wega. Pues anto, nos mester pone muchu mas atenshon na loke Yehova ta bisa nos òf preskribí mediante su Palabra, Beibel, i “e esklabu fiel i prudente.” Nos mester presta atenshon, pasobra su konseho tin di haber ku nos bida mes! (Mateo 4:4; 24:45-47) Klaro ku un dòkter por faya, pero “e lei di SEÑOR ta perfekto.” (Salmo 19:7) Nos no tin nodi buska un segundo opinion mes.

E bukinan di Beibel, Krónikanan, (ku Èsdras a skirbi originalmente den un solo volúmen) ta mustra ku Èsdras en bèrdat tabata un studiante diligente. Pa e por a skirbi e bukinan aki el a konsultá vários fuente. * E hudiunan ku a kaba di yega for di Babilonia tabatin mester di un resúmen di e historia di nan nashon. Nan no tabatin sufisiente konosementu di seremonianan di nan religion, ni dje sirbishi di tèmpel ni dje tareanan ku levitanan mester a kumpli kuné. E listanan di genealogia tabata masha importante pa nan. Èsdras a presta atenshon spesial na e asuntunan aki. Te ku e binida di e Mesias, e hudiunan mester a keda komo un nashon ku su propio tera, un tèmpel, un saserdosio i un gobernadó. Danki n’e informashon ku Èsdras a kompilá, adorashon berdadero i unidat por a ser konserbá.

Kon ta bai ku bo kustumbernan di studia si bo kompará nan ku esnan di Èsdras? Si bo ta studia Beibel diligentemente, lo bo por bira mes efikas den bo manera di siña otronan loke Beibel ta bisa.

“Studia e Lei di SEÑOR” Komo Famia

No ta solamente komo persona individual nos mester e lei di Yehova. Ta bon pa studia Beibel tambe den seno di famia.

Jan ku Julia, un pareha di Hulanda, a lesa Beibel na bos haltu pa nan yunan for di dia ku e muchanan a nase. Aktualmente Ivo tin 15 aña di edat i Edo tin 14. Ainda nan tin nan studio di famia un bes pa siman. Jan ta splika: “Durante studio nos meta prinsipal no ta pa kubri hopi material, sino pa e muchanan komprendé loke nos ta studia.” E ta agregá: “E muchanan ta hasi hopi investigashon. Nan ta buska palabranan deskonosí. Tambe nan ta wak na ki tempu personahenan di Beibel a biba, ken nan tabata, ki trabou nan a hasi, etcetera. Asina ku nan por a lesa, nan a kuminsá konsultá bukinan manera Perspikasia pa Komprendé e Skritura, dikshonario i ensiklopedia. Esaki ta hasi e studio di famia mas dushi. Semper e muchanan ta spera e studio di famia ansiosamente.” Un benefisio adishonal di esaki ta ku awor e muchanan ta mas mihó den idioma ku nan koleganan di klas.

John ku Tini, un otro pareha na Hulanda, a studia ku nan yu hòmber, Esli (kende awor tin 24 aña i ta sirbi komo pionero den un otro kongregashon), i nan yu muhé, Linda (kende awor tin 20 aña di edat i ta kasá ku un ekselente ruman hòmber). En bes studia un sierto publikashon via e método usual di pregunta-i-kontesta, nan tabata adaptá e studio di famia n’e edat i nesesidatnan di e yunan. Ki método nan a usa?

John ta splika ku su yunan tabata skohe un tema interesante for di e serinan “Pregunta di Lektor” (den E Toren di Vigilansia) i “E Punto di Bista Bíbliko” (den Spièrta!). Despues nan tabata presentá loke nan a prepará, i semper esaki tabata hiba na kòmbersashonnan interesante komo famia. Di e manera aki e hóbennan a haña eksperensia den hasi investigashon i den papia tokante e resultadonan di loke nan a studia. Abo ta “studia e lei” di Yehova ku bo yunan? Esaki no solamente lo mehorá bo abilidatnan di  siña otro hende, sino tambe lo yuda bo yunan bira maestronan mas efikas.

