Donnan Spesial Ku Ta Hasi Nos Úniko

‘E sientífiko ta studia naturalesa pasobra e ta disfrutá di dje, i e ta disfrutá di dje pasobra e ta bunita.’—JULES-HENRI POINCARÉ, SIENTÍFIKO I MATEMÁTIKO FRANSES (1854-1912).

POINCARÉ a atmirá e beyesa di naturalesa masha hopi mes, partikularmente e “beyesa mas profundo” di órden i armonia ku ta atraé e mente di un sientífiko. Sin embargo, bo no mester ta un sientífiko pa bo apresiá e beyesa i órden ku tin rònt di nos. Un 3.000 aña pasá, e salmista David a ser konmoví profundamente pa e diseño ku el a mira den kreashon,  foral e diseño di e kurpa humano. P’esei el a resa: “Mi ta alabá bo, pasobra mi ta trahá na un manera temerosamente maravioso; maravioso ta bo obranan, i mi alma sa esei masha bon.”—Salmo 139:14.

E sintimentunan ei di asombro i rèspèt profundo ta algu úniko ku hende so ta sinti, nan ta fuera di e kapasidat di e bestia di mas inteligente. Sin embargo, nos interes den naturalesa ta bai mas profundo ainda. Hende di tur edat ku sa para ketu na kosnan di bida, a yega di puntra: Kiko ta e fuente di e diseño asombroso ku tin den tur loke ta biba? Sí, kon bini ta eksistí sernan bibu? I kiko ta nos debido lugá den e areglo aki? Ni siensia ni nos propio rasonamentu al respekto no por kontestá e preguntanan aki. Pero Beibel, ku ta inspirá dor di Dios, sí ta duna kontestanan realmente satisfasiente.—2 Pedro 1:20, 21.

E antiguo buki sagrado aki ta splika ku nos karakterístikanan úniko komo hende ta dor ku nos a ser kreá “segun e imágen di Dios.” Esei kier men ku nos tin e kapasidat di reflehá (ounke na un grado menor) e karakterístikanan di personalidat di nos Kreadó. (Génesis 1:27) P’esei ounke nos no tin wowo di águila, nos por desplegá sabiduria penetrante. Nos oido no por para banda di esun di un raton djanochi, pero nos por disfrutá di kòmbersashon, muzik i zonidunan agradabel di naturalesa. I ounke nos no tin un kompas interno, nos por haña e mihó guia den bida dor di akudí na Beibel Santu, e Palabra di Dios.—Proverbionan 3:5, 6.

E echo ku nos a ser kreá segun e imágen di Dios ta e motibu tambe dikon ta nos so tin un nesesidat spiritual. “Hende lo no biba di pan so, ma di tur palabra ku ta sali for di boka di Dios.” (Mateo 4:4) Abo ta ingerí e ekspreshonnan refreskante ei ku regularidat dor di lesa Beibel?

Si nos ta alimentá nos mes spiritualmente ku e Palabra di Dios, nos lo por komprondé kosnan muchu mas ayá di loke nos sentidonan físiko ta permití nos. Kon asina? Dor di edifiká nos fe. Fe berdadero, basá riba Beibel, ta hasi posibel ku nos por “mira” e Dios invisibel—meskos ku Moises a mir’é—i tambe distinguí kiko ta Su propósito pa futuro.—Hebreonan 11:1, 27.

Un Futuro Glorioso pa Esnan Ku Ta “Mira” Dios

Beibel ta siña nos ku e Kreadó, Yehova Dios, ta stima e tera i tur kriatura ku ta biba riba dje, foral hende ku ta teme Dios. P’esei e ta primintí di trese un fin na tur e malbadonan, inkluso esnan ku na un manera haragan ta “destruí e tera.” (Revelashon 11:18; Salmo 37:10, 11; 2 Tesalonisensenan 1:8) Despues di esei, Dios lo duna bida eterno na hende ku ta stim’é i obedes’é. Ademas, nan lo yuda kombertí henter e planeta den un paradeis ku lo ta patapata di bida. Ki un prospekto maravioso!—Lukas 23:43.

Imaginá tur loke lo bo por hasi i deskubrí ora ku lo no tin fin na bida ni na bon salú! Un sientífiko a skirbi: “Semper naturalesa lo tin kos nobo, kos na abundansia i beyesa ku ta inagotabel.” Beibel ta ekspres’é asin’aki: “[Dios] a traha tur kos apropiá na su tempu. Tambe el a pone eternidat den nan kurason, sin ku hende por haña sa e trabou ku Dios a hasi for di prinsipio te na fin.”—Eklesiástes 3:11.

Kon bo por forma parti di e Paradeis ku Beibel ta deskribí? Dor di siña tokante Dios su propósito awor i práktika loke bo ta siña. Hesus a bisa: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.”—Huan 17:3.

[Plachi na página 10]

Usa bo sentidonan pa kultivá apresio pa e Kreadó

[Plachi na página 11]

E mihó manera pa siña konosé bo Kreadó ta dor di lesa Beibel