Rond mundo, hopi hende cu ta bisa cu nan ta siguidor di Cristo ta hopi envolvi den politica. Algun hende kier promove nan mes balornan moral y creencianan religioso, y pesey nan ta sostene cierto candidato di partido of cierto partido politico. Anto e politiconan, hopi biaha ta uza un asunto moral of social cu hopi hende ta papia di dje pa haya sosten di hende religioso. Ademas, a bira normal pa mira lider religioso riba lista di partido politico. Y den algun pais, un religion cu ta yama su mes cristian ta e religion oficial di e pais of estado.

 Kico bo ta pensa? Un siguidor di Cristo mester mete cu asunto politico? E ehempel di Hesus ta duna e contesta. Hesus a bisa: “Mi a duna boso un ehempel, pa boso tambe haci manera mi a haci cu boso.” (Juan 13:15) Ki ehempel Hesus a pone ora a trata di asunto politico?

 No. Hesus no tabata envolvi den asunto politico di e mundo aki.

 Hesus no a drenta politica pa e por a haya poder. Ora Diabel, esta, Satanas, a ofrece Hesus pa e bira gobernante di “tur e reinonan di mundo”, Hesus a rechasa e oferta ey. (Mateo 4:8-10) a Mas despues, ora e hendenan a ripara cu Hesus lo por a bira un bon lider, nan a purba di fors’e pa drenta politica. Bijbel ta bisa: “Como cu Hesus tabata sa cu nan tabata cerca di bin gar’e pa hacie rey, el a kita for di eynan y bolbe bay su so den sero.” (Juan 6:15) Hesus no a haci loke e hendenan tabata kier; el a nenga di drenta politica.

 Hesus no a scoge banda ora tabata trata di asunto politico. Por ehempel, e Hudiunan den tempo di Hesus no tabata kier paga e gobierno Romano belasting. E Hudiunan tabata haya cu e belasting cu e gobierno tabata cobra tabata inhusto. Nan tabata kier pa Hesus duna su opinion tocante e asunto, pero Hesus no a cuminsa cu un debate pa wak si e belasting ey tabata husto of no. Hesus a djis bisa nan: “Duna Cesar loke ta di Cesar, ma Dios loke ta di Dios.” (Marco 12:13-17) Hesus a keda neutral, pero el a bisa nan si cu nan mester a paga e belasting cu Cesar, esta, e gobierno Romano, a exigi nan paga. Hesus a mustra bon cla tambe cu obediencia na gobierno tin su limite. Un hende no mester a duna gobierno algo cu ta pertenece na Dios. Por ehempel, nos ta leal na Dios y nos ta adora e so, no gobierno.—Mateo 4:10; 22:37, 38.

 Hesus tabata apoya un gobierno den cielo, esta, e Reino di Dios. (Lucas 4:43) Hesus no tabatin nada di haber cu politica pasobra e tabata sa cu e gobiernonan humano no por cumpli cu e proposito cu Dios tin pa Tera; ta e Reino di Dios so por cumpli cu Dios su proposito. (Mateo 6:10) Hesus tabata sa cu Dios lo no uza gobierno humano; e tabata sa cu e Reino di Dios lo reemplasa tur gobierno.—Daniel 2:44.

 No. Hesus a bisa su siguidornan cu nan no mester tabata parti di mundo, y nan a obedece e mandamento ey. (Juan 15:19) Nan a sigui Hesus su ehempel, y nan no a mete den asunto politico. (Juan 17:16; 18:36) En bes di mete den e asuntonan ey, nan a haci e trabou cu Hesus a manda nan haci: Nan a predica tocante e Reino di Dios y siña hende tocante e Reino ey.—Mateo 28:18-20; Echonan 10:42.

 Pa e cristiannan di prome siglo, obediencia na Dios tabata e cos di mas importante. Pero nan tabata sa tambe cu nan mester a obedece e autoridadnan di gobierno. (Echonan 5:29; 1 Pedro 2:13, 17) Nan a obedece ley, y nan a paga belasting. (Romanonan 13:1, 7) Aunke nan no a mete den asunto politico, nan a beneficia di cierto proteccion cu ley a ofrece y otro servicio cu gobierno tabata duna.—Echonan 25:10, 11; Filipensenan 1:7.

 Bijbel ta mustra bon cla cu ni Hesus ni su prome siguidornan no tabata mete cu politica. Pa e motibo ey, testigonan di Jehova, kendenan tambe ta cristian, ta keda completamente neutral. Mescos cu tabata e caso cu e cristiannan di e prome siglo, testigonan di Jehova tambe ta haci e trabou cu Hesus a manda cristian haci, esta, predica bon noticia di e Reino.—Mateo 24:14.