“Pa Pon’é na Práktika”

Èsdras a apliká loke el a siña. Por ehèmpel, tempu ku e tabata na Babilonia ainda, e por a hiba un bida trankil. Apesar di esei, ora el a realisá ku e por a yuda su pueblo den estranheria, el a bandoná e komodidatnan di Babilonia i muda bai e stat leu di Yerúsalèm ku tur su inkumbinensia, problema- i peligernan. Ta klaro anto ku Èsdras no solamente a gana konosementu di Beibel, pero e tabata kla pa aktua na armonia ku loke el a siña.—1 Timoteo 3:13.

Despues, ora Èsdras tabata na Yerúsalèm, el a mustra un bes mas ku e ta apliká loke el a siña i prediká. Esaki tabata bisto ora el a tende ku e hòmbernan israelita a kasa ku muhé pagano. E relato di Beibel ta konta nos ku el ‘a sker su paña i su mantel, i a ranka poko kabei for di su kabes i su barba, i a kai sinta tur babuká.’ E tabatin asta ‘bèrgwensa di hisa su kara na’ Yehova.—Èsdras 9:1-6.

Su studio di e Lei di Dios tabatin hopi efekto riba dje! Èsdras tabatin un bista kla di kiko lo tabata e konsekuensianan si e pueblo desobedesé. E kantidat di hudiunan ku a bai nan patria bèk tabata poko. Si nan a drenta matrimonio ku e paganonan rònt di nan, ku tempu nan lo a meskla ku esakinan, i lo tabata fásil pa adorashon berdadero disparsé for di riba tera!

Felismente, Èsdras su ehèmpel di temor i selo pa Dios a motivá e israelitanan pa drecha nan bida. Nan a manda nan esposanan stranhero bai. Denter di tres luna tur kos tabata na òrdu. Èsdras su lealtat personal na Dios su Lei a kontribuí hopi na su manera efikas di siña.

Meskos ta sierto awe. Un tata kristian a bisa: “Bo yunan no ta hasi loke bo ta bisa; nan ta hasi loke bo ta hasi!” E mesun prinsipio ta aplikabel den e kongregashon kristian. Ansianonan ku ta pone un bon ehèmpel por ferwagt ku e kongregashon ta reakshoná riba loke nan ta siña nan.

“Pa Siña e Hendenan di Israel Su Statutonan i Ordenansanan”

Tin un otro motibu pakiko Èsdras su manera di siña tabata efikas. E no a siña hende su propio ideanan pero el a siña nan e “statutonan i ordenansanan.” Eseinan tabata e statutonan òf leinan di Yehova. Komo saserdote, esaki tabata su responsabilidat. (Malakías 2:7) Tambe el a siña hende hustisia, i a duna un ehèmpel di loke el a siña dor di kumpli ku e leinan di un manera hustu i imparsial, di akuerdo ku e normanan di hustisia. Ora esnan ku tin outoridat manifestá hustisia, esei lo hiba na stabilidat i resultadonan permanente. (Proverbionan 29:4) Asina tambe, ansianonan kristian, mayornan i predikadónan di Reino ku konosé e Palabra di Dios bon, lo edifiká stabilidat spiritual ora nan siña Yehova su statuto i hustisia n’e kongregashon, na nan famia i otro hende interesá.

Bo no ta di akuerdo ku bo manera di siña por bira mas efikas si bo imitá e ehèmpel di fiel Èsdras plenamente? Si ta asina, ‘dediká bo kurason, studia e lei di Yehova i pon’é na práktika, i siña hende Yehova su statutonan i ordenansanan.’—Èsdras 7:10.

[Nota]

[Kuadro/Plachi na página 22]

KIKO A HASI ÈSDRAS SU MANERA DI SIÑA EFIKAS?

1. El a pone su kurason den un kondishon apropiado

2. El a studia e Lei di Yehova

3. El a pone un bon ehèmpel den apliká loke el siña

4. El a dediká su mes na siña hende e punto di bista di Beibel